kṣa̱trasya̱ yoni̍rasi kṣa̱trasya̱ nābhi̍rasi | mā tvā̍ hisī̱nmā mā̍ hisīḥ
||20.1||क्ष॒त्रस्य॒ योनि॑रसि क्ष॒त्रस्य॒ नाभि॑रसि । मा त्वा॑ हिᳪसी॒न्मा मा॑ हिᳪसीः
ni ṣa̍sāda ghṛ̱tavra̍to̱ varu̍ṇaḥ pa̱styāsvā | sāmrā̍jyāya su̱kratu̍: | mṛ̱tyoḥ pā̍hi vi̱dyotpā̍hi
||20.2||नि ष॑साद घृ॒तव्र॑तो॒ वरु॑णः प॒स्त्यास्वा । साम्रा॑ज्याय सु॒क्रतु॑: । मृ॒त्योः पा॑हि वि॒द्योत्पा॑हि
de̱vasya̍ tvā savi̱tuḥ pra̍sa̱ve'śvino̍rbā̱hubhyā̍ṃ pū̱ṣṇo hastā̍bhyām |
a̱śvinorbhaiṣa̍jyena̱ teja̍se brahmavarca̱sāyā̱bhi ṣi̍ñcāmi̱ sara̍svatyai̱ bhaiṣa̍jyena vī̱ryā̱yā̱nnādyā̍yā̱bhi ṣi̍ñcā̱mīndra̍syendri̱yeṇa̱ balā̍ya śriyai̱ yaśa̍se̱'bhi ṣi̍ñcāmi
||20.3||दे॒वस्य॑ त्वा सवि॒तुः प्र॑स॒वेऽश्विनो॑र्बा॒हुभ्यां॑ पू॒ष्णो हस्ता॑भ्याम् ।
अ॒श्विनोर्भैष॑ज्येन॒ तेज॑से ब्रह्मवर्च॒साया॒भि षि॑ञ्चामि॒ सर॑स्वत्यै॒ भैष॑ज्येन वी॒र्या॒या॒न्नाद्या॑या॒भि षि॑ञ्चा॒मीन्द्र॑स्येन्द्रि॒येण॒ बला॑य श्रियै॒ यश॑से॒ऽभि षि॑ञ्चामि
ko̍'si kata̱mo̱'si̱ kasmai̍ tvā̱ kāya̍ tvā | suślo̍ka̱ suma̍ṅgala̱ satya̍rājan
||20.4||को॑ऽसि कत॒मो॒ऽसि॒ कस्मै॑ त्वा॒ काय॑ त्वा । सुश्लो॑क॒ सुम॑ङ्गल॒ सत्य॑राजन्
śiro̍ me̱ śrīryaśo̱ mukha̱ṃ tviṣi̱: keśā̍śca̱ śmaśrū̍ṇi | rājā̍ me prā̱ṇo a̱mṛta sa̱mrāṭ cakṣu̍rvi̱rāṭ śrotra̍m
||20.5||शिरो॑ मे॒ श्रीर्यशो॒ मुखं॒ त्विषि॒: केशा॑श्च॒ श्मश्रू॑णि । राजा॑ मे प्रा॒णो अ॒मृत॑ᳪ स॒म्राट् चक्षु॑र्वि॒राट् श्रोत्र॑म्
ji̱hvā me̍ bha̱draṃ vāṅmaho̱ mano̍ ma̱nyuḥ sva̱rāḍ bhāma̍: | modā̍: pramo̱dā a̱ṅgulī̱raṅgā̍ni mi̱traṃ me̱ saha̍:
||20.6||जि॒ह्वा मे॑ भ॒द्रं वाङ्महो॒ मनो॑ म॒न्युः स्व॒राड् भाम॑: । मोदा॑: प्रमो॒दा अ॒ङ्गुली॒रङ्गा॑नि मि॒त्रं मे॒ सह॑:
bā̱hū me̱ bala̍mindri̱ya hastau̍ me̱ karma̍ vī̱rya̱m | ā̱tmā kṣa̱tramuro̱ mama̍
||20.7||बा॒हू मे॒ बल॑मिन्द्रि॒यᳪ हस्तौ॑ मे॒ कर्म॑ वी॒र्य॒म् । आ॒त्मा क्ष॒त्रमुरो॒ मम॑
pṛ̱ṣṭhīrme̍ rā̱ṣṭramu̱dara̱masau̍ grī̱vāśca̱ śroṇī̍ | ū̱rū a̍ra̱tnī jānu̍nī̱ viśo̱ me'ṅgā̍ni sa̱rvata̍:
||20.8||पृ॒ष्ठीर्मे॑ रा॒ष्ट्रमु॒दर॒मᳪसौ॑ ग्री॒वाश्च॒ श्रोणी॑ । ऊ॒रू अ॑र॒त्नी जानु॑नी॒ विशो॒ मेऽङ्गा॑नि स॒र्वत॑:
nābhi̍rme ci̱ttaṃ vi̱jñāna̍ṃ pā̱yurme'pa̍citirbha̱sat | ā̱na̱nda̱na̱ndāvā̱ṇḍau me̱ bhaga̱: saubhā̍gya̱ṃ pasa̍: |
jaṅghā̍bhyāṃ pa̱dbhyāṃ dharmo̍'smi vi̱śi rājā̱ prati̍ṣṭhitaḥ
||20.9||नाभि॑र्मे चि॒त्तं वि॒ज्ञानं॑ पा॒युर्मेऽप॑चितिर्भ॒सत् । आ॒न॒न्द॒न॒न्दावा॒ण्डौ मे॒ भग॒: सौभा॑ग्यं॒ पस॑: ।
जङ्घा॑भ्यां प॒द्भ्यां धर्मो॑ऽस्मि वि॒शि राजा॒ प्रति॑ष्ठितः
prati̍ kṣa̱tre prati̍ tiṣṭhāmi rā̱ṣṭre pratyaśve̍ṣu̱ prati̍ tiṣṭhāmi̱ goṣu̍ |
pratyaṅge̍ṣu̱ prati̍ tiṣṭhāmyā̱tman prati̍ prā̱ṇeṣu̱ prati̍ tiṣṭhāmi pu̱ṣṭe prati̱ dyāvā̍pṛthi̱vyoḥ prati̍ tiṣṭhāmi ya̱jñe
||20.10||प्रति॑ क्ष॒त्रे प्रति॑ तिष्ठामि रा॒ष्ट्रे प्रत्यश्वे॑षु॒ प्रति॑ तिष्ठामि॒ गोषु॑ ।
प्रत्यङ्गे॑षु॒ प्रति॑ तिष्ठाम्या॒त्मन् प्रति॑ प्रा॒णेषु॒ प्रति॑ तिष्ठामि पु॒ष्टे प्रति॒ द्यावा॑पृथि॒व्योः प्रति॑ तिष्ठामि य॒ज्ञे
0||
tra̱yā de̱vā ekā̍daśa trayastriśāḥ su̱rādha̍saḥ |
bṛha̱spati̍purohitā de̱vasya̍ savi̱tuḥ sa̱ve | de̱vā de̱vaira̍vantu mā
||20.11||०।।
त्र॒या दे॒वा एका॑दश त्रयस्त्रि॒ᳪशाः सु॒राध॑सः ।
बृह॒स्पति॑पुरोहिता दे॒वस्य॑ सवि॒तुः स॒वे । दे॒वा दे॒वैर॑वन्तु मा
pra̱tha̱mā dvi̱tīyai̍rdvi̱tīyā̍stṛ̱tīyai̍stṛ̱tīyā̍: sa̱tyena̍ sa̱tyaṃ ya̱jñena̍ ya̱jño yaju̍rbhi̱ryajūṣi̱ sāma̍bhi̱: sāmā̍nyṛ̱gbhirṛca̍: puro'nuvā̱kyā̱bhiḥ puro'nuvā̱kyā̱ yā̱jyā̱bhiryā̱jyā̱ vaṣaṭkā̱rairva̍ṣaṭkā̱rā āhu̍tibhi̱rāhu̍tayo me̱ kāmā̱ntsama̍rdhayantu̱ bhūḥ svāhā̍
||20.12||प्र॒थ॒मा द्वि॒तीयै॑र्द्वि॒तीया॑स्तृ॒तीयै॑स्तृ॒तीया॑: स॒त्येन॑ स॒त्यं य॒ज्ञेन॑ य॒ज्ञो यजु॑र्भि॒र्यजू॑ᳪषि॒ साम॑भि॒: सामा॑न्यृ॒ग्भिरृच॑: पुरोऽनुवा॒क्या॒भिः पुरोऽनुवा॒क्या॒ या॒ज्या॒भिर्या॒ज्या॒ वषट्का॒रैर्व॑षट्का॒रा आहु॑तिभि॒राहु॑तयो मे॒ कामा॒न्त्सम॑र्धयन्तु॒ भूः स्वाहा॑
lomā̍ni̱ praya̍ti̱rmama̱ tvaṅma̱ āna̍ti̱rāga̍tiḥ | māsaṃ ma̱ upa̍nati̱rvasvasthi̍ ma̱jjā ma̱ āna̍tiḥ
||20.13||लोमा॑नि॒ प्रय॑ति॒र्मम॒ त्वङ्म॒ आन॑ति॒राग॑तिः । मा॒ᳪसं म॒ उप॑नति॒र्वस्वस्थि॑ म॒ज्जा म॒ आन॑तिः
yadde̍vā deva̱heḍa̍na̱ṃ devā̍saścakṛ̱mā va̱yam | a̱gnirmā̱ tasmā̱dena̍so̱ viśvā̍nmuñca̱tvaha̍saḥ
||20.14||यद्दे॑वा देव॒हेड॑नं॒ देवा॑सश्चकृ॒मा व॒यम् । अ॒ग्निर्मा॒ तस्मा॒देन॑सो॒ विश्वा॑न्मुञ्च॒त्वᳪह॑सः
yadi̱ divā̱ yadi̱ nakta̱menāsi cakṛ̱mā va̱yam | vā̱yurmā̱ tasmā̱dena̍so̱ viśvā̍nmuñca̱tvaha̍saḥ
||20.15||यदि॒ दिवा॒ यदि॒ नक्त॒मेना॑ᳪसि चकृ॒मा व॒यम् । वा॒युर्मा॒ तस्मा॒देन॑सो॒ विश्वा॑न्मुञ्च॒त्वᳪह॑सः
yadi̱ jāgra̱dyadi̱ svapna̱ enāsi cakṛ̱mā va̱yam | sūryo̍ mā̱ tasmā̱dena̍so̱ viśvā̍nmuñca̱tvaha̍saḥ
||20.16||यदि॒ जाग्र॒द्यदि॒ स्वप्न॒ एना॑ᳪसि चकृ॒मा व॒यम् । सूर्यो॑ मा॒ तस्मा॒देन॑सो॒ विश्वा॑न्मुञ्च॒त्वᳪह॑सः
yadgrāme̱ yadara̍ṇye̱ yatsa̱bhāyā̱ṃ yadi̍ndri̱ye |
yacchū̱dre yadarye̱ yadena̍ścakṛ̱mā va̱yaṃ yadeka̱syādhi̱ dharma̍ṇi̱ tasyā̍va̱yaja̍namasi
||20.17||यद्ग्रामे॒ यदर॑ण्ये॒ यत्स॒भायां॒ यदि॑न्द्रि॒ये ।
यच्छू॒द्रे यदर्ये॒ यदेन॑श्चकृ॒मा व॒यं यदेक॒स्याधि॒ धर्म॑णि॒ तस्या॑व॒यज॑नमसि
yadāpo̍ a̱ghnyā iti̱ varu̱ṇeti̱ śapā̍mahe̱ tato̍ varuṇa no muñca | ava̍bhṛtha nicumpuṇa nice̱rura̍si nicumpu̱ṇaḥ |
ava̍ de̱vairde̱vakṛ̍ta̱meno̍'ya̱kṣyava̱ martyai̱rmartya̍kṛtaṃ puru̱rāvṇo̍ deva ri̱ṣaspā̍hi
||20.18||यदापो॑ अ॒घ्न्या इति॒ वरु॒णेति॒ शपा॑महे॒ ततो॑ वरुण नो मुञ्च । अव॑भृथ निचुम्पुण निचे॒रुर॑सि निचुम्पु॒णः ।
अव॑ दे॒वैर्दे॒वकृ॑त॒मेनो॑ऽय॒क्ष्यव॒ मर्त्यै॒र्मर्त्य॑कृतं पुरु॒राव्णो॑ देव रि॒षस्पा॑हि
sa̍mu̱dre te̱ hṛda̍yama̱psvantaḥ saṃ tvā̍ viśa̱ntvoṣa̍dhīru̱tāpa̍: |
su̱mi̱tri̱yā na̱ āpa̱ oṣa̍dhayaḥ santu durmitri̱yāstasmai̍ santu̱ yo'smāndveṣṭi̱ yaṃ ca̍ va̱yaṃ dvi̱ṣmaḥ
||20.19||स॑मु॒द्रे ते॒ हृद॑यम॒प्स्वन्तः सं त्वा॑ विश॒न्त्वोष॑धीरु॒ताप॑: ।
सु॒मि॒त्रि॒या न॒ आप॒ ओष॑धयः सन्तु दुर्मित्रि॒यास्तस्मै॑ सन्तु॒ योऽस्मान्द्वेष्टि॒ यं च॑ व॒यं द्वि॒ष्मः
