deva̍ savita̱: prasu̍va ya̱jñaṃ prasu̍va ya̱jñapa̍ti̱ṃ bhagā̍ya |
di̱vyo ga̍ndha̱rvaḥ ke̍tu̱pūḥ keta̍ṃ naḥ punātu vā̱caspati̱rvāja̍ṃ naḥ svadatu̱ svāhā̍
||9.1||दि॒व्यो ग॑न्ध॒र्वः के॑तु॒पूः केतं॑ नः पुनातु वा॒चस्पति॒र्वाजं॑ नः स्वदतु॒ स्वाहा॑
dhru̍va̱sada̍ṃ tvā nṛ̱ṣada̍ṃ mana̱:sada̍mupayā̱magṛ̍hīto̱'sīndrā̍ya tvā̱ juṣṭa̍ṃ gṛhṇāmye̱ṣa te̱ yoni̱rindrā̍ya tvā̱ juṣṭa̍tamam |
a̍psu̱ṣada̍ṃ tvā ghṛta̱sada̍ṃ vyoma̱sada̍mupayā̱magṛ̍hīto̱'sīndrā̍ya tvā̱ juṣṭa̍ṃ gṛhṇāmye̱ṣa te̱ yoni̱rindrā̍ya tvā̱ juṣṭa̍tamam |
pṛthi̱vī̱sada̍ṃ tvā'ntarikṣa̱sada̍ṃ divi̱sada̍ṃ deva̱sada̍ṃ nāka̱sada̍mupayā̱magṛ̍hīto̱'sīndrā̍ya tvā̱ juṣṭa̍ṃ gṛhṇāmye̱ṣa te̱ yoni̱rindrā̍ya tvā̱ juṣṭa̍tamam
||9.2||ध्रु॑व॒सदं॑ त्वा नृ॒षदं॑ मन॒:सद॑मुपया॒मगृ॑हीतो॒ऽसीन्द्रा॑य त्वा॒ जुष्टं॑ गृह्णाम्ये॒ष ते॒ योनि॒रिन्द्रा॑य त्वा॒ जुष्ट॑तमम् ।
अ॑प्सु॒षदं॑ त्वा घृत॒सदं॑ व्योम॒सद॑मुपया॒मगृ॑हीतो॒ऽसीन्द्रा॑य त्वा॒ जुष्टं॑ गृह्णाम्ये॒ष ते॒ योनि॒रिन्द्रा॑य त्वा॒ जुष्ट॑तमम् ।
पृथि॒वी॒सदं॑ त्वाऽन्तरिक्ष॒सदं॑ दिवि॒सदं॑ देव॒सदं॑ नाक॒सद॑मुपया॒मगृ॑हीतो॒ऽसीन्द्रा॑य त्वा॒ जुष्टं॑ गृह्णाम्ये॒ष ते॒ योनि॒रिन्द्रा॑य त्वा॒ जुष्ट॑तमम्
a̱pā rasa̱mudva̍yasa sūrye̱ santa sa̱māhi̍tam | a̱pā rasa̍sya̱ yo rasa̱staṃ vo̍ gṛhṇāmyutta̱mamu̍payā̱magṛ̍hīto̱ sīndrā̍ya tvā̱ juṣṭa̍ṃ gṛhṇāmye̱ṣa te̱ yoni̱rindrā̍ya tvā̱ juṣṭa̍tamam
||9.3||अ॒पाᳪ रस॒मुद्व॑यस॒ᳪ सूर्ये॒ सन्त॑ᳪ स॒माहि॑तम् । अ॒पाᳪ रस॑स्य॒ यो रस॒स्तं वो॑ गृह्णाम्युत्त॒ममु॑पया॒मगृ॑हीतो॒ सीन्द्रा॑य त्वा॒ जुष्टं॑ गृह्णाम्ये॒ष ते॒ योनि॒रिन्द्रा॑य त्वा॒ जुष्ट॑तमम्
grahā̍ ūrjāhutayo̱ vyanto̱ viprā̍ya ma̱tim | teṣā̱ṃ viśi̍priyāṇāṃ vo̱'hamiṣa̱mūrja sama̍grabhamupayā̱magṛ̍hīto̱'sīndrā̍ya tvā̱ juṣṭa̍ṃ gṛhṇāmye̱ṣa te̱ yoni̱rindrā̍ya tvā̱ juṣṭa̍tamam | sa̱mpṛcau̍ stha̱: saṃ mā̍ bha̱dreṇa̍ pṛṅktaṃ vi̱pṛcau̍ stho̱ vi mā̍ pā̱pmanā̍ pṛṅktam
||9.4||ग्रहा॑ ऊर्जाहुतयो॒ व्यन्तो॒ विप्रा॑य म॒तिम् । तेषां॒ विशि॑प्रियाणां वो॒ऽहमिष॒मूर्ज॒ᳪ सम॑ग्रभमुपया॒मगृ॑हीतो॒ऽसीन्द्रा॑य त्वा॒ जुष्टं॑ गृह्णाम्ये॒ष ते॒ योनि॒रिन्द्रा॑य त्वा॒ जुष्ट॑तमम् । स॒म्पृचौ॑ स्थ॒: सं मा॑ भ॒द्रेण॑ पृङ्क्तं वि॒पृचौ॑ स्थो॒ वि मा॑ पा॒प्मना॑ पृङ्क्तम्
