Study
- Anukramaṇī
- Source
6 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| agniḥ| triṣṭup|
jo̱hūtro̍ a̱gniḥ pra̍tha̱maḥ pi̱teve̱l̤aspa̱de manu̍ṣā̱ yat sami̍ddhaḥ |
śriya̱ṃ vasā̍no a̱mṛto̱ vice̍tā marmṛ̱jenya̍: śrava̱sya1: sa vā̱jī
||1||जो॒हूत्रो॑ अ॒ग्निः प्र॑थ॒मः पि॒तेवे॒ळस्प॒दे मनु॑षा॒ यत् समि॑द्धः ।
श्रियं॒ वसा॑नो अ॒मृतो॒ विचे॑ता मर्मृ॒जेन्य॑: श्रव॒स्य१: स वा॒जी
śrū̱yā a̱gniści̱trabhā̍nu̱rhava̍ṃ me̱ viśvā̍bhirgī̱rbhira̱mṛto̱ vice̍tāḥ |
śyā̱vā ratha̍ṃ vahato̱ rohi̍tā vo̱tāru̱ṣāha̍ cakre̱ vibhṛ̍traḥ
||2||श्रू॒या अ॒ग्निश्चि॒त्रभा॑नु॒र्हवं॑ मे॒ विश्वा॑भिर्गी॒र्भिर॒मृतो॒ विचे॑ताः ।
श्या॒वा रथं॑ वहतो॒ रोहि॑ता वो॒तारु॒षाह॑ चक्रे॒ विभृ॑त्रः
u̱ttā̱nāyā̍majanaya̱n tsūṣū̍ta̱ṃ bhuva̍da̱gniḥ pu̍ru̱peśā̍su̱ garbha̍: |
śiri̍ṇāyāṃ cida̱ktunā̱ maho̍bhi̱rapa̍rīvṛto vasati̱ prace̍tāḥ
||3||उ॒त्ता॒नाया॑मजनय॒न् त्सूषू॑तं॒ भुव॑द॒ग्निः पु॑रु॒पेशा॑सु॒ गर्भ॑: ।
शिरि॑णायां चिद॒क्तुना॒ महो॑भि॒रप॑रीवृतो वसति॒ प्रचे॑ताः
jigha̍rmya̱gniṃ ha̱viṣā̍ ghṛ̱tena̍ pratikṣi̱yanta̱ṃ bhuva̍nāni̱ viśvā̍ |
pṛ̱thuṃ ti̍ra̱ścā vaya̍sā bṛ̱hanta̱ṃ vyaci̍ṣṭha̱mannai̍ rabha̱saṃ dṛśā̍nam
||4||जिघ॑र्म्य॒ग्निं ह॒विषा॑ घृ॒तेन॑ प्रतिक्षि॒यन्तं॒ भुव॑नानि॒ विश्वा॑ ।
पृ॒थुं ति॑र॒श्चा वय॑सा बृ॒हन्तं॒ व्यचि॑ष्ठ॒मन्नै॑ रभ॒सं दृशा॑नम्
ā vi̱śvata̍: pra̱tyañca̍ṃ jigharmyara̱kṣasā̱ mana̍sā̱ tajju̍ṣeta |
marya̍śrīḥ spṛha̱yadva̍rṇo a̱gnirnābhi̱mṛśe̍ ta̱nvā̱3 jarbhu̍rāṇaḥ
||5||आ वि॒श्वत॑: प्र॒त्यञ्चं॑ जिघर्म्यर॒क्षसा॒ मन॑सा॒ तज्जु॑षेत ।
मर्य॑श्रीः स्पृह॒यद्व॑र्णो अ॒ग्निर्नाभि॒मृशे॑ त॒न्वा॒३ जर्भु॑राणः
jñe̱yā bhā̱gaṃ sa̍hasā̱no vare̍ṇa̱ tvādū̍tāso manu̱vadva̍dema |
anū̍nama̱gniṃ ju̱hvā̍ vaca̱syā ma̍dhu̱pṛca̍ṃ dhana̱sā jo̍havīmi
||6||ज्ञे॒या भा॒गं स॑हसा॒नो वरे॑ण॒ त्वादू॑तासो मनु॒वद्व॑देम ।
अनू॑नम॒ग्निं जु॒ह्वा॑ वच॒स्या म॑धु॒पृचं॑ धन॒सा जो॑हवीमि