śāda̍ṃ da̱dbhirava̍kāṃ dantamūlai̱rmṛda̱ṃ barsvai̍ste̱gāndaṣṭrā̍bhyā sara̍svatyā agraji̱hvaṃ ji̱hvāyā̍ utsā̱dama̍vakra̱ndena̱ tālu̱ vāja hanu̍bhyāma̱pa ā̱sye̱na̱ vṛṣa̍ṇamā̱ṇḍābhyā̍mādi̱tyām̐ śmaśru̍bhi̱: panthā̍naṃ bhrū̱bhyāṃ dyāvā̍pṛthi̱vī varto̍bhyāṃ vi̱dyuta̍ṃ ka̱nīna̍kābhyā śu̱klāya̱ svāhā̍ kṛ̱ṣṇāya̱ svāhā̱ pāryā̍ṇi̱ pakṣmā̍ṇyavā̱ryā̱ i̱kṣavo̍'vā̱ryā̱ṇi̱ pakṣmā̍ṇi̱ pāryā̍ i̱kṣava̍:
||25.1||शादं॑ द॒द्भिरव॑कां दन्तमूलै॒र्मृदं॒ बर्स्वै॑स्ते॒गान्दᳪष्ट्रा॑भ्या॒ᳪ सर॑स्वत्या अग्रजि॒ह्वं जि॒ह्वाया॑ उत्सा॒दम॑वक्र॒न्देन॒ तालु॒ वाज॒ᳪ हनु॑भ्याम॒प आ॒स्ये॒न॒ वृष॑णमा॒ण्डाभ्या॑मादि॒त्याँ श्मश्रु॑भि॒: पन्था॑नं भ्रू॒भ्यां द्यावा॑पृथि॒वी वर्तो॑भ्यां वि॒द्युतं॑ क॒नीन॑काभ्याᳪ शु॒क्लाय॒ स्वाहा॑ कृ॒ष्णाय॒ स्वाहा॒ पार्या॑णि॒ पक्ष्मा॑ण्यवा॒र्या॒ इ॒क्षवो॑ऽवा॒र्या॒णि॒ पक्ष्मा॑णि॒ पार्या॑ इ॒क्षव॑:
vāta̍ṃ prā̱ṇenā̍pā̱nena̱ nāsi̍ke upayā̱mamadha̍re̱ṇauṣṭhe̍na̱ sadutta̍reṇa prakā̱śenānta̍ramanūkā̱śena̱ bāhya̍ṃ nive̱ṣyaṃ mū̱rdhnā sta̍nayi̱tnuṃ ni̍rbā̱dhenā̱śani̍ṃ ma̱stiṣke̍ṇa vi̱dyuta̍ṃ ka̱nīna̍kābhyā̱ṃ karṇā̍bhyā śrotra̱m̐ śrotrā̍bhyā̱ṃ karṇau̍ teda̱nīma̍dharaka̱ṇṭhenā̱paḥ śu̍ṣkaka̱ṇṭhena̍ ci̱ttaṃ manyā̍bhi̱radi̍ti śī̱rṣṇā nirṛ̍ti̱ṃ nirja̍rjalyena śī̱rṣṇā sa̍ṃkrośaiḥ prā̱ṇān reṣmāṇa stu̱pena̍
||25.2||वातं॑ प्रा॒णेना॑पा॒नेन॒ नासि॑के उपया॒ममध॑रे॒णौष्ठे॑न॒ सदुत्त॑रेण प्रका॒शेनान्त॑रमनूका॒शेन॒ बाह्यं॑ निवे॒ष्यं मू॒र्ध्ना स्त॑नयि॒त्नुं नि॑र्बा॒धेना॒शनिं॑ म॒स्तिष्के॑ण वि॒द्युतं॑ क॒नीन॑काभ्यां॒ कर्णा॑भ्या॒ᳪ श्रोत्रँ॒ श्रोत्रा॑भ्यां॒ कर्णौ॑ तेद॒नीम॑धरक॒ण्ठेना॒पः शु॑ष्कक॒ण्ठेन॑ चि॒त्तं मन्या॑भि॒रदि॑तिᳪ शी॒र्ष्णा निरृ॑तिं॒ निर्ज॑र्जल्येन शी॒र्ष्णा सं॑क्रोशैः प्रा॒णान् रेष्माण॑ᳪ स्तु॒पेन॑
ma̱śakā̱n keśai̱rindra svapa̍sā̱ vahe̍na̱ bṛha̱spati śakunisā̱dena̍ kū̱rmāñcha̱phairā̱krama̍ṇa sthū̱rābhyā̍mṛ̱kṣalā̍bhiḥ ka̱piñja̍lāñja̱vaṃ jaṅghā̍bhyā̱madhvā̍naṃ bā̱hubhyā̱ṃ jāmbī̍le̱nāra̍ṇyama̱gnima̍ti̱rugbhyā̍ṃ pū̱ṣaṇa̍ṃ do̱rbhyāma̱śvinā̱vasā̍bhyā ru̱dra rorā̍bhyām
||25.3||म॒शका॒न् केशै॒रिन्द्र॒ᳪ स्वप॑सा॒ वहे॑न॒ बृह॒स्पति॑ᳪ शकुनिसा॒देन॑ कू॒र्माञ्छ॒फैरा॒क्रम॑णᳪ स्थू॒राभ्या॑मृ॒क्षला॑भिः क॒पिञ्ज॑लाञ्ज॒वं जङ्घा॑भ्या॒मध्वा॑नं बा॒हुभ्यां॒ जाम्बी॑ले॒नार॑ण्यम॒ग्निम॑ति॒रुग्भ्यां॑ पू॒षणं॑ दो॒र्भ्याम॒श्विना॒वᳪसा॑भ्याᳪ रु॒द्रᳪ रोरा॑भ्याम्
a̱gneḥ pa̍kṣa̱tirvā̱yornipa̍kṣati̱rindra̍sya tṛ̱tīyā̱ soma̍sya catu̱rthyadi̍tyai pañca̱mīndrā̱ṇyai ṣa̱ṣṭhī ma̱rutā sapta̱mī bṛha̱spate̍raṣṭa̱mya̱rya̱mṇo na̍va̱mī dhā̱turda̍śa̱mīndra̍syaikāda̱śī varu̍ṇasya dvāda̱śī ya̱masya̍ trayoda̱śī
||25.4||अ॒ग्नेः प॑क्ष॒तिर्वा॒योर्निप॑क्षति॒रिन्द्र॑स्य तृ॒तीया॒ सोम॑स्य चतु॒र्थ्यदि॑त्यै पञ्च॒मीन्द्रा॒ण्यै ष॒ष्ठी म॒रुता॑ᳪ सप्त॒मी बृह॒स्पते॑रष्ट॒म्य॒र्य॒म्णो न॑व॒मी धा॒तुर्द॑श॒मीन्द्र॑स्यैकाद॒शी वरु॑णस्य द्वाद॒शी य॒मस्य॑ त्रयोद॒शी
i̱ndrā̱gnyoḥ pa̍kṣa̱ti: sara̍svatyai̱ nipa̍kṣatirmi̱trasya̍ tṛ̱tīyā̱pāṃ ca̍tu̱rthī nirṛ̍tyai pañca̱myagnīṣoma̍yoḥ ṣa̱ṣṭhī sa̱rpāṇā sapta̱mī viṣṇo̍raṣṭa̱mī pū̱ṣṇo na̍va̱mī tvaṣṭu̍rdaśa̱mīndra̍syaikāda̱śī varu̍ṇasya dvāda̱śī ya̱myai tra̍yoda̱śī dyāvā̍pṛthi̱vyordakṣi̍ṇaṃ pā̱rśvaṃ viśve̍ṣāṃ de̱vānā̱mutta̍ram
||25.5||इ॒न्द्रा॒ग्न्योः प॑क्ष॒ति: सर॑स्वत्यै॒ निप॑क्षतिर्मि॒त्रस्य॑ तृ॒तीया॒पां च॑तु॒र्थी निरृ॑त्यै पञ्च॒म्यग्नीषोम॑योः ष॒ष्ठी स॒र्पाणा॑ᳪ सप्त॒मी विष्णो॑रष्ट॒मी पू॒ष्णो न॑व॒मी त्वष्टु॑र्दश॒मीन्द्र॑स्यैकाद॒शी वरु॑णस्य द्वाद॒शी य॒म्यै त्र॑योद॒शी द्यावा॑पृथि॒व्योर्दक्षि॑णं पा॒र्श्वं विश्वे॑षां दे॒वाना॒मुत्त॑रम्
ma̱rutā skandhā̱ viśve̍ṣāṃ de̱vānā̍ṃ pratha̱mā kīka̍sā ru̱drāṇā̍ṃ dvi̱tīyā̍''di̱tyānā̍ṃ tṛ̱tīyā̍ vā̱yoḥ puccha̍ma̱gnīṣoma̍yo̱rbhāsa̍dau̱ kruñcau̱ śroṇi̍bhyā̱mindrā̱bṛha̱spatī̍ ū̱rubhyā̍ṃ mi̱trāvaru̍ṇāva̱lgābhyā̍mā̱krama̍ṇa sthū̱rābhyā̱ṃ bala̱ṃ kuṣṭhā̍bhyām
||25.6||म॒रुता॑ᳪ स्कन्धा॒ विश्वे॑षां दे॒वानां॑ प्रथ॒मा कीक॑सा रु॒द्राणां॑ द्वि॒तीया॑ऽऽदि॒त्यानां॑ तृ॒तीया॑ वा॒योः पुच्छ॑म॒ग्नीषोम॑यो॒र्भास॑दौ॒ क्रुञ्चौ॒ श्रोणि॑भ्या॒मिन्द्रा॒बृह॒स्पती॑ ऊ॒रुभ्यां॑ मि॒त्रावरु॑णाव॒ल्गाभ्या॑मा॒क्रम॑णᳪ स्थू॒राभ्यां॒ बलं॒ कुष्ठा॑भ्याम्
pū̱ṣaṇa̍ṃ vani̱ṣṭhunā̍'ndhā̱hīntsthū̍lagu̱dayā̍ sa̱rpāngudā̍bhirvi̱hruta̍ ā̱ntraira̱po va̱stinā̱ vṛṣa̍ṇamā̱ṇḍābhyā̱ṃ vāji̍na śepe̍na pra̱jā reta̍sā̱ cāṣā̍n pi̱ttena̍ prada̱rān pā̱yunā̍ kū̱śmāñcha̍kapiṇḍaiḥ
||25.7||पू॒षणं॑ वनि॒ष्ठुना॑ऽन्धा॒हीन्त्स्थू॑लगु॒दया॑ स॒र्पान्गुदा॑भिर्वि॒ह्रुत॑ आ॒न्त्रैर॒पो व॒स्तिना॒ वृष॑णमा॒ण्डाभ्यां॒ वाजि॑न॒ᳪ शेपे॑न प्र॒जाᳪ रेत॑सा॒ चाषा॑न् पि॒त्तेन॑ प्रद॒रान् पा॒युना॑ कू॒श्माञ्छ॑कपिण्डैः
indra̍sya krī̱ḍo'di̍tyai pāja̱sya̱ṃ di̱śāṃ ja̱travo'di̍tyai bha̱sajjī̱mūtā̍n hṛdayaupa̱śenā̱ntari̍kṣaṃ purī̱tatā̱ nabha̍ uda̱rye̱ṇa cakravā̱kau mata̍snābhyā̱ṃ diva̍ṃ vṛ̱kkābhyā̍ṃ gi̱rīn plā̱śibhi̱rupa̍lān plī̱hnā va̱lmīkā̍n klo̱mabhi̍rglau̱bhirgulmā̍n hi̱rābhi̱: srava̍ntīrhra̱dān ku̱kṣibhyā samu̱dramu̱dare̍ṇa vaiśvāna̱raṃ bhasma̍nā
||25.8||इन्द्र॑स्य क्री॒डोऽदि॑त्यै पाज॒स्यं॒ दि॒शां ज॒त्रवोऽदि॑त्यै भ॒सज्जी॒मूता॑न् हृदयौप॒शेना॒न्तरि॑क्षं पुरी॒तता॒ नभ॑ उद॒र्ये॒ण चक्रवा॒कौ मत॑स्नाभ्यां॒ दिवं॑ वृ॒क्काभ्यां॑ गि॒रीन् प्ला॒शिभि॒रुप॑लान् प्ली॒ह्ना व॒ल्मीका॑न् क्लो॒मभि॑र्ग्लौ॒भिर्गुल्मा॑न् हि॒राभि॒: स्रव॑न्तीर्ह्र॒दान् कु॒क्षिभ्या॑ᳪ समु॒द्रमु॒दरे॑ण वैश्वान॒रं भस्म॑ना
vidhṛ̍ti̱ṃ nābhyā̍ dhṛ̱ta rase̍nā̱po yū̱ṣṇā marī̍cīrvi̱pruḍbhi̍rnīhā̱ramū̱ṣmaṇā̍ śī̱naṃ vasa̍yā̱ pruṣvā̱ aśru̍bhirhrā̱dunī̍rdū̱ṣīkā̍bhira̱snā rakṣāsi ci̱trāṇyaṅgai̱rnakṣa̍trāṇi rū̱peṇa̍ pṛthi̱vīṃ tva̱cā ju̍mba̱kāya̱ svāhā̍
||25.9||विधृ॑तिं॒ नाभ्या॑ धृ॒तᳪ रसे॑ना॒पो यू॒ष्णा मरी॑चीर्वि॒प्रुड्भि॑र्नीहा॒रमू॒ष्मणा॑ शी॒नं वस॑या॒ प्रुष्वा॒ अश्रु॑भिर्ह्रा॒दुनी॑र्दू॒षीका॑भिर॒स्ना रक्षा॑ᳪसि चि॒त्राण्यङ्गै॒र्नक्ष॑त्राणि रू॒पेण॑ पृथि॒वीं त्व॒चा जु॑म्ब॒काय॒ स्वाहा॑
hi̱ra̱ṇya̱ga̱rbhaḥ sama̍varta̱tāgre̍ bhū̱tasya̍ jā̱taḥ pati̱reka̍ āsīt |
sa dā̍dhāra pṛthi̱vīṃ dyāmu̱temāṃ kasmai̍ de̱vāya̍ ha̱viṣā̍ vidhema
||25.10||हि॒र॒ण्य॒ग॒र्भः सम॑वर्त॒ताग्रे॑ भू॒तस्य॑ जा॒तः पति॒रेक॑ आसीत् ।
स दा॑धार पृथि॒वीं द्यामु॒तेमां कस्मै॑ दे॒वाय॑ ह॒विषा॑ विधेम
yaḥ prā̍ṇa̱to ni̍miṣa̱to ma̍hitvaika̱ idrājā̱ jaga̍to ba̱bhūva̍ |
ya īśe̍ a̱sya dvi̱pada̱ścatu̍ṣpada̱: kasmai̍ de̱vāya̍ ha̱viṣā̍ vidhema
||25.11||यः प्रा॑ण॒तो नि॑मिष॒तो म॑हित्वैक॒ इद्राजा॒ जग॑तो ब॒भूव॑ ।
य ईशे॑ अ॒स्य द्वि॒पद॒श्चतु॑ष्पद॒: कस्मै॑ दे॒वाय॑ ह॒विषा॑ विधेम
yasye̱me hi̱mava̍nto mahi̱tvā yasya̍ samu̱dra ra̱sayā̍ sa̱hāhuḥ |
yasye̱māḥ pra̱diśo̱ yasya̍ bā̱hū kasmai̍ de̱vāya̍ ha̱viṣā̍ vidhema
||25.12||यस्ये॒मे हि॒मव॑न्तो महि॒त्वा यस्य॑ समु॒द्रᳪ र॒सया॑ स॒हाहुः ।
यस्ये॒माः प्र॒दिशो॒ यस्य॑ बा॒हू कस्मै॑ दे॒वाय॑ ह॒विषा॑ विधेम
ya ā̍tma̱dā ba̍la̱dā yasya̱ viśva̍ u̱pāsa̍te pra̱śiṣa̱ṃ yasya̍ de̱vāḥ |
yasya̍ chā̱yāmṛta̱ṃ yasya̍ mṛ̱tyuḥ kasmai̍ de̱vāya̍ ha̱viṣā̍ vidhema
||25.13||य आ॑त्म॒दा ब॑ल॒दा यस्य॒ विश्व॑ उ॒पास॑ते प्र॒शिषं॒ यस्य॑ दे॒वाः ।
यस्य॑ छा॒यामृतं॒ यस्य॑ मृ॒त्युः कस्मै॑ दे॒वाय॑ ह॒विषा॑ विधेम
ā no̍ bha̱drāḥ krata̍vo yantu vi̱śvato'da̍bdhāso̱ apa̍rītāsa u̱dbhida̍: |
de̱vā no̱ yathā̱ sada̱mid vṛ̱dhe asa̱nnaprā̍yuvo rakṣi̱tāro̍ di̱ve – di̍ve
||25.14||आ नो॑ भ॒द्राः क्रत॑वो यन्तु वि॒श्वतोऽद॑ब्धासो॒ अप॑रीतास उ॒द्भिद॑: ।
दे॒वा नो॒ यथा॒ सद॒मिद् वृ॒धे अस॒न्नप्रा॑युवो रक्षि॒तारो॑ दि॒वे – दि॑वे
de̱vānā̍ṃ bha̱drā su̍ma̱tirṛ̍jūya̱tāṃ de̱vānā rā̱tira̱bhi no̱ niva̍rtatām |
de̱vānā sa̱khyamupa̍sedimā va̱yaṃ de̱vā na̱ āyu̱: prati̍rantu jī̱vase̍
||25.15||दे॒वानां॑ भ॒द्रा सु॑म॒तिरृ॑जूय॒तां दे॒वाना॑ᳪ रा॒तिर॒भि नो॒ निव॑र्तताम् ।
दे॒वाना॑ᳪ स॒ख्यमुप॑सेदिमा व॒यं दे॒वा न॒ आयु॒: प्रति॑रन्तु जी॒वसे॑
tānpūrva̍yā ni̱vidā̍ hūmahe va̱yaṃ bhaga̍ṃ mi̱tramadi̍ti̱ṃ dakṣa̍ma̱sridha̍m |
a̱rya̱maṇa̱ṃ varu̍ṇa soma̍ma̱śvinā̱ sara̍svatī naḥ su̱bhagā̱ maya̍skarat
||25.16||तान्पूर्व॑या नि॒विदा॑ हूमहे व॒यं भगं॑ मि॒त्रमदि॑तिं॒ दक्ष॑म॒स्रिध॑म् ।
अ॒र्य॒मणं॒ वरु॑ण॒ᳪ सोम॑म॒श्विना॒ सर॑स्वती नः सु॒भगा॒ मय॑स्करत्
tanno̱ vāto̍ mayo̱bhu vā̍tu bheṣa̱jaṃ tanmā̱tā pṛ̍thi̱vī tatpi̱tā dyau̍: |
tad grāvā̍ṇaḥ soma̱suto̍ mayo̱bhuva̱stada̍śvinā śṛṇutaṃ dhiṣṇyā yu̱vam
||25.17||तन्नो॒ वातो॑ मयो॒भु वा॑तु भेष॒जं तन्मा॒ता पृ॑थि॒वी तत्पि॒ता द्यौ॑: ।
तद् ग्रावा॑णः सोम॒सुतो॑ मयो॒भुव॒स्तद॑श्विना शृणुतं धिष्ण्या यु॒वम्
tamīśā̍na̱ṃ jaga̍tasta̱sthuṣa̱spati̍ṃ dhiyañji̱nvamava̍se hūmahe va̱yam |
pū̱ṣā no̱ yathā̱ veda̍sā̱masa̍d vṛ̱dhe ra̍kṣi̱tā pā̱yurada̍bdhaḥ sva̱staye̍
||25.18||तमीशा॑नं॒ जग॑तस्त॒स्थुष॒स्पतिं॑ धियञ्जि॒न्वमव॑से हूमहे व॒यम् ।
पू॒षा नो॒ यथा॒ वेद॑सा॒मस॑द् वृ॒धे र॑क्षि॒ता पा॒युरद॑ब्धः स्व॒स्तये॑
sva̱sti na̱ indro̍ vṛ̱ddhaśra̍vāḥ sva̱sti na̍: pū̱ṣā vi̱śvave̍dāḥ |
sva̱sti na̱stārkṣyo̱ ari̍ṣṭanemiḥ sva̱sti no̱ bṛha̱spati̍rdadhātu
||25.19||स्व॒स्ति न॒ इन्द्रो॑ वृ॒द्धश्र॑वाः स्व॒स्ति न॑: पू॒षा वि॒श्ववे॑दाः ।
स्व॒स्ति न॒स्तार्क्ष्यो॒ अरि॑ष्टनेमिः स्व॒स्ति नो॒ बृह॒स्पति॑र्दधातु
