Study
- Anukramaṇī
- Source
6 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| somāpūṣaṇau, 6(antyārdharcasya) aditiḥ| triṣṭup|
somā̍pūṣaṇā̱ jana̍nā rayī̱ṇāṃ jana̍nā di̱vo jana̍nā pṛthi̱vyāḥ |
jā̱tau viśva̍sya̱ bhuva̍nasya go̱pau de̱vā a̍kṛṇvanna̱mṛta̍sya̱ nābhi̍m
||1||सोमा॑पूषणा॒ जन॑ना रयी॒णां जन॑ना दि॒वो जन॑ना पृथि॒व्याः ।
जा॒तौ विश्व॑स्य॒ भुव॑नस्य गो॒पौ दे॒वा अ॑कृण्वन्न॒मृत॑स्य॒ नाभि॑म्
i̱mau de̱vau jāya̍mānau juṣante̱mau tamā̍ṃsi gūhatā̱maju̍ṣṭā |
ā̱bhyāmindra̍: pa̱kvamā̱māsva̱ntaḥ so̍māpū̱ṣabhyā̍ṃ janadu̱sriyā̍su
||2||इ॒मौ दे॒वौ जाय॑मानौ जुषन्ते॒मौ तमां॑सि गूहता॒मजु॑ष्टा ।
आ॒भ्यामिन्द्र॑: प॒क्वमा॒मास्व॒न्तः सो॑मापू॒षभ्यां॑ जनदु॒स्रिया॑सु
somā̍pūṣaṇā̱ raja̍so vi̱māna̍ṃ sa̱ptaca̍kra̱ṃ ratha̱mavi̍śvaminvam |
vi̱ṣū̱vṛta̱ṃ mana̍sā yu̱jyamā̍na̱ṃ taṃ ji̍nvatho vṛṣaṇā̱ pañca̍raśmim
||3||सोमा॑पूषणा॒ रज॑सो वि॒मानं॑ स॒प्तच॑क्रं॒ रथ॒मवि॑श्वमिन्वम् ।
वि॒षू॒वृतं॒ मन॑सा यु॒ज्यमा॑नं॒ तं जि॑न्वथो वृषणा॒ पञ्च॑रश्मिम्
di̱vya1nyaḥ sada̍naṃ ca̱kra u̱ccā pṛ̍thi̱vyāma̱nyo adhya̱ntari̍kṣe |
tāva̱smabhya̍ṃ puru̱vāra̍ṃ puru̱kṣuṃ rā̱yaspoṣa̱ṃ vi ṣya̍tā̱ṃ nābhi̍ma̱sme
||4||दि॒व्य१न्यः सद॑नं च॒क्र उ॒च्चा पृ॑थि॒व्याम॒न्यो अध्य॒न्तरि॑क्षे ।
ताव॒स्मभ्यं॑ पुरु॒वारं॑ पुरु॒क्षुं रा॒यस्पोषं॒ वि ष्य॑तां॒ नाभि॑म॒स्मे
viśvā̍nya̱nyo bhuva̍nā ja̱jāna̱ viśva̍ma̱nyo a̍bhi̱cakṣā̍ṇa eti |
somā̍pūṣaṇā̱vava̍ta̱ṃ dhiya̍ṃ me yu̱vābhyā̱ṃ viśvā̱: pṛta̍nā jayema
||5||विश्वा॑न्य॒न्यो भुव॑ना ज॒जान॒ विश्व॑म॒न्यो अ॑भि॒चक्षा॑ण एति ।
सोमा॑पूषणा॒वव॑तं॒ धियं॑ मे यु॒वाभ्यां॒ विश्वा॒: पृत॑ना जयेम
dhiya̍ṃ pū̱ṣā ji̍nvatu viśvami̱nvo ra̱yiṃ somo̍ rayi̱pati̍rdadhātu |
ava̍tu de̱vyadi̍tirana̱rvā bṛ̱had va̍dema vi̱dathe̍ su̱vīrā̍:
||6||धियं॑ पू॒षा जि॑न्वतु विश्वमि॒न्वो र॒यिं सोमो॑ रयि॒पति॑र्दधातु ।
अव॑तु दे॒व्यदि॑तिरन॒र्वा बृ॒हद् व॑देम वि॒दथे॑ सु॒वीरा॑: