de̱vasya̍ tvā savi̱tuḥ pra̍sa̱ve'śvino̍rbā̱hubhyā̍ṃ pū̱ṣṇo hastā̍bhyām | ā da̍de̱ nārya̍sī̱dama̱ha rakṣa̍sāṃ grī̱vā api̍ kṛntāmi | yavo̍'si ya̱vayā̱smad dveṣo̍ ya̱vayārā̍tīrdi̱ve tvā̱'ntari̍kṣāya tvā pṛthi̱vyai tvā̱ śundha̍ntām̐llo̱kāḥ pi̍tṛ̱ṣada̍nāḥ |
pi̍tṛ̱ṣada̍namasi
||6.1||पि॑तृ॒षद॑नमसि
a̱gre̱ṇīra̍si svāve̱śa u̍nnetṝ̱ṇāme̱tasya̍ vittā̱dadhi̍ tvā sthāsyati de̱vastvā̍ savi̱tā madhvā̍naktu su̍pippa̱lābhya̱stvauṣa̍dhībhyaḥ |
dyāmagre̍ṇāspṛkṣa̱ āntari̍kṣa̱ṃ madhye̍nāprāḥ pṛthi̱vīmupa̍reṇādṛhīḥ
||6.2||अ॒ग्रे॒णीर॑सि स्वावे॒श उ॑न्नेतॄ॒णामे॒तस्य॑ वित्ता॒दधि॑ त्वा स्थास्यति दे॒वस्त्वा॑ सवि॒ता मध्वा॑नक्तु सु॑पिप्प॒लाभ्य॒स्त्वौष॑धीभ्यः ।
द्यामग्रे॑णास्पृक्ष॒ आन्तरि॑क्षं॒ मध्ये॑नाप्राः पृथि॒वीमुप॑रेणादृᳪहीः
yā te̱ dhāmā̍nyu̱śmasi̱ gama̍dhyai̱ yatra̱ gāvo̱ bhūri̍śṛṅgā a̱yāsa̍: | atrāha̱ tadu̍rugā̱yasya̱ viṣṇo̍: para̱maṃ pa̱damava̍ bhāri̱ bhūri̍ |
bra̱hma̱vani̍ tvā kṣatra̱vani̍ rāyaspoṣa̱vani̱ paryū̍hāmi | brahma̍ dṛha kṣa̱traṃ dṛhāyu̍rdṛha pra̱jāṃ dṛha
||6.3||या ते॒ धामा॑न्यु॒श्मसि॒ गम॑ध्यै॒ यत्र॒ गावो॒ भूरि॑शृङ्गा अ॒यास॑: । अत्राह॒ तदु॑रुगा॒यस्य॒ विष्णो॑: पर॒मं प॒दमव॑ भारि॒ भूरि॑ ।
ब्र॒ह्म॒वनि॑ त्वा क्षत्र॒वनि॑ रायस्पोष॒वनि॒ पर्यू॑हामि । ब्रह्म॑ दृᳪह क्ष॒त्रं दृ॒ᳪहायु॑र्दृᳪह प्र॒जां दृ॑ᳪह
viṣṇo̱: karmā̍ṇi paśyata̱ yato̍ vra̱tāni̍ paspa̱śe | indra̍sya̱ yujya̱: sakhā̍
||6.4||विष्णो॒: कर्मा॑णि पश्यत॒ यतो॑ व्र॒तानि॑ पस्प॒शे । इन्द्र॑स्य॒ युज्य॒: सखा॑
tadviṣṇo̍: para̱maṃ pa̱da sadā̍ paśyanti sū̱rayo̍ |di̱vī̱va̱ cakṣu̱rāta̍tam
||6.5||तद्विष्णो॑: पर॒मं प॒दᳪ सदा॑ पश्यन्ति सू॒रयो॑ ।दि॒वी॒व॒ चक्षु॒रात॑तम्
