Study
- Anukramaṇī
- Source
8 somāhutirbhārgavaḥ| agniḥ| anuṣṭup|
hotā̍janiṣṭa̱ ceta̍naḥ pi̱tā pi̱tṛbhya̍ ū̱taye̍ |
pra̱yakṣa̱ñjenya̱ṃ vasu̍ śa̱kema̍ vā̱jino̱ yama̍m
||1||होता॑जनिष्ट॒ चेत॑नः पि॒ता पि॒तृभ्य॑ ऊ॒तये॑ ।
प्र॒यक्ष॒ञ्जेन्यं॒ वसु॑ श॒केम॑ वा॒जिनो॒ यम॑म्
ā yasmi̍n tsa̱pta ra̱śmaya̍sta̱tā ya̱jñasya̍ ne̱tari̍ |
ma̱nu̱ṣvad daivya̍maṣṭa̱maṃ potā̱ viśva̱ṃ tadi̍nvati
||2||आ यस्मि॑न् त्स॒प्त र॒श्मय॑स्त॒ता य॒ज्ञस्य॑ ने॒तरि॑ ।
म॒नु॒ष्वद् दैव्य॑मष्ट॒मं पोता॒ विश्वं॒ तदि॑न्वति
da̱dha̱nve vā̱ yadī̱manu̱ voca̱d brahmā̍ṇi̱ veru̱ tat |
pari̱ viśvā̍ni̱ kāvyā̍ ne̱miśca̱krami̍vābhavat
||3||द॒ध॒न्वे वा॒ यदी॒मनु॒ वोच॒द् ब्रह्मा॑णि॒ वेरु॒ तत् ।
परि॒ विश्वा॑नि॒ काव्या॑ ने॒मिश्च॒क्रमि॑वाभवत्
sā̱kaṃ hi śuci̍nā̱ śuci̍: praśā̱stā kratu̱nāja̍ni |
vi̱dvām̐ a̍sya vra̱tā dhru̱vā va̱yā i̱vānu̍ rohate
||4||सा॒कं हि शुचि॑ना॒ शुचि॑: प्रशा॒स्ता क्रतु॒नाज॑नि ।
वि॒द्वाँ अ॑स्य व्र॒ता ध्रु॒वा व॒या इ॒वानु॑ रोहते
tā a̍sya̱ varṇa̍mā̱yuvo̱ neṣṭu̍: sacanta dhe̱nava̍: |
ku̱vit ti̱sṛbhya̱ ā vara̱ṃ svasā̍ro̱ yā i̱daṃ ya̱yuḥ
||5||ता अ॑स्य॒ वर्ण॑मा॒युवो॒ नेष्टु॑: सचन्त धे॒नव॑: ।
कु॒वित् ति॒सृभ्य॒ आ वरं॒ स्वसा॑रो॒ या इ॒दं य॒युः
yadī̍ mā̱turupa̱ svasā̍ ghṛ̱taṃ bhara̱ntyasthi̍ta |
tāsā̍madhva̱ryurāga̍tau̱ yavo̍ vṛ̱ṣṭīva̍ modate
||6||यदी॑ मा॒तुरुप॒ स्वसा॑ घृ॒तं भर॒न्त्यस्थि॑त ।
तासा॑मध्व॒र्युराग॑तौ॒ यवो॑ वृ॒ष्टीव॑ मोदते
svaḥ svāya̱ dhāya̍se kṛṇu̱tāmṛ̱tvigṛ̱tvija̍m |
stoma̍ṃ ya̱jñaṃ cādara̍ṃ va̱nemā̍ rari̱mā va̱yam
||7||स्वः स्वाय॒ धाय॑से कृणु॒तामृ॒त्विगृ॒त्विज॑म् ।
स्तोमं॑ य॒ज्ञं चादरं॑ व॒नेमा॑ ररि॒मा व॒यम्
yathā̍ vi̱dvām̐ ara̱ṃ kara̱d viśve̍bhyo yaja̱tebhya̍: |
a̱yama̍gne̱ tve api̱ yaṃ ya̱jñaṃ ca̍kṛ̱mā va̱yam
||8||यथा॑ वि॒द्वाँ अरं॒ कर॒द् विश्वे॑भ्यो यज॒तेभ्य॑: ।
अ॒यम॑ग्ने॒ त्वे अपि॒ यं य॒ज्ञं च॑कृ॒मा व॒यम्