a̱gnesta̱nūra̍si̱ viṣṇa̍ve tvā̱ soma̍sya ta̱nūra̍si̱ viṣṇa̍ve̱ tvā 'ti̍therāti̱thyama̍si̱ viṣṇa̍ve tvā śye̱nāya̍ tvā soma̱bhṛte̱ viṣṇa̍ve tvā̱'gnaye̍ tvā rāyaspoṣa̱de viṣṇa̍ve tvā
||5.1||अ॒ग्नेस्त॒नूर॑सि॒ विष्ण॑वे त्वा॒ सोम॑स्य त॒नूर॑सि॒ विष्ण॑वे॒ त्वा ऽति॑थेराति॒थ्यम॑सि॒ विष्ण॑वे त्वा श्ये॒नाय॑ त्वा सोम॒भृते॒ विष्ण॑वे त्वा॒ऽग्नये॑ त्वा रायस्पोष॒दे विष्ण॑वे त्वा
a̱gnerja̱nitra̍masi vṛṣa̍ṇau stha u̱rvaśya̍syā̱yura̍si purū̱ravā̍ asi | gā̱ya̱treṇa̍ tvā̱ chanda̍sā manthāmi̱ trai̍ṣṭubhena tvā̱ chanda̍sā manthāmi̱ jāga̍tena tvā̱ chanda̍sā manthāmi
||5.2||अ॒ग्नेर्ज॒नित्र॑मसि वृष॑णौ स्थ उ॒र्वश्य॑स्या॒युर॑सि पुरू॒रवा॑ असि । गा॒य॒त्रेण॑ त्वा॒ छन्द॑सा मन्थामि॒ त्रै॑ष्टुभेन त्वा॒ छन्द॑सा मन्थामि॒ जाग॑तेन त्वा॒ छन्द॑सा मन्थामि
bhava̍taṃ na̱: sama̍nasau̱ sace̍tasāvare̱pasau̍ | mā ya̱jña hisiṣṭa̱ṃ mā ya̱jñapa̍tiṃ jātavedasau śivau bha̍vatama̱dya na̍:
||5.3||भव॑तं न॒: सम॑नसौ॒ सचे॑तसावरे॒पसौ॑ । मा य॒ज्ञᳪ हि॑ᳪसिष्टं॒ मा य॒ज्ञप॑तिं जातवेदसौ शिवौ भ॑वतम॒द्य न॑:
a̱gnāva̱gniśca̍rati̱ pravi̍ṣṭa̱ ṛṣī̍ṇāṃ pu̱tro a̍bhiśasti̱pāvā̍ | sa na̍: syo̱naḥ su̱yajā̍ yaje̱ha de̱vebhyo̍ ha̱vya sada̱mapra̍yuccha̱ntsvāhā̍
||5.4||अ॒ग्नाव॒ग्निश्च॑रति॒ प्रवि॑ष्ट॒ ऋषी॑णां पु॒त्रो अ॑भिशस्ति॒पावा॑ । स न॑: स्यो॒नः सु॒यजा॑ यजे॒ह दे॒वेभ्यो॑ ह॒व्यᳪ सद॒मप्र॑युच्छ॒न्त्स्वाहा॑
āpa̍taye tvā̱ pari̍pataye gṛhṇāmi̱ tanū̱naptre̍ śākva̱rāya̱ śakva̍na̱ oji̍ṣṭhāya | anā̍dhṛṣṭamasyanādhṛ̱ṣyaṃ de̱vānā̱mojo'na̍bhiśastyabhiśasti̱pā a̍nabhiśaste̱nyamañja̍sā sa̱tyamupa̍geṣa svi̱te mā̍ dhāḥ
||5.5||आप॑तये त्वा॒ परि॑पतये गृह्णामि॒ तनू॒नप्त्रे॑ शाक्व॒राय॒ शक्व॑न॒ ओजि॑ष्ठाय । अना॑धृष्टमस्यनाधृ॒ष्यं दे॒वाना॒मोजोऽन॑भिशस्त्यभिशस्ति॒पा अ॑नभिशस्ते॒न्यमञ्ज॑सा स॒त्यमुप॑गेषᳪ स्वि॒ते मा॑ धाः
agne̍ vratapā̱stve vra̍ta̱pā yā tava̍ ta̱nūri̱ya sā mayi̱ yo mama̍ ta̱nūre̱ṣā sā tvayi̍ | sa̱ha nau̍ vratapate vra̱tānyanu̍ me dī̱kṣāṃ dī̱kṣāpa̍ti̱rmanya̍tā̱manu̱ tapa̱stapa̍spatiḥ
||5.6||अग्ने॑ व्रतपा॒स्त्वे व्र॑त॒पा या तव॑ त॒नूरि॒यᳪ सा मयि॒ यो मम॑ त॒नूरे॒षा सा त्वयि॑ । स॒ह नौ॑ व्रतपते व्र॒तान्यनु॑ मे दी॒क्षां दी॒क्षाप॑ति॒र्मन्य॑ता॒मनु॒ तप॒स्तप॑स्पतिः
a̱jśuraśuṣṭe deva so̱māpyā̍yatā̱mindrā̍yaikadhana̱vide̍ | ā tubhya̱mindra̱: pyāya̍tā̱mā tvamindrā̍ya pyāyasva | ā pyā̍yayā̱smāntsakhī̍ntsa̱nyā me̱dhayā̍ sva̱sti te̍ deva soma su̱tyāma̍śīya | eṣṭā̱ rāya̱: preṣe bhagā̍ya ṛ̱tamṛ̍tavā̱dibhyo̱ namo̱ dyāvā̍pṛthi̱vībhyā̍m
||5.7||अ॒jशुर॑ᳪशुष्टे देव सो॒माप्या॑यता॒मिन्द्रा॑यैकधन॒विदे॑ । आ तुभ्य॒मिन्द्र॒: प्याय॑ता॒मा त्वमिन्द्रा॑य प्यायस्व । आ प्या॑यया॒स्मान्त्सखी॑न्त्स॒न्या मे॒धया॑ स्व॒स्ति ते॑ देव सोम सु॒त्याम॑शीय । एष्टा॒ राय॒: प्रेषे भगा॑य ऋ॒तमृ॑तवा॒दिभ्यो॒ नमो॒ द्यावा॑पृथि॒वीभ्या॑म्
yā te̍ agne'yaḥśa̱yā ta̱nūrvarṣi̍ṣṭhā gahvare̱ṣṭhā | u̱graṃ vaco̱ apā̍vadhīttve̱ṣaṃ vaco̱ apā̍vadhī̱tsvāhā̍ |
yā te̍ agne rajaḥśa̱yā ta̱nūrvarṣi̍ṣṭhā gahvare̱ṣṭhā | u̱graṃ vaco̱ apā̍vadhīttve̱ṣaṃ vaco̱ apā̍vadhī̱tsvāhā̍ |
yā te̍ agne hariśa̱yā ta̱nūrvarṣi̍ṣṭhā gahvare̱ṣṭhā | u̱graṃ vaco̱ apā̍vadhīttve̱ṣaṃ vaco̱ apā̍vadhī̱tsvāhā̍
||5.8||या ते॑ अग्नेऽयःश॒या त॒नूर्वर्षि॑ष्ठा गह्वरे॒ष्ठा । उ॒ग्रं वचो॒ अपा॑वधीत्त्वे॒षं वचो॒ अपा॑वधी॒त्स्वाहा॑ ।
या ते॑ अग्ने रजःश॒या त॒नूर्वर्षि॑ष्ठा गह्वरे॒ष्ठा । उ॒ग्रं वचो॒ अपा॑वधीत्त्वे॒षं वचो॒ अपा॑वधी॒त्स्वाहा॑ ।
या ते॑ अग्ने हरिश॒या त॒नूर्वर्षि॑ष्ठा गह्वरे॒ष्ठा । उ॒ग्रं वचो॒ अपा॑वधीत्त्वे॒षं वचो॒ अपा॑वधी॒त्स्वाहा॑
ta̱ptāya̍nī me'si vi̱ttāya̍nī me'syava̍tānmā nāthi̱tādava̍tānmā vyathi̱tāt | vi̱deda̱gnirnabho̱ nāmā 'gne̍ aṅgira̱ āyu̍nā̱ nāmnehi̱
yo'syāṃ pṛ̍thi̱vyāmasi̱ yatte'nā̍dhṛṣṭa̱ṃ nāma̍ ya̱jñiya̱ṃ tena̱ tvā da̍dhe vi̱deda̱gnirna̱bho̱ nāmā 'gne̍ aṅgira̱ āyu̍nā̱ nāmnehi̱
yo dvi̱tīya̍syāṃ pṛthi̱vyāmasi̱ yatte'nā̍dhṛṣṭa̱ṃ nāma̍ ya̱jñiya̱ṃ tena̱ tvā da̍dhe vi̱deda̱gnirna̱bho nāmā 'gne̍ aṅgira̱ āyu̍nā̱ nāmnehi̍ yastṛ̱tīya̍syāṃ pṛthi̱vyāmasi̱ yatte'nā̍dhṛṣṭa̱ṃ nāma̍ ya̱jñiya̱ṃ tena̱ tvā da̍dhe | anu̍ tvā de̱vavī̍taye
||5.9||त॒प्ताय॑नी मेऽसि वि॒त्ताय॑नी मेऽस्यव॑तान्मा नाथि॒तादव॑तान्मा व्यथि॒तात् । वि॒देद॒ग्निर्नभो॒ नामा ऽग्ने॑ अङ्गिर॒ आयु॑ना॒ नाम्नेहि॒
योऽस्यां पृ॑थि॒व्यामसि॒ यत्तेऽना॑धृष्टं॒ नाम॑ य॒ज्ञियं॒ तेन॒ त्वा द॑धे वि॒देद॒ग्निर्न॒भो॒ नामा ऽग्ने॑ अङ्गिर॒ आयु॑ना॒ नाम्नेहि॒
यो द्वि॒तीय॑स्यां पृथि॒व्यामसि॒ यत्तेऽना॑धृष्टं॒ नाम॑ य॒ज्ञियं॒ तेन॒ त्वा द॑धे वि॒देद॒ग्निर्न॒भो नामा ऽग्ने॑ अङ्गिर॒ आयु॑ना॒ नाम्नेहि॑ यस्तृ॒तीय॑स्यां पृथि॒व्यामसि॒ यत्तेऽना॑धृष्टं॒ नाम॑ य॒ज्ञियं॒ तेन॒ त्वा द॑धे । अनु॑ त्वा दे॒ववी॑तये
si̱jhya̱si sapatnasā̱hī de̱vebhya̍: kalpasva si̱jhya̱si sapatnasā̱hī de̱vebhya̍:śundhasva si̱jhya̱si sapatnasā̱hī de̱vebhya̍: śumbhasva
||5.10||सि॒jह्य॒सि सपत्नसा॒ही दे॒वेभ्य॑: कल्पस्व सि॒jह्य॒सि सपत्नसा॒ही दे॒वेभ्य॑:शुन्धस्व सि॒jह्य॒सि सपत्नसा॒ही दे॒वेभ्य॑: शुम्भस्व
i̱ndra̱gho̱ṣastvā̱ vasu̍bhiḥ pu̱rastā̍tpātu prace̍tāstvā rudraiḥ pa̱ścātpā̍tu mano̍javāstvā pi̱tṛbhi̍rdakṣiṇa̱taḥ pā̍tu
vi̱śvaka̍rmā tvā''di̱tyairu̍ttara̱taḥ pā̍tvi̱dama̱haṃ ta̱ptaṃ vārba̍hi̱rdhā ya̱jñānniḥ sṛ̍jāmi
||5.11||इ॒न्द्र॒घो॒षस्त्वा॒ वसु॑भिः पु॒रस्ता॑त्पातु प्रचे॑तास्त्वा रुद्रैः प॒श्चात्पा॑तु मनो॑जवास्त्वा पि॒तृभि॑र्दक्षिण॒तः पा॑तु
वि॒श्वक॑र्मा त्वाऽऽदि॒त्यैरु॑त्तर॒तः पा॑त्वि॒दम॒हं त॒प्तं वार्ब॑हि॒र्धा य॒ज्ञान्निः सृ॑जामि
si̱jhya̱si̱ svāhā̍ si̱jhya̱syāditya̱vani̱: svāhā̍ si̱jhya̱si brahma̱vani̍: kṣatra̱vani̱: svāhā̍
si̱jhya̱si suprajā̱vanī̍ rāyaspoṣa̱vani̱: svāhā̍ si̱jhyasyāva̍ha de̱vān yaja̍mānāya̱ svāhā̍
bhū̱tebhya̍stvā
||5.12||सि॒jह्य॒सि॒ स्वाहा॑ सि॒jह्य॒स्यादित्य॒वनि॒: स्वाहा॑ सि॒jह्य॒सि ब्रह्म॒वनि॑: क्षत्र॒वनि॒: स्वाहा॑
सि॒jह्य॒सि सुप्रजा॒वनी॑ रायस्पोष॒वनि॒: स्वाहा॑ सि॒jह्यस्याव॑ह दे॒वान् यज॑मानाय॒ स्वाहा॑
भू॒तेभ्य॑स्त्वा
dhru̱vo̱'si pṛthi̱vīṃ dṛha dhruva̱kṣida̍sya̱ntari̍kṣaṃ dṛhācyuta̱kṣida̍si̱ diva̍ṃ dṛhā̱gneḥ purī̍ṣamasi
||5.13||ध्रु॒वो॒ऽसि पृथि॒वीं दृ॑ᳪह ध्रुव॒क्षिद॑स्य॒न्तरि॑क्षं दृᳪहाच्युत॒क्षिद॑सि॒ दिवं॑ दृᳪहा॒ग्नेः पुरी॑षमसि
yu̱ñjate̱ mana̍ u̱ta yu̍ñjate̱ dhiyo̱ viprā̱ vipra̍sya bṛha̱to vi̍pa̱ścita̍: |
vi hotrā̍ dadhe vayunā̱videka̱ inma̱hī de̱vasya̍ savi̱tuḥ pari̍ṣṭuti̱: svāhā̍
||5.14||यु॒ञ्जते॒ मन॑ उ॒त यु॑ञ्जते॒ धियो॒ विप्रा॒ विप्र॑स्य बृह॒तो वि॑प॒श्चित॑: ।
वि होत्रा॑ दधे वयुना॒विदेक॒ इन्म॒ही दे॒वस्य॑ सवि॒तुः परि॑ष्टुति॒: स्वाहा॑
i̱daṃ viṣṇu̱rvi ca̍krame tre̱dhā ni da̍dhe pa̱dam | samū̍ḍhamasya pāsu̱re svāhā̍
||5.15||इ॒दं विष्णु॒र्वि च॑क्रमे त्रे॒धा नि द॑धे प॒दम् । समू॑ढमस्य पाᳪसु॒रे स्वाहा॑
irā̍vatī dhenu̱matī̱ hi bhū̱ta sū̍yava̱sinī̱ mana̍ve daśa̱syā | vya̍skabhnā̱ roda̍sī viṣṇave̱te dā̱dhartha̍ pṛthi̱vīma̱bhito̍ ma̱yūkhai̱: svāhā̍
||5.16||इरा॑वती धेनु॒मती॒ हि भू॒तᳪ सू॑यव॒सिनी॒ मन॑वे दश॒स्या । व्य॑स्कभ्ना॒ रोद॑सी विष्णवे॒ते दा॒धर्थ॑ पृथि॒वीम॒भितो॑ म॒यूखै॒: स्वाहा॑
de̱va̱śrutau̍ de̱veṣvā gho̍ṣata̱ṃ prācī̱ preta̍madhva̱raṃ ka̱lpaya̍ntī ū̱rdhvaṃ ya̱jñaṃ na̍yata̱ṃ mā ji̍hvaratam |
svaṃ go̱ṣṭhamā va̍dataṃ devī durye̱ āyu̱rmā nirvā̍diṣṭaṃ pra̱jāṃ mā nirvā̍diṣṭa̱matra̍ ramethā̱ṃ varṣma̍n pṛthi̱vyāḥ
||5.17||दे॒व॒श्रुतौ॑ दे॒वेष्वा घो॑षतं॒ प्राची॒ प्रेत॑मध्व॒रं क॒ल्पय॑न्ती ऊ॒र्ध्वं य॒ज्ञं न॑यतं॒ मा जि॑ह्वरतम् ।
स्वं गो॒ष्ठमा व॑दतं देवी दुर्ये॒ आयु॒र्मा निर्वा॑दिष्टं प्र॒जां मा निर्वा॑दिष्ट॒मत्र॑ रमेथां॒ वर्ष्म॑न् पृथि॒व्याः
viṣṇo̱rnuka̍ṃ vī̱ryā̱ṇi̱ pra vo̍ca̱ṃ yaḥ pārthi̍vāni vima̱me rajāsi |
yo aska̍bhāya̱dutta̍ra sa̱dhastha̍ṃ vicakramā̱ṇastre̱dhoru̍gā̱yo viṣṇa̍ve tvā
||5.18||विष्णो॒र्नुकं॑ वी॒र्या॒णि॒ प्र वो॑चं॒ यः पार्थि॑वानि विम॒मे रजा॑ᳪसि ।
यो अस्क॑भाय॒दुत्त॑रᳪ स॒धस्थं॑ विचक्रमा॒णस्त्रे॒धोरु॑गा॒यो विष्ण॑वे त्वा
di̱vo vā̍ viṣṇa u̱ta vā̍ pṛthi̱vyā ma̱ho vā̍ viṣṇa u̱rora̱ntari̍kṣāt |
u̱bhā hi hastā̱ vasu̍nā pṛ̱ṇasvā pra ya̍ccha̱ dakṣi̍ṇā̱dota sa̱vyādviṣṇa̍ve tvā
||5.19||दि॒वो वा॑ विष्ण उ॒त वा॑ पृथि॒व्या म॒हो वा॑ विष्ण उ॒रोर॒न्तरि॑क्षात् ।
उ॒भा हि हस्ता॒ वसु॑ना पृ॒णस्वा प्र य॑च्छ॒ दक्षि॑णा॒दोत स॒व्याद्विष्ण॑वे त्वा
pra tadviṣṇu̍ stavate vī̱rye̱ṇa mṛ̱go na bhī̱maḥ ku̍ca̱ro gi̍ri̱ṣṭhāḥ |
yasyo̱ruṣu̍ tri̱ṣu vi̱krama̍ṇeṣvadhikṣi̱yanti̱ bhuva̍nāni̱ viśvā̍
||5.20||प्र तद्विष्णु॑ स्तवते वी॒र्ये॒ण मृ॒गो न भी॒मः कु॑च॒रो गि॑रि॒ष्ठाः ।
यस्यो॒रुषु॑ त्रि॒षु वि॒क्रम॑णेष्वधिक्षि॒यन्ति॒ भुव॑नानि॒ विश्वा॑
viṣṇo̍ ra̱rāṭa̍masi̱ viṣṇo̱: śnaptre̍ stho viṣṇo̱: syūra̍si̱ viṣṇo̍rdhru̱vo̱'si |
vai̱ṣṇa̱vama̍si̱ viṣṇa̍ve tvā
||5.21||विष्णो॑ र॒राट॑मसि॒ विष्णो॒: श्नप्त्रे॑ स्थो विष्णो॒: स्यूर॑सि॒ विष्णो॑र्ध्रु॒वो॒ऽसि ।