indra̍sya̱ vajro̍'si vāja̱sāstvayā̱yaṃ vāja se̍t | vāja̍sya̱ nu pra̍sa̱ve mā̱tara̍ṃ ma̱hīmadi̍ti̱ṃ nāma̱ vaca̍sā karāmahe |
yasyā̍mi̱daṃ viśva̱ṃ bhuva̍namāvi̱veśa̱ tasyā̍ṃ no de̱vaḥ sa̍vi̱tā dharma̍ sāviṣat
||9.5||इन्द्र॑स्य॒ वज्रो॑ऽसि वाज॒सास्त्वया॒यं वाज॑ᳪ से॑त् । वाज॑स्य॒ नु प्र॑स॒वे मा॒तरं॑ म॒हीमदि॑तिं॒ नाम॒ वच॑सा करामहे ।
यस्या॑मि॒दं विश्वं॒ भुव॑नमावि॒वेश॒ तस्यां॑ नो दे॒वः स॑वि॒ता धर्म॑ साविषत्
a̱psvantara̱mṛta̍ma̱psu bhe̍ṣa̱jama̱pāmu̱ta praśa̍sti̱ṣvaśvā̱ bhava̍ta vā̱jina̍: |
devī̍rāpo̱ yo va̍ ū̱rmiḥ pratū̍rtiḥ ka̱kunmā̍n vāja̱sāstenā̱yaṃ vāja set
||9.6||अ॒प्स्वन्तर॒मृत॑म॒प्सु भे॑ष॒जम॒पामु॒त प्रश॑स्ति॒ष्वश्वा॒ भव॑त वा॒जिन॑: ।
देवी॑रापो॒ यो व॑ ऊ॒र्मिः प्रतू॑र्तिः क॒कुन्मा॑न् वाज॒सास्तेना॒यं वाज॑ᳪ सेत्
vāto̍ vā̱ mano̍ vā gandha̱rvāḥ sa̱ptaviśatiḥ | te agre'śva̍mayuñja̱m̐ste a̍smiñja̱vamā da̍dhuḥ
||9.7||वातो॑ वा॒ मनो॑ वा गन्ध॒र्वाः स॒प्तवि॑ᳪशतिः । ते अग्रेऽश्व॑मयुञ्जँ॒स्ते अ॑स्मिञ्ज॒वमा द॑धुः
vāta̍rahā bhava vājinyu̱jyamā̍na̱ indra̍syeva̱ dakṣi̍ṇaḥ śri̱yaidhi̍ |
yu̱ñjantu̍ tvā ma̱ruto̍ viśva̱veda̍sa̱ ā te̱ tvaṣṭā̍ pa̱tsu ja̱vaṃ da̍dhātu
||9.8||वात॑रᳪहा भव वाजिन्यु॒ज्यमा॑न॒ इन्द्र॑स्येव॒ दक्षि॑णः श्रि॒यैधि॑ ।
यु॒ञ्जन्तु॑ त्वा म॒रुतो॑ विश्व॒वेद॑स॒ आ ते॒ त्वष्टा॑ प॒त्सु ज॒वं द॑धातु
ja̱vo yaste̍ vāji̱nnihi̍to̱ guhā̱ yaḥ śye̱ne parī̍tto̱ aca̍racca̱ vāte̍ |
tena̍ no vāji̱n vala̍vā̱n bale̍na vāja̱jicca̱ bhava̱ sama̍ne ca pārayi̱ṣṇuḥ |
vāji̍no vājajito̱ vāja sari̱ṣyanto̱ bṛha̱spate̍rbhā̱gamava̍jighrata
||9.9||ज॒वो यस्ते॑ वाजि॒न्निहि॑तो॒ गुहा॒ यः श्ये॒ने परी॑त्तो॒ अच॑रच्च॒ वाते॑ ।
तेन॑ नो वाजि॒न् वल॑वा॒न् बले॑न वाज॒जिच्च॒ भव॒ सम॑ने च पारयि॒ष्णुः ।
वाजि॑नो वाजजितो॒ वाज॑ᳪ सरि॒ष्यन्तो॒ बृह॒स्पते॑र्भा॒गमव॑जिघ्रत
de̱vasyā̱ha sa̍vi̱tuḥ sa̱ve sa̱tyasa̍vaso̱ bṛha̱spate̍rutta̱maṃ nāka ruheyam |
de̱vasyā̱ha sa̍vi̱tuḥ sa̱ve sa̱tyasa̍vasa̱ indra̍syotta̱maṃ nāka ruheyam |
de̱vasyā̱ha sa̍vi̱tuḥ sa̱ve sa̱tyapra̍savaso̱ bṛha̱spate̍rutta̱maṃ nāka̍maruham |
de̱vasyā̱ha sa̍vi̱tuḥ sa̱ve sa̱tyapra̍savasa̱ indra̍syotta̱maṃ nāka̍maruham
||9.10||दे॒वस्या॒हᳪ स॑वि॒तुः स॒वे स॒त्यस॑वसो॒ बृह॒स्पते॑रुत्त॒मं नाक॑ᳪ रुहेयम् ।
दे॒वस्या॒हᳪ स॑वि॒तुः स॒वे स॒त्यस॑वस॒ इन्द्र॑स्योत्त॒मं नाक॑ᳪ रुहेयम् ।
दे॒वस्या॒हᳪ स॑वि॒तुः स॒वे स॒त्यप्र॑सवसो॒ बृह॒स्पते॑रुत्त॒मं नाक॑मरुहम् ।
दे॒वस्या॒हᳪ स॑वि॒तुः स॒वे स॒त्यप्र॑सवस॒ इन्द्र॑स्योत्त॒मं नाक॑मरुहम्
bṛha̍spate̱ vāja̍ṃ jaya̱ bṛha̱spata̍ye̱ vāca̍ṃ vadata̱ bṛha̱spati̱ṃ vāja̍ṃ jāpayata |
indra̱ vāja̍ṃ ja̱yendrā̍ya̱ vāca̍ṃ vada̱tendra̱ṃ vāja̍ṃ jāpayata
||9.11||बृह॑स्पते॒ वाजं॑ जय॒ बृह॒स्पत॑ये॒ वाचं॑ वदत॒ बृह॒स्पतिं॒ वाजं॑ जापयत ।
इन्द्र॒ वाजं॑ ज॒येन्द्रा॑य॒ वाचं॑ वद॒तेन्द्रं॒ वाजं॑ जापयत
e̱ṣā va̱: sā sa̱tyā sa̱ṃvāga̍bhū̱dyayā̱ bṛha̱spati̱ṃ vāja̱majī̍japa̱tājī̍japata̱ bṛha̱spati̱ṃ vāja̱ṃ vana̍spatayo̱ vimu̍cyadhvam |
e̱ṣā va̱: sā sa̱tyā sa̱ṃvāga̍bhū̱dyayendra̱ṃ vāja̱majī̍japa̱tājī̍japa̱tendra̱ṃ vāja̱ṃ vana̍spatayo̱ vimu̍cyadhvam
||9.12||ए॒षा व॒: सा स॒त्या सं॒वाग॑भू॒द्यया॒ बृह॒स्पतिं॒ वाज॒मजी॑जप॒ताजी॑जपत॒ बृह॒स्पतिं॒ वाजं॒ वन॑स्पतयो॒ विमु॑च्यध्वम् ।
ए॒षा व॒: सा स॒त्या सं॒वाग॑भू॒द्ययेन्द्रं॒ वाज॒मजी॑जप॒ताजी॑जप॒तेन्द्रं॒ वाजं॒ वन॑स्पतयो॒ विमु॑च्यध्वम्
de̱vasyā̱ha sa̍vi̱tuḥ sa̱ve sa̱tyapra̍savaso̱ bṛha̱spate̍rvāja̱jito̱ vāja̍ṃ jeṣam |
vāji̍no vājaji̱to'dhva̍na skabhnu̱vanto̱ yoja̍nā̱ mimā̍nā̱: kāṣṭhā̍ṃ gacchata
||9.13||दे॒वस्या॒हᳪ स॑वि॒तुः स॒वे स॒त्यप्र॑सवसो॒ बृह॒स्पते॑र्वाज॒जितो॒ वाजं॑ जेषम् ।
वाजि॑नो वाजजि॒तोऽध्व॑न स्कभ्नु॒वन्तो॒ योज॑ना॒ मिमा॑ना॒: काष्ठां॑ गच्छत
e̱ṣa sya vā̱jī kṣi̍pa̱ṇiṃ tu̍raṇyati grī̱vāyā̍ṃ ba̱ddho a̍pika̱kṣa ā̱sani̍ |
kratu̍ṃ dadhi̱krā anu̍ sasani̍ṣyadatpa̱thāmaṅkāsyanvā̱panī̍paṇa̱t svāhā̍
||9.14||ए॒ष स्य वा॒जी क्षि॑प॒णिं तु॑रण्यति ग्री॒वायां॑ ब॒द्धो अ॑पिक॒क्ष आ॒सनि॑ ।
क्रतुं॑ दधि॒क्रा अनु॑ स॒ᳪसनि॑ष्यदत्प॒थामङ्का॒ᳪस्यन्वा॒पनी॑पण॒त् स्वाहा॑
u̱ta smā̍sya̱ druva̍tasturaṇya̱taḥ pa̱rṇaṃ na veranu̍vāti praga̱rdhina̍: |
śye̱nasye̍va̱ dhraja̍to aṅka̱saṃ pari̍ dadhi̱krāvṇa̍: sa̱horjā tari̍trata̱: svāhā̍
||9.15||उ॒त स्मा॑स्य॒ द्रुव॑तस्तुरण्य॒तः प॒र्णं न वेरनु॑वाति प्रग॒र्धिन॑: ।
श्ये॒नस्ये॑व॒ ध्रज॑तो अङ्क॒सं परि॑ दधि॒क्राव्ण॑: स॒होर्जा तरि॑त्रत॒: स्वाहा॑
śaṃ no̍ bhavantu vā̱jino̱ have̍ṣu de̱vatā̍tā mi̱tadra̍vaḥ sva̱rkāḥ |
ja̱mbhaya̱nto'hi̱ṃ vṛka rakṣā̍si̱ sane̍mya̱smadyu̍yava̱nnamī̍vāḥ
||9.16||शं नो॑ भवन्तु वा॒जिनो॒ हवे॑षु दे॒वता॑ता मि॒तद्र॑वः स्व॒र्काः ।
ज॒म्भय॒न्तोऽहिं॒ वृक॒ᳪ रक्षा॑सि॒ सने॑म्य॒स्मद्यु॑यव॒न्नमी॑वाः
te no̱ arva̍nto havana̱śruto̱ hava̱ṃ viśve̍ śṛṇvantu vā̱jino̍ mi̱tadra̍vaḥ |
sa̱ha̱sra̱sā me̱dhasā̍tā sani̱ṣyavo̍ ma̱ho ye dhana sami̱theṣu̍ jabhri̱re
||9.17||ते नो॒ अर्व॑न्तो हवन॒श्रुतो॒ हवं॒ विश्वे॑ शृण्वन्तु वा॒जिनो॑ मि॒तद्र॑वः ।
स॒ह॒स्र॒सा मे॒धसा॑ता सनि॒ष्यवो॑ म॒हो ये धन॑ᳪ समि॒थेषु॑ जभ्रि॒रे
vāje̍-vāje'vata vājino no̱ dhane̍ṣu viprā amṛtā ṛtajñāḥ |
a̱sya madhva̍: pibata mā̱daya̍dhvaṃ tṛ̱ptā yā̍ta pa̱thibhi̍rdeva̱yānai̍:
||9.18||वाजे॑-वाजेऽवत वाजिनो नो॒ धने॑षु विप्रा अमृता ऋतज्ञाः ।
अ॒स्य मध्व॑: पिबत मा॒दय॑ध्वं तृ॒प्ता या॑त प॒थिभि॑र्देव॒यानै॑:
ā mā̱ vāja̍sya prasa̱vo ja̍gamyā̱deme dyāvā̍pṛthi̱vī vi̱śvarū̍pe |
ā mā̍ gantāṃ pi̱tarā̍ mā̱tarā̱ cā mā̱ somo̍ amṛta̱tvena̍ gamyāt |
vāji̍no vājajito̱ vāja sasṛ̱vāso̱ bṛha̱spate̍rbhā̱gamava̍jighrata nimṛjā̱nāḥ
||9.19||आ मा॒ वाज॑स्य प्रस॒वो ज॑गम्या॒देमे द्यावा॑पृथि॒वी वि॒श्वरू॑पे ।
आ मा॑ गन्तां पि॒तरा॑ मा॒तरा॒ चा मा॒ सोमो॑ अमृत॒त्वेन॑ गम्यात् ।
वाजि॑नो वाजजितो॒ वाज॑ᳪ ससृ॒वाᳪसो॒ बृह॒स्पते॑र्भा॒गमव॑जिघ्रत निमृजा॒नाः
ā̱paye̱ svāhā̍ svā̱paye̱ svāhā̍ 'pi̱jāya̱ svāhā̍ krata̍ve̱ svāhā̱ vasa̍ve̱ svāhā̍ 'ha̱rpata̍ye̱ svāhā̍
'hne̍ mu̱gdhāya̱ svāhā̍ mu̱gdhāya̍ vainaśi̱nāya̱ svāhā̍ vinaśina̍ āntyāya̱nāya̱ svāhā 'ntyā̍ya bhauva̱nāya̱ svāhā̱ bhuva̍nasya̱ pata̍ye̱ svāhā'dhi̍pataye̱ svāhā̍
||9.20||आ॒पये॒ स्वाहा॑ स्वा॒पये॒ स्वाहा॑ ऽपि॒जाय॒ स्वाहा॑ क्रत॑वे॒ स्वाहा॒ वस॑वे॒ स्वाहा॑ ऽह॒र्पत॑ये॒ स्वाहा॑
ऽह्ने॑ मु॒ग्धाय॒ स्वाहा॑ मु॒ग्धाय॑ वैनᳪशि॒नाय॒ स्वाहा॑ विन॒ᳪशिन॑ आन्त्याय॒नाय॒ स्वाहा ऽन्त्या॑य भौव॒नाय॒ स्वाहा॒ भुव॑नस्य॒ पत॑ये॒ स्वाहाऽधि॑पतये॒ स्वाहा॑
āyu̍rya̱jñena̍ kalpatāṃ prā̱ṇo ya̱jñena̍ kalpatā̱ṃ cakṣu̍rya̱jñena̍ kalpatātāṃ śrotra̍ṃ ya̱jñena̍ kalpatā̱ṃ pṛ̱ṣṭhaṃ ya̱jñena̍ kalpatā̱ṃ ya̱jño ya̱jñena̍ kalpatām |
pra̱jāpa̍teḥ pra̱jā a̍bhūma̱ sva̱rdevā aganmā̱mṛtā̍ abhūma
||9.21||आयु॑र्य॒ज्ञेन॑ कल्पतां प्रा॒णो य॒ज्ञेन॑ कल्पतां॒ चक्षु॑र्य॒ज्ञेन॑ कल्पतातां॒ᳪ श्रोत्रं॑ य॒ज्ञेन॑ कल्पतां॒ पृ॒ष्ठं य॒ज्ञेन॑ कल्पतां॒ य॒ज्ञो य॒ज्ञेन॑ कल्पताम् ।
प्र॒जाप॑तेः प्र॒जा अ॑भूम॒ स्व॒र्देवा अगन्मा॒मृता॑ अभूम
a̱sme vo̍ astvindri̱yama̱sme nṛ̱mṇamu̱ta kratu̍ra̱sme varcāsi santu vaḥ | namo̍ mā̱tre pṛ̍thi̱vyai̱ namo̍ mā̱tre pṛ̍thi̱vyā i̱yaṃ te̱ rāḍ ya̱ntā'si̱ yama̍no dhru̱vo̱'si dha̱ruṇa̍: | kṛ̱ṣyai tvā̱ kṣemā̍ya tvā ra̱yyai tvā̱ poṣā̍ya tvā
||9.22||अ॒स्मे वो॑ अस्त्विन्द्रि॒यम॒स्मे नृ॒म्णमु॒त क्रतु॑र॒स्मे वर्चा॑ᳪसि सन्तु वः । नमो॑ मा॒त्रे पृ॑थि॒व्यै॒ नमो॑ मा॒त्रे पृ॑थि॒व्या इ॒यं ते॒ राड् य॒न्ताऽसि॒ यम॑नो ध्रु॒वो॒ऽसि ध॒रुण॑: । कृ॒ष्यै त्वा॒ क्षेमा॑य त्वा र॒य्यै त्वा॒ पोषा॑य त्वा
vāja̍sye̱maṃ pra̍sa̱vaḥ su̍ṣu̱ve'gre̱ soma rājā̍na̱moṣa̍dhīṣva̱psu | tā a̱smabhya̱ṃ madhu̍matīrbhavantu va̱ya rā̱ṣṭre jā̍gṛyāma pu̱rohi̍tā̱: svāhā̍
||9.23||वाज॑स्ये॒मं प्र॑स॒वः सु॑षु॒वेऽग्रे॒ सोम॒ᳪ राजा॑न॒मोष॑धीष्व॒प्सु । ता अ॒स्मभ्यं॒ मधु॑मतीर्भवन्तु व॒यᳪ रा॒ष्ट्रे जा॑गृयाम पु॒रोहि॑ता॒: स्वाहा॑
vāja̍sye̱māṃ pra̍sa̱vaḥ śi̍śriye̱ diva̍mi̱mā ca̱ viśvā̱ bhuva̍nāni sa̱mrāṭ |
adi̍tsantaṃ dāpayati prajā̱nantsa no̍ ra̱yi sarva̍vīra̱ṃ ni ya̍cchatu̱ svāhā̍
||9.24||वाज॑स्ये॒मां प्र॑स॒वः शि॑श्रिये॒ दिव॑मि॒मा च॒ विश्वा॒ भुव॑नानि स॒म्राट् ।
अदि॑त्सन्तं दापयति प्रजा॒नन्त्स नो॑ र॒यिᳪ सर्व॑वीरं॒ नि य॑च्छतु॒ स्वाहा॑
vāja̍sya̱ nu pra̍sa̱va ā ba̍bhūve̱mā ca̱ viśvā̱ bhuva̍nāni sa̱rvata̍: |
sane̍mi̱ rājā̱ pari̍ yāti vi̱dvān pra̱jāṃ puṣṭi̍ṃ va̱rdhaya̍māno a̱sme svāhā̍
||9.25||वाज॑स्य॒ नु प्र॑स॒व आ ब॑भूवे॒मा च॒ विश्वा॒ भुव॑नानि स॒र्वत॑: ।
सने॑मि॒ राजा॒ परि॑ याति वि॒द्वान् प्र॒जां पुष्टिं॑ व॒र्धय॑मानो अ॒स्मे स्वाहा॑
soma rājā̍na̱mava̍se̱'gnima̱nvā̍rabhāmahe | ā̱di̱tyānviṣṇu sūrya̍ṃ bra̱hmāṇa̍ṃ ca̱ bṛha̱spati svāhā̍
||9.26||सोम॒ᳪ राजा॑न॒मव॑से॒ऽग्निम॒न्वा॑रभामहे | आ॒दि॒त्यान्विष्णु॒ᳪ सूर्यं॑ ब्र॒ह्माणं॑ च॒ बृह॒स्पति॒ᳪ स्वाहा॑
a̱rya̱maṇa̱ṃ bṛha̱spati̱mindra̱ṃ dānā̍ya codaya | vāca̱ṃ viṣṇu sara̍svatī savi̱tāra̍ṃ ca vā̱jina svāhā̍
||9.27||अ॒र्य॒मणं॒ बृह॒स्पति॒मिन्द्रं॒ दाना॑य चोदय । वाचं॒ विष्णु॒ᳪ सर॑स्वतीᳪ सवि॒तारं॑ च वा॒जिन॒ᳪ स्वाहा॑
agne̱ acchā̍ vade̱ha na̱: prati̍ naḥ su̱manā̍ bhava | pra no̍ yaccha sahasraji̱ttva hi dha̍na̱dā asi̱ svāhā̍
||9.28||अग्ने॒ अच्छा॑ वदे॒ह न॒: प्रति॑ नः सु॒मना॑ भव । प्र नो॑ यच्छ सहस्रजि॒त्त्वᳪ हि ध॑न॒दा असि॒ स्वाहा॑
pra no̍ yacchatvarya̱mā pra pū̱ṣā pra bṛha̱spati̍: | pra vāgde̱vī da̍dātu na̱: svāhā̍
||9.29||प्र नो॑ यच्छत्वर्य॒मा प्र पू॒षा प्र बृह॒स्पति॑: । प्र वाग्दे॒वी द॑दातु न॒: स्वाहा॑
de̱vasya̍ tvā savi̱tuḥ pra̍sa̱ve'śvino̍rbā̱hubhyā̍ṃ pū̱ṣṇo hastā̍bhyām |
sara̍svatyai vā̱co ya̱nturya̱ntriye̍ dadhāmi̱ bṛha̱spate̍ṣṭvā̱ sāmrā̍jyenā̱bhi ṣi̍ñcāmyasau
||9.30||दे॒वस्य॑ त्वा सवि॒तुः प्र॑स॒वेऽश्विनो॑र्बा॒हुभ्यां॑ पू॒ष्णो हस्ता॑भ्याम् ।
सर॑स्वत्यै वा॒चो य॒न्तुर्य॒न्त्रिये॑ दधामि॒ बृह॒स्पते॑ष्ट्वा॒ साम्रा॑ज्येना॒भि षि॑ञ्चाम्यसौ
a̱gnirekā̍kṣareṇa prā̱ṇamuda̍jaya̱ttamujje̍ṣama̱śvinau̱ dvya̱kṣareṇa dvi̱pado̍ manu̱ṣyānuda̍jayatā̱ṃ tānujje̍ṣa̱ṃ viṣṇu̱strya̱kṣareṇa̱ trīm̐llo̱kānuda̍jaya̱ttānujje̍ṣaṃ
soma̱ścatu̍rakṣareṇa̱ catu̍ṣpadaḥ pa̱śūnuda̍jaya̱ttānujje̍ṣam
||9.31||अ॒ग्निरेका॑क्षरेण प्रा॒णमुद॑जय॒त्तमुज्जे॑षम॒श्विनौ॒ द्व्य॒क्षरेण द्वि॒पदो॑ मनु॒ष्यानुद॑जयतां॒ तानुज्जे॑षं॒ विष्णु॒स्त्र्य॒क्षरेण॒ त्रीँल्लो॒कानुद॑जय॒त्तानुज्जे॑षं॒ᳪ
सोम॒श्चतु॑रक्षरेण॒ चतु॑ष्पदः प॒शूनुद॑जय॒त्तानुज्जे॑षम्
pū̱ṣā pañcā̍kṣareṇa̱ pañca̱ diśa̱ uda̍jaya̱ttā ujje̍ṣaṃ savi̱tā ṣaḍa̍kṣareṇa̱ ṣaḍṛ̱tūnuda̍jaya̱ttānujje̍ṣaṃ ma̱ruta̍: sa̱ptākṣa̍reṇa sa̱pta grā̱myān pa̱śūnuda̍jaya̱m̐stānujje̍ṣa̱ṃ bṛha̱spati̍ra̱ṣṭākṣa̍reṇa gāya̱trīmuda̍jaya̱ttāmujje̍ṣam
||9.32||पू॒षा पञ्चा॑क्षरेण॒ पञ्च॒ दिश॒ उद॑जय॒त्ता उज्जे॑षंᳪ सवि॒ता षड॑क्षरेण॒ षडृ॒तूनुद॑जय॒त्तानुज्जे॑षं म॒रुत॑: स॒प्ताक्ष॑रेण स॒प्त ग्रा॒म्यान् प॒शूनुद॑जयँ॒स्तानुज्जे॑षं॒ बृह॒स्पति॑र॒ष्टाक्ष॑रेण गाय॒त्रीमुद॑जय॒त्तामुज्जे॑षम्
mi̱tro navā̍kṣareṇa tri̱vṛta stoma̱muda̍jaya̱ttamujje̍ṣa̱ṃ varu̍ṇo̱ daśā̍kṣareṇa vi̱rāja̱muda̍jaya̱ttāmujje̍ṣa̱mindra̱ e̱kāda̍śākṣareṇa tri̱ṣṭubha̱muda̍jaya̱ttāmujje̍ṣa̱ṃ
viśve̍ de̱vā dvāda̍śākṣareṇa̱ jaga̍tī̱muda̍jaya̱m̐stāmujje̍ṣam
||9.33||मि॒त्रो नवा॑क्षरेण त्रि॒वृत॒ᳪ स्तोम॒मुद॑जय॒त्तमुज्जे॑षं॒ वरु॑णो॒ दशा॑क्षरेण वि॒राज॒मुद॑जय॒त्तामुज्जे॑ष॒मिन्द्र॒ ए॒काद॑शाक्षरेण त्रि॒ष्टुभ॒मुद॑जय॒त्तामुज्जे॑षं॒
विश्वे॑ दे॒वा द्वाद॑शाक्षरेण॒ जग॑ती॒मुद॑जयँ॒स्तामुज्जे॑षम्
vasa̍va̱strayo̍daśākṣareṇa trayoda̱śa stoma̱muda̍jaya̱m̐stamujje̍ṣaṃ ru̱drāścatu̍rdaśākṣareṇa caturda̱śa stoma̱muda̍jaya̱m̐stamujje̍ṣamādi̱tyāḥ pañca̍daśākṣareṇa pañcada̱śa stoma̱muda̍jaya̱m̐stamujje̍ṣa̱madi̍ti̱: ṣoḍa̍śākṣareṇa ṣoḍa̱śa stoma̱muda̍jaya̱ttamujje̍ṣaṃ pra̱jāpa̍tiḥ sa̱ptada̍śākṣareṇa saptada̱śa stoma̱muda̍jaya̱ttamujje̍ṣam
||9.34||वस॑व॒स्त्रयो॑दशाक्षरेण त्रयोद॒शᳪ स्तोम॒मुद॑जयँ॒स्तमुज्जे॑षंᳪ रु॒द्राश्चतु॑र्दशाक्षरेण चतुर्द॒शᳪ स्तोम॒मुद॑जयँ॒स्तमुज्जे॑षमादि॒त्याः पञ्च॑दशाक्षरेण पञ्चद॒शᳪ स्तोम॒मुद॑जयँ॒स्तमुज्जे॑ष॒मदि॑ति॒: षोड॑शाक्षरेण षोड॒शᳪ स्तोम॒मुद॑जय॒त्तमुज्जे॑षं प्र॒जाप॑तिः स॒प्तद॑शाक्षरेण सप्तद॒शᳪ स्तोम॒मुद॑जय॒त्तमुज्जे॑षम्
e̱ṣa te̍ nirṛte bhā̱gastaṃ ju̍ṣasva̱ svāhā̱'gnine̍trebhyo de̱vebhya̍: pura̱: sadbhya̱: svāhā̍ ya̱mane̍trebhyo de̱vebhyo̍ dakṣi̱ṇāsadbhya̱: svāhā̍ vi̱śvade̍vanetrebhyo de̱vebhya̍: paścā̱tsadbhya̱: svāhā̍ mi̱trāvaru̍ṇanetrebhyo vā ma̱runne̍trebhyo vā de̱vebhya̍ uttarā̱sadbhya̱: svāhā̱ soma̍netrebhyo de̱vebhya̍ upari̱sadbhyo̱ duva̍svadbhya̱: svāhā̍
||9.35||ए॒ष ते॑ निरृते भा॒गस्तं जु॑षस्व॒ स्वाहा॒ऽग्निने॑त्रेभ्यो दे॒वेभ्य॑: पुर॒: सद्भ्य॒: स्वाहा॑ य॒मने॑त्रेभ्यो दे॒वेभ्यो॑ दक्षि॒णासद्भ्य॒: स्वाहा॑ वि॒श्वदे॑वनेत्रेभ्यो दे॒वेभ्य॑: पश्चा॒त्सद्भ्य॒: स्वाहा॑ मि॒त्रावरु॑णनेत्रेभ्यो वा म॒रुन्ने॑त्रेभ्यो वा दे॒वेभ्य॑ उत्तरा॒सद्भ्य॒: स्वाहा॒ सोम॑नेत्रेभ्यो दे॒वेभ्य॑ उपरि॒सद्भ्यो॒ दुव॑स्वद्भ्य॒: स्वाहा॑
ye de̱vā a̱gnine̍trāḥ pura̱: sada̱stebhya̱: svāhā̱ ye de̱vā ya̱mane̍trā dakṣi̱ṇāsada̱stebhya̱: svāhā̱ ye de̱vā vi̱śvade̍vanetrāḥ paścā̱tsada̱stebhya̱: svāhā̱ ye de̱vā mi̱trāvaru̍ṇanetrā vā ma̱runne̍trā vottarā̱sada̱stebhya̱: svāhā̱ ye de̱vāḥ soma̍netrā upari̱sado̱ duva̍svanta̱stebhya̱: svāhā̍
||9.36||ये दे॒वा अ॒ग्निने॑त्राः पुर॒: सद॒स्तेभ्य॒: स्वाहा॒ ये दे॒वा य॒मने॑त्रा दक्षि॒णासद॒स्तेभ्य॒: स्वाहा॒ ये दे॒वा वि॒श्वदे॑वनेत्राः पश्चा॒त्सद॒स्तेभ्य॒: स्वाहा॒ ये दे॒वा मि॒त्रावरु॑णनेत्रा वा म॒रुन्ने॑त्रा वोत्तरा॒सद॒स्तेभ्य॒: स्वाहा॒ ये दे॒वाः सोम॑नेत्रा उपरि॒सदो॒ दुव॑स्वन्त॒स्तेभ्य॒: स्वाहा॑
agne̱ saha̍sva̱ pṛta̍nā a̱bhimā̍tī̱rapā̍sya | du̱ṣṭara̱stara̱nnarā̍tī̱rvarco̍ dhā ya̱jñavā̍hasi
||9.37||अग्ने॒ सह॑स्व॒ पृत॑ना अ॒भिमा॑ती॒रपा॑स्य । दु॒ष्टर॒स्तर॒न्नरा॑ती॒र्वर्चो॑ धा य॒ज्ञवा॑हसि
de̱vasya̍ tvā savi̱tuḥ pra̍sa̱ve'śvino̍rbā̱hubhyā̍ṃ pū̱ṣṇo hastā̍bhyām | u̱pāśorvī̱rye̱ṇa juhomi ha̱ta rakṣa̱: svāhā̱
rakṣa̍sāṃ tvā ba̱dhāyāba̍dhiṣma̱ rakṣo'ba̍dhiṣmā̱muma̱sau ha̱taḥ
||9.38||दे॒वस्य॑ त्वा सवि॒तुः प्र॑स॒वेऽश्विनो॑र्बा॒हुभ्यां॑ पू॒ष्णो हस्ता॑भ्याम् । उ॒पा॒ᳪशोर्वी॒र्ये॒ण जुहोमि ह॒तᳪ रक्ष॒: स्वाहा॒
रक्ष॑सां त्वा ब॒धायाब॑धिष्म॒ रक्षोऽब॑धिष्मा॒मुम॒सौ ह॒तः
sa̱vi̱tā tvā̍ sa̱vānā suva̱tāma̱gnirgṛ̱hapa̍tīnā somo̱ vana̱spatī̍nām |
bṛha̱spati̍rvā̱ca indro̱ jyaiṣṭhyā̍ya ru̱draḥ pa̱śubhyo̍ mi̱traḥ sa̱tyo varu̍ṇo̱ dharma̍patīnām
||9.39||स॒वि॒ता त्वा॑ स॒वाना॑ᳪ सुव॒ताम॒ग्निर्गृ॒हप॑तीना॒ᳪ सोमो॒ वन॒स्पती॑नाम् ।
बृह॒स्पति॑र्वा॒च इन्द्रो॒ ज्यैष्ठ्या॑य रु॒द्रः प॒शुभ्यो॑ मि॒त्रः स॒त्यो वरु॑णो॒ धर्म॑पतीनाम्
i̱maṃ de̍vā asapa̱tna su̍vadhvaṃ maha̱te kṣa̱trāya̍ maha̱te jyaiṣṭhyā̍ya maha̱te jāna̍rājyā̱yendra̍syendri̱yāya̍ |
i̱mama̱muṣya̍ pu̱trama̱muṣyai̍ pu̱trama̱syai vi̱śa e̱ṣa vo̍'mī̱ rājā̱ somo̱'smāka̍ṃ brāhma̱ṇānā rājā̍
||9.40||इ॒मं दे॑वा असप॒त्नᳪ सु॑वध्वं मह॒ते क्ष॒त्राय॑ मह॒ते ज्यैष्ठ्या॑य मह॒ते जान॑राज्या॒येन्द्र॑स्येन्द्रि॒याय॑ |
इ॒मम॒मुष्य॑ पु॒त्रम॒मुष्यै॑ पु॒त्रम॒स्यै वि॒श ए॒ष वो॑ऽमी॒ राजा॒ सोमो॒ऽस्माकं॑ ब्राह्म॒णाना॒ᳪ राजा॑