dru̱pa̱dādi̍va mumucā̱naḥ svi̱nnaḥ snā̱to malā̍diva | pū̱taṃ pa̱vitre̍ṇe̱vājya̱māpa̍: śundhantu maina̍saḥ
||20.20||द्रु॒प॒दादि॑व मुमुचा॒नः स्वि॒न्नः स्ना॒तो मला॑दिव । पू॒तं प॒वित्रे॑णे॒वाज्य॒माप॑: शुन्धन्तु मैन॑सः
udva̱yaṃ tama̍sa̱spari̱ sva: paśya̍nta̱ utta̍ram | de̱vaṃ de̍va̱trā sūrya̱maga̍nma̱ jyoti̍rutta̱mam
||20.21||उद्व॒यं तम॑स॒स्परि॒ स्व: पश्य॑न्त॒ उत्त॑रम् । दे॒वं दे॑व॒त्रा सूर्य॒मग॑न्म॒ ज्योति॑रुत्त॒मम्
a̱po a̱dyānva̍cāriṣa rase̍na̱ sama̍sṛkṣmahi |
paya̍svānagna̱ ā'ga̍ma̱ṃ taṃ mā̱ sa sṛ̍ja̱ varca̍sā pra̱jayā̍ ca̱ dhane̍na ca
||20.22||अ॒पो अ॒द्यान्व॑चारिष॒ᳪ रसे॑न॒ सम॑सृक्ष्महि ।
पय॑स्वानग्न॒ आऽग॑मं॒ तं मा॒ सᳪ सृ॑ज॒ वर्च॑सा प्र॒जया॑ च॒ धने॑न च
edho̍'syedhiṣī̱mahi̍ sa̱mida̍si̱ tejo̍'si̱ tejo̱ mayi̍ dhehi |
sa̱māva̍varti pṛthi̱vī samu̱ṣāḥ samu̱ sūrya̍: | samu̱ viśva̍mi̱daṃ jaga̍t |
vai̱śvā̱na̱rajyo̍tirbhūyāsaṃ vi̱bhūn kāmā̱n vya̱śnavai̱ bhūḥ svāhā̍
||20.23||एधो॑ऽस्येधिषी॒महि॑ स॒मिद॑सि॒ तेजो॑ऽसि॒ तेजो॒ मयि॑ धेहि ।
स॒माव॑वर्ति पृथि॒वी समु॒षाः समु॒ सूर्य॑: । समु॒ विश्व॑मि॒दं जग॑त् ।
वै॒श्वा॒न॒रज्यो॑तिर्भूयासं वि॒भून् कामा॒न् व्य॒श्नवै॒ भूः स्वाहा॑
a̱bhyā da̍dhāmi sa̱midha̱magne̍ vratapate̱ tvayi̍ |
vra̱taṃ ca̍ śra̱ddhāṃ copai̍mī̱ndhe tvā̍ dīkṣi̱to a̱ham
||20.24||अ॒भ्या द॑धामि स॒मिध॒मग्ने॑ व्रतपते॒ त्वयि॑ ।
व्र॒तं च॑ श्र॒द्धां चोपै॑मी॒न्धे त्वा॑ दीक्षि॒तो अ॒हम्
yatra̱ brahma̍ ca kṣa̱traṃ ca̍ sa̱myañco̱ cara̍taḥ sa̱ha |
tam̐llo̱kaṃ puṇya̱ṃ prajñe̍ṣa̱ṃ yatra̍ de̱vāḥ sa̱hāgninā̍
||20.25||यत्र॒ ब्रह्म॑ च क्ष॒त्रं च॑ स॒म्यञ्चो॒ चर॑तः स॒ह ।
तँल्लो॒कं पुण्यं॒ प्रज्ञे॑षं॒ यत्र॑ दे॒वाः स॒हाग्निना॑
yatrendra̍śca vā̱yuśca̍ sa̱myañco̱ cara̍taḥ sa̱ha | tam̐llo̱kaṃ puṇya̱ṃ prajñe̍ṣa̱ṃ yatra̍ se̱dirna vi̱dyate̍
||20.26||यत्रेन्द्र॑श्च वा॒युश्च॑ स॒म्यञ्चो॒ चर॑तः स॒ह । तँल्लो॒कं पुण्यं॒ प्रज्ञे॑षं॒ यत्र॑ से॒दिर्न वि॒द्यते॑
aśunā̍ te aśuḥ pṛ̍cyatā̱ṃ paru̍ṣā̱ paru̍: | ga̱ndhaste̱ soma̍mavatu̱ madā̍ya̱ raso̱ acyu̍taḥ
||20.27||अ॒ᳪशुना॑ ते अ॒ᳪशुः पृ॑च्यतां॒ परु॑षा॒ परु॑: । ग॒न्धस्ते॒ सोम॑मवतु॒ मदा॑य॒ रसो॒ अच्यु॑तः
si̱ñcanti̱ pari̍ ṣiñca̱ntyutsi̍ñcanti pu̱nanti̍ ca | surā̍yai ba̱bhrvai̱ made̍ ki̱ntvo va̍dati ki̱ntvaḥ
||20.28||सि॒ञ्चन्ति॒ परि॑ षिञ्च॒न्त्युत्सि॑ञ्चन्ति पु॒नन्ति॑ च । सुरा॑यै ब॒भ्र्वै॒ मदे॑ कि॒न्त्वो व॑दति कि॒न्त्वः
dhā̱nāva̍ntaṃ kara̱mbhiṇa̍mapū̱pava̍ntamu̱kthina̍m | indra̍ prā̱tarju̍ṣasva naḥ
||20.29||धा॒नाव॑न्तं कर॒म्भिण॑मपू॒पव॑न्तमु॒क्थिन॑म् । इन्द्र॑ प्रा॒तर्जु॑षस्व नः
bṛ̱hadindrā̍ya gāyata̱ maru̍to vṛtra̱hanta̍mam | yena̱ jyoti̱raja̍nayannṛtā̱vṛdho̍ de̱vaṃ de̱vāya̱ jāgṛ̍vi
||20.30||बृ॒हदिन्द्रा॑य गायत॒ मरु॑तो वृत्र॒हन्त॑मम् । येन॒ ज्योति॒रज॑नयन्नृता॒वृधो॑ दे॒वं दे॒वाय॒ जागृ॑वि
adhva̍ryo̱ adri̍bhiḥ su̱ta soma̍ṃ pa̱vitra̱ ā na̍ya | pu̱nā̱hīndrā̍ya̱ pāta̍ve
||20.31||अध्व॑र्यो॒ अद्रि॑भिः सु॒तᳪ सोमं॑ प॒वित्र॒ आ न॑य । पु॒ना॒हीन्द्रा॑य॒ पात॑वे
yo bhū̱tānā̱madhi̍pati̱ryasmi̍m̐llo̱kā adhi̍ śri̱tāḥ |
ya īśe̍ maha̱to ma̱hām̐stena̍ gṛhṇāmi̱ tvāma̱haṃ mayi̍ gṛhṇāmi̱ tvāma̱ham
||20.32||यो भू॒ताना॒मधि॑पति॒र्यस्मिँ॑ल्लो॒का अधि॑ श्रि॒ताः ।
य ईशे॑ मह॒तो म॒हाँस्तेन॑ गृह्णामि॒ त्वाम॒हं मयि॑ गृह्णामि॒ त्वाम॒हम्
u̱pa̱yā̱magṛ̍hīto'sya̱śvibhyā̍ṃ tvā̱ sara̍svatyai̱ tvendrā̍ya tvā su̱trāmṇa̍ e̱ṣa te̱ yoni̍ra̱śvibhyā̍ṃ tvā̱ sara̍svatyai̱ tvendrā̍ya tvā su̱trāmṇe̍
||20.33||उ॒प॒या॒मगृ॑हीतोऽस्य॒श्विभ्यां॑ त्वा॒ सर॑स्वत्यै॒ त्वेन्द्रा॑य त्वा सु॒त्राम्ण॑ ए॒ष ते॒ योनि॑र॒श्विभ्यां॑ त्वा॒ सर॑स्वत्यै॒ त्वेन्द्रा॑य त्वा सु॒त्राम्णे॑
prā̱ṇa̱pā me̍ apāna̱pāśca̍kṣu̱ṣpāḥ śro̍tra̱pāśca̍ me |
vāco̍ me vi̱śvabhe̍ṣajo̱ mana̍so'si vi̱lāya̍kaḥ
||20.34||प्रा॒ण॒पा मे॑ अपान॒पाश्च॑क्षु॒ष्पाः श्रो॑त्र॒पाश्च॑ मे ।
वाचो॑ मे वि॒श्वभे॑षजो॒ मन॑सोऽसि वि॒लाय॑कः
a̱śvina̍kṛtasya te̱ sara̍svatikṛta̱syendre̍ṇa su̱trāmṇā̍ kṛ̱tasya̍ |
upa̍hūta̱ upa̍hūtasya bhakṣayāmi
||20.35||अ॒श्विन॑कृतस्य ते॒ सर॑स्वतिकृत॒स्येन्द्रे॑ण सु॒त्राम्णा॑ कृ॒तस्य॑ ।
उप॑हूत॒ उप॑हूतस्य भक्षयामि
sami̍ddha̱ indra̍ u̱ṣasā̱manī̍ke puro̱rucā̍ pūrva̱kṛdvā̍vṛdhā̱naḥ |
tri̱bhirde̱vaistriśatā̱ vajra̍bāhurja̱ghāna̍ vṛ̱traṃ vi duro̍ vavāra
||20.36||समि॑द्ध॒ इन्द्र॑ उ॒षसा॒मनी॑के पुरो॒रुचा॑ पूर्व॒कृद्वा॑वृधा॒नः ।
त्रि॒भिर्दे॒वैस्त्रि॒ᳪशता॒ वज्र॑बाहुर्ज॒घान॑ वृ॒त्रं वि दुरो॑ ववार
narā̱śasa̱: prati̱ śūro̱ mimā̍na̱stanū̱napā̱tprati̍ ya̱jñasya̱ dhāma̍ |
gobhi̍rva̱pāvā̱n madhu̍nā sama̱ñjan hira̍ṇyaiśca̱ndrī ya̍jati̱ prace̍tāḥ
||20.37||नरा॒शᳪस॒: प्रति॒ शूरो॒ मिमा॑न॒स्तनू॒नपा॒त्प्रति॑ य॒ज्ञस्य॒ धाम॑ ।
गोभि॑र्व॒पावा॒न् मधु॑ना सम॒ञ्जन् हिर॑ण्यैश्च॒न्द्री य॑जति॒ प्रचे॑ताः
ī̱ḍi̱to de̱vairhari̍vām̐2 abhi̱ṣṭirā̱juhvā̍no ha̱viṣā̱ śardha̍mānaḥ |
pu̱ra̱nda̱ro go̍ta̱bhidvajra̍bāhu̱rā yā̍tu ya̱jñamupa̍ no juṣā̱ṇaḥ
||20.38||ई॒डि॒तो दे॒वैर्हरि॑वाँ२ अभि॒ष्टिरा॒जुह्वा॑नो ह॒विषा॒ शर्ध॑मानः ।
पु॒र॒न्द॒रो गो॑त॒भिद्वज्र॑बाहु॒रा या॑तु य॒ज्ञमुप॑ नो जुषा॒णः
ju̱ṣā̱ṇo ba̱rhirhari̍vān na̱ indra̍: prā̱cīna sīdat pra̱diśā̍ pṛthi̱vyāḥ |
u̱ru̱prathā̱: pratha̍māna syo̱namā̍di̱tyaira̱ktaṃ vasu̍bhiḥ sa̱joṣā̍:
||20.39||जु॒षा॒णो ब॒र्हिर्हरि॑वान् न॒ इन्द्र॑: प्रा॒चीन॑ᳪ सीदत् प्र॒दिशा॑ पृथि॒व्याः ।
उ॒रु॒प्रथा॒: प्रथ॑मानᳪ स्यो॒नमा॑दि॒त्यैर॒क्तं वसु॑भिः स॒जोषा॑:
indra̱ṃ dura̍: kava̱ṣyo dhāva̍mānā̱ vṛṣā̍ṇaṃ yantu̱ jana̍yaḥ su̱patnī̍: |
dvāro̍ de̱vīra̱bhito̱ vi śra̍yantā su̱vīrā̍ vī̱raṃ pratha̍mānā̱ maho̍bhiḥ
||20.40||इन्द्रं॒ दुर॑: कव॒ष्यो धाव॑माना॒ वृषा॑णं यन्तु॒ जन॑यः सु॒पत्नी॑: ।
द्वारो॑ दे॒वीर॒भितो॒ वि श्र॑यन्ताᳪ सु॒वीरा॑ वी॒रं प्रथ॑माना॒ महो॑भिः
u̱ṣāsā̱naktā̍ bṛha̱tī bṛ̱hanta̱ṃ paya̍svatī su̱dughe̱ śūra̱mindra̍m |
tantu̍ṃ ta̱taṃ peśa̍sā sa̱ṃvaya̍ntī de̱vānā̍ṃ de̱vaṃ ya̍jataḥ suru̱kme
||20.41||उ॒षासा॒नक्ता॑ बृह॒ती बृ॒हन्तं॒ पय॑स्वती सु॒दुघे॒ शूर॒मिन्द्र॑म् ।
तन्तुं॑ त॒तं पेश॑सा सं॒वय॑न्ती दे॒वानां॑ दे॒वं य॑जतः सुरु॒क्मे
daivyā̱ mimā̍nā̱ manu̍ṣaḥ puru̱trā hotā̍rā̱vindra̍ṃ pratha̱mā su̱vācā̍ |
mū̱rdhan ya̱jñasya̱ madhu̍nā̱ dadhā̍nā prā̱cīna̱ṃ jyoti̍rha̱viṣā̍ vṛdhātaḥ
||20.42||दैव्या॒ मिमा॑ना॒ मनु॑षः पुरु॒त्रा होता॑रा॒विन्द्रं॑ प्रथ॒मा सु॒वाचा॑ ।
मू॒र्धन् य॒ज्ञस्य॒ मधु॑ना॒ दधा॑ना प्रा॒चीनं॒ ज्योति॑र्ह॒विषा॑ वृधातः
ti̱sro de̱vīrha̱viṣā̱ vardha̍mānā̱ indra̍ṃ juṣā̱ṇā jana̍yo̱ na patnī̍: |
acchi̍nna̱ṃ tantu̱ṃ paya̍sā̱ sara̍sva̱tīḍā̍ de̱vī bhāra̍tī vi̱śvatū̍rtiḥ
||20.43||ति॒स्रो दे॒वीर्ह॒विषा॒ वर्ध॑माना॒ इन्द्रं॑ जुषा॒णा जन॑यो॒ न पत्नी॑: ।
अच्छि॑न्नं॒ तन्तुं॒ पय॑सा॒ सर॑स्व॒तीडा॑ दे॒वी भार॑ती वि॒श्वतू॑र्तिः
tvaṣṭā̱ dadha̱cchuṣma̱mindrā̍ya̱ vṛṣṇe'pā̱ko'ci̍ṣṭurya̱śase̍ pu̱rūṇi̍ |
vṛṣā̱ yaja̱nvṛṣa̍ṇa̱ṃ bhūri̍retā mū̱rdhan ya̱jñasya̱ sama̍naktu de̱vān
||20.44||त्वष्टा॒ दध॒च्छुष्म॒मिन्द्रा॑य॒ वृष्णेऽपा॒कोऽचि॑ष्टुर्य॒शसे॑ पु॒रूणि॑ ।
वृषा॒ यज॒न्वृष॑णं॒ भूरि॑रेता मू॒र्धन् य॒ज्ञस्य॒ सम॑नक्तु दे॒वान्
vana̱spati̱rava̍sṛṣṭo̱ na pāśai̱stmanyā̍ sama̱ñjañcha̍mi̱tā na de̱vaḥ |
indra̍sya ha̱vyairja̱ṭhara̍ṃ pṛṇā̱naḥ svadā̍ti ya̱jñaṃ madhu̍nā ghṛ̱tena̍
||20.45||वन॒स्पति॒रव॑सृष्टो॒ न पाशै॒स्त्मन्या॑ सम॒ञ्जञ्छ॑मि॒ता न दे॒वः ।
इन्द्र॑स्य ह॒व्यैर्ज॒ठरं॑ पृणा॒नः स्वदा॑ति य॒ज्ञं मधु॑ना घृ॒तेन॑
sto̱kānā̱mindu̱ṃ prati̱ śūra̱ indro̍ vṛṣā̱yamā̍ṇo vṛṣa̱bhastu̍rā̱ṣāṭ |
ghṛ̱ta̱pruṣā̱ mana̍sā̱ moda̍mānā̱: svāhā̍ de̱vā a̱mṛtā̍ mādayantām
||20.46||स्तो॒काना॒मिन्दुं॒ प्रति॒ शूर॒ इन्द्रो॑ वृषा॒यमा॑णो वृष॒भस्तु॑रा॒षाट् ।
घृ॒त॒प्रुषा॒ मन॑सा॒ मोद॑माना॒: स्वाहा॑ दे॒वा अ॒मृता॑ मादयन्ताम्
ā yā̱tvindro'va̍sa̱ upa̍ na i̱ha stu̱taḥ sa̍dha̱mada̍stu̱ śūra̍: |
vā̱vṛ̱dhā̱nastavi̍ṣī̱ryasya̍ pū̱rvīrdyaurna kṣa̱trama̱bhibhū̍ti̱ puṣyā̍t
||20.47||आ या॒त्विन्द्रोऽव॑स॒ उप॑ न इ॒ह स्तु॒तः स॑ध॒मद॑स्तु॒ शूर॑: ।
वा॒वृ॒धा॒नस्तवि॑षी॒र्यस्य॑ पू॒र्वीर्द्यौर्न क्ष॒त्रम॒भिभू॑ति॒ पुष्या॑त्
ā na̱ indro̍ dū̱rādā na̍ ā̱sāda̍bhiṣṭi̱kṛdava̍se yāsadu̱graḥ |
oji̍ṣṭhebhirnṛ̱pati̱rvajra̍bāhuḥ sa̱ṅge sa̱matsu̍ tu̱rvaṇi̍: pṛta̱nyūn
||20.48||आ न॒ इन्द्रो॑ दू॒रादा न॑ आ॒साद॑भिष्टि॒कृदव॑से यासदु॒ग्रः ।
ओजि॑ष्ठेभिर्नृ॒पति॒र्वज्र॑बाहुः स॒ङ्गे स॒मत्सु॑ तु॒र्वणि॑: पृत॒न्यून्
ā na̱ indro̱ hari̍bhiryā̱tvacchā̍rvācī̱no'va̍se̱ rādha̍se ca |
tiṣṭhā̍ti va̱jrī ma̱ghavā̍ vira̱pśīmaṃ ya̱jñamanu̍ no̱ vāja̍sātau
||20.49||आ न॒ इन्द्रो॒ हरि॑भिर्या॒त्वच्छा॑र्वाची॒नोऽव॑से॒ राध॑से च ।
तिष्ठा॑ति व॒ज्री म॒घवा॑ विर॒प्शीमं य॒ज्ञमनु॑ नो॒ वाज॑सातौ
trā̱tāra̱mindra̍mavi̱tāra̱mindra have̍ – have su̱hava śūra̱mindra̍m |
hvayā̍mi śa̱kraṃ pu̍ruhū̱tamindra sva̱sti no̍ ma̱ghavā̍ dhā̱tvindra̍:
||20.50||त्रा॒तार॒मिन्द्र॑मवि॒तार॒मिन्द्र॒ᳪ हवे॑ – हवे सु॒हव॒ᳪ शूर॒मिन्द्र॑म् ।
ह्वया॑मि श॒क्रं पु॑रुहू॒तमिन्द्र॑ᳪ स्व॒स्ति नो॑ म॒घवा॑ धा॒त्विन्द्र॑:
indra̍: su̱trāmā̱ svavā̱m̐2 avo̍bhiḥ sumṛḍī̱ko bha̍vatu vi̱śvave̍dāḥ |
bādha̍tā̱ṃ dveṣo̱ abha̍yaṃ kṛṇotu su̱vīrya̍sya̱ pata̍yaḥ syāma
||20.51||इन्द्र॑: सु॒त्रामा॒ स्ववाँ॒२ अवो॑भिः सुमृडी॒को भ॑वतु वि॒श्ववे॑दाः ।
बाध॑तां॒ द्वेषो॒ अभ॑यं कृणोतु सु॒वीर्य॑स्य॒ पत॑यः स्याम
tasya̍ va̱ya su̍ma̱tau ya̱jñiya̱syāpi̍ bha̱dre sau̍mana̱se syā̍ma |
sa su̱trāmā̱ svavā̱m̐2 indro̍ a̱sme ā̱rācci̱d dveṣa̍: sanu̱taryu̍yotu
||20.52||तस्य॑ व॒यᳪ सु॑म॒तौ य॒ज्ञिय॒स्यापि॑ भ॒द्रे सौ॑मन॒से स्या॑म ।
स सु॒त्रामा॒ स्ववाँ॒२ इन्द्रो॑ अ॒स्मे आ॒राच्चि॒द् द्वेष॑: सनु॒तर्यु॑योतु
ā ma̱ndrairi̍ndra̱ hari̍bhiryā̱hi ma̱yūra̍romabhiḥ |
mā tvā̱ ke ci̱nni ya̍ma̱n viṃ nā pā̱śino'ti̱ dhanve̍va̱ tām̐2 i̍hi
||20.53||आ म॒न्द्रैरि॑न्द्र॒ हरि॑भिर्या॒हि म॒यूर॑रोमभिः ।
मा त्वा॒ के चि॒न्नि य॑म॒न् विं ना पा॒शिनोऽति॒ धन्वे॑व॒ ताँ२ इ॑हि
e̱vedindra̱ṃ vṛṣa̍ṇa̱ṃ vajra̍bāhu̱ṃ vasi̍ṣṭhāso a̱bhya̱rcantya̱rkaiḥ |
sa na̍ stu̱to vī̱rava̍ddhātu̱ goma̍dyū̱yaṃ pā̍ta sva̱stibhi̱: sadā̍ naḥ
||20.54||ए॒वेदिन्द्रं॒ वृष॑णं॒ वज्र॑बाहुं॒ वसि॑ष्ठासो अ॒भ्य॒र्चन्त्य॒र्कैः ।
स न॑ स्तु॒तो वी॒रव॑द्धातु॒ गोम॑द्यू॒यं पा॑त स्व॒स्तिभि॒: सदा॑ नः
sami̍ddho a̱gnira̍śvinā ta̱pto gha̱rmo vi̱rāṭ su̱taḥ | du̱he dhe̱nuḥ sara̍svatī̱ soma śu̱krami̱hendri̱yam
||20.55||समि॑द्धो अ॒ग्निर॑श्विना त॒प्तो घ॒र्मो वि॒राट् सु॒तः । दु॒हे धे॒नुः सर॑स्वती॒ सोम॑ᳪ शु॒क्रमि॒हेन्द्रि॒यम्
ta̱nū̱pā bhi̱ṣajā̍ su̱te'śvino̱bhā sara̍svatī | madhvā̱ rajāsīndri̱yamindrā̍ya pa̱thibhi̍rvahān
||20.56||त॒नू॒पा भि॒षजा॑ सु॒तेऽश्विनो॒भा सर॑स्वती । मध्वा॒ रजा॑ᳪसीन्द्रि॒यमिन्द्रा॑य प॒थिभि॑र्वहान्
indrā̱yendu sara̍svatī̱ narā̱śase̍na na̱gnahu̍m | adhā̍tāma̱śvinā̱ madhu̍ bheṣa̱jaṃ bhi̱ṣajā̍ su̱te
||20.57||इन्द्रा॒येन्दु॒ᳪ सर॑स्वती॒ नरा॒शᳪसे॑न न॒ग्नहु॑म् । अधा॑ताम॒श्विना॒ मधु॑ भेष॒जं भि॒षजा॑ सु॒ते
ā̱juhvā̍nā̱ sara̍sva̱tīndrā̍yendri̱yāṇi̍ vī̱rya̱m | iḍā̍bhira̱śvinā̱viṣa samūrja sa ra̱yiṃ da̍dhuḥ
||20.58||आ॒जुह्वा॑ना॒ सर॑स्व॒तीन्द्रा॑येन्द्रि॒याणि॑ वी॒र्य॒म् । इडा॑भिर॒श्विना॒विष॒ᳪ समूर्ज॒ᳪ सᳪ र॒यिं द॑धुः
a̱śvinā̱ namu̍ceḥ su̱ta soma śu̱kraṃ pa̍ri̱srutā̍ | sara̍svatī̱ tamā 'bha̍radba̱rhiṣendrā̍ya̱ pāta̍ve
||20.59||अ॒श्विना॒ नमु॑चेः सु॒तᳪ सोम॑ᳪ शु॒क्रं प॑रि॒स्रुता॑ । सर॑स्वती॒ तमा ऽभ॑रद्ब॒र्हिषेन्द्रा॑य॒ पात॑वे
ka̱va̱ṣyo na̱ vyaca̍svatīra̱śvibhyā̱ṃ na duro̱ diśa̍: | indro̱ na roda̍sī u̱bhe du̱he kā̱māntsara̍svatī
||20.60||क॒व॒ष्यो न॒ व्यच॑स्वतीर॒श्विभ्यां॒ न दुरो॒ दिश॑: । इन्द्रो॒ न रोद॑सी उ॒भे दु॒हे का॒मान्त्सर॑स्वती
u̱ṣāsā̱nakta̍maśvinā̱ divendra̍ sā̱yami̍ndriyaiḥ | sa̱ñjā̱nā̱ne su̱peśa̍sā̱ sama̍ñjāte̱ sara̍svatyā
||20.61||उ॒षासा॒नक्त॑मश्विना॒ दिवेन्द्र॑ सा॒यमि॑न्द्रियैः । स॒ञ्जा॒ना॒ने सु॒पेश॑सा॒ सम॑ञ्जाते॒ सर॑स्वत्या
pā̱taṃ no̍ aśvinā̱ divā̍ pā̱hi nakta sarasvati | daivyā̍ hotārā bhiṣajā pā̱tamindra sacā̍ su̱te
||20.62||पा॒तं नो॑ अश्विना॒ दिवा॑ पा॒हि नक्त॑ᳪ सरस्वति । दैव्या॑ होतारा भिषजा पा॒तमिन्द्र॒ᳪ सचा॑ सु॒ते
ti̱srastre̱dhā sara̍svatya̱śvinā̱ bhāra̱tīḍā̍ | tī̱vraṃ pa̍ri̱srutā̱ soma̱mindrā̍ya suṣuvu̱rmada̍m
||20.63||ति॒स्रस्त्रे॒धा सर॑स्वत्य॒श्विना॒ भार॒तीडा॑ । ती॒व्रं प॑रि॒स्रुता॒ सोम॒मिन्द्रा॑य सुषुवु॒र्मद॑म्
a̱śvinā̍ bheṣa̱jaṃ madhu̍ bheṣa̱jaṃ na̱: sara̍svatī | indre̱ tvaṣṭā̱ yaśa̱: śriya rū̱pa-rū̍pamadhuḥ su̱te
||20.64||अ॒श्विना॑ भेष॒जं मधु॑ भेष॒जं न॒: सर॑स्वती । इन्द्रे॒ त्वष्टा॒ यश॒: श्रिय॑ᳪ रू॒पᳪ-रू॑पमधुः सु॒ते
ṛ̱tu̱thendro̱ vana̱spati̍: śaśamā̱naḥ pa̍ri̱srutā̍ | kī̱lāla̍ma̱śvibhyā̱ṃ madhu̍ du̱he dhe̱nuḥ sara̍svatī
||20.65||ऋ॒तु॒थेन्द्रो॒ वन॒स्पति॑: शशमा॒नः प॑रि॒स्रुता॑ । की॒लाल॑म॒श्विभ्यां॒ मधु॑ दु॒हे धे॒नुः सर॑स्वती
gobhi̱rna soma̍maśvinā̱ māsa̍reṇa pari̱srutā̍ | sama̍dhāta sara̍svatyā̱ svāhendre̍ su̱taṃ madhu̍
||20.66||गोभि॒र्न सोम॑मश्विना॒ मास॑रेण परि॒स्रुता॑ । सम॑धात॒ᳪ सर॑स्वत्या॒ स्वाहेन्द्रे॑ सु॒तं मधु॑
a̱śvinā̍ ha̱viri̍ndri̱yaṃ namu̍cerdhi̱yā sara̍svatī | ā śu̱kramā̍su̱rādvasu̍ ma̱ghamindrā̍ya jabhrire
||20.67||अ॒श्विना॑ ह॒विरि॑न्द्रि॒यं नमु॑चेर्धि॒या सर॑स्वती । आ शु॒क्रमा॑सु॒राद्वसु॑ म॒घमिन्द्रा॑य जभ्रिरे
yama̱śvinā̱ sara̍svatī ha̱viṣendra̱mava̍rdhayan | sa bi̍bheda va̱laṃ ma̱ghaṃ namu̍cāvāsu̱re sacā̍
||20.68||यम॒श्विना॒ सर॑स्वती ह॒विषेन्द्र॒मव॑र्धयन् । स बि॑भेद व॒लं म॒घं नमु॑चावासु॒रे सचा॑
tamindra̍ṃ pa̱śava̱: sacā̱śvino̱bhā sara̍svatī | dadhā̍nā a̱bhya̱nūṣata ha̱viṣā̍ ya̱jña i̍ndri̱yaiḥ
||20.69||तमिन्द्रं॑ प॒शव॒: सचा॒श्विनो॒भा सर॑स्वती । दधा॑ना अ॒भ्य॒नूषत ह॒विषा॑ य॒ज्ञ इ॑न्द्रि॒यैः
ya indra̍ indri̱yaṃ da̱dhuḥ sa̍vi̱tā varu̍ṇo̱ bhaga̍: | sa su̱trāmā̍ ha̱viṣpa̍ti̱ryaja̍mānāya saścata
||20.70||य इन्द्र॑ इन्द्रि॒यं द॒धुः स॑वि॒ता वरु॑णो॒ भग॑: । स सु॒त्रामा॑ ह॒विष्प॑ति॒र्यज॑मानाय सश्चत
sa̱vi̱tā varu̍ṇo dadha̱dyaja̍mānāya dā̱śuṣe̍ | āda̍tta̱ namu̍ce̱rvasu̍ su̱trāmā̱ bala̍mindri̱yam
||20.71||स॒वि॒ता वरु॑णो दध॒द्यज॑मानाय दा॒शुषे॑ । आद॑त्त॒ नमु॑चे॒र्वसु॑ सु॒त्रामा॒ बल॑मिन्द्रि॒यम्
varu̍ṇaḥ kṣa̱trami̍ndri̱yaṃ bhage̍na savi̱tā śriya̍m | su̱trāmā̱ yaśa̍sā̱ bala̱ṃ dadhā̍nā ya̱jñamā̍śata
||20.72||वरु॑णः क्ष॒त्रमि॑न्द्रि॒यं भगे॑न सवि॒ता श्रिय॑म् । सु॒त्रामा॒ यश॑सा॒ बलं॒ दधा॑ना य॒ज्ञमा॑शत
a̱śvinā̱ gobhi̍rindri̱yamaśve̍bhirvī̱ryaṃ bala̍m | ha̱viṣendra sara̍svatī̱ yaja̍mānamavardhayan
||20.73||अ॒श्विना॒ गोभि॑रिन्द्रि॒यमश्वे॑भिर्वी॒र्यं बल॑म् । ह॒विषेन्द्र॒ᳪ सर॑स्वती॒ यज॑मानमवर्धयन्
tā nāsa̍tyā su̱peśa̍sā̱ hira̍ṇyavartanī̱ narā̍ | sara̍svatī ha̱viṣma̱tīndra̱ karma̍su no'vata
||20.74||ता नास॑त्या सु॒पेश॑सा॒ हिर॑ण्यवर्तनी॒ नरा॑ । सर॑स्वती ह॒विष्म॒तीन्द्र॒ कर्म॑सु नोऽवत
tā bhi̱ṣajā̍ su̱karma̍ṇā̱ sā su̱dughā̱ sara̍svatī | sa vṛ̍tra̱hā śa̱takra̍tu̱rindrā̍ya dadhurindri̱yam
||20.75||ता भि॒षजा॑ सु॒कर्म॑णा॒ सा सु॒दुघा॒ सर॑स्वती । स वृ॑त्र॒हा श॒तक्र॑तु॒रिन्द्रा॑य दधुरिन्द्रि॒यम्
yu̱va su̱rāma̍maśvinā̱ namu̍cāvāsu̱re sacā̍ | vi̱pi̱pā̱nāḥ sara̍sva̱tīndra̱ṃ karma̍svāvata
||20.76||यु॒वᳪ सु॒राम॑मश्विना॒ नमु॑चावासु॒रे सचा॑ । वि॒पि॒पा॒नाः सर॑स्व॒तीन्द्रं॒ कर्म॑स्वावत
pu̱trami̍va pi̱tarā̍va̱śvino̱bhendrā̱vathu̱: kāvyai̍rdasanā̍bhiḥ |yatsu̱rāma̱ṃ vyapi̍ba̱: śacī̍bhi̱: sara̍svatī tvā maghavannabhiṣṇak
||20.77||पु॒त्रमि॑व पि॒तरा॑व॒श्विनो॒भेन्द्रा॒वथु॒: काव्यै॑र्द॒ᳪसना॑भिः ।यत्सु॒रामं॒ व्यपि॑ब॒: शची॑भि॒: सर॑स्वती त्वा मघवन्नभिष्णक्
yasmi̱nnaśvā̍sa ṛṣa̱bhāsa̍ u̱kṣaṇo̍ va̱śā me̱ṣā a̍vasṛ̱ṣṭāsa̱ āhu̍tāḥ |
kī̱lā̱la̱pe soma̍pṛṣṭhāya ve̱dhase̍ hṛ̱dā ma̱tiṃ ja̍naya̱ cāru̍ma̱gnaye̍
||20.78||यस्मि॒न्नश्वा॑स ऋष॒भास॑ उ॒क्षणो॑ व॒शा मे॒षा अ॑वसृ॒ष्टास॒ आहु॑ताः ।
की॒ला॒ल॒पे सोम॑पृष्ठाय वे॒धसे॑ हृ॒दा म॒तिं ज॑नय॒ चारु॑म॒ग्नये॑
ahā̍vyagne ha̱virā̱sye̱ te sru̱cī̱va ghṛ̱taṃ ca̱mvī̱va̱ soma̍: |
vā̱ja̱sani ra̱yima̱sme su̱vīra̍ṃ praśa̱staṃ dhe̍hi ya̱śasa̍ṃ bṛ̱hanta̍m
||20.79||अहा॑व्यग्ने ह॒विरा॒स्ये॒ ते स्रु॒ची॒व घृ॒तं च॒म्वी॒व॒ सोम॑: ।
वा॒ज॒सनि॑ᳪ र॒यिम॒स्मे सु॒वीरं॑ प्रश॒स्तं धे॑हि य॒शसं॑ बृ॒हन्त॑म्
a̱śvinā̱ teja̍sā̱ cakṣu̍: prā̱ṇena̱ sara̍svatī vī̱rya̱m | vā̱cendro̱ bale̱nendrā̍ya dadhurindri̱yam
||20.80||अ॒श्विना॒ तेज॑सा॒ चक्षु॑: प्रा॒णेन॒ सर॑स्वती वी॒र्य॒म् । वा॒चेन्द्रो॒ बले॒नेन्द्रा॑य दधुरिन्द्रि॒यम्
goma̍dū̱ ṣu ṇā̍satyā̱śvā̍vadyātamaśvinā | va̱rtī ru̍drā nṛ̱pāyya̍m
||20.81||गोम॑दू॒ षु णा॑सत्या॒श्वा॑वद्यातमश्विना । व॒र्ती रु॑द्रा नृ॒पाय्य॑म्
na yatparo̱ nānta̍ra āda̱dharṣa̍dvṛṣaṇvasū | du̱:śaso̱ martyo̍ ri̱puḥ
||20.82||न यत्परो॒ नान्त॑र आद॒धर्ष॑द्वृषण्वसू । दु॒:शᳪसो॒ मर्त्यो॑ रि॒पुः
tā na̱ ā vo̍ḍhamaśvinā ra̱yiṃ pi̱śaṅga̍saṃdṛśam | dhiṣṇyā̍ varivo̱vida̍m
||20.83||ता न॒ आ वो॑ढमश्विना र॒यिं पि॒शङ्ग॑संदृशम् । धिष्ण्या॑ वरिवो॒विद॑म्
pā̱va̱kā na̱: sara̍svatī̱ vāje̍bhirvā̱jinī̍vatī | ya̱jñaṃ va̍ṣṭu dhi̱yāva̍suḥ
||20.84||पा॒व॒का न॒: सर॑स्वती॒ वाजे॑भिर्वा॒जिनी॑वती । य॒ज्ञं व॑ष्टु धि॒याव॑सुः
co̱da̱yi̱trī sū̱nṛtā̍nā̱ṃ ceta̍ntī sumatī̱nām | ya̱jñaṃ da̍dhe̱ sara̍svatī
||20.85||चो॒द॒यि॒त्री सू॒नृता॑नां॒ चेत॑न्ती सुमती॒नाम् । य॒ज्ञं द॑धे॒ सर॑स्वती
ma̱ho arṇa̱: sara̍svatī̱ pra ce̍tayati ke̱tunā̍ | dhiyo̱ viśvā̱ vi rā̍jati
||20.86||म॒हो अर्ण॒: सर॑स्वती॒ प्र चे॑तयति के॒तुना॑ । धियो॒ विश्वा॒ वि रा॑जति
indrā yā̍hi citrabhāno su̱tā i̱me tvā̱yava̍: | aṇvī̍bhi̱stanā̍ pū̱tāsa̍:
||20.87||इन्द्रा या॑हि चित्रभानो सु॒ता इ॒मे त्वा॒यव॑: । अण्वी॑भि॒स्तना॑ पू॒तास॑:
indrā yā̍hi dhi̱yeṣi̱to vipra̍jūtaḥ su̱tāva̍taḥ | upa̱ brahmā̍ṇi vā̱ghata̍:
||20.88||इन्द्रा या॑हि धि॒येषि॒तो विप्र॑जूतः सु॒ताव॑तः । उप॒ ब्रह्मा॑णि वा॒घत॑:
indrā yā̍hi̱ tūtu̍jāna̱ upa̱ brahmā̍ṇi harivaḥ | su̱te da̍dhiṣva na̱ścana̍:
||20.89||इन्द्रा या॑हि॒ तूतु॑जान॒ उप॒ ब्रह्मा॑णि हरिवः । सु॒ते द॑धिष्व न॒श्चन॑:
a̱śvinā̍ pibatā̱ṃ madhu̱ sara̍svatyā sa̱joṣa̍sā |
indra̍: su̱trāmā̍ vṛtra̱hā ju̱ṣantā so̱myaṃ madhu̍
||20.90||अ॒श्विना॑ पिबतां॒ मधु॒ सर॑स्वत्या स॒जोष॑सा ।
इन्द्र॑: सु॒त्रामा॑ वृत्र॒हा जु॒षन्ता॑ᳪ सो॒म्यं मधु॑