Study
- Anukramaṇī
- Source
6 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| ṛtudevatāḥ- 1 indro madhuśca, 2maruto mādhavaśca, 3 tvaṣṭā śukraśca, 4 agniḥ śaciśca, 5 indro nabhaśca, 6 mitrāvaruṇau nabhasyaśca| jagatī|
tubhya̍ṃ hinvā̱no va̍siṣṭa̱ gā a̱po 'dhu̍kṣan tsī̱mavi̍bhi̱radri̍bhi̱rnara̍: |
pibe̍ndra̱ svāhā̱ prahu̍ta̱ṃ vaṣa̍ṭkṛtaṃ ho̱trādā soma̍ṃ pratha̱mo ya īśi̍ṣe
||1||तुभ्यं॑ हिन्वा॒नो व॑सिष्ट॒ गा अ॒पो ऽधु॑क्षन् त्सी॒मवि॑भि॒रद्रि॑भि॒र्नर॑: ।
पिबे॑न्द्र॒ स्वाहा॒ प्रहु॑तं॒ वष॑ट्कृतं हो॒त्रादा सोमं॑ प्रथ॒मो य ईशि॑षे
ya̱jñaiḥ sammi̍ślā̱: pṛṣa̍tībhiṝ̱ṣṭibhi̱ryāma̍ñchu̱bhrāso̍ a̱ñjiṣu̍ pri̱yā u̱ta |
ā̱sadyā̍ ba̱rhirbha̍ratasya sūnavaḥ po̱trādā soma̍ṃ pibatā divo naraḥ
||2||य॒ज्ञैः सम्मि॑श्ला॒: पृष॑तीभिॠ॒ष्टिभि॒र्याम॑ञ्छु॒भ्रासो॑ अ॒ञ्जिषु॑ प्रि॒या उ॒त ।
आ॒सद्या॑ ब॒र्हिर्भ॑रतस्य सूनवः पो॒त्रादा सोमं॑ पिबता दिवो नरः
a̱meva̍ naḥ suhavā̱ ā hi ganta̍na̱ ni ba̱rhiṣi̍ sadatanā̱ raṇi̍ṣṭana |
athā̍ mandasva jujuṣā̱ṇo andha̍sa̱stvaṣṭa̍rde̱vebhi̱rjani̍bhiḥ su̱madga̍ṇaḥ
||3||अ॒मेव॑ नः सुहवा॒ आ हि गन्त॑न॒ नि ब॒र्हिषि॑ सदतना॒ रणि॑ष्टन ।
अथा॑ मन्दस्व जुजुषा॒णो अन्ध॑स॒स्त्वष्ट॑र्दे॒वेभि॒र्जनि॑भिः सु॒मद्ग॑णः
ā va̍kṣi de̱vām̐ i̱ha vi̍pra̱ yakṣi̍ co̱śan ho̍ta̱rni ṣa̍dā̱ yoni̍ṣu tri̱ṣu |
prati̍ vīhi̱ prasthi̍taṃ so̱myaṃ madhu̱ pibāgnī̍dhrā̱t tava̍ bhā̱gasya̍ tṛpṇuhi
||4||आ व॑क्षि दे॒वाँ इ॒ह वि॑प्र॒ यक्षि॑ चो॒शन् हो॑त॒र्नि ष॑दा॒ योनि॑षु त्रि॒षु ।
प्रति॑ वीहि॒ प्रस्थि॑तं सो॒म्यं मधु॒ पिबाग्नी॑ध्रा॒त् तव॑ भा॒गस्य॑ तृप्णुहि
e̱ṣa sya te̍ ta̱nvo̍ nṛmṇa̱vardha̍na̱: saha̱ oja̍: pra̱divi̍ bā̱hvorhi̱taḥ |
tubhya̍ṃ su̱to ma̍ghava̱n tubhya̱mābhṛ̍ta̱stvama̍sya̱ brāhma̍ṇā̱dā tṛ̱pat pi̍ba
||5||ए॒ष स्य ते॑ त॒न्वो॑ नृम्ण॒वर्ध॑न॒: सह॒ ओज॑: प्र॒दिवि॑ बा॒ह्वोर्हि॒तः ।
तुभ्यं॑ सु॒तो म॑घव॒न् तुभ्य॒माभृ॑त॒स्त्वम॑स्य॒ ब्राह्म॑णा॒दा तृ॒पत् पि॑ब
ju̱ṣethā̍ṃ ya̱jñaṃ bodha̍ta̱ṃ hava̍sya me sa̱tto hotā̍ ni̱vida̍: pū̱rvyā anu̍ |
acchā̱ rājā̍nā̱ nama̍ etyā̱vṛta̍ṃ praśā̱strādā pi̍bataṃ so̱myaṃ madhu̍
||6||जु॒षेथां॑ य॒ज्ञं बोध॑तं॒ हव॑स्य मे स॒त्तो होता॑ नि॒विद॑: पू॒र्व्या अनु॑ ।
अच्छा॒ राजा॑ना॒ नम॑ एत्या॒वृतं॑ प्रशा॒स्त्रादा पि॑बतं सो॒म्यं मधु॑