वै॒ष्ण॒वम॑सि॒ विष्ण॑वे त्वा
de̱vasya̍ tvā savi̱tuḥ pra̍sa̱ve'śvino̍rbā̱hubhyā̍ṃ pū̱ṣṇo hastā̍bhyām |
ā da̍de̱ nārya̍sī̱dama̱ha rakṣa̍sāṃ grī̱vā api̍ kṛntāmi |
bṛ̱hanna̍si bṛ̱hadra̍vā bṛha̱tīmindrā̍ya̱ vāca̍ṃ vada
||5.22||दे॒वस्य॑ त्वा सवि॒तुः प्र॑स॒वेऽश्विनो॑र्बा॒हुभ्यां॑ पू॒ष्णो हस्ता॑भ्याम् ।
आ द॑दे॒ नार्य॑सी॒दम॒हᳪ रक्ष॑सां ग्री॒वा अपि॑ कृन्तामि ।
बृ॒हन्न॑सि बृ॒हद्र॑वा बृह॒तीमिन्द्रा॑य॒ वाचं॑ वद
ra̱kṣo̱haṇa̍ṃ valaga̱hana̍ṃ vaiṣṇa̱vī mi̱dama̱haṃ taṃ va̍la̱gamutki̍rāmi̱ yaṃ me̱ niṣṭyo̱ yama̱mātyo̍ nica̱khāne̱dama̱haṃ taṃ va̍la̱gamutki̍rāmi̱ yaṃ me̍ samā̱no yamasa̍māno nica̱khāne̱dama̱haṃ taṃ va̍la̱gamutki̍rāmi̱ yaṃ me̱ saba̍ndhu̱ryamasa̍bandhurnica̱khāne̱dama̱haṃ taṃ va̍la̱gamutki̍rāmi̱ yaṃ me̍ sajā̱to yamasa̍jāto nica̱khānotkṛ̱tyāṃ ki̍rāmi
||5.23||र॒क्षो॒हणं॑ वलग॒हनं॑ वैष्ण॒वी मि॒दम॒हं तं व॑ल॒गमुत्कि॑रामि॒ यं मे॒ निष्ट्यो॒ यम॒मात्यो॑ निच॒खाने॒दम॒हं तं व॑ल॒गमुत्कि॑रामि॒ यं मे॑ समा॒नो यमस॑मानो निच॒खाने॒दम॒हं तं व॑ल॒गमुत्कि॑रामि॒ यं मे॒ सब॑न्धु॒र्यमस॑बन्धुर्निच॒खाने॒दम॒हं तं व॑ल॒गमुत्कि॑रामि॒ यं मे॑ सजा॒तो यमस॑जातो निच॒खानोत्कृ॒त्यां कि॑रामि
sva̱rāḍa̍si sapatna̱hā sa̍tra̱rāḍa̍syabhimāti̱hā ja̍na̱rāḍa̍si rakṣo̱hā sa̍rva̱rāḍa̍syamitra̱hā
||5.24||स्व॒राड॑सि सपत्न॒हा स॑त्र॒राड॑स्यभिमाति॒हा ज॑न॒राड॑सि रक्षो॒हा स॑र्व॒राड॑स्यमित्र॒हा
ra̱kṣo̱haṇo̍ vo valaga̱hana̱: prokṣā̍mi vaiṣṇa̱vān ra̍kṣo̱haṇo̍ vo valaga̱hano'va̍nayāmi vaiṣṇa̱vān ra̍kṣo̱haṇo̍ vo valaga̱hano'va̍stṛṇāmi vaiṣṇa̱vān
ra̍kṣo̱haṇau̍ vāṃ valaga̱hanā̱ upa̍ dadhāmi vaiṣṇa̱vī ra̍kṣo̱haṇau̍ vāṃ valaga̱hanau̱ paryū̍hāmi vaiṣṇa̱vī vai̍ṣṇa̱vama̍si vai̍ṣṇa̱vā stha̍
||5.25||र॒क्षो॒हणो॑ वो वलग॒हन॒: प्रोक्षा॑मि वैष्ण॒वान् र॑क्षो॒हणो॑ वो वलग॒हनोऽव॑नयामि वैष्ण॒वान् र॑क्षो॒हणो॑ वो वलग॒हनोऽव॑स्तृणामि वैष्ण॒वान्
र॑क्षो॒हणौ॑ वां वलग॒हना॒ उप॑ दधामि वैष्ण॒वी र॑क्षो॒हणौ॑ वां वलग॒हनौ॒ पर्यू॑हामि वैष्ण॒वी वै॑ष्ण॒वम॑सि वै॑ष्ण॒वा स्थ॑
de̱vasya̍ tvā savi̱tuḥ pra̍sa̱ve'śvino̍rbā̱hubhyā̍ṃ pū̱ṣṇo hastā̍bhyām | ā da̍de̱ nārya̍sī̱dama̱ha rakṣa̍sāṃ grī̱vā api̍ kṛntāmi |
yavo̍'si ya̱vayā̱smaddveṣo̍ ya̱vayārā̍tīrdi̱ve tvā̱'ntari̍kṣāya tvā pṛthi̱vyai tvā śundha̍ntāṃllo̱kāḥ pi̍tṛ̱ṣada̍nāḥ pitṛ̱ṣada̍namasi
||5.26||दे॒वस्य॑ त्वा सवि॒तुः प्र॑स॒वेऽश्विनो॑र्बा॒हुभ्यां॑ पू॒ष्णो हस्ता॑भ्याम् । आ द॑दे॒ नार्य॑सी॒दम॒हᳪ रक्ष॑सां ग्री॒वा अपि॑ कृन्तामि ।
यवो॑ऽसि य॒वया॒स्मद्द्वेषो॑ य॒वयारा॑तीर्दि॒वे त्वा॒ऽन्तरि॑क्षाय त्वा पृथि॒व्यै त्वा शुन्ध॑न्तांल्लो॒काः पि॑तृ॒षद॑नाः पितृ॒षद॑नमसि
uddiva stabhānā̱ntari̍kṣaṃ pṛṇa̱ dṛha̍sva pṛthi̱vyām dyu̍tā̱nāstvā̍ māru̱to mino̍tu mi̱trāvaru̍ṇau dhru̱veṇa̱ dharma̍ṇā |
bra̱hma̱vani̍ tvā kṣatra̱vani̍ rāyaspoṣa̱vani̱ paryū̍hāmi | brahma̍ dṛha kṣa̱traṃ dṛhāyu̍rdṛha pra̱jāṃ dṛha
||5.27||उद्दिव॑ᳪ स्तभाना॒न्तरि॑क्षं पृण॒ दृᳪह॑स्व पृथि॒व्याम् द्यु॑ता॒नास्त्वा॑ मारु॒तो मिनो॑तु मि॒त्रावरु॑णौ ध्रु॒वेण॒ धर्म॑णा ।
ब्र॒ह्म॒वनि॑ त्वा क्षत्र॒वनि॑ रायस्पोष॒वनि॒ पर्यू॑हामि । ब्रह्म॑ दृᳪह क्ष॒त्रं दृ॒ᳪहायु॑र्दृᳪह प्र॒जां दृ॑ᳪह
dhru̱vāsi̍ dhru̱vo'yaṃ yaja̍māno̱'sminnā̱yata̍ne pra̱jayā̍ pa̱śubhi̍rbhūyāt |
ghṛ̱tena̍ dyāvāpṛthivī pūryethā̱mindra̍sya cha̱dira̍si viśvaja̱nasya̍ chā̱yā
||5.28||ध्रु॒वासि॑ ध्रु॒वोऽयं यज॑मानो॒ऽस्मिन्ना॒यत॑ने प्र॒जया॑ प॒शुभि॑र्भूयात् ।
घृ॒तेन॑ द्यावापृथिवी पूर्येथा॒मिन्द्र॑स्य छ॒दिर॑सि विश्वज॒नस्य॑ छा॒या
pari̍ tvā girvaṇo̱ gira̍ i̱mā bha̍vantu vi̱śvata̍:| vṛ̱ddhāyu̱manu̱ vṛddha̍yo̱ juṣṭā̍ bhavantu̱ juṣṭa̍yaḥ
||5.29||परि॑ त्वा गिर्वणो॒ गिर॑ इ॒मा भ॑वन्तु वि॒श्वत॑:। वृ॒द्धायु॒मनु॒ वृद्ध॑यो॒ जुष्टा॑ भवन्तु॒ जुष्ट॑यः
indra̍sya̱ syūra̱sīndra̍sya dhru̱vo̍'si | ai̱ndrama̍si vaiśvade̱vama̍si
||5.30||इन्द्र॑स्य॒ स्यूर॒सीन्द्र॑स्य ध्रु॒वो॑ऽसि । ऐ॒न्द्रम॑सि वैश्वदे॒वम॑सि
vi̱bhūra̍si pra̱vāha̍ṇo̱ vahni̍rasi havya̱vāha̍naḥ | śvā̱tro̱'si̱ prace̍tāstu̱tho̍'si vi̱śvave̍dāḥ
||5.31||वि॒भूर॑सि प्र॒वाह॑णो॒ वह्नि॑रसि हव्य॒वाह॑नः । श्वा॒त्रो॒ऽसि॒ प्रचे॑तास्तु॒थो॑ऽसि वि॒श्ववे॑दाः
u̱śiga̍si ka̱viraṅghā̍rirasi̱ bambhā̍rirava̱syūra̍si̱ duva̍svāñchu̱ndhyūra̍si mārjā̱līya̍: sa̱mrāḍa̍si kṛ̱śānu̍: pari̱ṣadyo̍'si̱ pava̍māno̱ nabho̍'si pra̱takvā̍
mṛ̱ṣṭo̱'si havya̱sūda̍na ṛ̱ta̱dhā̍mā'si̱ sva̱rjyotiḥ
||5.32||उ॒शिग॑सि क॒विरङ्घा॑रिरसि॒ बम्भा॑रिरव॒स्यूर॑सि॒ दुव॑स्वाञ्छु॒न्ध्यूर॑सि मार्जा॒लीय॑: स॒म्राड॑सि कृ॒शानु॑: परि॒षद्यो॑ऽसि॒ पव॑मानो॒ नभो॑ऽसि प्र॒तक्वा॑
मृ॒ष्टो॒ऽसि हव्य॒सूद॑न ऋ॒त॒धा॑माऽसि॒ स्व॒र्ज्योतिः
sa̱mu̱dro̱'si vi̱śvavya̍cā a̱jo'syeka̍pā̱dahi̍rasi bu̱dhnyo vāga̍syai̱ndrama̍si̱ sado̱'syṛta̍sya dvārau̱ mā mā̱ sanatā̍pta̱madhva̍nāmadhvapate̱ pra mā̍ tira sva̱sti me̱'sminpa̱thi de̍va̱yāne̍ bhūyāt
||5.33||स॒मु॒द्रो॒ऽसि वि॒श्वव्य॑चा अ॒जोऽस्येक॑पा॒दहि॑रसि बु॒ध्न्यो वाग॑स्यै॒न्द्रम॑सि॒ सदो॒ऽस्यृत॑स्य द्वारौ॒ मा मा॒ सनता॑प्त॒मध्व॑नामध्वपते॒ प्र मा॑ तिर स्व॒स्ति मे॒ऽस्मिन्प॒थि दे॑व॒याने॑ भूयात्
mi̱trasya̍ mā̱ cakṣu̍ṣekṣadhva̱magna̍yaḥ sagarā̱ḥ saga̍rā stha̱ saga̍reṇa̱ nāmnā̱ raudre̱ṇānī̍kena pā̱ta mā̍'gnayaḥ pipṛ̱ta mā̍'gnayo gopā̱yata̍ mā̱ namo̍ vo'stu̱ mā mā̍ hisiṣṭa
||5.34||मि॒त्रस्य॑ मा॒ चक्षु॑षेक्षध्व॒मग्न॑यः सगराः॒ सग॑रा स्थ॒ सग॑रेण॒ नाम्ना॒ रौद्रे॒णानी॑केन पा॒त मा॑ऽग्नयः पिपृ॒त मा॑ऽग्नयो गोपा॒यत॑ मा॒ नमो॑ वोऽस्तु॒ मा मा॑ हिᳪसिष्ट
jyoti̍rasi vi̱śvarū̍pa̱ṃ viśve̍ṣāṃ de̱vānā sa̱mit | tva so̍ma tanū̱kṛdbhyo̱ dveṣo̍bhyo̱'nyakṛ̍tebhya u̱ru ya̱ntāsi̱ varū̍tha svāhā̍
juṣā̱ṇo a̱pturājya̍sya vetu̱ svāhā̍
||5.35||ज्योति॑रसि वि॒श्वरू॑पं॒ विश्वे॑षां दे॒वाना॑ᳪ स॒मित् । त्वᳪ सो॑म तनू॒कृद्भ्यो॒ द्वेषो॑भ्यो॒ऽन्यकृ॑तेभ्य उ॒रु य॒न्तासि॒ वरू॑थ॒ᳪ स्वाहा॑
जुषा॒णो अ॒प्तुराज्य॑स्य वेतु॒ स्वाहा॑
agne̱ naya̍ su̱pathā̍ rā̱ye a̱smānviśvā̍ni deva va̱yunā̍ni vi̱dvān |
yu̱yo̱dhyasmajju̍hurā̱ṇameno̱ bhūyi̍ṣṭhāṃ te̱ nama̍ uktiṃ vidhema
||5.36||अग्ने॒ नय॑ सु॒पथा॑ रा॒ये अ॒स्मान्विश्वा॑नि देव व॒युना॑नि वि॒द्वान् ।
यु॒यो॒ध्यस्मज्जु॑हुरा॒णमेनो॒ भूयि॑ष्ठां ते॒ नम॑ उक्तिं विधेम
a̱yaṃ no̍ a̱gnirvari̍vaskṛṇotva̱yaṃ mṛdha̍: pu̱ra e̍tu prabhi̱ndan |
a̱yaṃ vājā̍ñjayatu̱ vāja̍sātāva̱ya śatrū̍ñjayatu̱ jarhṛ̍ṣāṇa̱: svāhā̍
||5.37||अ॒यं नो॑ अ॒ग्निर्वरि॑वस्कृणोत्व॒यं मृध॑: पु॒र ए॑तु प्रभि॒न्दन् ।
अ॒यं वाजा॑ञ्जयतु॒ वाज॑साताव॒यᳪ शत्रू॑ञ्जयतु॒ जर्हृ॑षाण॒: स्वाहा॑
u̱ru vi̍ṣṇo̱ vi kra̍masvo̱ru kṣayā̍ya naskṛdhi |
ghṛ̱taṃ ghṛ̍tayone piba̱ prapra̍ ya̱jñapa̍tiṃ tira̱ svāhā̍