pa̱ri̱vīra̍si̱ pari̍ tvā̱ daivī̱rviśo̍ vyayantā̱ṃ parī̱maṃ yaja̍māna̱j rāyo̍ manu̱ṣyā̱ṇām |
di̱vaḥ sū̱nura̍sye̱ṣa te̍ pṛthi̱vyām̐llo̱ka ā̍ra̱ṇyaste̍ pa̱śuḥ
||6.6||प॒रि॒वीर॑सि॒ परि॑ त्वा॒ दैवी॒र्विशो॑ व्ययन्तां॒ परी॒मं यज॑मान॒j रायो॑ मनु॒ष्या॒णाम् ।
दि॒वः सू॒नुर॑स्ये॒ष ते॑ पृथि॒व्याँल्लो॒क आ॑र॒ण्यस्ते॑ प॒शुः
u̱pā̱vīra̱syupa̍ de̱vāndaivī̱rviśa̱: prāgu̍ru̱śijo̱ vahni̍tamān | deva̍ tvaṣṭa̱rvasu̍ rama ha̱vyā te̍ svadantām
||6.7||उ॒पा॒वीर॒स्युप॑ दे॒वान्दैवी॒र्विश॒: प्रागु॑रु॒शिजो॒ वह्नि॑तमान् । देव॑ त्वष्ट॒र्वसु॑ रम ह॒व्या ते॑ स्वदन्ताम्
reva̍tī̱ rama̍dhva̱ṃ bṛha̍spate dhā̱rayā̱ vasū̍ni | ṛ̱tasya̍ tvā devahavi̱ḥ pāśe̍na̱ prati̍ muñcāmi̱ dharṣā̱ mānu̍ṣaḥ
||6.8||रेव॑ती॒ रम॑ध्वं॒ बृह॑स्पते धा॒रया॒ वसू॑नि । ऋ॒तस्य॑ त्वा देवहविः॒ पाशे॑न॒ प्रति॑ मुञ्चामि॒ धर्षा॒ मानु॑षः
de̱vasya̍ tvā savi̱tuḥ pra̍sa̱ve'śvino̍rbā̱hubhyā̍ṃ pū̱ṣṇo hastā̍bhyām | a̱gnīṣomā̍bhyā̱ṃ juṣṭa̱ṃ ni yu̍najmi | a̱dbhyastvau̍ṣadhī̱bhyo'nu̍ tvā mā̱tā ma̍nyatā̱manu̍ pi̱tā'nu̱ bhrātā̱ saga̱rbhyo'nu̱ sakhā̱ sayū̍thyaḥ | a̱gnīṣomā̍bhyāṃ tvā̱ juṣṭa̱ṃ prokṣā̍mi
||6.9||दे॒वस्य॑ त्वा सवि॒तुः प्र॑स॒वेऽश्विनो॑र्बा॒हुभ्यां॑ पू॒ष्णो हस्ता॑भ्याम् । अ॒ग्नीषोमा॑भ्यां॒ जुष्टं॒ नि यु॑नज्मि । अ॒द्भ्यस्त्वौ॑षधी॒भ्योऽनु॑ त्वा मा॒ता म॑न्यता॒मनु॑ पि॒ताऽनु॒ भ्राता॒ सग॒र्भ्योऽनु॒ सखा॒ सयू॑थ्यः । अ॒ग्नीषोमा॑भ्यां त्वा॒ जुष्टं॒ प्रोक्षा॑मि
a̱pāṃ pe̱rura̱syāpo̍ de̱vīḥ sva̍dantu svā̱ttaṃ ci̱tsadde̍vaha̱viḥ | saṃ te̍ prā̱ṇo vāte̍na gacchatā̱jsamaṅgā̍ni̱ yaja̍trai̱: saṃ ya̱jñapa̍tirā̱śiṣā̍
||6.10||अ॒पां पे॒रुर॒स्यापो॑ दे॒वीः स्व॑दन्तु स्वा॒त्तं चि॒त्सद्दे॑वह॒विः । सं ते॑ प्रा॒णो वाते॑न गच्छता॒jसमङ्गा॑नि॒ यज॑त्रै॒: सं य॒ज्ञप॑तिरा॒शिषा॑
ghṛ̱tenā̱ktau pa̱śūm̐strā̍yethā̱j reva̍ti̱ yaja̍māne pri̱yaṃ dhā ā vi̍śa | u̱rora̱ntari̍kṣātsa̱jūrde̱vena̱ vāte̍nā̱sya ha̱viṣa̱stmanā̍ yaja̱ sama̍sya ta̱nvā̱ bhava |
varṣo̱ varṣī̍yasi ya̱jñe ya̱jñapa̍tiṃ dhā̱: svāhā̍ de̱vebhyo̍ de̱vebhya̱: svāhā̍
||6.11||घृ॒तेना॒क्तौ प॒शूँस्त्रा॑येथा॒j रेव॑ति॒ यज॑माने प्रि॒यं धा आ वि॑श । उ॒रोर॒न्तरि॑क्षात्स॒जूर्दे॒वेन॒ वाते॑ना॒स्य ह॒विष॒स्त्मना॑ यज॒ सम॑स्य त॒न्वा॒ भव ।
वर्षो॒ वर्षी॑यसि य॒ज्ञे य॒ज्ञप॑तिं धा॒: स्वाहा॑ दे॒वेभ्यो॑ दे॒वेभ्य॒: स्वाहा॑
māhi̍rbhū̱rmā pṛdā̍ku̱rnama̍sta ātānāna̱rvā prehi̍ | ghṛ̱tasya̍ ku̱lyā upa̍ ṛ̱tasya̱ pathyā̱ anu̍
||6.12||माहि॑र्भू॒र्मा पृदा॑कु॒र्नम॑स्त आतानान॒र्वा प्रेहि॑ । घृ॒तस्य॑ कु॒ल्या उप॑ ऋ॒तस्य॒ पथ्या॒ अनु॑
devī̍rāpaḥ śu̱ddhā vo̍ḍhva̱j supa̍riviṣṭā de̱veṣu̱ supa̍riviṣṭā va̱yaṃ pa̍rive̱ṣṭāro̍ bhūyāsma
||6.13||देवी॑रापः शु॒द्धा वो॑ढ्व॒j सुप॑रिविष्टा दे॒वेषु॒ सुप॑रिविष्टा व॒यं प॑रिवे॒ष्टारो॑ भूयास्म
vāca̍ṃ te śundhāmi prā̱ṇaṃ te̍ śundhāmi̱ cakṣu̍ste śundhāmi̱ śrotra̍ṃ te śundhāmi̱ nābhi̍ṃ te śundhāmi̱ meḍhra̍ṃ te śundhāmi pā̱yuṃ te̍ śundhāmi ca̱ritrā̍m̐ste śundhāmi
||6.14||वाचं॑ ते शुन्धामि प्रा॒णं ते॑ शुन्धामि॒ चक्षु॑स्ते शुन्धामि॒ श्रोत्रं॑ ते शुन्धामि॒ नाभिं॑ ते शुन्धामि॒ मेढ्रं॑ ते शुन्धामि पा॒युं ते॑ शुन्धामि च॒रित्राँ॑स्ते शुन्धामि
mana̍sta̱ ā pyā̍yatā̱ṃ vākta̱ ā pyā̍yatāṃ prā̱ṇasta̱ ā pyā̍yatā̱ṃ cakṣu̍sta̱ ā pyā̍yatā̱ṃj
śrotra̍ṃ ta̱ ā pyā̍yatām | yatte̍ krū̱raṃ yadāsthi̍ta̱ṃ tatta̱ ā pyā̍yatā̱ṃ niṣṭyāyatā̱ṃ tatte̍ śudhyatu śamaho̍bhyaḥ |
oṣa̍dhe̱ trāya̍sva̱ svadhi̍te̱ maina hisīḥ
||6.15||मन॑स्त॒ आ प्या॑यतां॒ वाक्त॒ आ प्या॑यतां प्रा॒णस्त॒ आ प्या॑यतां॒ चक्षु॑स्त॒ आ प्या॑यतां॒j
श्रोत्रं॑ त॒ आ प्या॑यताम् । यत्ते॑ क्रू॒रं यदास्थि॑तं॒ तत्त॒ आ प्या॑यतां॒ निष्ट्यायतां॒ तत्ते॑ शुध्यतु शमहो॑भ्यः ।
ओष॑धे॒ त्राय॑स्व॒ स्वधि॑ते॒ मैन॑ᳪ हिᳪसीः
rakṣa̍sāṃ bhā̱go̱'si̱ nira̍sta̱j rakṣa̍ i̱dama̱ha rakṣo̱'bhi ti̍ṣṭhāmī̱dama̱ha rakṣo'va̍ bādha i̱dama̱ha rakṣo̍'dha̱maṃ tamo̍ nayāmi |
ghṛ̱tena̍ dyāvāpṛthivī̱ prorṇu̍vāthā̱ṃ vāyo̱ ve sto̱kānā̍magnirājya̍sya vetu̱ svāhā̱ svāhā̍kṛte ū̱rdhvana̍bhasaṃ māru̱taṃ ga̍cchatam
||6.16||रक्ष॑सां भा॒गो॒ऽसि॒ निर॑स्त॒j रक्ष॑ इ॒दम॒हᳪ रक्षो॒ऽभि ति॑ष्ठामी॒दम॒हᳪ रक्षोऽव॑ बाध इ॒दम॒हᳪ रक्षो॑ऽध॒मं तमो॑ नयामि ।
घृ॒तेन॑ द्यावापृथिवी॒ प्रोर्णु॑वाथां॒ वायो॒ वे स्तो॒काना॑मग्निराज्य॑स्य वेतु॒ स्वाहा॒ स्वाहा॑कृते ऊ॒र्ध्वन॑भसं मारु॒तं ग॑च्छतम्
i̱damā̍pa̱: pra va̍hatāva̱dyaṃ ca̱ mala̍ṃ ca̱ yat | yaccā̍bhidu̱drohānṛ̍ta̱ṃ yacca̍ śe̱pe a̍bhī̱ruṇa̍m |
āpo̍ mā̱ tasmā̱dena̍sa̱: pava̍mānaśca muñcatu
||6.17||इ॒दमा॑प॒: प्र व॑हताव॒द्यं च॒ मलं॑ च॒ यत् । यच्चा॑भिदु॒द्रोहानृ॑तं॒ यच्च॑ शे॒पे अ॑भी॒रुण॑म् ।
आपो॑ मा॒ तस्मा॒देन॑स॒: पव॑मानश्च मुञ्चतु
saṃ te̱ mano̱ mana̍sā̱ saṃ prā̱ṇaḥ prā̱ṇena̍ gacchatām | reḍa̍sya̱gniṣṭvā̍ śrīṇā̱tvāpa̍stvā̱
sama̍riṇa̱nvāta̍sya tvā̱ dhrājyai̍ pū̱ṣṇo rahyā̍ ū̱ṣmaṇo̍ vyathiṣa̱t prayu̍ta̱ṃ dveṣa̍:
||6.18||सं ते॒ मनो॒ मन॑सा॒ सं प्रा॒णः प्रा॒णेन॑ गच्छताम् । रेड॑स्य॒ग्निष्ट्वा॑ श्रीणा॒त्वाप॑स्त्वा॒
सम॑रिण॒न्वात॑स्य त्वा॒ ध्राज्यै॑ पू॒ष्णो रᳪह्या॑ ऊ॒ष्मणो॑ व्यथिष॒त् प्रयु॑तं॒ द्वेष॑:
ghṛ̱taṃ ghṛ̍tapāvānaḥ pibata̱ vasā̍ṃ vasāpāvānaḥ pibatā̱ntari̍kṣasya ha̱vira̍si̱ svāhā̍ |
diśa̍: pra̱diśa̍: ā̱diśo̍ vi̱diśa̍ u̱ddiśo̍ di̱gbhyaḥ svāhā̍
||6.19||घृ॒तं घृ॑तपावानः पिबत॒ वसां॑ वसापावानः पिबता॒न्तरि॑क्षस्य ह॒विर॑सि॒ स्वाहा॑ ।
दिश॑: प्र॒दिश॑: आ॒दिशो॑ वि॒दिश॑ उ॒द्दिशो॑ दि॒ग्भ्यः स्वाहा॑
ai̱ndraḥ prā̱ṇo aṅge̍ aṅge̱ ni dī̍dhyadai̱ndra u̍dā̱no aṅge̍ aṅge̱ nidhī̍taḥ | deva̍ tvaṣṭa̱rbhūri̍ te̱ sa sa̍metu̱ sala̍kṣmā̱ yadviṣu̍rūpa̱ṃ bhavā̍ti |
de̍va̱trā yanta̱mava̍se̱ sakhā̱yo'nu̍ tvā mā̱tā pi̱taro̍ madantu
||6.20||ऐ॒न्द्रः प्रा॒णो अङ्गे॑ अङ्गे॒ नि दी॑ध्यदै॒न्द्र उ॑दा॒नो अङ्गे॑ अङ्गे॒ निधी॑तः । देव॑ त्वष्ट॒र्भूरि॑ ते॒ सᳪ स॑मेतु॒ सल॑क्ष्मा॒ यद्विषु॑रूपं॒ भवा॑ति ।
दे॑व॒त्रा यन्त॒मव॑से॒ सखा॒योऽनु॑ त्वा मा॒ता पि॒तरो॑ मदन्तु
sa̱mu̱draṃ ga̍ccha̱ svāhā̍ 'ntari̍kṣaṃ gaccha̱ svāhā̍ de̱va sa̍vi̱tāra̍ṃ gaccha̱ svāhā̍ mi̱trāvaru̍ṇau gaccha̱ svāhā̍
'horā̱tre ga̍ccha̱ svāhā̍ chandāsi gaccha̱ svāhā̱ dyāvā̍pṛthi̱vī ga̍ccha̱ svāhā̍ ya̱jñaṃ ga̍ccha̱ svāhā̱ soma̍ṃ gaccha̱ svāhā̍ di̱vyaṃ nabho̍ gaccha̱ svāhā̱ 'gniṃ vai̍śvāna̱raṃ ga̍ccha̱ svāhā̱ mano̍ me̱ hārdi̍ yaccha̱ diva̍ṃ te dhū̱mo ga̍cchatu̱ svarjyoti̍: pṛthi̱vīṃ bhasma̱nā''pṛ̍ṇa̱ svāhā̍
||6.21||स॒मु॒द्रं ग॑च्छ॒ स्वाहा॑ ऽन्तरि॑क्षं गच्छ॒ स्वाहा॑ दे॒वᳪ स॑वि॒तारं॑ गच्छ॒ स्वाहा॑ मि॒त्रावरु॑णौ गच्छ॒ स्वाहा॑
ऽहोरा॒त्रे ग॑च्छ॒ स्वाहा॑ छन्दा॑ᳪसि गच्छ॒ स्वाहा॒ द्यावा॑पृथि॒वी ग॑च्छ॒ स्वाहा॑ य॒ज्ञं ग॑च्छ॒ स्वाहा॒ सोमं॑ गच्छ॒ स्वाहा॑ दि॒व्यं नभो॑ गच्छ॒ स्वाहा॒ ऽग्निं वै॑श्वान॒रं ग॑च्छ॒ स्वाहा॒ मनो॑ मे॒ हार्दि॑ यच्छ॒ दिवं॑ ते धू॒मो ग॑च्छतु॒ स्वर्ज्योति॑: पृथि॒वीं भस्म॒नाऽऽपृ॑ण॒ स्वाहा॑
mā'po mau̍ṣadhīrhisī̱rdhāmno̍ dhāmno rāja̱m̐stato̍ varuṇa no muñca | yadā̱hura̱ghnyā iti̱ varu̱ṇeti̱ śapā̍mahe̱ tato̍ varuṇa no muñca |
sumi̱tri̱yā na̱ āpa̱ oṣa̍dhayaḥ santu durmitri̱yāstasmai̍ santu̱ yosmāndveṣṭi̱ yaṃ ca̍ va̱yaṃ dvi̱ṣma:
||6.22||माऽपो मौ॑षधीर्हिᳪसी॒र्धाम्नो॑ धाम्नो राजँ॒स्ततो॑ वरुण नो मुञ्च । यदा॒हुर॒घ्न्या इति॒ वरु॒णेति॒ शपा॑महे॒ ततो॑ वरुण नो मुञ्च ।
सुमि॒त्रि॒या न॒ आप॒ ओष॑धयः सन्तु दुर्मित्रि॒यास्तस्मै॑ सन्तु॒ योस्मान्द्वेष्टि॒ यं च॑ व॒यं द्वि॒ष्म:
ha̱viṣma̍tīri̱mā āpo̍ ha̱viṣmā̱m̐2 ā vi̍vāsati | ha̱viṣmā̍n de̱vo a̍dhva̱ro ha̱viṣmā̍m̐2 astu̱ sūrya̍:
||6.23||ह॒विष्म॑तीरि॒मा आपो॑ ह॒विष्माँ॒२ आ वि॑वासति । ह॒विष्मा॑न् दे॒वो अ॑ध्व॒रो ह॒विष्माँ॑२ अस्तु॒ सूर्य॑:
a̱gnervo'pa̍nnagṛhasya̱ sada̍si sādayāmīndrā̱gnyorbhā̍ga̱dheyī̍ stha mi̱trāvaru̍ṇayorbhāga̱dheyī̍ stha viśve̍ṣāṃ de̱vānā̍ṃ bhāga̱dheyī̍ stha | a̱mūryā upa̱ sūrye̱ yābhi̍rvā̱ sūrya̍: sa̱ha | tā no̍ hinvantvadhva̱ram
||6.24||अ॒ग्नेर्वोऽप॑न्नगृहस्य॒ सद॑सि सादयामीन्द्रा॒ग्न्योर्भा॑ग॒धेयी॑ स्थ मि॒त्रावरु॑णयोर्भाग॒धेयी॑ स्थ विश्वे॑षां दे॒वानां॑ भाग॒धेयी॑ स्थ । अ॒मूर्या उप॒ सूर्ये॒ याभि॑र्वा॒ सूर्य॑: स॒ह । ता नो॑ हिन्वन्त्वध्व॒रम्
hṛ̱de tvā̱ mana̍se tvā di̱ve tvā̱ sūryā̍ya tvā | ū̱rdhvami̱mama̍dhva̱raṃ di̱vi de̱veṣu̱ hotrā̍ yaccha
||6.25||हृ॒दे त्वा॒ मन॑से त्वा दि॒वे त्वा॒ सूर्या॑य त्वा । ऊ॒र्ध्वमि॒मम॑ध्व॒रं दि॒वि दे॒वेषु॒ होत्रा॑ यच्छ
soma̍ rāja̱n viśvā̱stvaṃ pra̱jā u̱pāva̍roha viśvā̱stvāṃ pra̱jā u̱pāva̍rohantu |
śṛ̱ṇotva̱gniḥ sa̱midhā̍ ha̱vaṃ me̍ śṛṇva̱ntvāpo̍ dhi̱ṣaṇā̍śca de̱vīḥ |
śrotā̍ grāvāṇo vi̱duṣo̱ na ya̱jña śṛ̱ṇotu̍ de̱vaḥ sa̍vi̱tā hava̍ṃ me̱ svāhā̍
||6.26||सोम॑ राज॒न् विश्वा॒स्त्वं प्र॒जा उ॒पाव॑रोह विश्वा॒स्त्वां प्र॒जा उ॒पाव॑रोहन्तु ।
शृ॒णोत्व॒ग्निः स॒मिधा॑ ह॒वं मे॑ शृण्व॒न्त्वापो॑ धि॒षणा॑श्च दे॒वीः ।
श्रोता॑ ग्रावाणो वि॒दुषो॒ न य॒ज्ञᳪ शृ॒णोतु॑ दे॒वः स॑वि॒ता हवं॑ मे॒ स्वाहा॑
devī̍rāpo apāṃ napā̱dyo va̍ ū̱rmirha̍vi̱ṣya̱ indri̱yāvā̍n ma̱dinta̍maḥ |
taṃ de̱vebhyo̍ deva̱trā da̍tta śukra̱pebhyo̱ yeṣā̍ṃ bhā̱ga stha̱ svāhā̍
||6.27||देवी॑रापो अपां नपा॒द्यो व॑ ऊ॒र्मिर्ह॑वि॒ष्य॒ इन्द्रि॒यावा॑न् म॒दिन्त॑मः ।
तं दे॒वेभ्यो॑ देव॒त्रा द॑त्त शुक्र॒पेभ्यो॒ येषां॑ भा॒ग स्थ॒ स्वाहा॑
kārṣi̍rasi sa̍mu̱drasya̱ tvā kṣi̍tyā̱ unna̍yāmi | samāpo̍ a̱dbhira̍gmata̱ samoṣa̍dhībhi̱roṣa̍dhīḥ
||6.28||कार्षि॑रसि स॑मु॒द्रस्य॒ त्वा क्षि॑त्या॒ उन्न॑यामि । समापो॑ अ॒द्भिर॑ग्मत॒ समोष॑धीभि॒रोष॑धीः
yama̍gne pṛ̱tsu martya̱mavā̱ vāje̍ṣu̱ yaṃ ju̱nāḥ | sa yantā̱ śaśva̍tī̱riṣa̱: svāhā̍
||6.29||यम॑ग्ने पृ॒त्सु मर्त्य॒मवा॒ वाजे॑षु॒ यं जु॒नाः । स यन्ता॒ शश्व॑ती॒रिष॒: स्वाहा॑
de̱vasya̍ tvā savi̱tuḥ pra̍sa̱ve'śvino̍rbā̱hubhyā̍ṃ pū̱ṣṇo hastā̍bhyām | ā da̍de̱ rāvā̍si gabhī̱rami̱mama̍dhva̱raṃ kṛ̱dhīndrā̍ya su̱ṣūta̍mam |
u̱tta̱mena̍ pa̱vinorja̍svanta̱ṃ madhu̍manta̱ṃ paya̍svantaṃ nigrā̱bhyā̱ stha deva̱śruta̍sta̱rpaya̍ta mā
||6.30||दे॒वस्य॑ त्वा सवि॒तुः प्र॑स॒वेऽश्विनो॑र्बा॒हुभ्यां॑ पू॒ष्णो हस्ता॑भ्याम् । आ द॑दे॒ रावा॑सि गभी॒रमि॒मम॑ध्व॒रं कृ॒धीन्द्रा॑य सु॒षूत॑मम् ।
उ॒त्त॒मेन॑ प॒विनोर्ज॑स्वन्तं॒ मधु॑मन्तं॒ पय॑स्वन्तं निग्रा॒भ्या॒ स्थ देव॒श्रुत॑स्त॒र्पय॑त मा
mano̍ me tarpayata̱ vāca̍ṃ me tarpayata prā̱ṇaṃ me̍ tarpayata̱ cakṣu̍rme tarpayata̱ śrotra̍ṃ me tarpayatā̱tmāna̍ṃ me tarpayata pra̱jāṃ me̍ tarpayata pa̱śūnme̍ tarpayata ga̱ṇānme̍ tarpayata ga̱ṇā me̱ mā vi tṛ̍ṣan
||6.31||मनो॑ मे तर्पयत॒ वाचं॑ मे तर्पयत प्रा॒णं मे॑ तर्पयत॒ चक्षु॑र्मे तर्पयत॒ श्रोत्रं॑ मे तर्पयता॒त्मानं॑ मे तर्पयत प्र॒जां मे॑ तर्पयत प॒शून्मे॑ तर्पयत ग॒णान्मे॑ तर्पयत ग॒णा मे॒ मा वि तृ॑षन्
indrā̍ya tvā̱ vasu̍mate ru̱drava̍ta̱ indrā̍ya tvā ''di̱tyava̍ta̱ indrā̍ya tvā 'bhimāti̱ghne |
śye̱nāya̍ tvā soma̱bhṛte̱ 'gnaye̍ tvā rāyaspoṣa̱de
||6.32||इन्द्रा॑य त्वा॒ वसु॑मते रु॒द्रव॑त॒ इन्द्रा॑य त्वा ऽऽदि॒त्यव॑त॒ इन्द्रा॑य त्वा ऽभिमाति॒घ्ने ।
श्ये॒नाय॑ त्वा सोम॒भृते॒ ऽग्नये॑ त्वा रायस्पोष॒दे
yatte̍ soma di̱vi jyoti̱ryatpṛ̍thi̱vyāṃ yadu̱rāva̱ntari̍kṣe | tenāsmai̱ yaja̍mānāyo̱ru rā̱ye kṛ̱dhyadhi̍ dā̱tre vo̍caḥ
||6.33||यत्ते॑ सोम दि॒वि ज्योति॒र्यत्पृ॑थि॒व्यां यदु॒राव॒न्तरि॑क्षे । तेनास्मै॒ यज॑मानायो॒रु रा॒ये कृ॒ध्यधि॑ दा॒त्रे वो॑चः
śvā̱trā stha̍ vṛtra̱turo̱ rādho̍gūrtā a̱mṛta̍sya̱ patnī̍: | tā de̍vīrdeva̱tremaṃ ya̱jñaṃ na̍ya̱topa̍hūtā̱: soma̍sya pibata
||6.34||श्वा॒त्रा स्थ॑ वृत्र॒तुरो॒ राधो॑गूर्ता अ॒मृत॑स्य॒ पत्नी॑: । ता दे॑वीर्देव॒त्रेमं य॒ज्ञं न॑य॒तोप॑हूता॒: सोम॑स्य पिबत
mā bhe̱rmā saṃ vi̍kthā̱ ūrja̍ṃ dhatsva̱ dhiṣa̍ṇe vī̱ḍvī sa̱tī vī̍ḍayethā̱mūrja̍ṃ dadhāthām | pā̱pmā ha̱to na soma̍:
||6.35||मा भे॒र्मा सं वि॑क्था॒ ऊर्जं॑ धत्स्व॒ धिष॑णे वी॒ड्वी स॒ती वी॑डयेथा॒मूर्जं॑ दधाथाम् । पा॒प्मा ह॒तो न सोम॑:
prāgapā̱guda̍gadha̱rāksa̱rvata̍stvā̱ diśa̱ ā dhā̍vantu | amba̱ niṣpa̍ra̱ sama̱rīrvi̍dām
||6.36||प्रागपा॒गुद॑गध॒राक्स॒र्वत॑स्त्वा॒ दिश॒ आ धा॑वन्तु । अम्ब॒ निष्प॑र॒ सम॒रीर्वि॑दाम्
tvama̱ṅga praśasiṣo de̱vaḥ śa̍viṣṭha̱ martya̍m | na tvada̱nyo ma̍ghavannasti marḍi̱tendra̱ bravī̍mi te̱ vaca̍:
||6.37||त्वम॒ङ्ग प्रश॑ᳪसिषो दे॒वः श॑विष्ठ॒ मर्त्य॑म् । न त्वद॒न्यो म॑घवन्नस्ति मर्डि॒तेन्द्र॒ ब्रवी॑मि ते॒ वच॑: