sa̱midhā̱'gniṃ du̍vasyata ghṛtairbo̍dhaya̱tāti̍thim | āsmi̍n ha̱vyā ju̍hotana
||3.1||स॒मिधा॒ऽग्निं दु॑वस्यत घृतैर्बो॑धय॒ताति॑थिम् । आस्मि॑न् ह॒व्या जु॑होतन
susa̍middhāya śo̱ciṣe̍ ghṛ̱taṃ tī̱vraṃ ju̍hotana | a̱gnaye̍ jā̱tave̍dase
||3.2||सुस॑मिद्धाय शो॒चिषे॑ घृ॒तं ती॒व्रं जु॑होतन । अ॒ग्नये॑ जा॒तवे॑दसे
taṃ tvā̍ sa̱midbhi̍raṅgiro ghṛ̱tena̍ vardhayāmasi | bṛ̱haccho̍cā yaviṣṭhya
||3.3||तं त्वा॑ स॒मिद्भि॑रङ्गिरो घृ॒तेन॑ वर्धयामसि । बृ॒हच्छो॑चा यविष्ठ्य
upa̍ tvā'gne ha̱viṣma̍tīrghṛ̱tācī̍ryantu haryata | ju̱ṣasva̍ sa̱midho̱ mama̍
||3.4||उप॑ त्वाऽग्ने ह॒विष्म॑तीर्घृ॒ताची॑र्यन्तु हर्यत । जु॒षस्व॑ स॒मिधो॒ मम॑
bhūrbhuva̱: svardyauri̍va bhū̱mnā pṛ̍thi̱vīva̍ vari̱mṇā | tasyā̍ste pṛthivi devayajani pṛ̱ṣṭhe'gnima̍nnā̱dama̱nnādyā̱yāda̍dhe
||3.5||भूर्भुव॒: स्वर्द्यौरि॑व भू॒म्ना पृ॑थि॒वीव॑ वरि॒म्णा । तस्या॑स्ते पृथिवि देवयजनि पृ॒ष्ठेऽग्निम॑न्ना॒दम॒न्नाद्या॒याद॑धे
āyaṃ gauḥ pṛśni̍rakramī̱dasa̍dan mā̱tara̍ṃ pu̱raḥ | pi̱tara̍ṃ ca pra̱yantsva̍:
||3.6||आयं गौः पृश्नि॑रक्रमी॒दस॑दन् मा॒तरं॑ पु॒रः । पि॒तरं॑ च प्र॒यन्त्स्व॑:
a̱ntaśca̍rati roca̱nāsya prā̱ṇādapā̍na̱tī | vya̍khyan mahi̱ṣo diva̍m
||3.7||अ॒न्तश्च॑रति रोच॒नास्य प्रा॒णादपा॑न॒ती । व्य॑ख्यन् महि॒षो दिव॑म्
tri̱jśaddhāma̱ vi rā̍jati̱ vāk pa̍ta̱ṅgāya̍ dhīyate | prati̱ vasto̱raha̱ dyubhi̍:
||3.8||त्रि॒jशद्धाम॒ वि रा॑जति॒ वाक् प॑त॒ङ्गाय॑ धीयते । प्रति॒ वस्तो॒रह॒ द्युभि॑:
a̱gnirjyoti̱rjyoti̍ra̱gniḥ svāhā̍ | sūryo̱ jyoti̱rjyoti̱: sūrya̱: svāhā̍ |
a̱gnirvarco̱ jyoti̱rvarca̱ḥ svāhā̍ | sūryo̱ varco̱ jyoti̱rvarca̱ḥ svāhā̍ | jyoti̱: sūrya̱: sūryo̱ jyoti̱: svāhā̍
||3.9||अ॒ग्निर्ज्योति॒र्ज्योति॑र॒ग्निः स्वाहा॑ । सूर्यो॒ ज्योति॒र्ज्योति॒: सूर्य॒: स्वाहा॑ ।
अ॒ग्निर्वर्चो॒ ज्योति॒र्वर्चः॒ स्वाहा॑ । सूर्यो॒ वर्चो॒ ज्योति॒र्वर्चः॒ स्वाहा॑ । ज्योति॒: सूर्य॒: सूर्यो॒ ज्योति॒: स्वाहा॑
sa̱jūrde̱vena̍ savi̱trā sa̱jū rātryendra̍vatyā | ju̍ṣā̱ṇo a̱gnirve̍tu̱ svāhā̍ |
sa̱jūrde̱vena̍ savi̱trā sa̱jūru̱ṣasendra̍vatyā |ju̍ṣā̱ṇaḥ sūryo̍ vetu̱ svāhā̍
||3.10||स॒जूर्दे॒वेन॑ सवि॒त्रा स॒जू रात्र्येन्द्र॑वत्या । जु॑षा॒णो अ॒ग्निर्वे॑तु॒ स्वाहा॑ ।
स॒जूर्दे॒वेन॑ सवि॒त्रा स॒जूरु॒षसेन्द्र॑वत्या ।जु॑षा॒णः सूर्यो॑ वेतु॒ स्वाहा॑
u̱pa̱pra̱yanto̍ adhva̱raṃ mantra̍ṃ vocemā̱gnaye̍ | ā̱re a̱sme ca̍ śṛṇva̱te
||3.11||उ॒प॒प्र॒यन्तो॑ अध्व॒रं मन्त्रं॑ वोचेमा॒ग्नये॑ । आ॒रे अ॒स्मे च॑ शृण्व॒ते
a̱gnirmū̱rdhā di̱vaḥ ka̱kutpati̍: pṛthi̱vyā a̱yam | a̱pāretāsi jinvati
||3.12||अ॒ग्निर्मू॒र्धा दि॒वः क॒कुत्पति॑: पृथि॒व्या अ॒यम् । अ॒पाᳪरेता॑ᳪसि जिन्वति
u̱bhā vā̍mindrāgnī āhu̱vadhyā̍ u̱bhā rādha̍saḥ sa̱ha mā̍da̱yadhyai̍ |
u̱bhā dā̱tārā̍vi̱ṣāra̍yī̱ṇāmu̱bhā vāja̍sya sā̱taye̍ huve vām
||3.13||उ॒भा वा॑मिन्द्राग्नी आहु॒वध्या॑ उ॒भा राध॑सः स॒ह मा॑द॒यध्यै॑ ।
उ॒भा दा॒तारा॑वि॒षाᳪर॑यी॒णामु॒भा वाज॑स्य सा॒तये॑ हुवे वाम्
a̱yaṃ te̱ yoni̍rṛ̱tviyo̱ yato̍ jā̱to aro̍cathāḥ | taṃ jā̱nanna̍gna̱ āro̱hāthā̍ no vardhayā ra̱yim
||3.14||अ॒यं ते॒ योनि॑रृ॒त्वियो॒ यतो॑ जा॒तो अरो॑चथाः । तं जा॒नन्न॑ग्न॒ आरो॒हाथा॑ नो वर्धया र॒यिम्
a̱yami̱ha pra̍tha̱mo dhā̍yi dhā̱tṛbhi̱rhotā̱ yaji̍ṣṭho adhva̱reṣvīḍya̍: |
yamapna̍vāno̱ bhṛga̍vo viruru̱curvane̍ṣu ci̱traṃ vi̱bhva̱ṃ vi̱śevi̍śe
||3.15||अ॒यमि॒ह प्र॑थ॒मो धा॑यि धा॒तृभि॒र्होता॒ यजि॑ष्ठो अध्व॒रेष्वीड्य॑: ।
यमप्न॑वानो॒ भृग॑वो विरुरु॒चुर्वने॑षु चि॒त्रं वि॒भ्वं॒ वि॒शेवि॑शे
a̱sya pra̱tnāmanu̱ dyutaśu̱kraṃ du̍duhre̱ ahra̍yaḥ | paya̍: sahasra̱sāmṛṣi̍m
||3.16||अ॒स्य प्र॒त्नामनु॒ द्युत॑ᳪशु॒क्रं दु॑दुह्रे॒ अह्र॑यः । पय॑: सहस्र॒सामृषि॑म्
ta̍nū̱pā a̍gne'si ta̱nva̱ṃ me pāhyāyu̱rdā a̍gne̱ syāyu̍rme dehi va̍rco̱dā a̍gne'si̱ varco̍ me dehi |
agne̱ yanme̍ ta̱nvā̱ ū̱naṃ tanma̱ āpṛ̍ṇa
||3.17||त॑नू॒पा अ॑ग्नेऽसि त॒न्वं॒ मे पाह्यायु॒र्दा अ॑ग्ने॒ स्यायु॑र्मे देहि व॑र्चो॒दा अ॑ग्नेऽसि॒ वर्चो॑ मे देहि ।
अग्ने॒ यन्मे॑ त॒न्वा॒ ऊ॒नं तन्म॒ आपृ॑ण
indhā̍nāstvā śa̱tahimā̍ dyu̱mantasami̍dhīmahi | vaya̍svanto vaya̱skṛta̱ saha̍svantaḥ saha̱skṛta̍m |
agne̍ sapatna̱dambha̍na̱mada̍bdhāso̱ adā̍bhyam | citrā̍vaso sva̱sti te̍ pā̱rama̍śīya
||3.18||इन्धा॑नास्त्वा श॒तᳪहिमा॑ द्यु॒मन्त॒ᳪसमि॑धीमहि । वय॑स्वन्तो वय॒स्कृत॒ सह॑स्वन्तः सह॒स्कृत॑म् ।
अग्ने॑ सपत्न॒दम्भ॑न॒मद॑ब्धासो॒ अदा॑भ्यम् । चित्रा॑वसो स्व॒स्ति ते॑ पा॒रम॑शीय
saṃ tvama̍gne̱ sūrya̍sya̱ varca̍sāgathā̱: samṛṣī̍ṇā stu̱tena̍ |
saṃ pri̱yeṇa̱ dhāmnā̱ sama̱hamāyu̍ṣā̱ saṃ varca̍sā̱ saṃ pra̱jayā̱ sa rā̱yaspoṣe̍ṇa gmiṣīya
||3.19||सं त्वम॑ग्ने॒ सूर्य॑स्य॒ वर्च॑सागथा॒: समृषी॑णाᳪ स्तु॒तेन॑ ।
सं प्रि॒येण॒ धाम्ना॒ सम॒हमायु॑षा॒ सं वर्च॑सा॒ सं प्र॒जया॒ सᳪ रा॒यस्पोषे॑ण ग्मिषीय
andha̱ sthāndho̍ vo bhakṣīya̱ maha̍ stha̱ maho̍ vo bhakṣī̱yorja̱ sthorja̍ṃ vo bhakṣīya rā̱yaspoṣa̍ stha rā̱yaspoṣa̍ṃ vo bhakṣīya
||3.20||अन्ध॒ स्थान्धो॑ वो भक्षीय॒ मह॑ स्थ॒ महो॑ वो भक्षी॒योर्ज॒ स्थोर्जं॑ वो भक्षीय रा॒यस्पोष॑ स्थ रा॒यस्पोषं॑ वो भक्षीय
reva̍tī̱ rama̍dhvama̱sminyonā̍va̱smin go̱ṣṭhe'smiṃllo̱ke̱'sminkṣaye̍ | ihai̱va sta̱ māpa̍gāta
||3.21||रेव॑ती॒ रम॑ध्वम॒स्मिन्योना॑व॒स्मिन् गो॒ष्ठेऽस्मिंल्लो॒के॒ऽस्मिन्क्षये॑ । इहै॒व स्त॒ माप॑गात
sahi̱tāsi̍ viśvarū̱pyū̱rjā māvi̍śa gaupa̱tyena̍ | upa̍ tvāgne di̱vedi̍ve̱ doṣā̍vastarddhi̱yā va̱yam |
namo̱ bhara̍nta̱ ema̍si
||3.22||स॒ᳪहि॒तासि॑ विश्वरू॒प्यू॒र्जा मावि॑श गौप॒त्येन॑ । उप॑ त्वाग्ने दि॒वेदि॑वे॒ दोषा॑वस्तर्द्धि॒या व॒यम् ।
नमो॒ भर॑न्त॒ एम॑सि
rāja̍ntamadhva̱rāṇā̍ṃ go̱pāmṛ̱tasya̱ dīdi̍vim | vardha̍māna sve dame̍
||3.23||राज॑न्तमध्व॒राणां॑ गो॒पामृ॒तस्य॒ दीदि॑विम् । वर्ध॑मान॒ᳪ स्वे दमे॑
sa na̍: pi̱teva̍ sū̱nave'gne̍ sūpāya̱no bha̍va | saca̍svā naḥ sva̱staye̍
||3.24||स न॑: पि॒तेव॑ सू॒नवेऽग्ने॑ सूपाय॒नो भ॑व । सच॑स्वा नः स्व॒स्तये॑
agne̱ tvaṃ no̱ anta̍ma u̱ta trā̱tā śi̱vo bha̍vā varū̱thya̱: |
vasu̍ra̱gnirvasuśra̍vā̱ acchā̍ nakṣi dyu̱matta̍ma ra̱yiṃ dā̍:
||3.25||अग्ने॒ त्वं नो॒ अन्त॑म उ॒त त्रा॒ता शि॒वो भ॑वा वरू॒थ्य॒: ।
वसु॑र॒ग्निर्वसुश्र॑वा॒ अच्छा॑ नक्षि द्यु॒मत्त॑मᳪ र॒यिं दा॑:
taṃ tvā̍ śociṣṭha dīdivaḥ su̱mnāya̍ nū̱namī̍mahe̱ sakhi̍bhyaḥ |
sa no̍ bodhi śru̱dhī hava̍muru̱ṣyā ṇo̍ adhāya̱taḥ sama̍smāt
||3.26||तं त्वा॑ शोचिष्ठ दीदिवः सु॒म्नाय॑ नू॒नमी॑महे॒ सखि॑भ्यः ।
स नो॑ बोधि श्रु॒धी हव॑मुरु॒ष्या णो॑ अधाय॒तः सम॑स्मात्
iḍa̱ ehyadi̍ta̱ ehi̍ kāmyā̱ eta̍ | mayi̍ vaḥ kāma̱dhara̍ṇaṃ bhūyāt
||3.27||इड॒ एह्यदि॑त॒ एहि॑ काम्या॒ एत॑ । मयि॑ वः काम॒धर॑णं भूयात्
so̱māna svara̍ṇaṃ kṛṇu̱hi bra̍hmaṇaspate | ka̱kṣīva̍nta̱ṃ ya au̍śi̱jaḥ
||3.28||सो॒मान॒ᳪ स्वर॑णं कृणु॒हि ब्र॑ह्मणस्पते । क॒क्षीव॑न्तं॒ य औ॑शि॒जः
yo re̱vānyo a̍mīva̱hā va̍su̱vitpu̍ṣṭi̱varddha̍naḥ | sa na̍: siṣaktu̱ yastu̱raḥ
||3.29||यो रे॒वान्यो अ॑मीव॒हा व॑सु॒वित्पु॑ष्टि॒वर्द्ध॑नः । स न॑: सिषक्तु॒ यस्तु॒रः
mā na̱: śaso̱ ara̍ruṣo dhū̱rtiḥ praṇa̱ṅa martya̍sya | rakṣā̍ ṇo brahmaṇaspate
||3.30||मा न॒: शᳪसो॒ अर॑रुषो धू॒र्तिः प्रण॒ङ मर्त्य॑स्य । रक्षा॑ णो ब्रह्मणस्पते
mahi̍ trī̱ṇāmavo̍'stu dyu̱kṣaṃ mi̱trasyā̍rya̱mṇaḥ | du̍rā̱dharṣa̱ṃ varu̍ṇasya
||3.31||महि॑ त्री॒णामवो॑ऽस्तु द्यु॒क्षं मि॒त्रस्या॑र्य॒म्णः । दु॑रा॒धर्षं॒ वरु॑णस्य
na̱hi teṣā̍ma̱mā ca̱na nādhva̍su vāra̱ṇeṣu̍ | īśe̍ ri̱pura̱ghaśasaḥ
||3.32||न॒हि तेषा॑म॒मा च॒न नाध्व॑सु वार॒णेषु॑ । ईशे॑ रि॒पुर॒घश॑ᳪसः
te hi pu̱trāso̱ adi̍te̱ḥ pra jī̱vase̱ martyā̍ya | jyoti̱ryaccha̱ntyaja̍sram