||5.38||उ॒रु वि॑ष्णो॒ वि क्र॑मस्वो॒रु क्षया॑य नस्कृधि ।
घृ॒तं घृ॑तयोने पिब॒ प्रप्र॑ य॒ज्ञप॑तिं तिर॒ स्वाहा॑
deva̍ savitare̱ṣa te̱ soma̱sta ra̍kṣasva̱ mā tvā̍ dabhan |
e̱tattvaṃ de̍va soma de̱vo de̱vām̐2 upā̍gā i̱dama̱haṃ ma̍nu̱ṣyā̱ntsa̱ha rā̱yaspoṣe̍ṇa svāhā̱ nirvaru̍ṇasya̱ pāśā̍nmucye
||5.39||देव॑ सवितरे॒ष ते॒ सोम॒स्तᳪ र॑क्षस्व॒ मा त्वा॑ दभन् ।
ए॒तत्त्वं दे॑व सोम दे॒वो दे॒वाँ२ उपा॑गा इ॒दम॒हं म॑नु॒ष्या॒न्त्स॒ह रा॒यस्पोषे॑ण स्वाहा॒ निर्वरु॑णस्य॒ पाशा॑न्मुच्ये
agne̍ vratapā̱stve vra̍ta̱pā yā tava̍ ta̱nūrmayyabhū̍de̱ṣā sā tvayi̱ yo mama̍ ta̱nūstvayyabhū̍di̱ya sā mayi̍ |
ya̱thā̱ya̱thaṃ nau̍ vratapate vra̱tānyanu̍ me dī̱kṣāṃ dī̱kṣāpa̍ti̱ramastānu̱ tapa̱stapa̍spatiḥ
||5.40||अग्ने॑ व्रतपा॒स्त्वे व्र॑त॒पा या तव॑ त॒नूर्मय्यभू॑दे॒षा सा त्वयि॒ यो मम॑ त॒नूस्त्वय्यभू॑दि॒यᳪ सा मयि॑ ।
य॒था॒य॒थं नौ॑ व्रतपते व्र॒तान्यनु॑ मे दी॒क्षां दी॒क्षाप॑ति॒रम॒ᳪस्तानु॒ तप॒स्तप॑स्पतिः
u̱ru vi̍ṣṇo̱ vi kra̍masvo̱ru kṣayā̍ya naskṛdhi | ghṛ̱taṃ ghṛ̍tayone piba̱ prapra̍ ya̱jñapa̍tiṃ tira̱ svāhā̍
||5.41||उ॒रु वि॑ष्णो॒ वि क्र॑मस्वो॒रु क्षया॑य नस्कृधि । घृ॒तं घृ॑तयोने पिब॒ प्रप्र॑ य॒ज्ञप॑तिं तिर॒ स्वाहा॑
atya̱nyām̐2 agā̱ṃ nānyām̐2 upā̍gāma̱rvāk tvā̱ pare̱bhyo'vi̍daṃ pa̱ro'va̍rebhyaḥ |
taṃ tvā̍ juṣāmahe deva vanaspate devaya̱jyāyai̍ de̱vāstvā̍ devaya̱jyāyai̍ juṣantā̱ṃ viṣṇa̍ve tvā |
oṣa̍dhe̱ trāya̍sva svadhi̍te̱ maina hisīḥ
||5.42||अत्य॒न्याँ२ अगां॒ नान्याँ२ उपा॑गाम॒र्वाक् त्वा॒ परे॒भ्योऽवि॑दं प॒रोऽव॑रेभ्यः ।
तं त्वा॑ जुषामहे देव वनस्पते देवय॒ज्यायै॑ दे॒वास्त्वा॑ देवय॒ज्यायै॑ जुषन्तां॒ विष्ण॑वे त्वा ।
ओष॑धे॒ त्राय॑स्व स्वधि॑ते॒ मैन॑ᳪ हिᳪसीः
dyāṃ mā le̍khīra̱ntari̍kṣa̱ṃ mā hisīḥ pṛthi̱vyā sambha̍va |
a̱ya hi tvā̱ svadhi̍ti̱steti̍jānaḥ praṇi̱nāya̍ maha̱te sau̍bhagāya |
ata̱stvaṃ de̍va vanaspate śa̱tava̍lśo̱ vi ro̍ha sa̱hasra̍valśā̱ vi va̱ya ru̍hema
||5.43||द्यां मा ले॑खीर॒न्तरि॑क्षं॒ मा हि॑ᳪसीः पृथि॒व्या सम्भ॑व ।
अ॒यᳪ हि त्वा॒ स्वधि॑ति॒स्तेति॑जानः प्रणि॒नाय॑ मह॒ते सौ॑भगाय ।
अत॒स्त्वं दे॑व वनस्पते श॒तव॑ल्शो॒ वि रो॑ह स॒हस्र॑वल्शा॒ वि व॒यᳪ रु॑हेम