Study
- Anukramaṇī
- Source
11 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| savitā|triṣṭup|
udu̱ ṣya de̱vaḥ sa̍vi̱tā sa̱vāya̍ śaśvatta̱maṃ tada̍pā̱ vahni̍rasthāt |
nū̱naṃ de̱vebhyo̱ vi hi dhāti̱ ratna̱mathābha̍jad vī̱tiho̍traṃ sva̱stau
||1||उदु॒ ष्य दे॒वः स॑वि॒ता स॒वाय॑ शश्वत्त॒मं तद॑पा॒ वह्नि॑रस्थात् ।
नू॒नं दे॒वेभ्यो॒ वि हि धाति॒ रत्न॒मथाभ॑जद् वी॒तिहो॑त्रं स्व॒स्तौ
viśva̍sya̱ hi śru̱ṣṭaye̍ de̱va ū̱rdhvaḥ pra bā̱havā̍ pṛ̱thupā̍ṇi̱: sisa̍rti |
āpa̍ścidasya vra̱ta ā nimṛ̍grā a̱yaṃ ci̱d vāto̍ ramate̱ pari̍jman
||2||विश्व॑स्य॒ हि श्रु॒ष्टये॑ दे॒व ऊ॒र्ध्वः प्र बा॒हवा॑ पृ॒थुपा॑णि॒: सिस॑र्ति ।
आप॑श्चिदस्य व्र॒त आ निमृ॑ग्रा अ॒यं चि॒द् वातो॑ रमते॒ परि॑ज्मन्
ā̱śubhi̍ści̱dyān vi mu̍cāti nū̱namarī̍rama̱data̍mānaṃ ci̱deto̍: |
a̱hyarṣū̍ṇāṃ ci̱nnya̍yām̐ avi̱ṣyāmanu̍ vra̱taṃ sa̍vi̱turmokyāgā̍t
||3||आ॒शुभि॑श्चि॒द्यान् वि मु॑चाति नू॒नमरी॑रम॒दत॑मानं चि॒देतो॑: ।
अ॒ह्यर्षू॑णां चि॒न्न्य॑याँ अवि॒ष्यामनु॑ व्र॒तं स॑वि॒तुर्मोक्यागा॑त्
puna̱: sama̍vya̱d vita̍ta̱ṃ vaya̍ntī ma̱dhyā karto̱rnya̍dhā̱cchakma̱ dhīra̍: |
ut saṃhāyā̍sthā̱d vyṛ1tūm̐ra̍dardhara̱rama̍tiḥ savi̱tā de̱va āgā̍t
||4||पुन॒: सम॑व्य॒द् वित॑तं॒ वय॑न्ती म॒ध्या कर्तो॒र्न्य॑धा॒च्छक्म॒ धीर॑: ।
उत् संहाया॑स्था॒द् व्यृ१तूँर॑दर्धर॒रम॑तिः सवि॒ता दे॒व आगा॑त्
nānaukā̍ṃsi̱ duryo̱ viśva̱māyu̱rvi ti̍ṣṭhate prabha̱vaḥ śoko̍ a̱gneḥ |
jyeṣṭha̍ṃ mā̱tā sū̱nave̍ bhā̱gamādhā̱danva̍sya̱ keta̍miṣi̱taṃ sa̍vi̱trā
||5||नानौकां॑सि॒ दुर्यो॒ विश्व॒मायु॒र्वि ति॑ष्ठते प्रभ॒वः शोको॑ अ॒ग्नेः ।
ज्येष्ठं॑ मा॒ता सू॒नवे॑ भा॒गमाधा॒दन्व॑स्य॒ केत॑मिषि॒तं स॑वि॒त्रा
sa̱māva̍varti̱ viṣṭhi̍to jigī̱ṣurviśve̍ṣā̱ṃ kāma̱ścara̍tāma̱mābhū̍t |
śaśvā̱m̐ apo̱ vikṛ̍taṃ hi̱tvyāgā̱danu̍ vra̱taṃ sa̍vi̱turdaivya̍sya
||6||स॒माव॑वर्ति॒ विष्ठि॑तो जिगी॒षुर्विश्वे॑षां॒ काम॒श्चर॑ताम॒माभू॑त् ।
शश्वाँ॒ अपो॒ विकृ॑तं हि॒त्व्यागा॒दनु॑ व्र॒तं स॑वि॒तुर्दैव्य॑स्य
tvayā̍ hi̱tamapya̍ma̱psu bhā̱gaṃ dhanvānvā mṛ̍ga̱yaso̱ vi ta̍sthuḥ |
vanā̍ni̱ vibhyo̱ naki̍rasya̱ tāni̍ vra̱tā de̱vasya̍ savi̱turmi̍nanti
||7||त्वया॑ हि॒तमप्य॑म॒प्सु भा॒गं धन्वान्वा मृ॑ग॒यसो॒ वि त॑स्थुः ।
वना॑नि॒ विभ्यो॒ नकि॑रस्य॒ तानि॑ व्र॒ता दे॒वस्य॑ सवि॒तुर्मि॑नन्ति
yā̱drā̱dhyaṃ1 varu̍ṇo̱ yoni̱mapya̱mani̍śitaṃ ni̱miṣi̱ jarbhu̍rāṇaḥ |
viśvo̍ mārtā̱ṇḍo vra̱jamā pa̱śurgā̍tstha̱ stha̱śo janmā̍ni savi̱tā vyāka̍:
||8||या॒द्रा॒ध्यं१ वरु॑णो॒ योनि॒मप्य॒मनि॑शितं नि॒मिषि॒ जर्भु॑राणः ।
विश्वो॑ मार्ता॒ण्डो व्र॒जमा प॒शुर्गा॑त्स्थ॒ स्थ॒शो जन्मा॑नि सवि॒ता व्याक॑:
na yasyendro̱ varu̍ṇo̱ na mi̱tro vra̱tama̍rya̱mā na mi̱nanti̍ ru̱draḥ |
nārā̍taya̱stami̱daṃ sva̱sti hu̱ve de̱vaṃ sa̍vi̱tāra̱ṃ namo̍bhiḥ
||9||न यस्येन्द्रो॒ वरु॑णो॒ न मि॒त्रो व्र॒तम॑र्य॒मा न मि॒नन्ति॑ रु॒द्रः ।
नारा॑तय॒स्तमि॒दं स्व॒स्ति हु॒वे दे॒वं स॑वि॒तारं॒ नमो॑भिः
bhaga̱ṃ dhiya̍ṃ vā̱jaya̍nta̱: pura̍ṃdhi̱ṃ narā̱śaṃso̱ gnāspati̍rno avyāḥ |
ā̱ye vā̱masya̍ saṃga̱the ra̍yī̱ṇāṃ pri̱yā de̱vasya̍ savi̱tuḥ syā̍ma
||10||भगं॒ धियं॑ वा॒जय॑न्त॒: पुरं॑धिं॒ नरा॒शंसो॒ ग्नास्पति॑र्नो अव्याः ।
आ॒ये वा॒मस्य॑ संग॒थे र॑यी॒णां प्रि॒या दे॒वस्य॑ सवि॒तुः स्या॑म
a̱smabhya̱ṃ tad di̱vo a̱dbhyaḥ pṛ̍thi̱vyāstvayā̍ da̱ttaṃ kāmya̱ṃ rādha̱ ā gā̍t |
śaṃ yat sto̱tṛbhya̍ ā̱paye̱ bhavā̍tyuru̱śaṃsā̍ya savitarjari̱tre
||11||अ॒स्मभ्यं॒ तद् दि॒वो अ॒द्भ्यः पृ॑थि॒व्यास्त्वया॑ द॒त्तं काम्यं॒ राध॒ आ गा॑त् ।
शं यत् स्तो॒तृभ्य॑ आ॒पये॒ भवा॑त्युरु॒शंसा॑य सवितर्जरि॒त्रे