pṛṣa̍daśvā ma̱ruta̱: pṛśni̍mātaraḥ śubha̱ṃyāvā̍no vi̱dathe̍ṣu̱ jagma̍yaḥ |
a̱gni̱ji̱hvā mana̍va̱: sūra̍cakṣaso̱ viśve̍ no de̱vā ava̱sāga̍manni̱ha
||25.20||पृष॑दश्वा म॒रुत॒: पृश्नि॑मातरः शुभं॒यावा॑नो वि॒दथे॑षु॒ जग्म॑यः ।
अ॒ग्नि॒जि॒ह्वा मन॑व॒: सूर॑चक्षसो॒ विश्वे॑ नो दे॒वा अव॒साग॑मन्नि॒ह
bha̱draṃ karṇe̍bhiḥ śṛṇuyāma devā bha̱draṃ pa̍śyemā̱kṣabhi̍ryajatrāḥ |
sthi̱rairaṅgai̍stuṣṭu̱vāsa̍sta̱nūbhi̱rvya̱śemahi de̱vahi̍ta̱ṃ yadāyu̍:
||25.21||भ॒द्रं कर्णे॑भिः शृणुयाम देवा भ॒द्रं प॑श्येमा॒क्षभि॑र्यजत्राः ।
स्थि॒रैरङ्गै॑स्तुष्टु॒वाᳪस॑स्त॒नूभि॒र्व्य॒शेमहि दे॒वहि॑तं॒ यदायु॑:
śa̱taminnu śa̱rado̱ anti̍ devā̱ yatrā̍ naśca̱krā ja̱rasa̍ṃ ta̱nūnā̍m |
pu̱trāso̱ yatra̍ pi̱taro̱ bhava̍nti̱ mā no̍ ma̱dhyā rī̍riṣa̱tāyu̱rganto̍:
||25.22||श॒तमिन्नु श॒रदो॒ अन्ति॑ देवा॒ यत्रा॑ नश्च॒क्रा ज॒रसं॑ त॒नूना॑म् ।
पु॒त्रासो॒ यत्र॑ पि॒तरो॒ भव॑न्ति॒ मा नो॑ म॒ध्या री॑रिष॒तायु॒र्गन्तो॑:
adi̍tirdyau̱radi̍tira̱ntari̍kṣa̱madi̍tirmā̱tā sa pi̱tā sa pu̱traḥ |
viśve̍ de̱vā adi̍ti̱: pañca̱ janā̱ adi̍tirjā̱tamadi̍ti̱rjani̍tvam
||25.23||अदि॑तिर्द्यौ॒रदि॑तिर॒न्तरि॑क्ष॒मदि॑तिर्मा॒ता स पि॒ता स पु॒त्रः ।
विश्वे॑ दे॒वा अदि॑ति॒: पञ्च॒ जना॒ अदि॑तिर्जा॒तमदि॑ति॒र्जनि॑त्वम्
mā no̍ mi̱tro varu̍ṇo arya̱māyurindra̍ ṛbhu̱kṣā ma̱ruta̱: pari̍ khyan |
yadvā̱jino̍ de̱vajā̍tasya̱ sapte̍: prava̱kṣyāmo̍ vi̱dathe̍ vī̱ryā̱ṇi
||25.24||मा नो॑ मि॒त्रो वरु॑णो अर्य॒मायुरिन्द्र॑ ऋभु॒क्षा म॒रुत॒: परि॑ ख्यन् ।
यद्वा॒जिनो॑ दे॒वजा॑तस्य॒ सप्ते॑: प्रव॒क्ष्यामो॑ वि॒दथे॑ वी॒र्या॒णि
yanni̱rṇijā̱ rekṇa̍sā̱ prāvṛ̍tasya rā̱tiṃ gṛ̍bhī̱tāṃ mu̍kha̱to naya̍nti |
suprā̍ṅa̱jo memya̍dvi̱śvarū̍pa indrāpū̱ṣṇoḥ pri̱yamapye̍ti̱ pātha̍:
||25.25||यन्नि॒र्णिजा॒ रेक्ण॑सा॒ प्रावृ॑तस्य रा॒तिं गृ॑भी॒तां मु॑ख॒तो नय॑न्ति ।
सुप्रा॑ङ॒जो मेम्य॑द्वि॒श्वरू॑प इन्द्रापू॒ष्णोः प्रि॒यमप्ये॑ति॒ पाथ॑:
e̱ṣa chāga̍: pu̱ro aśve̍na vā̱jinā̍ pū̱ṣṇo bhā̱go nī̍yate vi̱śvade̍vyaḥ |
a̱bhi̱priya̱ṃ yatpu̍ro̱ḍāśa̱marva̍tā̱ tvaṣṭede̍na sauśrava̱sāya̍ jinvati
||25.26||ए॒ष छाग॑: पु॒रो अश्वे॑न वा॒जिना॑ पू॒ष्णो भा॒गो नी॑यते वि॒श्वदे॑व्यः ।
अ॒भि॒प्रियं॒ यत्पु॑रो॒डाश॒मर्व॑ता॒ त्वष्टेदे॑नᳪ सौश्रव॒साय॑ जिन्वति
yaddha̍vi̱ṣya̱mṛtu̱śo de̍va̱yāna̱ṃ trirmānu̍ṣā̱: paryaśva̱ṃ naya̍nti |
atrā̍ pū̱ṣṇaḥ pra̍tha̱mo bhā̱ga e̍ti ya̱jñaṃ de̱vebhya̍: prative̱daya̍nna̱jaḥ
||25.27||यद्ध॑वि॒ष्य॒मृतु॒शो दे॑व॒यानं॒ त्रिर्मानु॑षा॒: पर्यश्वं॒ नय॑न्ति ।
अत्रा॑ पू॒ष्णः प्र॑थ॒मो भा॒ग ए॑ति य॒ज्ञं दे॒वेभ्य॑: प्रतिवे॒दय॑न्न॒जः
hotā̍dhva̱ryurāva̍yā agnimi̱ndho grā̍vagrā̱bha u̱ta śastā̱ suvi̍praḥ |
tena̍ ya̱jñena̱ sva̱raṃkṛtena̱ svi̱ṣṭena va̱kṣaṇā̱ ā pṛ̍ṇadhvam
||25.28||होता॑ध्व॒र्युराव॑या अग्निमि॒न्धो ग्रा॑वग्रा॒भ उ॒त शᳪस्ता॒ सुवि॑प्रः ।
तेन॑ य॒ज्ञेन॒ स्व॒रंकृतेन॒ स्वि॒ष्टेन व॒क्षणा॒ आ पृ॑णध्वम्
yū̱pa̱vra̱skā u̱ta ye yū̍pavā̱hāśca̱ṣāla̱ṃ ye a̍śvayū̱pāya̱ takṣa̍ti |
ye cārva̍te̱ paca̍na sa̱mbhara̍ntyu̱to teṣā̍ma̱bhigū̍rtirna invatu
||25.29||यू॒प॒व्र॒स्का उ॒त ये यू॑पवा॒हाश्च॒षालं॒ ये अ॑श्वयू॒पाय॒ तक्ष॑ति ।
ये चार्व॑ते॒ पच॑नᳪ स॒म्भर॑न्त्यु॒तो तेषा॑म॒भिगू॑र्तिर्न इन्वतु
upa̱ prāgā̍tsu̱manme̍'dhāyi̱ manma̍ de̱vānā̱māśā̱ upa̍ vī̱tapṛ̍ṣṭhaḥ |
anve̍na̱ṃ viprā̱ ṛṣa̍yo madanti de̱vānā̍ṃ pu̱ṣṭe ca̍kṛmā su̱bandhu̍m
||25.30||उप॒ प्रागा॑त्सु॒मन्मे॑ऽधायि॒ मन्म॑ दे॒वाना॒माशा॒ उप॑ वी॒तपृ॑ष्ठः ।
अन्वे॑नं॒ विप्रा॒ ऋष॑यो मदन्ति दे॒वानां॑ पु॒ष्टे च॑कृमा सु॒बन्धु॑म्
yadvā̱jino̱ dāma̍ sa̱ndāna̱marva̍to̱ yā śī̍rṣa̱ṇyā̱ raśa̱nā rajju̍rasya |
yadvā̍ ghāsya̱ prabhṛ̍tamā̱sye tṛṇa sarvā̱ tā te̱ api̍ de̱veṣva̍stu
||25.31||यद्वा॒जिनो॒ दाम॑ स॒न्दान॒मर्व॑तो॒ या शी॑र्ष॒ण्या॒ रश॒ना रज्जु॑रस्य ।
यद्वा॑ घास्य॒ प्रभृ॑तमा॒स्ये तृण॒ᳪ सर्वा॒ ता ते॒ अपि॑ दे॒वेष्व॑स्तु
yadaśva̍sya kra̱viṣo̱ makṣi̱kāśa̱ yadvā̱ svarau̱ svadhi̍tau ri̱ptamasti̍ |
yaddhasta̍yoḥ śami̱turyanna̱kheṣu̱ sarvā̱ tā te̱ api̍ de̱veṣva̍stu
||25.32||यदश्व॑स्य क्र॒विषो॒ मक्षि॒काश॒ यद्वा॒ स्वरौ॒ स्वधि॑तौ रि॒प्तमस्ति॑ ।
यद्धस्त॑योः शमि॒तुर्यन्न॒खेषु॒ सर्वा॒ ता ते॒ अपि॑ दे॒वेष्व॑स्तु
yadūva̍dhyamu̱dara̍syāpa̱vāti̱ ya ā̱masya̍ kra̱viṣo̍ ga̱ndho asti̍ |
su̱kṛ̱tā taccha̍mi̱tāra̍: kṛṇvantū̱ta medha śṛta̱pāka̍ṃ pacantu
||25.33||यदूव॑ध्यमु॒दर॑स्याप॒वाति॒ य आ॒मस्य॑ क्र॒विषो॑ ग॒न्धो अस्ति॑ ।
सु॒कृ॒ता तच्छ॑मि॒तार॑: कृण्वन्तू॒त मेध॑ᳪ शृत॒पाकं॑ पचन्तु
yatte̱ gātrā̍da̱gninā̍ pa̱cyamā̍nāda̱bhi śūla̱ṃ niha̍tasyāva̱dhāva̍ti |
mā tadbhūmyā̱māśri̍ṣa̱nmā tṛṇe̍ṣu de̱vebhya̱stadu̱śadbhyo̍ rā̱tama̍stu
||25.34||यत्ते॒ गात्रा॑द॒ग्निना॑ प॒च्यमा॑नाद॒भि शूलं॒ निह॑तस्याव॒धाव॑ति ।
मा तद्भूम्या॒माश्रि॑ष॒न्मा तृणे॑षु दे॒वेभ्य॒स्तदु॒शद्भ्यो॑ रा॒तम॑स्तु
ye vā̱jina̍ṃ pari̱paśya̍nti pa̱kvaṃ ya ī̍mā̱huḥ su̍ra̱bhirnirha̱reti̍ |
ye cārva̍to māsabhi̱kṣāmu̱pāsa̍ta u̱to teṣā̍ma̱bhigū̍rtirna invatu
||25.35||ये वा॒जिनं॑ परि॒पश्य॑न्ति प॒क्वं य ई॑मा॒हुः सु॑र॒भिर्निर्ह॒रेति॑ ।
ये चार्व॑तो माᳪसभि॒क्षामु॒पास॑त उ॒तो तेषा॑म॒भिगू॑र्तिर्न इन्वतु
yannīkṣa̍ṇaṃ mā̱m̐spaca̍nyā u̱khāyā̱ yā pātrā̍ṇi yū̱ṣṇa ā̱seca̍nāni |
ū̱ṣma̱ṇyā̱pi̱dhānā̍ carū̱ṇāma̱ṅkāḥ sū̱nāḥ pari̍ bhūṣa̱ntyaśva̍m
||25.36||यन्नीक्ष॑णं माँ॒स्पच॑न्या उ॒खाया॒ या पात्रा॑णि यू॒ष्ण आ॒सेच॑नानि ।
ऊ॒ष्म॒ण्या॒पि॒धाना॑ चरू॒णाम॒ङ्काः सू॒नाः परि॑ भूष॒न्त्यश्व॑म्
mā tvā̱'gnirdhva̍nayīddhū̱maga̍ndhi̱rmokhā bhrāja̍ntya̱bhi vi̍kta̱ jaghri̍: |
i̱ṣṭaṃ vī̱tama̱bhigū̍rta̱ṃ vaṣa̍ṭkṛta̱ṃ taṃ de̱vāsa̱: prati̍ gṛbhṇa̱ntyaśva̍m
||25.37||मा त्वा॒ऽग्निर्ध्व॑नयीद्धू॒मग॑न्धि॒र्मोखा भ्राज॑न्त्य॒भि वि॑क्त॒ जघ्रि॑: ।
इ॒ष्टं वी॒तम॒भिगू॑र्तं॒ वष॑ट्कृतं॒ तं दे॒वास॒: प्रति॑ गृभ्ण॒न्त्यश्व॑म्
ni̱krama̍ṇaṃ ni̱ṣada̍naṃ vi̱varta̍na̱ṃ yacca̱ paḍvī̍śa̱marva̍taḥ |
yacca̍ papau̱ yacca̍ ghā̱siṃ ja̱ghāsa̱ sarvā̱ tā te̱ api̍ de̱veṣva̍stu
||25.38||नि॒क्रम॑णं नि॒षद॑नं वि॒वर्त॑नं॒ यच्च॒ पड्वी॑श॒मर्व॑तः ।
यच्च॑ पपौ॒ यच्च॑ घा॒सिं ज॒घास॒ सर्वा॒ ता ते॒ अपि॑ दे॒वेष्व॑स्तु
yadaśvā̍ya̱ vāsa̍ upastṛ̱ṇantya̍dhīvā̱saṃ yā hira̍ṇyānyasmai |
sa̱ndāna̱marva̍nta̱ṃ paḍvī̍śaṃ pri̱yā de̱veṣvā yā̍mayanti
||25.39||यदश्वा॑य॒ वास॑ उपस्तृ॒णन्त्य॑धीवा॒सं या हिर॑ण्यान्यस्मै ।
स॒न्दान॒मर्व॑न्तं॒ पड्वी॑शं प्रि॒या दे॒वेष्वा या॑मयन्ति
yatte̍ sā̱de maha̍sā̱ śūkṛ̍tasya̱ pārṣṇyā̍ vā̱ kaśa̍yā vā tu̱toda̍ |
sru̱ceva̱ tā ha̱viṣo̍ adhva̱reṣu̱ sarvā̱ tā te̱ brahma̍ṇā sūdayāmi
||25.40||यत्ते॑ सा॒दे मह॑सा॒ शूकृ॑तस्य॒ पार्ष्ण्या॑ वा॒ कश॑या वा तु॒तोद॑ ।
स्रु॒चेव॒ ता ह॒विषो॑ अध्व॒रेषु॒ सर्वा॒ ता ते॒ ब्रह्म॑णा सूदयामि
catu̍striśadvā̱jino̍ de̱vaba̍ndho̱rvaṅkrī̱raśva̍sya̱ svadhi̍ti̱: same̍ti |
acchi̍drā̱ gātrā̍ va̱yunā̍ kṛṇota̱ paru̍ṣparuranu̱ghuṣyā̱ viśa̍sta
||25.41||चतु॑स्त्रिᳪशद्वा॒जिनो॑ दे॒वब॑न्धो॒र्वङ्क्री॒रश्व॑स्य॒ स्वधि॑ति॒: समे॑ति ।
अच्छि॑द्रा॒ गात्रा॑ व॒युना॑ कृणोत॒ परु॑ष्परुरनु॒घुष्या॒ विश॑स्त
eka̱stvaṣṭu̱raśva̍syā viśa̱stā dvā ya̱ntārā̍ bhavata̱statha̍ ṛ̱tuḥ |
yā te̱ gātrā̍ṇāmṛtu̱thā kṛ̱ṇomi̱ tā-tā̱ piṇḍā̍nā̱ṃ pra ju̍homyagnau
||25.42||एक॒स्त्वष्टु॒रश्व॑स्या विश॒स्ता द्वा य॒न्तारा॑ भवत॒स्तथ॑ ऋ॒तुः ।
या ते॒ गात्रा॑णामृतु॒था कृ॒णोमि॒ ता-ता॒ पिण्डा॑नां॒ प्र जु॑होम्यग्नौ
mā tvā̍ tapatpri̱ya ā̱tmā'pi̱yanta̱ṃ mā svadhi̍tista̱nva ā ti̍ṣṭhipatte |
mā te̍ gṛ̱dhnura̍viśa̱stā'ti̱hāya̍ chi̱drā gātrā̍ṇya̱sinā̱ mithū̍ kaḥ
||25.43||मा त्वा॑ तपत्प्रि॒य आ॒त्माऽपि॒यन्तं॒ मा स्वधि॑तिस्त॒न्व आ ति॑ष्ठिपत्ते ।
मा ते॑ गृ॒ध्नुर॑विश॒स्ताऽति॒हाय॑ छि॒द्रा गात्रा॑ण्य॒सिना॒ मिथू॑ कः
na vā u̍ e̱tanmri̍yase̱ na ri̍ṣyasi de̱vām̐2 ide̍ṣi pa̱thibhi̍: su̱gebhi̍: |
harī̍ te̱ yuñjā̱ pṛṣa̍tī abhūtā̱mupā̍sthādvā̱jī dhu̱ri rāsa̍bhasya
||25.44||न वा उ॑ ए॒तन्म्रि॑यसे॒ न रि॑ष्यसि दे॒वाँ२ इदे॑षि प॒थिभि॑: सु॒गेभि॑: ।
हरी॑ ते॒ युञ्जा॒ पृष॑ती अभूता॒मुपा॑स्थाद्वा॒जी धु॒रि रास॑भस्य
su̱gavya̍ṃ no vā̱jī svaśvya̍ṃ pusaḥ pu̱trām̐2 u̱ta vi̍śvā̱puṣa ra̱yim |
a̱nā̱gā̱stvaṃ no̱ adi̍tiḥ kṛṇotu kṣa̱traṃ no̱ aśvo̍ vanatā ha̱viṣmā̍n
||25.45||सु॒गव्यं॑ नो वा॒जी स्वश्व्यं॑ पु॒ᳪसः पु॒त्राँ२ उ॒त वि॑श्वा॒पुष॑ᳪ र॒यिम् ।
अ॒ना॒गा॒स्त्वं नो॒ अदि॑तिः कृणोतु क्ष॒त्रं नो॒ अश्वो॑ वनताᳪ ह॒विष्मा॑न्
i̱mā nu ka̱ṃ bhuva̍nā sīṣadhā̱mendra̍śca̱ viśve̍ ca de̱vāḥ |
ā̱di̱tyairindra̱: saga̍ṇo ma̱rudbhi̍ra̱smabhya̍ṃ bheṣa̱jā ka̍rat |
ya̱jñaṃ ca̍ nasta̱nva̱ṃ ca pra̱jāṃ cā̍dityai̱rindra̍: sa̱ha sī̍ṣadhāti
||25.46||इ॒मा नु कं॒ भुव॑ना सीषधा॒मेन्द्र॑श्च॒ विश्वे॑ च दे॒वाः ।
आ॒दि॒त्यैरिन्द्र॒: सग॑णो म॒रुद्भि॑र॒स्मभ्यं॑ भेष॒जा क॑रत् ।
य॒ज्ञं च॑ नस्त॒न्वं॒ च प्र॒जां चा॑दित्यै॒रिन्द्र॑: स॒ह सी॑षधाति
agne̱ tvaṃ no̱ anta̍ma u̱ta trā̱tā śi̱vo bha̍va varū̱thya̱: |
vasu̍ra̱gnirvasu̍śravā̱ acchā̍ nakṣi dyu̱matta̍ma ra̱yiṃ dā̍: |
taṃ tvā̍ śociṣṭha dīdivaḥ su̱mnāya̍ nū̱namī̍mahe̱ sakhi̍bhyaḥ
||25.47||अग्ने॒ त्वं नो॒ अन्त॑म उ॒त त्रा॒ता शि॒वो भ॑व वरू॒थ्य॒: ।
वसु॑र॒ग्निर्वसु॑श्रवा॒ अच्छा॑ नक्षि द्यु॒मत्त॑मᳪ र॒यिं दा॑: ।
तं त्वा॑ शोचिष्ठ दीदिवः सु॒म्नाय॑ नू॒नमी॑महे॒ सखि॑भ्यः