||3.33||ते हि पु॒त्रासो॒ अदि॑तेः॒ प्र जी॒वसे॒ मर्त्या॑य । ज्योति॒र्यच्छ॒न्त्यज॑स्रम्
ka̱dā ca̱na sta̱rīra̍si̱ nendra̍ saścasi dā̱śuṣe̍ | u̱popennu ma̍ghava̱n bhūya̱ innu te̱ dāna̍ṃ de̱vasya̍ pṛcyate
||3.34||क॒दा च॒न स्त॒रीर॑सि॒ नेन्द्र॑ सश्चसि दा॒शुषे॑ । उ॒पोपेन्नु म॑घव॒न् भूय॒ इन्नु ते॒ दानं॑ दे॒वस्य॑ पृच्यते
tatsa̍vi̱turvare̍ṇya̱ṃ bhargo̍ de̱vasya̍ dhīmahi | dhiyo̱ yo na̍: praco̱dayā̍t
||3.35||तत्स॑वि॒तुर्वरे॑ण्यं॒ भर्गो॑ दे॒वस्य॑ धीमहि । धियो॒ यो न॑: प्रचो॒दया॑त्
pari̍ te dū̱ḍabho̱ ratho̱'smām̐2 a̍śnotu vi̱śvata̍: | yena̱ rakṣa̍si dā̱śuṣa̍:
||3.36||परि॑ ते दू॒डभो॒ रथो॒ऽस्माँ२ अ॑श्नोतु वि॒श्वत॑: । येन॒ रक्ष॑सि दा॒शुष॑:
bhūrbhuva̱: sva̱: supra̱jāḥ pra̱jābhi̍: syā su̱vīro̍ vī̱raiḥ su̱poṣa̱: poṣai̍: |
narya̍ pra̱jāṃ me̍ pāhi śasya̍ pa̱śūnme̍ pā̱hyatha̍rya pi̱tuṃ me̍ pāhi
||3.37||भूर्भुव॒: स्व॒: सुप्र॒जाः प्र॒जाभि॑: स्याᳪ सु॒वीरो॑ वी॒रैः सु॒पोष॒: पोषै॑: ।
नर्य॑ प्र॒जां मे॑ पाहि शᳪस्य॑ प॒शून्मे॑ पा॒ह्यथ॑र्य पि॒तुं मे॑ पाहि
ā ga̍nma vi̱śvave̍dasama̱smabhya̍ṃ vasu̱vitta̍mam | agne̍ samrāḍa̱bhi dyu̱mnama̱bhi saha̱ ā ya̍cchasva
||3.38||आ ग॑न्म वि॒श्ववे॑दसम॒स्मभ्यं॑ वसु॒वित्त॑मम् । अग्ने॑ सम्राड॒भि द्यु॒म्नम॒भि सह॒ आ य॑च्छस्व
a̱yama̱gnirgṛ̱hapa̍ti̱rgārha̍patyaḥ pra̱jāyā̍ vasu̱vitta̍maḥ | agne̍ gṛhapate̱'bhi dyu̱mnama̱bhi saha̱ ā ya̍cchasva
||3.39||अ॒यम॒ग्निर्गृ॒हप॑ति॒र्गार्ह॑पत्यः प्र॒जाया॑ वसु॒वित्त॑मः । अग्ने॑ गृहपते॒ऽभि द्यु॒म्नम॒भि सह॒ आ य॑च्छस्व
a̱yama̱gniḥ pu̍rī̱ṣyo̱ rayi̱mān pu̍ṣṭi̱vardha̍naḥ | agne̍ purīṣyā̱bhi dyu̱mnama̱bhi saha̱ ā ya̍cchasva
||3.40||अ॒यम॒ग्निः पु॑री॒ष्यो॒ रयि॒मान् पु॑ष्टि॒वर्ध॑नः । अग्ने॑ पुरीष्या॒भि द्यु॒म्नम॒भि सह॒ आ य॑च्छस्व
gṛhā̱ mā bi̍bhīta̱ mā ve̍padhva̱mūrja̍ṃ bibhrata̱ ema̍si | ūrja̱ṃ bibhra̍dvaḥ su̱manā̍: sume̱dhā gṛ̱hānaimi̱ mana̍sā̱ moda̍mānaḥ
||3.41||गृहा॒ मा बि॑भीत॒ मा वे॑पध्व॒मूर्जं॑ बिभ्रत॒ एम॑सि । ऊर्जं॒ बिभ्र॑द्वः सु॒मना॑: सुमे॒धा गृ॒हानैमि॒ मन॑सा॒ मोद॑मानः
yeṣā̍ma̱dhyeti̍ pra̱vasa̱nyeṣu̍ saumana̱so ba̱huḥ | gṛ̱hānupa̍hvayāmahe̱ te no̍ jānantu jāna̱taḥ
||3.42||येषा॑म॒ध्येति॑ प्र॒वस॒न्येषु॑ सौमन॒सो ब॒हुः । गृ॒हानुप॑ह्वयामहे॒ ते नो॑ जानन्तु जान॒तः
upa̍hūtā i̱ha gāva̱ upa̍hūtā ajā̱vaya̍: | atho̱ anna̍sya kī̱lāla̱ upa̍hūto gṛ̱heṣu̍ naḥ | kṣemā̍ya va̱: śāntyai̱ prapa̍dye śi̱va śa̱gma śa̱ṃyo: śa̱ṃyo:
||3.43||उप॑हूता इ॒ह गाव॒ उप॑हूता अजा॒वय॑: । अथो॒ अन्न॑स्य की॒लाल॒ उप॑हूतो गृ॒हेषु॑ नः । क्षेमा॑य व॒: शान्त्यै॒ प्रप॑द्ये शि॒वᳪ श॒ग्मᳪ शं॒यो: शं॒यो:
pra̱ghā̱sino̍ havāmahe ma̱ruta̍śca ri̱śāda̍saḥ | ka̱ra̱mbheṇa̍ sa̱joṣa̍saḥ
||3.44||प्र॒घा॒सिनो॑ हवामहे म॒रुत॑श्च रि॒शाद॑सः । क॒र॒म्भेण॑ स॒जोष॑सः
yadgrāme̱ yadara̍ṇye̱ yatsa̱bhāyā̱ṃ yadi̍ndri̍ye | yadena̍ścakṛ̱mā va̱yami̱daṃ tadava̍yajāmahe̱ svāhā̍
||3.45||यद्ग्रामे॒ यदर॑ण्ये॒ यत्स॒भायां॒ यदि॑न्द्रि॑ये । यदेन॑श्चकृ॒मा व॒यमि॒दं तदव॑यजामहे॒ स्वाहा॑
mo ṣū ṇa̍ i̱ndrātra̍ pṛ̱tsu de̱vairasti̱ hi ṣmā̍ te śuṣminnava̱yāḥ |
ma̱haści̱dyasya̍ mī̱ḍhuṣo̍ ya̱vyā ha̱viṣma̍to ma̱ruto̱ vanda̍te̱ gīḥ
||3.46||मो षू ण॑ इ॒न्द्रात्र॑ पृ॒त्सु दे॒वैरस्ति॒ हि ष्मा॑ ते शुष्मिन्नव॒याः ।
म॒हश्चि॒द्यस्य॑ मी॒ढुषो॑ य॒व्या ह॒विष्म॑तो म॒रुतो॒ वन्द॑ते॒ गीः
akra̱n karma̍ karma̱kṛta̍: sa̱ha vā̱cā ma̍yo̱bhuvā̍ | de̱vebhya̱: karma̍ kṛ̱tvāsta̱ṃ preta̍ sacābhuvaḥ
||3.47||अक्र॒न् कर्म॑ कर्म॒कृत॑: स॒ह वा॒चा म॑यो॒भुवा॑ । दे॒वेभ्य॒: कर्म॑ कृ॒त्वास्तं॒ प्रेत॑ सचाभुवः
ava̍bhṛtha nicumpuṇa nice̱rura̍si nicumpu̱ṇaḥ |
ava̍ de̱vairde̱vakṛ̍ta̱meno̍'yāsiṣa̱mava̱ martyai̱rmartya̍kṛtaṃ puru̱rāvṇo̍ deva ri̱ṣaspā̍hi
||3.48||अव॑भृथ निचुम्पुण निचे॒रुर॑सि निचुम्पु॒णः ।
अव॑ दे॒वैर्दे॒वकृ॑त॒मेनो॑ऽयासिष॒मव॒ मर्त्यै॒र्मर्त्य॑कृतं पुरु॒राव्णो॑ देव रि॒षस्पा॑हि
pū̱rṇā da̍rvi̱ parā̍ pata̱ supū̍rṇā̱ puna̱rā pa̍ta | va̱sneva̱ vikrī̍ṇāvahā̱ iṣa̱mūrja śatakrato
||3.49||पू॒र्णा द॑र्वि॒ परा॑ पत॒ सुपू॑र्णा॒ पुन॒रा प॑त । व॒स्नेव॒ विक्री॑णावहा॒ इष॒मूर्ज॑ᳪ शतक्रतो
de̱hi me̱ dadā̍mi te̱ ni me̍ dhehi̱ ni ta dadhe | ni̱hāra̍ṃ ca̱ harā̍si me ni̱hāra̱ṃ ni ha̍rāṇi te̱ svāhā̍
||3.50||दे॒हि मे॒ ददा॑मि ते॒ नि मे॑ धेहि॒ नि त दधे । नि॒हारं॑ च॒ हरा॑सि मे नि॒हारं॒ नि ह॑राणि ते॒ स्वाहा॑
akṣa̱nnamī̍madanta̱ hyava̍ pri̱yā a̍dhūṣata |
asto̍ṣata̱ svabhā̍navo̱ viprā̱ nivi̍ṣṭhayā ma̱tī yojā̱ nvi̱ndra te̱ harī̍
||3.51||अक्ष॒न्नमी॑मदन्त॒ ह्यव॑ प्रि॒या अ॑धूषत ।
अस्तो॑षत॒ स्वभा॑नवो॒ विप्रा॒ निवि॑ष्ठया म॒ती योजा॒ न्वि॒न्द्र ते॒ हरी॑
su̱sa̱ndṛśa̍ṃ tvā va̱yaṃ magha̍vanvandiṣī̱mahi̍ |
pra nū̱naṃ pū̱rṇaba̍ndhura stu̱to yā̍si̱ vaśā̱m̐2 anu̱ yojā̱ nvi̱ndra te̱ harī̍
||3.52||सु॒स॒न्दृशं॑ त्वा व॒यं मघ॑वन्वन्दिषी॒महि॑ ।
प्र नू॒नं पू॒र्णब॑न्धुर स्तु॒तो या॑सि॒ वशाँ॒२ अनु॒ योजा॒ न्वि॒न्द्र ते॒ हरी॑
mano̱ nvāhvā̍mahe nārāśa̱jsena̱ stome̍na | pi̍tṝ̱ṇāṃ ca̱ manma̍bhiḥ
||3.53||मनो॒ न्वाह्वा॑महे नाराश॒jसेन॒ स्तोमे॑न । पि॑तॄ॒णां च॒ मन्म॑भिः
ā na̍ etu̱ mana̱: puna̱: kratve̱ dakṣā̍ya jī̱vase̍ | jyok ca̱ sūrya̍ṃ dṛ̱śe
||3.54||आ न॑ एतु॒ मन॒: पुन॒: क्रत्वे॒ दक्षा॑य जी॒वसे॑ । ज्योक् च॒ सूर्यं॑ दृ॒शे
puna̍rnaḥ pitaro̱ mano̱ dadā̍tu daivyo̱ jana̍: | jī̱vaṃ vrāta sacemahi
||3.55||पुन॑र्नः पितरो॒ मनो॒ ददा॑तु दैव्यो॒ जन॑: । जी॒वं व्रात॑ᳪ सचेमहि
va̱ya so̍ma vra̱te tava̱ mana̍sta̱nūṣu̱ bibhra̍taḥ | pra̱jāva̍ntaḥ sacemahi
||3.56||व॒यᳪ सो॑म व्र॒ते तव॒ मन॑स्त॒नूषु॒ बिभ्र॑तः । प्र॒जाव॑न्तः सचेमहि
e̱ṣa te̍ rudra bhā̱gaḥ sa̱ha svasrāmbi̍kayā̱ taṃ ju̍ṣasva̱ svāhai̱ṣa te̍ rudra bhā̱ga ā̱khuste̍ pa̱śuḥ
||3.57||ए॒ष ते॑ रुद्र भा॒गः स॒ह स्वस्राम्बि॑कया॒ तं जु॑षस्व॒ स्वाहै॒ष ते॑ रुद्र भा॒ग आ॒खुस्ते॑ प॒शुः
ava̍ ru̱drama̍dīma̱hyava̍ de̱vaṃ trya̍mbakam | yathā̍ no̱ vasya̍sa̱skara̱dyathā̍ na̱: śreya̍sa̱skara̱dyathā̍ no vyavasā̱yayā̍t
||3.58||अव॑ रु॒द्रम॑दीम॒ह्यव॑ दे॒वं त्र्य॑म्बकम् । यथा॑ नो॒ वस्य॑स॒स्कर॒द्यथा॑ न॒: श्रेय॑स॒स्कर॒द्यथा॑ नो व्यवसा॒यया॑त्
bhe̱ṣa̱jama̍si bheṣa̱jaṃ gave'śvā̍ya̱ puru̍ṣāya bheṣa̱jam | su̱khaṃ me̱ṣāya̍ meṣyai
||3.59||भे॒ष॒जम॑सि भेष॒जं गवेऽश्वा॑य॒ पुरु॑षाय भेष॒जम् । सु॒खं मे॒षाय॑ मेष्यै
trya̍mbakaṃ yajāmahe suga̱ndhiṃ pu̍ṣṭi̱vardha̍nam | u̱rvā̱ru̱kami̍va̱ bandha̍nānmṛ̱tyormu̍kṣīya̱ māmṛtā̍t |
trya̍mbakaṃ yajāmahe suga̱ndhiṃ pa̍ti̱veda̍nam | u̱rvā̱ru̱kami̍va̱ bandha̍nādi̱to mu̍kṣīya̱ māmuta̍:
||3.60||त्र्य॑म्बकं यजामहे सुग॒न्धिं पु॑ष्टि॒वर्ध॑नम् । उ॒र्वा॒रु॒कमि॑व॒ बन्ध॑नान्मृ॒त्योर्मु॑क्षीय॒ मामृता॑त् ।
त्र्य॑म्बकं यजामहे सुग॒न्धिं प॑ति॒वेद॑नम् । उ॒र्वा॒रु॒कमि॑व॒ बन्ध॑नादि॒तो मु॑क्षीय॒ मामुत॑:
e̱tatte̍ rudrāva̱saṃ tena̍ pa̱ro mūja̍va̱to'tī̍hi |
ava̍tatadhanvā̱ pinā̍kāvasa̱: kṛtti̍vāsā̱ ahisannaḥ śi̱vo'tī̍hi
||3.61||ए॒तत्ते॑ रुद्राव॒सं तेन॑ प॒रो मूज॑व॒तोऽती॑हि ।
अव॑ततधन्वा॒ पिना॑कावस॒: कृत्ति॑वासा॒ अहि॑ᳪसन्नः शि॒वोऽती॑हि
tryā̍yu̱ṣaṃ ja̱mada̍gneḥ ka̱śyapa̍sya tryāyu̱ṣam | yadde̱veṣu̍ tryāyu̱ṣaṃ tanno̍ astu tryāyu̱ṣam
||3.62||त्र्या॑यु॒षं ज॒मद॑ग्नेः क॒श्यप॑स्य त्र्यायु॒षम् । यद्दे॒वेषु॑ त्र्यायु॒षं तन्नो॑ अस्तु त्र्यायु॒षम्
śi̱vo nāmā̍si̱ svadhi̍tiste pi̱tā nama̍ste astu̱ mā mā̍ hisīḥ |
ni va̍rtayāmyāyu̍ṣe̱'nnādyā̍ya̱ prajana̍nāya rā̱yaspoṣā̍ya suprajā̱stvāya̍ su̱vīryā̍ya
||3.63||शि॒वो नामा॑सि॒ स्वधि॑तिस्ते पि॒ता नम॑स्ते अस्तु॒ मा मा॑ हिᳪसीः ।
नि व॑र्तयाम्यायु॑षे॒ऽन्नाद्या॑य॒ प्रजन॑नाय रा॒यस्पोषा॑य सुप्रजा॒स्त्वाय॑ सु॒वीर्या॑य