Study
- Anukramaṇī
- Source
4 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| indraḥ|1 aṣṭiḥ, 2-3 atiśakvarī, 4 aṣṭiḥ atiśakvarī vā|
trika̍drukeṣu mahi̱ṣo yavā̍śiraṃ tuvi̱śuṣma̍stṛ̱pat soma̍mapiba̱d viṣṇu̍nā su̱taṃ yathāva̍śat |
sa ī̍ṃ mamāda̱ mahi̱ karma̱ karta̍ve ma̱hāmu̱ruṃ saina̍ṃ saścad de̱vo de̱vaṃ sa̱tyamindra̍ṃ sa̱tya indu̍:
||1||त्रिक॑द्रुकेषु महि॒षो यवा॑शिरं तुवि॒शुष्म॑स्तृ॒पत् सोम॑मपिब॒द् विष्णु॑ना सु॒तं यथाव॑शत् ।
स ईं॑ ममाद॒ महि॒ कर्म॒ कर्त॑वे म॒हामु॒रुं सैनं॑ सश्चद् दे॒वो दे॒वं स॒त्यमिन्द्रं॑ स॒त्य इन्दु॑:
adha̱ tviṣī̍mām̐ a̱bhyoja̍sā̱ krivi̍ṃ yu̱dhābha̍va̱dā roda̍sī apṛṇadasya ma̱jmanā̱ pra vā̍vṛdhe |
adha̍ttā̱nyaṃ ja̱ṭhare̱ prema̍ricyata̱ saina̍ṃ saścad de̱vo de̱vaṃ sa̱tyamindra̍ṃ sa̱tya indu̍:
||2||अध॒ त्विषी॑माँ अ॒भ्योज॑सा॒ क्रिविं॑ यु॒धाभ॑व॒दा रोद॑सी अपृणदस्य म॒ज्मना॒ प्र वा॑वृधे ।
अध॑त्ता॒न्यं ज॒ठरे॒ प्रेम॑रिच्यत॒ सैनं॑ सश्चद् दे॒वो दे॒वं स॒त्यमिन्द्रं॑ स॒त्य इन्दु॑:
sā̱kaṃ jā̱taḥ kratu̍nā sā̱kamoja̍sā vavakṣitha sā̱kaṃ vṛ̱ddho vī̱ryai̍: sāsa̱hirmṛdho̱ vica̍rṣaṇiḥ |
dātā̱ rādha̍: stuva̱te kāmya̱ṃ vasu̱ saina̍ṃ saścad de̱vo de̱vaṃ sa̱tyamindra̍ṃ sa̱tya indu̍:
||3||सा॒कं जा॒तः क्रतु॑ना सा॒कमोज॑सा ववक्षिथ सा॒कं वृ॒द्धो वी॒र्यै॑: सास॒हिर्मृधो॒ विच॑र्षणिः ।
दाता॒ राध॑: स्तुव॒ते काम्यं॒ वसु॒ सैनं॑ सश्चद् दे॒वो दे॒वं स॒त्यमिन्द्रं॑ स॒त्य इन्दु॑:
tava̱ tyannarya̍ṃ nṛ̱to'pa̍ indra pratha̱maṃ pū̱rvyaṃ di̱vi pra̱vācya̍ṃ kṛ̱tam |
yad de̱vasya̱ śava̍sā̱ prāri̍ṇā̱ asu̍ṃ ri̱ṇanna̱paḥ |
bhuva̱d viśva̍ma̱bhyāde̍va̱moja̍sā vi̱dādūrja̍ṃ śa̱takra̍turvi̱dādiṣa̍m
||4||तव॒ त्यन्नर्यं॑ नृ॒तोऽप॑ इन्द्र प्रथ॒मं पू॒र्व्यं दि॒वि प्र॒वाच्यं॑ कृ॒तम् ।
यद् दे॒वस्य॒ शव॑सा॒ प्रारि॑णा॒ असुं॑ रि॒णन्न॒पः ।
भुव॒द् विश्व॑म॒भ्यादे॑व॒मोज॑सा वि॒दादूर्जं॑ श॒तक्र॑तुर्वि॒दादिष॑म्