i̱ṣe tvo̱rje tvā̍ vā̱yava̍ stha de̱vo va̍: savi̱tā prārpa̍yatu̱ śreṣṭha̍tamāya̱ karma̍ṇa̱ āpyā̍yadhva maghnyā̱ indrā̍ya bhā̱gaṃ pra̱jāva̍tīranamī̱vā a̍ya̱kṣmā mā va̍ ste̱na ī̍śata̱ māghaśaso dhru̱vā a̱smin gopa̍tau syāta ba̱hvīryaja̍mānasya pa̱śūnpā̍hi
||1.1||इ॒षे त्वो॒र्जे त्वा॑ वा॒यव॑ स्थ दे॒वो व॑: सवि॒ता प्रार्प॑यतु॒ श्रेष्ठ॑तमाय॒ कर्म॑ण॒ आप्या॑यध्व मघ्न्या॒ इन्द्रा॑य भा॒गं प्र॒जाव॑तीरनमी॒वा अ॑य॒क्ष्मा मा व॑ स्ते॒न ई॑शत॒ माघश॑ᳪसो ध्रु॒वा अ॒स्मिन् गोप॑तौ स्यात ब॒ह्वीर्यज॑मानस्य प॒शून्पा॑हि
vaso̍: pa̱vitra̍masi̱ dyau̍rasi pṛthi̱vya̱si māta̱riśva̍no gha̱rmo̱'si vi̱śvadhā̍ asi |
para̱meṇa̱ dhāmnā̱ dṛha̍sva̱ mā hvā̱rmā te̍ ya̱jñapa̍tirhvārṣīt
||1.2||वसो॑: प॒वित्र॑मसि॒ द्यौ॑रसि पृथि॒व्य॒सि मात॒रिश्व॑नो घ॒र्मो॒ऽसि वि॒श्वधा॑ असि |
पर॒मेण॒ धाम्ना॒ दृᳪह॑स्व॒ मा ह्वा॒र्मा ते॑ य॒ज्ञप॑तिर्ह्वार्षीत्
vaso̍: pa̱vitra̍masi śa̱tadhā̍ra̱ṃ vaso̍: pa̱vitra̍masi sa̱hasra̍dhāram |
de̱vastvā̍ savi̱tā pu̍nātu̱ vaso̍: pa̱vitre̍ṇa śa̱tadhā̍reṇa su̱pvā kāma̍dhukṣaḥ
||1.3||वसो॑: प॒वित्र॑मसि श॒तधा॑रं॒ वसो॑: प॒वित्र॑मसि स॒हस्र॑धारम् ।
दे॒वस्त्वा॑ सवि॒ता पु॑नातु॒ वसो॑: प॒वित्रे॑ण श॒तधा॑रेण सु॒प्वा काम॑धुक्षः
sā vi̱śvāyu̱: sā vi̱śvaka̍rmā̱ sā vi̱śvadhā̍yāḥ |
indra̍sya tvā bhā̱ga some̱nāta̍nacmi̱ viṣṇo̍ ha̱vya ra̍kṣa
||1.4||सा वि॒श्वायु॒: सा वि॒श्वक॑र्मा॒ सा वि॒श्वधा॑याः ।
इन्द्र॑स्य त्वा भा॒गᳪ सोमे॒नात॑नच्मि॒ विष्णो॑ ह॒व्यᳪ र॑क्ष
agne̍ vratapate vra̱taṃ ca̍riṣyāmi̱ taccha̍keya̱ṃ tanme̍ rādhyatām | i̱dama̱hamanṛ̍tātsa̱tyamupai̍mi
||1.5||अग्ने॑ व्रतपते व्र॒तं च॑रिष्यामि॒ तच्छ॑केयं॒ तन्मे॑ राध्यताम् । इ॒दम॒हमनृ॑तात्स॒त्यमुपै॑मि
kastvā̍ yunakti̱ sa tvā̍ yunakti̱ kasmai̍ tvā yunakti̱ tasmai̍ tvā yunakti | karma̍ṇe vā̱ṃ veṣā̍ya vām
||1.6||कस्त्वा॑ युनक्ति॒ स त्वा॑ युनक्ति॒ कस्मै॑ त्वा युनक्ति॒ तस्मै॑ त्वा युनक्ति । कर्म॑णे वां॒ वेषा॑य वाम्
pratyu̍ṣṭa rakṣa̱: pratyu̍ṣṭā̱ arā̍tayo̱ niṣṭa̍pta rakṣo̱ niṣṭa̍ptā̱ arā̍tayaḥ | u̱rvantari̍kṣa̱manve̍mi
||1.7||प्रत्यु॑ष्ट॒ᳪ रक्ष॒: प्रत्यु॑ष्टा॒ अरा॑तयो॒ निष्ट॑प्त॒ᳪ रक्षो॒ निष्ट॑प्ता॒ अरा॑तयः । उ॒र्वन्तरि॑क्ष॒मन्वे॑मि
dhūra̍si̱ dhūrva̱ dhūrva̍nta̱ṃ dhūrva̱ taṃ yo̱'smāndhūrva̍ti̱ taṃ dhū̍rva̱ yaṃ va̱yaṃ dhūrvā̍maḥ |
de̱vānā̍masi̱ vahni̍tama sasni̍tama̱ṃ papri̍tama̱ṃ juṣṭa̍tamaṃ deva̱hūta̍mam
||1.8||धूर॑सि॒ धूर्व॒ धूर्व॑न्तं॒ धूर्व॒ तं यो॒ऽस्मान्धूर्व॑ति॒ तं धू॑र्व॒ यं व॒यं धूर्वा॑मः ।
दे॒वाना॑मसि॒ वह्नि॑तम॒ᳪ सस्नि॑तमं॒ पप्रि॑तमं॒ जुष्ट॑तमं देव॒हूत॑मम्
viṣṇu̍stvā kramatā¬mu̱ru vātā̱yāpa̍hata rakṣo̱ yaccha̍ntā̱ṃ pañca̍
||1.9||विष्णु॑स्त्वा क्रमता¬मु॒रु वाता॒याप॑हत॒ᳪ रक्षो॒ यच्छ॑न्तां॒ पञ्च॑
de̱vasya̍ tvā savi̱tuḥ pra̍sa̱ve'śvino̍rbā̱hubhyā̍ṃ pū̱ṣṇo hastā̍bhyām |
a̱gnaye̱ juṣṭa̍ṃ gṛhṇāmya̱gnīṣomā̍bhyā̱ṃ juṣṭa̍ṃ gṛhṇāmi
||1.10||दे॒वस्य॑ त्वा सवि॒तुः प्र॑स॒वेऽश्विनो॑र्बा॒हुभ्यां॑ पू॒ष्णो हस्ता॑भ्याम् ।
अ॒ग्नये॒ जुष्टं॑ गृह्णाम्य॒ग्नीषोमा॑भ्यां॒ जुष्टं॑ गृह्णामि
bhū̱tāya̍ tvā̱ nārā̍taye sva̱rabhi̱vikhye̍ṣa̱ṃ dṛha̍ntā̱ṃ duryā̍: pṛthi̱vyāmu̱rvantari̍kṣa̱manve̍mi pṛthi̱vyāstvā̱ nābhau̍ sādayā̱myadi̍tyā u̱pasthe'gne̍ ha̱vya ra̍kṣa
||1.11||भू॒ताय॑ त्वा॒ नारा॑तये स्व॒रभि॒विख्ये॑षं॒ दृᳪह॑न्तां॒ दुर्या॑: पृथि॒व्यामु॒र्वन्तरि॑क्ष॒मन्वे॑मि पृथि॒व्यास्त्वा॒ नाभौ॑ सादया॒म्यदि॑त्या उ॒पस्थेऽग्ने॑ ह॒व्यᳪ र॑क्ष
pa̱vitre̍ stho vaiṣṇa̱vyau̱ savi̱turva̍: prasa̱va utpu̍nā̱myacchi̍dreṇa pa̱vitre̍ṇa̱ sūrya̍sya ra̱śmibhi̍: |
devī̍rāpo agreguvo agrepu̱vo'gra̍ i̱mama̱dya ya̱jñaṃ na̍ya̱tāgre̍ ya̱jñapa̍ti su̱dhātu̍ṃ ya̱jñapa̍tiṃ deva̱yuva̍m
||1.12||प॒वित्रे॑ स्थो वैष्ण॒व्यौ॒ सवि॒तुर्व॑: प्रस॒व उत्पु॑ना॒म्यच्छि॑द्रेण प॒वित्रे॑ण॒ सूर्य॑स्य र॒श्मिभि॑: ।
देवी॑रापो अग्रेगुवो अग्रेपु॒वोऽग्र॑ इ॒मम॒द्य य॒ज्ञं न॑य॒ताग्रे॑ य॒ज्ञप॑तिᳪ सु॒धातुं॑ य॒ज्ञप॑तिं देव॒युव॑म्
yu̱ṣmā indro̍'vṛṇīta vṛtra̱tūrye̍ yū̱yamindra̍mavṛṇīdhvaṃ vṛtra̱tūrye̱ prokṣi̍tā stha |
a̱gnaye̍ tvā̱ juṣṭa̱ṃ prokṣā̍mya̱gnīṣomā̍bhyāṃ tvā̱ juṣṭa̱ṃ prokṣā̍mi |
daivyā̍ya̱ karma̍ṇe śundhadhvaṃ devaya̱jyāyai̱ yadvo'śu̍ddhāḥ parāja̱ghnuri̱daṃ va̱stacchu̍ndhāmi
||1.13||यु॒ष्मा इन्द्रो॑ऽवृणीत वृत्र॒तूर्ये॑ यू॒यमिन्द्र॑मवृणीध्वं वृत्र॒तूर्ये॒ प्रोक्षि॑ता स्थ ।
अ॒ग्नये॑ त्वा॒ जुष्टं॒ प्रोक्षा॑म्य॒ग्नीषोमा॑भ्यां त्वा॒ जुष्टं॒ प्रोक्षा॑मि ।
दैव्या॑य॒ कर्म॑णे शुन्धध्वं देवय॒ज्यायै॒ यद्वोऽशु॑द्धाः पराज॒घ्नुरि॒दं व॒स्तच्छु॑न्धामि
śarmā̱syava̍dhūta rakṣo'va̍dhūtā̱ arā̍ta̱yo 'di̍tyā̱stvaga̍si̱ prati̱ tvādi̍tirvettu |adri̍rasi vānaspa̱tyo grāvā̍'si pṛ̱thubu̍dhna̱: prati̱ tvā'di̍tyā̱stvagve̍ttu
||1.14||शर्मा॒स्यव॑धूत॒ᳪ रक्षोऽव॑धूता॒ अरा॑त॒यो ऽदि॑त्या॒स्त्वग॑सि॒ प्रति॒ त्वादि॑तिर्वेत्तु ।अद्रि॑रसि वानस्प॒त्यो ग्रावा॑ऽसि पृ॒थुबु॑ध्न॒: प्रति॒ त्वाऽदि॑त्या॒स्त्वग्वे॑त्तु
a̱gnesta̱nūra̍si vā̱co vi̱sarja̍naṃ de̱vavī̍taye tvā gṛhṇāmi bṛ̱hadgrā̍vā'si vānaspa̱tyaḥ sa i̱daṃ de̱vebhyo̍ ha̱viḥ śa̍mīṣva su̱śami̍ śamīṣva |
havi̍ṣkṛ̱dehi̱ havi̍ṣkṛ̱dehi̍
||1.15||अ॒ग्नेस्त॒नूर॑सि वा॒चो वि॒सर्ज॑नं दे॒ववी॑तये त्वा गृह्णामि बृ॒हद्ग्रा॑वाऽसि वानस्प॒त्यः स इ॒दं दे॒वेभ्यो॑ ह॒विः श॑मीष्व सु॒शमि॑ शमीष्व ।
हवि॑ष्कृ॒देहि॒ हवि॑ष्कृ॒देहि॑
ku̱kku̱ṭo̱'si̱ madhu̍jihva̱ iṣa̱mūrja̱māva̍da̱ tvayā̍ va̱ya sa̍ṃdhā̱ta sa̍ṃdhātaṃ jeṣma va̱rṣavṛ̍ddhamasi̱ prati̍ tvā va̱rṣavṛ̍ddhaṃ vettu̱ parā̍pūta rakṣa̱: parā̍pūtā̱ arā̍ta̱yo 'pa̍hata rakṣo̍ vā̱yurvo̱ vivi̍naktu de̱vo va̍: savi̱tā hira̍ṇyapāṇi̱: prati̍gṛbhṇā̱tvacchi̍dreṇa pā̱ṇinā̍
||1.16||कु॒क्कु॒टो॒ऽसि॒ मधु॑जिह्व॒ इष॒मूर्ज॒माव॑द॒ त्वया॑ व॒यᳪ सं॑धा॒तᳪ सं॑धातं जेष्म व॒र्षवृ॑द्धमसि॒ प्रति॑ त्वा व॒र्षवृ॑द्धं वेत्तु॒ परा॑पूत॒ᳪ रक्ष॒: परा॑पूता॒ अरा॑त॒यो ऽप॑हत॒ᳪ रक्षो॑ वा॒युर्वो॒ विवि॑नक्तु दे॒वो व॑: सवि॒ता हिर॑ण्यपाणि॒: प्रति॑गृभ्णा॒त्वच्छि॑द्रेण पा॒णिना॑
dhṛṣṭi̍ra̱syapā̍'gne a̱gnimā̱māda̍ṃ jahi̱ niṣkra̱vyāda se̱dhā de̍va̱yaja̍ṃ vaha |
dhru̱vama̍si pṛthi̱vīṃ dṛha brahma̱vani̍ tvā kṣatra̱vani̍ sajāta̱vanyupa̍dadhāmi̱ bhātṛ̍vyasya va̱dhāya̍
||1.17||धृष्टि॑र॒स्यपा॑ऽग्ने अ॒ग्निमा॒मादं॑ जहि॒ निष्क्र॒व्याद॑ᳪ से॒धा दे॑व॒यजं॑ वह ।
ध्रु॒वम॑सि पृथि॒वीं दृ॑ᳪह ब्रह्म॒वनि॑ त्वा क्षत्र॒वनि॑ सजात॒वन्युप॑दधामि॒ भातृ॑व्यस्य व॒धाय॑
agne̱ brahma̍ gṛbhṇīṣva dha̱ruṇa̍masya̱ntari̍kṣaṃ dṛha brahma̱vani̍ tvā kṣatra̱vani̍ sajāta̱vanyupa̍dadhāmi̱ bhrātṛ̍vyasya ba̱dhāya̍ |
dha̱rtrama̍si̱ diva̍ṃ dṛha brahma̱vani̍ tvā kṣatra̱vani̍ sajāta̱vanyupa̍dadhāmi̱ bhrātṛ̍vyasya ba̱dhāya̍ |
viśvā̍bhya̱stvāśā̍bhya̱ upa̍dadhāmi̱ cita̍ sthordhva̱cito̱ bhṛgū̍ṇā̱maṅgi̍rasā̱ṃ tapa̍sā tapyadhvam
||1.18||अग्ने॒ ब्रह्म॑ गृभ्णीष्व ध॒रुण॑मस्य॒न्तरि॑क्षं दृᳪह ब्रह्म॒वनि॑ त्वा क्षत्र॒वनि॑ सजात॒वन्युप॑दधामि॒ भ्रातृ॑व्यस्य ब॒धाय॑ ।
ध॒र्त्रम॑सि॒ दिवं॑ दृᳪह ब्रह्म॒वनि॑ त्वा क्षत्र॒वनि॑ सजात॒वन्युप॑दधामि॒ भ्रातृ॑व्यस्य ब॒धाय॑ ।
विश्वा॑भ्य॒स्त्वाशा॑भ्य॒ उप॑दधामि॒ चित॑ स्थोर्ध्व॒चितो॒ भृगू॑णा॒मङ्गि॑रसां॒ तप॑सा तप्यध्वम्
śarmā̱syava̍dhūta rakṣo'va̍dhūtā̱ arā̍ta̱yo'di̍tyā̱stvaga̍si̱ prati̱ tvā'di̍tirvettu |
dhi̱ṣaṇā̍'si parva̱tī prati̱ tvā'di̍tyā̱stvagve̍ttu di̱vaska̍mbha̱nīra̍si dhi̱ṣaṇā̍'si pārvate̱yī prati̍ tvā parva̱tī ve̍ttu
||1.19||शर्मा॒स्यव॑धूत॒ᳪ रक्षोऽव॑धूता॒ अरा॑त॒योऽदि॑त्या॒स्त्वग॑सि॒ प्रति॒ त्वाऽदि॑तिर्वेत्तु ।
धि॒षणा॑ऽसि पर्व॒ती प्रति॒ त्वाऽदि॑त्या॒स्त्वग्वे॑त्तु दि॒वस्क॑म्भ॒नीर॑सि धि॒षणा॑ऽसि पार्वते॒यी प्रति॑ त्वा पर्व॒॒ती वे॑त्तु
dhā̱nya̱masi dhinu̱hi de̱vān prā̱ṇāya̍ tvo dā̱nāya̍ tvā vyā̱nāya̍ tvā | dī̱rghāmanu̱ prasi̍ti̱māyu̍ṣe dhāṃ de̱vo va̍: savi̱tā hira̍ṇyapāṇi̱: prati̍gṛbhṇā̱tvacchi̍dreṇa pā̱ṇinā̱ cakṣu̍ṣe tvā ma̱hīnā̱ṃ payo̍'si
||1.20||धा॒न्य॒मसि धिनु॒हि दे॒वान् प्रा॒णाय॑ त्वो दा॒नाय॑ त्वा व्या॒नाय॑ त्वा । दी॒र्घामनु॒ प्रसि॑ति॒मायु॑षे धां दे॒वो व॑: सवि॒ता हिर॑ण्यपाणि॒: प्रति॑गृभ्णा॒त्वच्छि॑द्रेण पा॒णिना॒ चक्षु॑षे त्वा म॒हीनां॒ पयो॑ऽसि
de̱vasya̍ tvā savi̱tuḥ pra̍sa̱ve'śvino̍rbā̱hubhyā̍ṃ pū̱ṣṇo hastā̍bhyām |
saṃ va̍pāmi̱ samāpa̱ oṣa̍dhībhi̱: samoṣa̍dhayo̱ rase̍na |
sa re̱vatī̱rjaga̍tībhiḥ pṛcyantā saṃ madhu̍matī̱rmadhu̍matībhiḥ pṛcyantām
||1.21||दे॒वस्य॑ त्वा सवि॒तुः प्र॑स॒वेऽश्विनो॑र्बा॒हुभ्यां॑ पू॒ष्णो हस्ता॑भ्याम् ।
सं व॑पामि॒ समाप॒ ओष॑धीभि॒: समोष॑धयो॒ रसे॑न ।
सᳪ रे॒वती॒र्जग॑तीभिः पृच्यन्ता॒ᳪ सं मधु॑मती॒र्मधु॑मतीभिः पृच्यन्ताम्
jana̍yatyai tvā̱ saṃyau̍mī̱dama̱gneri̱dama̱gnīṣoma̍yori̱ṣe tvā̍ gha̱rmo̱'si vi̱śvāyurastvā̍ savi̱tā śra̍payatu̱ varṣi̱ṣṭhe'dhi̱ nāke̍
||1.22||जन॑यत्यै त्वा॒ संयौ॑मी॒दम॒ग्नेरि॒दम॒ग्नीषोम॑योरि॒षे त्वा॑ घ॒र्मो॒ऽसि वि॒श्वायुरस्त्वा॑ सवि॒ता श्र॑पयतु॒ वर्षि॒ष्ठेऽधि॒ नाके॑
mā bhe̱rmā saṃvi̍kthā̱ ata̍merurya̱jño'ta̍meru̱ryaja̍mānasya pra̱jā bhū̍yāt tri̱tāya̍ tvā dvi̱tāya̍ tvaika̱tāya̍ tvā
||1.23||मा भे॒र्मा संवि॑क्था॒ अत॑मेरुर्य॒ज्ञोऽत॑मेरु॒र्यज॑मानस्य प्र॒जा भू॑यात् त्रि॒ताय॑ त्वा द्वि॒ताय॑ त्वैक॒ताय॑ त्वा
de̱vasya̍ tvā savi̱tuḥ pra̍sa̱ve'śvino̍rbā̱hubhyā̍ṃ pū̱ṣṇo hastā̍bhyām |
āda̍de'dhvara̱kṛta̍ṃ de̱vebhya̱ indra̍sya bā̱hura̍si̱ dakṣi̍ṇaḥ sa̱hasra̍bhṛṣṭiḥ śa̱tate̍jā vā̱yura̍si ti̱gmate̍jā dviṣa̱to va̱dhaḥ
||1.24||दे॒वस्य॑ त्वा सवि॒तुः प्र॑स॒वेऽश्विनो॑र्बा॒हुभ्यां॑ पू॒ष्णो हस्ता॑भ्याम् ।
आद॑देऽध्वर॒कृतं॑ दे॒वेभ्य॒ इन्द्र॑स्य बा॒हुर॑सि॒ दक्षि॑णः स॒हस्र॑भृष्टिः श॒तते॑जा वा॒युर॑सि ति॒ग्मते॑जा द्विष॒तो व॒धः
pṛthi̍vi devayaja̱nyoṣa̍dhyāste̱ mūla̱ṃ mā hisiṣaṃ vra̱jaṃ ga̍ccha go̱ṣṭhāna̱ṃ varṣa̍tu te̱ dyauba̍dhā̱na de̍va savitaḥ para̱masyā̍ṃ pṛthi̱vyā śa̱tena̱ pāśai̱ryo'smāndveṣṭi̱ yaṃ ca̍ va̱yaṃ dvi̱ṣmastamato̱ mā mau̍k
||1.25||पृथि॑वि देवयज॒न्योष॑ध्यास्ते॒ मूलं॒ मा हि॑ᳪसिषं व्र॒जं ग॑च्छ गो॒ष्ठानं॒ वर्ष॑तु ते॒ द्यौब॑धा॒न दे॑व सवितः पर॒मस्यां॑ पृथि॒व्याᳪ श॒तेन॒ पाशै॒र्योऽस्मान्द्वेष्टि॒ यं च॑ व॒यं द्वि॒ष्मस्तमतो॒ मा मौ॑क्
apā̱raru̍ṃ pṛthi̱vyai de̍va̱yaja̍nādvadhyāsaṃ vra̱jaṃ ga̍ccha go̱ṣṭhāna̱ṃ varṣa̍tu te̱ dyaurba̍dhā̱na de̍va savitaḥ para̱masyā̍ṃ pṛthi̱vyā śa̱tena̱ pāśai̱ryo'smāndveṣṭi̱ yaṃ ca̍ va̱yaṃ dvi̱ṣmastamato̱ mā mau̍k |
ara̍ro̱ diva̱ṃ mā pa̍pto dra̱psaste̱ dyāṃ mā ska̍n vra̱jaṃ ga̍ccha go̱ṣṭhāna̱ṃ varṣa̍tu te̱ dyaurba̍dhā̱na de̍va savitaḥ para̱masyā̍ṃ pṛthi̱vyā śa̱tena̱ pāśai̱ryo'smāndveṣṭi̱ yaṃ ca̍ va̱yaṃ dvi̱ṣmastamato̱ mā mau̍k
||1.26||अपा॒ररुं॑ पृथि॒व्यै दे॑व॒यज॑नाद्वध्यासं व्र॒जं ग॑च्छ गो॒ष्ठानं॒ वर्ष॑तु ते॒ द्यौर्ब॑धा॒न दे॑व सवितः पर॒मस्यां॑ पृथि॒व्या श॒तेन॒ पाशै॒र्योऽस्मान्द्वेष्टि॒ यं च॑ व॒यं द्वि॒ष्मस्तमतो॒ मा मौ॑क् ।
अर॑रो॒ दिवं॒ मा प॑प्तो द्र॒प्सस्ते॒ द्यां मा स्क॑न् व्र॒जं ग॑च्छ गो॒ष्ठानं॒ वर्ष॑तु ते॒ द्यौर्ब॑धा॒न दे॑व सवितः पर॒मस्यां॑ पृथि॒व्याᳪ श॒तेन॒ पाशै॒र्योऽस्मान्द्वेष्टि॒ यं च॑ व॒यं द्वि॒ष्मस्तमतो॒ मा मौ॑क्
gā̱ya̱treṇa̍ tvā̱ chanda̍sā̱ pari̍gṛhṇāmi̱ trai̍ṣṭubhena tvā̱ chanda̍sā̱ pari̍gṛhṇāmi̱ jāga̍tena tvā̱ chanda̍sā̱ pari̍gṛhṇāmi |
su̱kṣmā cāsi̍ śi̱vā cā̍si syo̱nā cāsi̍ su̱ṣadā̍ cā̱syūrja̍svatī̱ cāsi̱ paya̍svatī ca
||1.27||गा॒य॒त्रेण॑ त्वा॒ छन्द॑सा॒ परि॑गृह्णामि॒ त्रै॑ष्टुभेन त्वा॒ छन्द॑सा॒ परि॑गृह्णामि॒ जाग॑तेन त्वा॒ छन्द॑सा॒ परि॑गृह्णामि ।
सु॒क्ष्मा चासि॑ शि॒वा चा॑सि स्यो॒ना चासि॑ सु॒षदा॑ चा॒स्यूर्ज॑स्वती॒ चासि॒ पय॑स्वती च
pu̱rā krū̱rasya̍ vi̱sṛpo̍ virapśinnudā̱dāya̍ pṛthi̱vīṃ jī̱vadā̍num |
yāmairayam̐śca̱ndrama̍si sva̱dhābhi̱stāmu̱ dhīrā̍so anu̱diśya̍ yajante |
prokṣa̍ṇī̱rāsā̍daya dvi̍ṣa̱to ba̱dho̱'si
||1.28||पु॒रा क्रू॒रस्य॑ वि॒सृपो॑ विरप्शिन्नुदा॒दाय॑ पृथि॒वीं जी॒वदा॑नुम् ।
यामैरयँश्च॒न्द्रम॑सि स्व॒धाभि॒स्तामु॒ धीरा॑सो अनु॒दिश्य॑ यजन्ते ।
प्रोक्ष॑णी॒रासा॑दय द्वि॑ष॒तो ब॒धो॒ऽसि
pratyu̍ṣṭa rakṣa̱: pratyu̍ṣṭā̱ arā̍tayo niṣṭa̍pta rakṣo̱ niṣṭa̍ptā̱ arā̍tayaḥ |
ani̍śito'si sapatna̱kṣidvā̱jina̍ṃ tvā vāje̱dhyāyai̱ sammā̍rjmi |
pratyu̍ṣṭa rakṣa̱: pratyu̍ṣṭā̱ arā̍tayo̱ niṣṭa̍pta rakṣo̱ niṣṭa̍ptā̱ arā̍tayaḥ |
ani̍śitā'si sapatna̱kṣidvā̱jinī̍ṃ tvā vāje̱dhyāyai̱ sammā̍rjmi
||1.29||प्रत्यु॑ष्ट॒ᳪ रक्ष॒: प्रत्यु॑ष्टा॒ अरा॑तयो निष्ट॑प्त॒ᳪ रक्षो॒ निष्ट॑प्ता॒ अरा॑तयः ।
अनि॑शितोऽसि सपत्न॒क्षिद्वा॒जिनं॑ त्वा वाजे॒ध्यायै॒ सम्मा॑र्ज्मि ।
प्रत्यु॑ष्ट॒ᳪ रक्ष॒: प्रत्यु॑ष्टा॒ अरा॑तयो॒ निष्ट॑प्त॒ᳪ रक्षो॒ निष्ट॑प्ता॒ अरा॑तयः ।
अनि॑शिताऽसि सपत्न॒क्षिद्वा॒जिनीं॑ त्वा वाजे॒ध्यायै॒ सम्मा॑र्ज्मि
adi̍tyai̱ rāsnā̍si viṣṇo̍rve̱ṣpo̱'syū̱rje tvā 'da̍bdhena tvā̱ cakṣu̱ṣāva̍paśyāmi |
a̱gnerji̱hvāsi̍ su̱hūrde̱vebhyo̱ dhāmne̍ dhāmne me bhava̱ yaju̍ṣe yajuṣe
||1.30||अदि॑त्यै॒ रास्ना॑सि विष्णो॑र्वे॒ष्पो॒ऽस्यू॒र्जे त्वा ऽद॑ब्धेन त्वा॒ चक्षु॒षाव॑पश्यामि ।
अ॒ग्नेर्जि॒ह्वासि॑ सु॒हूर्दे॒वेभ्यो॒ धाम्ने॑ धाम्ने मे भव॒ यजु॑षे यजुषे
sa̱vi̱tustvā̍ prasa̱va utpu̍nā̱myacchi̍dreṇa pa̱vitre̍ṇa̱ sūrya̍sya ra̱śmibhi̍: |
sa̱vi̱turva̍: prasa̱va utpu̍nā̱myacchi̍dreṇa pa̱vitre̍ṇa̱ sūrya̍sya ra̱śmibhi̍: |
tejo̍'si śu̱krama̍sya̱mṛta̍masi dhāma̱ nāmā̍si pri̱yaṃ de̱vānā̱manā̍dhṛṣṭaṃ deva̱yaja̍namasi
||1.31||स॒वि॒तुस्त्वा॑ प्रस॒व उत्पु॑ना॒म्यच्छि॑द्रेण प॒वित्रे॑ण॒ सूर्य॑स्य र॒श्मिभि॑: ।
स॒वि॒तुर्व॑: प्रस॒व उत्पु॑ना॒म्यच्छि॑द्रेण प॒वित्रे॑ण॒ सूर्य॑स्य र॒श्मिभि॑: ।
तेजो॑ऽसि शु॒क्रम॑स्य॒मृत॑मसि धाम॒ नामा॑सि प्रि॒यं दे॒वाना॒मना॑धृष्टं देव॒यज॑नमसि