a̱po de̱vā madhu̍matīragṛbhṇa̱nnūrja̍svatī rāja̱svaścitā̍nāḥ |
yābhi̍rmi̱trāvaru̍ṇāva̱bhyaṣi̍ñca̱nyābhi̱rindra̱mana̍ya̱nnatyarā̍tīḥ
||10.1||याभि॑र्मि॒त्रावरु॑णाव॒भ्यषि॑ञ्च॒न्याभि॒रिन्द्र॒मन॑य॒न्नत्यरा॑तीः
vṛṣṇa̍ ū̱rmira̍si rāṣṭra̱dā rā̱ṣṭraṃ me̍ dehi̱ svāhā̱ vṛṣṇa̍ ū̱rmira̍si rāṣṭra̱dā rā̱ṣṭrama̱muṣmai̍ dehi
vṛ̍ṣase̱no̱'si rāṣṭra̱dā rā̱ṣṭraṃ me̍ dehi̱ svāhā̍ vṛṣase̱no̱'si rāṣṭra̱dā rā̱ṣṭrama̱muṣmai̍ dehi
||10.2||वृष्ण॑ ऊ॒र्मिर॑सि राष्ट्र॒दा रा॒ष्ट्रं मे॑ देहि॒ स्वाहा॒ वृष्ण॑ ऊ॒र्मिर॑सि राष्ट्र॒दा रा॒ष्ट्रम॒मुष्मै॑ देहि
वृ॑षसे॒नो॒ऽसि राष्ट्र॒दा रा॒ष्ट्रं मे॑ देहि॒ स्वाहा॑ वृषसे॒नो॒ऽसि राष्ट्र॒दा रा॒ष्ट्रम॒मुष्मै॑ देहि
a̱rtheta̍ stha rāṣṭra̱dā rā̱ṣṭraṃ me̍ datta̱ svāhā̱ 'rtheta̍ stha rāṣṭra̱dā rā̱ṣṭrama̱muṣmai̍ da̱ttauja̍svatī stha rāṣṭra̱dā rā̱ṣṭraṃ me̍ datta̱ svāhauja̍svatī stha rāṣṭra̱dā rā̱ṣṭrama̱muṣmai̍ da̱ttāpa̍: parivā̱hiṇī̍ stha rāṣṭra̱dā rā̱ṣṭraṃ me̍ datta̱ svāhā̍ 'pa̍: parivā̱hiṇī̍ stha rāṣṭra̱dā rā̱ṣṭrama̱muṣmai̍ dattā̱pāṃ pati̍rasi rāṣṭra̱dā rā̱ṣṭraṃ me̍ dehi̱ svāhā̱ 'pāṃ pati̍rasi rāṣṭra̱dā rā̱ṣṭrama̱muṣmai̍ dehya̱pāṃ garbho̍'si rāṣṭra̱dā rā̱ṣṭraṃ me̍ dehi̱ svāhā̱ 'pāṃ garbho̍ si rāṣṭra̱dā rā̱ṣṭrama̱muṣmai̍ dehi̱
||10.3||अ॒र्थेत॑ स्थ राष्ट्र॒दा रा॒ष्ट्रं मे॑ दत्त॒ स्वाहा॒ ऽर्थेत॑ स्थ राष्ट्र॒दा रा॒ष्ट्रम॒मुष्मै॑ द॒त्तौज॑स्वती स्थ राष्ट्र॒दा रा॒ष्ट्रं मे॑ दत्त॒ स्वाहौज॑स्वती स्थ राष्ट्र॒दा रा॒ष्ट्रम॒मुष्मै॑ द॒त्ताप॑: परिवा॒हिणी॑ स्थ राष्ट्र॒दा रा॒ष्ट्रं मे॑ दत्त॒ स्वाहा॑ ऽप॑: परिवा॒हिणी॑ स्थ राष्ट्र॒दा रा॒ष्ट्रम॒मुष्मै॑ दत्ता॒पां पति॑रसि राष्ट्र॒दा रा॒ष्ट्रं मे॑ देहि॒ स्वाहा॒ ऽपां पति॑रसि राष्ट्र॒दा रा॒ष्ट्रम॒मुष्मै॑ देह्य॒पां गर्भो॑ऽसि राष्ट्र॒दा रा॒ष्ट्रं मे॑ देहि॒ स्वाहा॒ ऽपां गर्भो॑ सि राष्ट्र॒दा रा॒ष्ट्रम॒मुष्मै॑ देहि॒
sūrya̍tvacasa stha rāṣṭra̱dā rā̱ṣṭraṃ me̍ datta̱ svāhā̱ sūrya̍tvacasa stha rāṣṭra̱dā rā̱ṣṭrama̱muṣmai̍ datta sūrya̍varcasa stha rāṣṭra̱dā rā̱ṣṭraṃ me̍ datta̱ svāhā̱ sūrya̍varcasa stha rāṣṭra̱dā rā̱ṣṭrama̱muṣmai̍ datta̱ māndā̍ stha rāṣṭra̱dā rā̱ṣṭraṃ me̍ datta̱ svāhā̱ māndā̍ stha rāṣṭra̱dā rā̱ṣṭrama̱muṣmai̍ datta vraja̱kṣita̍ stha rāṣṭra̱dā rā̱ṣṭraṃ me̍ datta̱ svāhā̍ vraja̱kṣita̍ stha rāṣṭra̱dā rā̱ṣṭrama̱muṣmai̍ datta̱ vāśā̍ stha rāṣṭra̱dā rā̱ṣṭraṃ me̍ datta̱ svāhā̱ vāśā̍ stha rāṣṭra̱dā rā̱ṣṭrama̱muṣmai̍ datta̱ śavi̍ṣṭhā stha rāṣṭra̱dā rā̱ṣṭraṃ me̍ datta̱ svāhā̱ śavi̍ṣṭhā stha rāṣṭra̱dā rā̱ṣṭrama̱muṣmai̍ datta̱ śakva̍rī stha rāṣṭra̱dā rā̱ṣṭraṃ me̍ datta̱ svāhā̱ śakva̍rī stha rāṣṭra̱dā rā̱ṣṭrama̱muṣmai̍ datta jana̱bhṛta̍ stha rāṣṭra̱dā rā̱ṣṭraṃ me̍ datta̱ svāhā̍ jana̱bhṛta̍ stha rāṣṭra̱dā rā̱ṣṭrama̱muṣmai̍ datta viśva̱bhṛta̍ stha rāṣṭra̱dā rā̱ṣṭraṃ me̍ datta̱ svāhā̍ viśva̱bhṛta̍ stha rāṣṭra̱dā rā̱ṣṭrama̱muṣmai̍ da̱ttāpa̍: sva̱rāja̍ stha rāṣṭra̱dā rā̱ṣṭrama̱muṣmai̍ datta | madhu̍matī̱rmadhu̍matībhiḥ pṛcyantā̱ṃ mahi̍ kṣa̱traṃ kṣa̱triyā̍ya vanvā̱nāṃnā̍dhṛṣṭāḥ sīdata sa̱hauja̍so̱ mahi̍ kṣa̱traṃ kṣa̱triyā̍ya̱ dadha̍tīḥ
||10.4||सूर्य॑त्वचस स्थ राष्ट्र॒दा रा॒ष्ट्रं मे॑ दत्त॒ स्वाहा॒ सूर्य॑त्वचस स्थ राष्ट्र॒दा रा॒ष्ट्रम॒मुष्मै॑ दत्त सूर्य॑वर्चस स्थ राष्ट्र॒दा रा॒ष्ट्रं मे॑ दत्त॒ स्वाहा॒ सूर्य॑वर्चस स्थ राष्ट्र॒दा रा॒ष्ट्रम॒मुष्मै॑ दत्त॒ मान्दा॑ स्थ राष्ट्र॒दा रा॒ष्ट्रं मे॑ दत्त॒ स्वाहा॒ मान्दा॑ स्थ राष्ट्र॒दा रा॒ष्ट्रम॒मुष्मै॑ दत्त व्रज॒क्षित॑ स्थ राष्ट्र॒दा रा॒ष्ट्रं मे॑ दत्त॒ स्वाहा॑ व्रज॒क्षित॑ स्थ राष्ट्र॒दा रा॒ष्ट्रम॒मुष्मै॑ दत्त॒ वाशा॑ स्थ राष्ट्र॒दा रा॒ष्ट्रं मे॑ दत्त॒ स्वाहा॒ वाशा॑ स्थ राष्ट्र॒दा रा॒ष्ट्रम॒मुष्मै॑ दत्त॒ शवि॑ष्ठा स्थ राष्ट्र॒दा रा॒ष्ट्रं मे॑ दत्त॒ स्वाहा॒ शवि॑ष्ठा स्थ राष्ट्र॒दा रा॒ष्ट्रम॒मुष्मै॑ दत्त॒ शक्व॑री स्थ राष्ट्र॒दा रा॒ष्ट्रं मे॑ दत्त॒ स्वाहा॒ शक्व॑री स्थ राष्ट्र॒दा रा॒ष्ट्रम॒मुष्मै॑ दत्त जन॒भृत॑ स्थ राष्ट्र॒दा रा॒ष्ट्रं मे॑ दत्त॒ स्वाहा॑ जन॒भृत॑ स्थ राष्ट्र॒दा रा॒ष्ट्रम॒मुष्मै॑ दत्त विश्व॒भृत॑ स्थ राष्ट्र॒दा रा॒ष्ट्रं मे॑ दत्त॒ स्वाहा॑ विश्व॒भृत॑ स्थ राष्ट्र॒दा रा॒ष्ट्रम॒मुष्मै॑ द॒त्ताप॑: स्व॒राज॑ स्थ राष्ट्र॒दा रा॒ष्ट्रम॒मुष्मै॑ दत्त । मधु॑मती॒र्मधु॑मतीभिः पृच्यन्तां॒ महि॑ क्ष॒त्रं क्ष॒त्रिया॑य वन्वा॒नांना॑धृष्टाः सीदत स॒हौज॑सो॒ महि॑ क्ष॒त्रं क्ष॒त्रिया॑य॒ दध॑तीः
soma̍sya̱ tviṣi̍rasi̱ tave̍va me̱ tviṣi̍rbhūyāt | a̱gnaye̱ svāhā̱ somā̍ya̱ svāhā̍ savi̱tre svāhā̱ sara̍svatyai̱ svāhā̍
pū̱ṣṇe svāhā̱ bṛha̱spata̍ye̱ svāhendrā̍ya̱ svāhā̱ ghoṣā̍ya̱ svāhā̱ ślokā̍ya̱ svāhā
'śā̍ya̱ svāhā̱ bhagā̍ya̱ svāhā̍ 'rya̱mṇe svāhā̍
||10.5||सोम॑स्य॒ त्विषि॑रसि॒ तवे॑व मे॒ त्विषि॑र्भूयात् । अ॒ग्नये॒ स्वाहा॒ सोमा॑य॒ स्वाहा॑ सवि॒त्रे स्वाहा॒ सर॑स्वत्यै॒ स्वाहा॑
पू॒ष्णे स्वाहा॒ बृह॒स्पत॑ये॒ स्वाहेन्द्रा॑य॒ स्वाहा॒ घोषा॑य॒ स्वाहा॒ श्लोका॑य॒ स्वाहा
ऽᳪशा॑य॒ स्वाहा॒ भगा॑य॒ स्वाहा॑ ऽर्य॒म्णे स्वाहा॑
pa̱vitre̍ stho vaiṣṇa̱vyau̱ savi̱turva̍: prasa̱va utpu̍nā̱myacchi̍dreṇa pa̱vitre̍ṇa̱ sūrya̍sya ra̱śmibhi̍: |
ani̍bhṛṣṭamasi vā̱co bandhu̍stapo̱jāḥ soma̍sya dā̱trama̍si̱ svāhā̍ rāja̱sva̱:
||10.6||प॒वित्रे॑ स्थो वैष्ण॒व्यौ॒ सवि॒तुर्व॑: प्रस॒व उत्पु॑ना॒म्यच्छि॑द्रेण प॒वित्रे॑ण॒ सूर्य॑स्य र॒श्मिभि॑: ।
अनि॑भृष्टमसि वा॒चो बन्धु॑स्तपो॒जाः सोम॑स्य दा॒त्रम॑सि॒ स्वाहा॑ राज॒स्व॒:
sa̱dha̱mādo̍ dyu̱mninī̱rāpa̍ e̱tā anā̍dhṛṣṭā apa̱syo vasā̍nāḥ |
pa̱styā̱su cakre̱ varu̍ṇaḥ sa̱dhastha̍ma̱pā śiśu̍rmā̱tṛta̍māsva̱ntaḥ
||10.7||स॒ध॒मादो॑ द्यु॒म्निनी॒राप॑ ए॒ता अना॑धृष्टा अप॒स्यो वसा॑नाः ।
प॒स्त्या॒सु चक्रे॒ वरु॑णः स॒धस्थ॑म॒पाᳪ शिशु॑र्मा॒तृत॑मास्व॒न्तः
kṣa̱trasyolba̍masi kṣa̱trasya̍ ja̱rāyva̍si kṣa̱trasya̱ yoni̍rasi kṣa̱trasya̱ nābhi̍ra̱sīndra̍sya̱ vārtra̍ghnamasi mi̱trasyā̍si̱ varu̍ṇasyāsi̱
tvayā̱'yaṃ vṛ̱traṃ ba̍dhet | dṛ̱bā'si̍ ru̱jā'si̍ kṣu̱mā'si̍ | pā̱taina̱ṃ prāñca̍ṃ pā̱tainaṃ pra̱tyañca̍ṃ pā̱taina̍ṃ ti̱ryañca̍ṃ di̱gbhyaḥ pā̍ta
||10.8||क्ष॒त्रस्योल्ब॑मसि क्ष॒त्रस्य॑ ज॒राय्व॑सि क्ष॒त्रस्य॒ योनि॑रसि क्ष॒त्रस्य॒ नाभि॑र॒सीन्द्र॑स्य॒ वार्त्र॑घ्नमसि मि॒त्रस्या॑सि॒ वरु॑णस्यासि॒
त्वया॒ऽयं वृ॒त्रं ब॑धेत् । दृ॒बाऽसि॑ रु॒जाऽसि॑ क्षु॒माऽसि॑ । पा॒तैनं॒ प्राञ्चं॑ पा॒तैनं प्र॒त्यञ्चं॑ पा॒तैनं॑ ति॒र्यञ्चं॑ दि॒ग्भ्यः पा॑त
ā̱virma̍yā̱ āvi̍tto a̱gnirgṛ̱hapa̍tirāvi̍tta̱ indro̍ vṛ̱ddhaśra̍vā̱ āvi̍ttau mi̱trāvaru̍ṇau dhṛ̱tavra̍tā̱vāvi̍ttaḥ pū̱ṣā vi̱śvave̍dā̱
āvi̍tte̱ dyāvā̍pṛthi̱vī vi̱śvaśa̍mbhuvā̱vāvi̱ttādi̍tiru̱ruśa̍rmā
||10.9||आ॒विर्म॑या॒ आवि॑त्तो अ॒ग्निर्गृ॒हप॑तिरावि॑त्त॒ इन्द्रो॑ वृ॒द्धश्र॑वा॒ आवि॑त्तौ मि॒त्रावरु॑णौ धृ॒तव्र॑ता॒वावि॑त्तः पू॒षा वि॒श्ववे॑दा॒
आवि॑त्ते॒ द्यावा॑पृथि॒वी वि॒श्वश॑म्भुवा॒वावि॒त्तादि॑तिरु॒रुश॑र्मा
ave̍ṣṭā danda̱śūkā̍: prācī̱mā ro̍ha gāya̱trī tvā̍'vatu rathanta̱ra sāma̍ tri̱vṛtstomo̍ vasa̱nta ṛ̱turbrahma̱ dravi̍ṇam
||10.10||अवे॑ष्टा दन्द॒शूका॑: प्राची॒मा रो॑ह गाय॒त्री त्वा॑ऽवतु रथन्त॒रᳪ साम॑ त्रि॒वृत्स्तोमो॑ वस॒न्त ऋ॒तुर्ब्रह्म॒ द्रवि॑णम्
dakṣi̍ṇā̱mā ro̍ha tri̱ṣṭup tvā̍'vatu bṛ̱hatsāma̍ pañcada̱śa stomo̍ grī̱ṣma ṛ̱tuḥ kṣa̱traṃ dravi̍ṇam
||10.11||दक्षि॑णा॒मा रो॑ह त्रि॒ष्टुप् त्वा॑ऽवतु बृ॒हत्साम॑ पञ्चद॒श स्तोमो॑ ग्री॒ष्म ऋ॒तुः क्ष॒त्रं द्रवि॑णम्
pra̱tīcī̱mā ro̍ha̱ jaga̍tī tvā'vatu vairū̱pa sāma̍ saptada̱śa stomo̍ va̱rṣā ṛ̱turviḍ dravi̍ṇam
||10.12||प्र॒तीची॒मा रो॑ह॒ जग॑ती त्वाऽवतु वैरू॒पᳪ साम॑ सप्तद॒श स्तोमो॑ व॒र्षा ऋ॒तुर्विड् द्रवि॑णम्
udī̍cī̱mā ro̍hānu̱ṣṭup tvā̍'vatu vairā̱ja sāmai̍kaviśa stoma̍: śa̱radṛ̱tuḥ phala̱ṃ dravi̍ṇam
||10.13||उदी॑ची॒मा रो॑हानु॒ष्टुप् त्वा॑ऽवतु वैरा॒जᳪ सामै॑कवि॒ᳪश स्तोम॑: श॒रदृ॒तुः फलं॒ द्रवि॑णम्
ū̱rdhvāmā ro̍ha pa̱ṅktistvā̍'vatu śākvararaiva̱te sāma̍nī triṇavatrayastriśau̱ stomau̍ hemantaśiśi̱rāvṛ̱tū varco̱ dravi̍ṇa̱ṃ
pratya̍sta̱ṃ namu̍ce̱: śira̍:
||10.14||ऊ॒र्ध्वामा रो॑ह प॒ङ्क्तिस्त्वा॑ऽवतु शाक्वररैव॒ते साम॑नी त्रिणवत्रयस्त्रि॒ᳪशौ॒ स्तोमौ॑ हेमन्तशिशि॒रावृ॒तू वर्चो॒ द्रवि॑णं॒
प्रत्य॑स्तं॒ नमु॑चे॒: शिर॑:
soma̍sya̱ tviṣi̍rasi̱ tave̍va me̱ tviṣi̍rbhūyāt | mṛ̱tyoḥ pā̱hyojo̍'si̱ saho̍'sya̱mṛta̍masi
||10.15||सोम॑स्य॒ त्विषि॑रसि॒ तवे॑व मे॒ त्विषि॑र्भूयात् । मृ॒त्योः पा॒ह्योजो॑ऽसि॒ सहो॑ऽस्य॒मृत॑मसि
hira̍ṇyarūpā u̱ṣaso̍ viro̱ka u̱bhāvi̍ndrā̱ udi̍tha̱: sūrya̍śca |
ā ro̍hataṃ varuṇa mitra̱ gartta̱ṃ tata̍ścakṣāthā̱madi̍ti̱ṃ diti̍ṃ ca mi̱tro̱'si̱ varu̍ṇo'si
||10.16||हिर॑ण्यरूपा उ॒षसो॑ विरो॒क उ॒भावि॑न्द्रा॒ उदि॑थ॒: सूर्य॑श्च ।
आ रो॑हतं वरुण मित्र॒ गर्त्तं॒ तत॑श्चक्षाथा॒मदि॑तिं॒ दितिं॑ च मि॒त्रो॒ऽसि॒ वरु॑णोऽसि
soma̍sya tvā dyu̱mnenā̱bhi ṣi̍ñcāmya̱gnerbhrāja̍sā̱ sūrya̍sya̱ varca̱sendra̍syendri̱yeṇa̍ |
kṣa̱trāṇā̍ṃ kṣa̱trapa̍tire̱dhyati̍ di̱dyūn pā̍hi
||10.17||सोम॑स्य त्वा द्यु॒म्नेना॒भि षि॑ञ्चाम्य॒ग्नेर्भ्राज॑सा॒ सूर्य॑स्य॒ वर्च॒सेन्द्र॑स्येन्द्रि॒येण॑ ।
क्ष॒त्राणां॑ क्ष॒त्रप॑तिरे॒ध्यति॑ दि॒द्यून् पा॑हि
i̱maṃ de̍vā asapa̱tna su̍vadhvaṃ maha̱te kṣa̱trāya̍ maha̱te jyai̍ṣṭhyāya maha̱te jāna̍rājyā̱yendra̍syendri̱yāya̍ |
i̱mama̱muṣya̍ pu̱trama̱muṣyai̍ pu̱tramasyai vi̱śa e̱ṣa vo̍'mī̱ rājā̱ somo̱'smāka̍ṃ brāhma̱ṇānārājā̍
||10.18||इ॒मं दे॑वा असप॒त्नᳪ सु॑वध्वं मह॒ते क्ष॒त्राय॑ मह॒ते ज्यै॑ष्ठ्याय मह॒ते जान॑राज्या॒येन्द्र॑स्येन्द्रि॒याय॑ ।
इ॒मम॒मुष्य॑ पु॒त्रम॒मुष्यै॑ पु॒त्रमस्यै वि॒श ए॒ष वो॑ऽमी॒ राजा॒ सोमो॒ऽस्माकं॑ ब्राह्म॒णाना॒ᳪराजा॑
pra parva̍tasya vṛṣa̱bhasya̍ pṛ̱ṣṭhānnāva̍ścaranti sva̱sica̍ iyā̱nāḥ |
tā ā'va̍vṛtrannadha̱rāguda̍ktā̱ ahi̍ṃ bu̱dhnya̱manu̱ rīya̍māṇāḥ |
viṣṇo̍rvi̱krama̍ṇamasi̱ viṣṇo̱rvikrā̍ntamasi̱ viṣṇo̍: krā̱ntama̍si
||10.19||प्र पर्व॑तस्य वृष॒भस्य॑ पृ॒ष्ठान्नाव॑श्चरन्ति स्व॒सिच॑ इया॒नाः ।
ता आऽव॑वृत्रन्नध॒रागुद॑क्ता॒ अहिं॑ बु॒ध्न्य॒मनु॒ रीय॑माणाः ।
विष्णो॑र्वि॒क्रम॑णमसि॒ विष्णो॒र्विक्रा॑न्तमसि॒ विष्णो॑: क्रा॒न्तम॑सि
prajā̍pate̱ na tvade̱tānya̱nyo viśvā̍ rū̱pāṇi̱ pari̱ tā ba̍bhūva | yatkā̍māste juhu̱mastanno̍ astva̱yama̱muṣya̍ pi̱tāsāva̱sya pi̱tā va̱ya syā̍ma̱ pata̍yo rayī̱ṇā svāhā̍ |
rudra̱ yatte̱ krivi̱ para̱ṃ nāma̱ tasmi̍nhu̱tama̍syame̱ṣṭama̍si̱ svāhā̍
||10.20||प्रजा॑पते॒ न त्वदे॒तान्य॒न्यो विश्वा॑ रू॒पाणि॒ परि॒ ता ब॑भूव । यत्का॑मास्ते जुहु॒मस्तन्नो॑ अस्त्व॒यम॒मुष्य॑ पि॒तासाव॒स्य पि॒ता व॒यᳪ स्या॑म॒ पत॑यो रयी॒णाᳪ स्वाहा॑ ।
रुद्र॒ यत्ते॒ क्रिवि॒ परं॒ नाम॒ तस्मि॑न्हु॒तम॑स्यमे॒ष्टम॑सि॒ स्वाहा॑
indra̍sya̱ vajro̍'si mi̱trāvaru̍ṇayostvā praśā̱stroḥ pra̱śiṣā̍ yunajmi |
avya̍thāyai tvā sva̱dhāyai̱ tvā'ri̍ṣṭo̱ arju̍no ma̱rutā̍ṃ prasa̱vena̍ ja̱yāpā̍ma̱ mana̍sā̱ sami̍ndri̱yeṇa̍
||10.21||इन्द्र॑स्य॒ वज्रो॑ऽसि मि॒त्रावरु॑णयोस्त्वा प्रशा॒स्त्रोः प्र॒शिषा॑ युनज्मि ।
अव्य॑थायै त्वा स्व॒धायै॒ त्वाऽरि॑ष्टो॒ अर्जु॑नो म॒रुतां॑ प्रस॒वेन॑ ज॒यापा॑म॒ मन॑सा॒ समि॑न्द्रि॒येण॑
mā ta̍ indra te va̱yaṃ tu̍rāṣā̱ḍayu̍ktāso abra̱hmatā̱ vida̍sāma |
tiṣṭhā̱ ratha̱madhi̱ yaṃ va̍jraha̱stā ra̱śmīn de̍va yuvase̱ svaśvā̍n
||10.22||मा त॑ इन्द्र ते व॒यं तु॑राषा॒डयु॑क्तासो अब्र॒ह्मता॒ विद॑साम ।
तिष्ठा॒ रथ॒मधि॒ यं व॑ज्रह॒स्ता र॒श्मीन् दे॑व युवसे॒ स्वश्वा॑न्
a̱gnaye̍ gṛ̱hapa̍taye̱ svāhā̱ somā̍ya̱ vana̱spata̍ye̱ svāhā̍
ma̱rutā̱moja̍se̱ svāhendra̍syendri̱yāya̱ svāhā̍ | pṛthi̍vi māta̱rmā mā̍ hisī̱rmo a̱haṃ tvām
||10.23||अ॒ग्नये॑ गृ॒हप॑तये॒ स्वाहा॒ सोमा॑य॒ वन॒स्पत॑ये॒ स्वाहा॑
म॒रुता॒मोज॑से॒ स्वाहेन्द्र॑स्येन्द्रि॒याय॒ स्वाहा॑ । पृथि॑वि मात॒र्मा मा॑ हिᳪसी॒र्मो अ॒हं त्वाम्
hasaḥ śu̍ci̱ṣadvasu̍rantarikṣa̱saddhotā̍ vedi̱ṣadati̍thirduroṇa̱sat |
nṛ̱ṣadva̍ra̱sadṛ̍ta̱sadvyo̍ma̱sada̱bjā go̱jā ṛ̍ta̱jā a̍dri̱jā ṛ̱taṃ bṛ̱hat
||10.24||ह॒ᳪसः शु॑चि॒षद्वसु॑रन्तरिक्ष॒सद्धोता॑ वेदि॒षदति॑थिर्दुरोण॒सत् ।
नृ॒षद्व॑र॒सदृ॑त॒सद्व्यो॑म॒सद॒ब्जा गो॒जा ऋ॑त॒जा अ॑द्रि॒जा ऋ॒तं बृ॒हत्
iya̍da̱syāyu̍ra̱syāyu̱rmayi̍ dhehi̱ yuṅṅa̍si̱ varco̍'si̱ varco̱ mayi̍ dhe̱hyūrga̱syūrja̱ṃ mayi̍ dhehi ||
indra̍sya vāṃ vīrya̱kṛto̍ bā̱hū a̍bhyu̱pāva̍harāmi
||10.25||इय॑द॒स्यायु॑र॒स्यायु॒र्मयि॑ धेहि॒ युङ्ङ॑सि॒ वर्चो॑ऽसि॒ वर्चो॒ मयि॑ धे॒ह्यूर्ग॒स्यूर्जं॒ मयि॑ धेहि ।।
इन्द्र॑स्य वां वीर्य॒कृतो॑ बा॒हू अ॑भ्यु॒पाव॑हरामि
syo̱nā'si̍ su̱ṣadā̍'si kṣa̱trasya̱ yoni̍rasi |
syo̱nāmā sī̍da su̱ṣadā̱mā sī̍da kṣa̱trasya̱ yoni̱mā sī̍da
||10.26||स्यो॒नाऽसि॑ सु॒षदा॑ऽसि क्ष॒त्रस्य॒ योनि॑रसि ।
स्यो॒नामा सी॑द सु॒षदा॒मा सी॑द क्ष॒त्रस्य॒ योनि॒मा सी॑द
ni ṣa̍sāda ghṛ̱tavra̍to̱ varu̍ṇaḥ pa̱styāsvā | sāmrā̍jyāya su̱kratu̍:
||10.27||नि ष॑साद घृ॒तव्र॑तो॒ वरु॑णः प॒स्त्यास्वा । साम्रा॑ज्याय सु॒क्रतु॑:
a̱bhi̱bhūra̍sye̱tāste̱ pañca̱ diśa̍: kalpantā̱ṃ brahma̱m̐stvaṃ bra̱hmā'si̍ savi̱tā'si̍ sa̱tyapra̍savo̱ varu̍ṇo'si sa̱tyaujā̱ indro̍'si̱ viśau̍jā ru̱dro̱'si su̱śeva̍: |
bahu̍kāra̱ śreya̍skara̱ bhūya̍ska̱rendra̍sya̱ vajro̍'si̱ tena̍ me radhya
||10.28||अ॒भि॒भूर॑स्ये॒तास्ते॒ पञ्च॒ दिश॑: कल्पन्तां॒ ब्रह्मँ॒स्त्वं ब्र॒ह्माऽसि॑ सवि॒ताऽसि॑ स॒त्यप्र॑सवो॒ वरु॑णोऽसि स॒त्यौजा॒ इन्द्रो॑ऽसि॒ विशौ॑जा रु॒द्रो॒ऽसि सु॒शेव॑: ।
बहु॑कार॒ श्रेय॑स्कर॒ भूय॑स्क॒रेन्द्र॑स्य॒ वज्रो॑ऽसि॒ तेन॑ मे रध्य
a̱gniḥ pṛ̱thurdharma̍ṇa̱spati̍rjuṣā̱ṇo a̱gniḥ pṛ̱thurdharma̍ṇa̱spati̱rājya̍sya vetu̱ svāhā̍
svāhā̍kṛtā̱: sūrya̍sya ra̱śmibhi̍ryatadhva sajā̱tānā̍ṃ madhya̱meṣṭhyā̍ya
||10.29||अ॒ग्निः पृ॒थुर्धर्म॑ण॒स्पति॑र्जुषा॒णो अ॒ग्निः पृ॒थुर्धर्म॑ण॒स्पति॒राज्य॑स्य वेतु॒ स्वाहा॑
स्वाहा॑कृता॒: सूर्य॑स्य र॒श्मिभि॑र्यतध्वᳪ सजा॒तानां॑ मध्य॒मेष्ठ्या॑य
sa̱vi̱trā pra̍savi̱trā sara̍svatyā vā̱cā tvaṣṭrā̍ rū̱paiḥ pū̱ṣṇā pa̱śubhi̱rindre̍ṇā̱sme bṛha̱spati̍nā̱ brahma̍ṇā̱ varu̍ṇe̱nauja̍sā̱'gninā̱ teja̍sā̱ some̍na̱ rājñā̱ viṣṇu̍nā daśa̱myā de̱vata̍yā̱ prasū̍ta̱: pra sa̍rpāmi
||10.30||स॒वि॒त्रा प्र॑सवि॒त्रा सर॑स्वत्या वा॒चा त्वष्ट्रा॑ रू॒पैः पू॒ष्णा प॒शुभि॒रिन्द्रे॑णा॒स्मे बृह॒स्पति॑ना॒ ब्रह्म॑णा॒ वरु॑णे॒नौज॑सा॒ऽग्निना॒ तेज॑सा॒ सोमे॑न॒ राज्ञा॒ विष्णु॑ना दश॒म्या दे॒वत॑या॒ प्रसू॑त॒: प्र स॑र्पामि
a̱śvibhyā̍ṃ pacyasva̱ sara̍svatyai pacya̱svendrā̍ya su̱trāmṇe̍ pacyasva |
vā̱yuḥ pū̱taḥ pa̱vitre̍ṇa pra̱tyaṅksomo̱ ati̍srutaḥ | indra̍sya̱ yujya̱: sakhā̍
||10.31||अ॒श्विभ्यां॑ पच्यस्व॒ सर॑स्वत्यै पच्य॒स्वेन्द्रा॑य सु॒त्राम्णे॑ पच्यस्व ।
वा॒युः पू॒तः प॒वित्रे॑ण प्र॒त्यङ्क्सोमो॒ अति॑स्रुतः । इन्द्र॑स्य॒ युज्य॒: सखा॑
ku̱vida̱ṅga yava̍manto yava̍ṃ ci̱dyathā̱ dāntya̍nupū̱rvaṃ vi̱yūya̍ |
i̱hehai̍ṣāṃ kṛṇuhi̱ bhoja̍nāni̱ ye ba̱rhiṣo̱ nama̍ ukti̱ṃ yaja̍nti |
u̱pa̱yā̱magṛ̍hīto'sya̱śvibhyā̍ṃ tvā̱ sara̍svatyai̱ tvendrā̍ya tvā su̱trāmṇe̍
||10.32||कु॒विद॒ङ्ग यव॑मन्तो यवं॑ चि॒द्यथा॒ दान्त्य॑नुपू॒र्वं वि॒यूय॑ ।
इ॒हेहै॑षां कृणुहि॒ भोज॑नानि॒ ये ब॒र्हिषो॒ नम॑ उक्तिं॒ यज॑न्ति ।
उ॒प॒या॒मगृ॑हीतोऽस्य॒श्विभ्यां॑ त्वा॒ सर॑स्वत्यै॒ त्वेन्द्रा॑य त्वा सु॒त्राम्णे॑
yu̱va su̱rāma̍maśvinā̱ namu̍cāvāsu̱re sacā̍ | vi̱pi̱pā̱nā śu̍bhaspatī̱ indra̱ṃ karma̍svāvatam
||10.33||यु॒वᳪ सु॒राम॑मश्विना॒ नमु॑चावासु॒रे सचा॑ । वि॒पि॒पा॒ना शु॑भस्पती॒ इन्द्रं॒ कर्म॑स्वावतम्
pu̱trami̍va pi̱tarā̍va̱śvino̱bhendrā̱vathu̱: kāvyai̍rdasanā̍bhiḥ |
yatsu̱rāma̱ṃ vyapi̍ba̱: śacī̍bhi̱: sara̍svatī tvā maghavannabhiṣṇak
||10.34||पु॒त्रमि॑व पि॒तरा॑व॒श्विनो॒भेन्द्रा॒वथु॒: काव्यै॑र्द॒ᳪसना॑भिः ।
यत्सु॒रामं॒ व्यपि॑ब॒: शची॑भि॒: सर॑स्वती त्वा मघवन्नभिष्णक्