ṛca̱ṃ vāca̱ṃ pra pa̍dye̱ mano̱ yaju̱: pra pa̍dye̱ sāma̍ prā̱ṇaṃ pra pa̍dye̱ cakṣu̱: śrotra̱ṃ pra pa̍dye |
vāgoja̍: sa̱haujo̱ mayi̍ prāṇāpā̱nau
||36.1||वागोज॑: स॒हौजो॒ मयि॑ प्राणापा॒नौ
yanme̍ chi̱draṃ cakṣu̍ṣo̱ hṛda̍yasya̱ mana̍so̱ vāti̍tṛṇṇa̱ṃ bṛha̱spati̍rme̱ tadda̍dhātu |
śaṃ no̍ bhavatu̱ bhuva̍nasya̱ yaspati̍:
||36.2||यन्मे॑ छि॒द्रं चक्षु॑षो॒ हृद॑यस्य॒ मन॑सो॒ वाति॑तृण्णं॒ बृह॒स्पति॑र्मे॒ तद्द॑धातु ।
शं नो॑ भवतु॒ भुव॑नस्य॒ यस्पति॑:
bhūrbhuva̱: sva̱: tatsa̍vi̱turvare̍ṇya̱ṃ bhargo̍ de̱vasya̍ dhīmahi |
dhiyo̱ yo na̍: praco̱dayā̍t
||36.3||भूर्भुव॒: स्व॒: तत्स॑वि॒तुर्वरे॑ण्यं॒ भर्गो॑ दे॒वस्य॑ धीमहि ।
धियो॒ यो न॑: प्रचो॒दया॑त्
kayā̍ naści̱tra ā bhu̍vadū̱tī sa̱dāvṛ̍dha̱: sakhā̍ | kayā̱ śaci̍ṣṭhayā vṛ̱tā
||36.4||कया॑ नश्चि॒त्र आ भु॑वदू॒ती स॒दावृ॑ध॒: सखा॑ । कया॒ शचि॑ष्ठया वृ॒ता
kastvā̍ sa̱tyo madā̍nā̱ṃ mahi̍ṣṭho matsa̱dandha̍saḥ | dṛ̱ḍhā ci̍dā̱ruje̱ vasu̍
||36.5||कस्त्वा॑ स॒त्यो मदा॑नां॒ मᳪहि॑ष्ठो मत्स॒दन्ध॑सः । दृ॒ढा चि॑दा॒रुजे॒ वसु॑
a̱bhī ṣu ṇa̱: sakhī̍nāmavi̱tā ja̍ritṝ̱ṇām | śa̱taṃ bha̍vāsyū̱tibhi̍:
||36.6||अ॒भी षु ण॒: सखी॑नामवि॒ता ज॑रितॄ॒णाम् । श॒तं भ॑वास्यू॒तिभि॑:
kayā̱ tvaṃ na ū̱tyābhi pra ma̍ndase vṛṣan | kayā̍ sto̱tṛbhya̱ ā bha̍ra
||36.7||कया॒ त्वं न ऊ॒त्याभि प्र म॑न्दसे वृषन् । कया॑ स्तो॒तृभ्य॒ आ भ॑र
indro̱ viśva̍sya rājati | śaṃ no̍ astu dvi̱pade̱ śaṃ catu̍ṣpade
||36.8||इन्द्रो॒ विश्व॑स्य राजति । शं नो॑ अस्तु द्वि॒पदे॒ शं चतु॑ष्पदे
śaṃ no̍ mi̱tra: śaṃ varu̍ṇa̱: śaṃ no̍ bhavatvarya̱mā |
śaṃ na̱ indro̱ bṛha̱spati̱: śaṃ no̱ viṣṇu̍rurukra̱maḥ
||36.9||शं नो॑ मि॒त्र: शं वरु॑ण॒: शं नो॑ भवत्वर्य॒मा ।
शं न॒ इन्द्रो॒ बृह॒स्पति॒: शं नो॒ विष्णु॑रुरुक्र॒मः
śaṃ no̱ vāta̍: pavatā śaṃ na̍stapatu̱ sūrya̍: |
śaṃ na̱: kani̍kradadde̱vaḥ pa̱rjanyo̍ a̱bhi va̍rṣatu
||36.10||शं नो॒ वात॑: पवता॒ᳪ शं न॑स्तपतु॒ सूर्य॑: ।
शं न॒: कनि॑क्रदद्दे॒वः प॒र्जन्यो॑ अ॒भि व॑र्षतु
ahā̍ni̱ śaṃ bhava̍ntu na̱: śa rātrī̱: prati̍ dhīyatām |
śaṃ na̍ indrā̱gnī bha̍vatā̱mavo̍bhi̱: śaṃ na̱ indrā̱varu̍ṇā rā̱taha̍vyā |
śaṃ na̍ indrāpū̱ṣaṇā̱ vāja̍sātau̱ śamindrā̱somā̍ suvi̱tāya̱ śaṃ yoḥ
||36.11||अहा॑नि॒ शं भव॑न्तु न॒: शᳪ रात्री॒: प्रति॑ धीयताम् ।
शं न॑ इन्द्रा॒ग्नी भ॑वता॒मवो॑भि॒: शं न॒ इन्द्रा॒वरु॑णा रा॒तह॑व्या ।
शं न॑ इन्द्रापू॒षणा॒ वाज॑सातौ॒ शमिन्द्रा॒सोमा॑ सुवि॒ताय॒ शं योः
śaṃ no̍ de̱vīra̱bhiṣṭa̍ya̱ āpo̍ bhavantu pī̱taye̍ |
śaṃ yora̱bhi sra̍vantu naḥ
||36.12||शं नो॑ दे॒वीर॒भिष्ट॑य॒ आपो॑ भवन्तु पी॒तये॑ ।
शं योर॒भि स्र॑वन्तु नः
syo̱nā pṛ̍thivi no bhavānṛkṣa̱rā ni̱veśa̍nī |
yacchā̍ na̱: śarma̍ sa̱prathā̍:
||36.13||स्यो॒ना पृ॑थिवि नो भवानृक्ष॒रा नि॒वेश॑नी ।
यच्छा॑ न॒: शर्म॑ स॒प्रथा॑:
āpo̱ hi ṣṭhā ma̍yo̱bhuva̱stā na̍ ū̱rje da̍dhātana | ma̱he raṇā̍ya̱ cakṣa̍se
||36.14||आपो॒ हि ष्ठा म॑यो॒भुव॒स्ता न॑ ऊ॒र्जे द॑धातन । म॒हे रणा॑य॒ चक्ष॑से
yo va̍: śi̱vata̍mo̱ rasa̱stasya̍ bhājayate̱ha na̍: | u̱śa̱tīri̍va mā̱tara̍:
||36.15||यो व॑: शि॒वत॑मो॒ रस॒स्तस्य॑ भाजयते॒ह न॑: । उ॒श॒तीरि॑व मा॒तर॑:
tasmā̱ ara̍ṃ gamāma vo̱ yasya̱ kṣayā̍ya̱ jinva̍tha | āpo̍ ja̱naya̍thā ca naḥ
||36.16||तस्मा॒ अरं॑ गमाम वो॒ यस्य॒ क्षया॑य॒ जिन्व॑थ । आपो॑ ज॒नय॑था च नः
dyau: śānti̍ra̱ntari̍kṣa śānti̍: pṛthi̱vī śānti̱rāpa̱: śānti̱roṣa̍dhaya̱: śānti̍: |
vana̱spata̍ya̱: śānti̱rviśve̍ de̱vāḥ śānti̱rbrahma̱ śānti̱: sarva śānti̱: śānti̍re̱va śānti̱: sā mā̱ śānti̍redhi
||36.17||द्यौ: शान्ति॑र॒न्तरि॑क्ष॒ᳪ शान्ति॑: पृथि॒वी शान्ति॒राप॒: शान्ति॒रोष॑धय॒: शान्ति॑: ।
वन॒स्पत॑य॒: शान्ति॒र्विश्वे॑ दे॒वाः शान्ति॒र्ब्रह्म॒ शान्ति॒: सर्व॒ᳪ शान्ति॒: शान्ति॑रे॒व शान्ति॒: सा मा॒ शान्ति॑रेधि
dṛte̱ dṛha̍ mā mi̱trasya̍ mā̱ cakṣu̍ṣā̱ sarvā̍ṇi bhū̱tāni̱ samī̍kṣantām |
mi̱trasyā̱haṃ cakṣu̍ṣā̱ sarvā̍ṇi bhū̱tāni̱ samī̍kṣe |
mi̱trasya̱ cakṣu̍ṣā̱ samī̍kṣāmahe
||36.18||दृते॒ दृᳪह॑ मा मि॒त्रस्य॑ मा॒ चक्षु॑षा॒ सर्वा॑णि भू॒तानि॒ समी॑क्षन्ताम् ।
मि॒त्रस्या॒हं चक्षु॑षा॒ सर्वा॑णि भू॒तानि॒ समी॑क्षे ।
मि॒त्रस्य॒ चक्षु॑षा॒ समी॑क्षामहे
dṛte̱ dṛha̍ mā | jyokte̍ sa̱ndṛśi̍ jīvyāsa̱ṃ jyokte̍ sa̱ndṛśi̍ jīvyāsam
||36.19||दृते॒ दृᳪह॑ मा । ज्योक्ते॑ स॒न्दृशि॑ जीव्यासं॒ ज्योक्ते॑ स॒न्दृशि॑ जीव्यासम्
nama̍ste̱ hara̍se śo̱ciṣe̱ nama̍ste astva̱rciṣe̍ |
a̱nyām̐ste̍ a̱smatta̍pantu he̱taya̍: pāva̱ko a̱smabhya śi̱vo bha̍va
||36.20||नम॑स्ते॒ हर॑से शो॒चिषे॒ नम॑स्ते अस्त्व॒र्चिषे॑ ।
अ॒न्याँस्ते॑ अ॒स्मत्त॑पन्तु हे॒तय॑: पाव॒को अ॒स्मभ्य॑ᳪ शि॒वो भ॑व
nama̍ste astu vi̱dyute̱ nama̍ste stanayi̱tnave̍ | nama̍ste bhagavannastu̱ yata̱: sva̱: sa̱mīha̍se
||36.21||नम॑स्ते अस्तु वि॒द्युते॒ नम॑स्ते स्तनयि॒त्नवे॑ । नम॑स्ते भगवन्नस्तु॒ यत॒: स्व॒: स॒मीह॑से
yato̍-yataḥ sa̱mīha̍se̱ tato̍ no̱ abha̍yaṃ kuru | śaṃ na̍: kuru pra̱jābhyo'bha̍yaṃ naḥ pa̱śubhya̍:
||36.22||यतो॑-यतः स॒मीह॑से॒ ततो॑ नो॒ अभ॑यं कुरु । शं न॑: कुरु प्र॒जाभ्योऽभ॑यं नः प॒शुभ्य॑:
su̱mi̱tri̱yā na̱ āpa̱ oṣa̍dhayaḥ santu durmitri̱yāstasmai̍ santu̱ yo'smān dveṣṭi̱ yaṃ ca̍ va̱yaṃ dvi̱ṣmaḥ
||36.23||सु॒मि॒त्रि॒या न॒ आप॒ ओष॑धयः सन्तु दुर्मित्रि॒यास्तस्मै॑ सन्तु॒ योऽस्मान् द्वेष्टि॒ यं च॑ व॒यं द्वि॒ष्मः
taccakṣu̍rde̱vahi̍taṃ pu̱rastā̍cchu̱kramucca̍rat | paśye̍ma śa̱rada̍: śa̱taṃ jīve̍ma śa̱rada̍: śa̱ta śṛṇu̍yāma śa̱rada̍: śa̱taṃ pra bra̍vāma śa̱rada̍: śa̱tamadī̍nāḥ syāma śa̱rada̍: śa̱taṃ bhūya̍śca śa̱rada̍: śa̱tāt
||36.24||तच्चक्षु॑र्दे॒वहि॑तं पु॒रस्ता॑च्छु॒क्रमुच्च॑रत् । पश्ये॑म श॒रद॑: श॒तं जीवे॑म श॒रद॑: श॒तᳪ शृणु॑याम श॒रद॑: श॒तं प्र ब्र॑वाम श॒रद॑: श॒तमदी॑नाः स्याम श॒रद॑: श॒तं भूय॑श्च श॒रद॑: श॒तात्