श्रद्धा सूक्त ५ श्रद्धा कामायनी।श्रधा । अनुष्टुप्।
श्र॒द्धया॒ग्निः समि॑ध्यते श्र॒द्धया॑ हूयते ह॒विः । श्र॒द्धां भग॑स्य मू॒र्धनि॒ वच॒सा वे॑दयामसि ॥10.151.1॥
śra̱ddhayā̱gniḥ sami̍dhyate śra̱ddhayā̍ hūyate ha̱viḥ | śra̱ddhāṃ bhaga̍sya mū̱rdhani̱ vaca̱sā ve̍dayāmasi
प्रि॒यं श्र॑द्धे॒ दद॑तः प्रि॒यं श्र॑द्धे॒ दिदा॑सतः । प्रि॒यं भो॒जेषु॒ यज्व॑स्वि॒दं म॑ उदि॒तं कृ॑धि ॥10.151.2॥
pri̱yaṃ śra̍ddhe̱ dada̍taḥ pri̱yaṃ śra̍ddhe̱ didā̍sataḥ | pri̱yaṃ bho̱jeṣu̱ yajva̍svi̱daṃ ma̍ udi̱taṃ kṛ̍dhi
यथा॑ दे॒वा असु॑रेषु श्र॒द्धामु॒ग्रेषु॑ चक्रि॒रे । ए॒वं भो॒जेषु॒ यज्व॑स्व॒स्माक॑मुदि॒तं कृ॑धि ॥10.151.3॥
yathā̍ de̱vā asu̍reṣu śra̱ddhāmu̱greṣu̍ cakri̱re | e̱vaṃ bho̱jeṣu̱ yajva̍sva̱smāka̍mudi̱taṃ kṛ̍dhi
श्र॒द्धां दे॒वा यज॑माना वा॒युगो॑पा॒ उपा॑सते । श्र॒द्धां हृ॑द॒य्य१याकू॑त्या श्र॒द्धया॑ विन्दते॒ वसु॑ ॥10.151.4॥
śra̱ddhāṃ de̱vā yaja̍mānā vā̱yugo̍pā̱ upā̍sate | śra̱ddhāṃ hṛ̍da̱yya1yākū̍tyā śra̱ddhayā̍ vindate̱ vasu̍
श्र॒द्धां प्रा॒तर्ह॑वामहे श्र॒द्धां म॒ध्यंदि॑नं॒ परि॑ । श्र॒द्धां सूर्य॑स्य नि॒म्रुचि॒ श्रद्धे॒ श्रद्धा॑पये॒ह न॑: ॥10.151.5॥
śra̱ddhāṃ prā̱tarha̍vāmahe śra̱ddhāṃ ma̱dhyaṃdi̍na̱ṃ pari̍ | śra̱ddhāṃ sūrya̍sya ni̱mruci̱ śraddhe̱ śraddhā̍paye̱ha na̍: