Study
- Anukramaṇī
- Source
10 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| indraḥ| triṣṭup|
pra ghā̱ nva̍sya maha̱to ma̱hāni̍ sa̱tyā sa̱tyasya̱ kara̍ṇāni vocam |
trika̍drukeṣvapibat su̱tasyā̱sya made̱ ahi̱mindro̍ jaghāna
||1||प्र घा॒ न्व॑स्य मह॒तो म॒हानि॑ स॒त्या स॒त्यस्य॒ कर॑णानि वोचम् ।
त्रिक॑द्रुकेष्वपिबत् सु॒तस्या॒स्य मदे॒ अहि॒मिन्द्रो॑ जघान
a̱va̱ṃśe dyāma̍stabhāyad bṛ̱hanta̱mā roda̍sī apṛṇada̱ntari̍kṣam |
sa dhā̍rayat pṛthi̱vīṃ pa̱pratha̍cca̱ soma̍sya̱ tā mada̱ indra̍ścakāra
||2||अ॒वं॒शे द्याम॑स्तभायद् बृ॒हन्त॒मा रोद॑सी अपृणद॒न्तरि॑क्षम् ।
स धा॑रयत् पृथि॒वीं प॒प्रथ॑च्च॒ सोम॑स्य॒ ता मद॒ इन्द्र॑श्चकार
sadme̍va̱ prāco̱ vi mi̍māya̱ mānai̱rvajre̍ṇa̱ khānya̍tṛṇanna̱dīnā̍m |
vṛthā̍sṛjat pa̱thibhi̍rdīrghayā̱thaiḥ soma̍sya̱ tā mada̱ indra̍ścakāra
||3||सद्मे॑व॒ प्राचो॒ वि मि॑माय॒ मानै॒र्वज्रे॑ण॒ खान्य॑तृणन्न॒दीना॑म् ।
वृथा॑सृजत् प॒थिभि॑र्दीर्घया॒थैः सोम॑स्य॒ ता मद॒ इन्द्र॑श्चकार
sa pra̍vo̱l̤ahṛn pa̍ri̱gatyā̍ da̱bhīte̱rviśva̍madhā̱gāyu̍dhami̱ddhe a̱gnau |
saṃ gobhi̱raśvai̍rasṛja̱d rathe̍bhi̱: soma̍sya̱ tā mada̱ indra̍ścakāra
||4||स प्र॑वो॒ळहृन् प॑रि॒गत्या॑ द॒भीते॒र्विश्व॑मधा॒गायु॑धमि॒द्धे अ॒ग्नौ ।
सं गोभि॒रश्वै॑रसृज॒द् रथे॑भि॒: सोम॑स्य॒ ता मद॒ इन्द्र॑श्चकार
sa ī̍ṃ ma̱hīṃ dhuni̱meto̍raramṇā̱t so a̍snā̱tṝna̍pārayat sva̱sti |
ta u̱tsnāya̍ ra̱yima̱bhi pra ta̍sthu̱: soma̍sya̱ tā mada̱ indra̍ścakāra
||5||स ईं॑ म॒हीं धुनि॒मेतो॑ररम्णा॒त् सो अ॑स्ना॒तॄन॑पारयत् स्व॒स्ति ।
त उ॒त्स्नाय॑ र॒यिम॒भि प्र त॑स्थु॒: सोम॑स्य॒ ता मद॒ इन्द्र॑श्चकार
soda̍ñca̱ṃ sindhu̍mariṇānmahi̱tvā vajre̱ṇāna̍ u̱ṣasa̱: saṃ pi̍peṣa |
a̱ja̱vaso̍ ja̱vinī̍bhirvivṛ̱ścan tsoma̍sya̱ tā mada̱ indra̍ścakāra
||6||सोद॑ञ्चं॒ सिन्धु॑मरिणान्महि॒त्वा वज्रे॒णान॑ उ॒षस॒: सं पि॑पेष ।
अ॒ज॒वसो॑ ज॒विनी॑भिर्विवृ॒श्चन् त्सोम॑स्य॒ ता मद॒ इन्द्र॑श्चकार
sa vi̱dvām̐ a̍pago̱haṃ ka̱nīnā̍mā̱virbhava̱nnuda̍tiṣṭhat parā̱vṛk |
prati̍ śro̱ṇaḥ sthā̱dvya1naga̍caṣṭa̱ soma̍sya̱ tā mada̱ indra̍ścakāra
||7||स वि॒द्वाँ अ॑पगो॒हं क॒नीना॑मा॒विर्भव॒न्नुद॑तिष्ठत् परा॒वृक् ।
प्रति॑ श्रो॒णः स्था॒द्व्य१नग॑चष्ट॒ सोम॑स्य॒ ता मद॒ इन्द्र॑श्चकार
bhi̱nad va̱lamaṅgi̍robhirgṛṇā̱no vi parva̍tasya dṛṃhi̱tānyai̍rat |
ri̱ṇagrodhā̍ṃsi kṛ̱trimā̍ṇyeṣā̱ṃ soma̍sya̱ tā mada̱ indra̍ścakāra
||8||भि॒नद् व॒लमङ्गि॑रोभिर्गृणा॒नो वि पर्व॑तस्य दृंहि॒तान्यै॑रत् ।
रि॒णग्रोधां॑सि कृ॒त्रिमा॑ण्येषां॒ सोम॑स्य॒ ता मद॒ इन्द्र॑श्चकार
svapne̍nā̱bhyupyā̱ cumu̍ri̱ṃ dhuni̍ṃ ca ja̱ghantha̱ dasyu̱ṃ pra da̱bhīti̍māvaḥ |
ra̱mbhī ci̱datra̍ vivide̱ hira̍ṇya̱ṃ soma̍sya̱ tā mada̱ indra̍ścakāra
||9||स्वप्ने॑ना॒भ्युप्या॒ चुमु॑रिं॒ धुनिं॑ च ज॒घन्थ॒ दस्युं॒ प्र द॒भीति॑मावः ।
र॒म्भी चि॒दत्र॑ विविदे॒ हिर॑ण्यं॒ सोम॑स्य॒ ता मद॒ इन्द्र॑श्चकार
nū̱naṃ sā te̱ prati̱ vara̍ṃ jari̱tre du̍hī̱yadi̍ndra̱ dakṣi̍ṇā ma̱ghonī̍ |
śikṣā̍ sto̱tṛbhyo̱ māti̍ dha̱gbhago̍ no bṛ̱had va̍dema vi̱dathe̍ su̱vīrā̍:
||10||नू॒नं सा ते॒ प्रति॒ वरं॑ जरि॒त्रे दु॑ही॒यदि॑न्द्र॒ दक्षि॑णा म॒घोनी॑ ।
शिक्षा॑ स्तो॒तृभ्यो॒ माति॑ ध॒ग्भगो॑ नो बृ॒हद् व॑देम वि॒दथे॑ सु॒वीरा॑: