अध्ययनम्
- अनुक्रमणिका
- मूलम्
१० बार्हस्पत्यो भरद्वाज: । इन्द्र: ।त्रिष्टुप् ।
सु॒त इत् त्वं निमि॑श्ल इन्द्र॒ सोमे॒ स्तोमे॒ ब्रह्म॑णि श॒स्यमा॑न उ॒क्थे ।
यद् वा॑ यु॒क्ताभ्यां॑ मघव॒न् हरि॑भ्यां॒ बिभ्र॒द् वज्रं॑ बा॒ह्वोरि॑न्द्र॒ यासि॑
॥१॥su̱ta it tvaṃ nimi̍śla indra̱ some̱ stome̱ brahma̍ṇi śa̱syamā̍na u̱kthe |
yad vā̍ yu̱ktābhyā̍ṃ maghava̱n hari̍bhyā̱ṃ bibhra̱d vajra̍ṃ bā̱hvori̍ndra̱ yāsi̍
यद् वा॑ दि॒वि पार्ये॒ सुष्वि॑मिन्द्र वृत्र॒हत्येऽव॑सि॒ शूर॑सातौ ।
यद् वा॑ दक्ष॑स्य बि॒भ्युषो॒ अबि॑भ्य॒दर॑न्धय॒: शर्ध॑त इन्द्र॒ दस्यू॑न्
॥२॥yad vā̍ di̱vi pārye̱ suṣvi̍mindra vṛtra̱hatye'va̍si̱ śūra̍sātau |
yad vā̍ dakṣa̍sya bi̱bhyuṣo̱ abi̍bhya̱dara̍ndhaya̱: śardha̍ta indra̱ dasyū̍n
पाता॑ सु॒तमिन्द्रो॑ अस्तु॒ सोमं॑ प्रणे॒नीरु॒ग्रो ज॑रि॒तार॑मू॒ती ।
कर्ता॑ वी॒राय॒ सुष्व॑य उ लो॒कं दाता॒ वसु॑ स्तुव॒ते की॒रये॑ चित्
॥३॥pātā̍ su̱tamindro̍ astu̱ soma̍ṃ praṇe̱nīru̱gro ja̍ri̱tāra̍mū̱tī |
kartā̍ vī̱rāya̱ suṣva̍ya u lo̱kaṃ dātā̱ vasu̍ stuva̱te kī̱raye̍ cit
गन्तेया॑न्ति॒ सव॑ना॒ हरि॑भ्यां ब॒भ्रिर्वज्रं॑ प॒पिः सोमं॑ द॒दिर्गाः ।
कर्ता॑ वी॒रं नर्यं॒ सर्व॑वीरं॒ श्रोता॒ हवं॑ गृण॒तः स्तोम॑वाहाः
॥४॥ganteyā̍nti̱ sava̍nā̱ hari̍bhyāṃ ba̱bhrirvajra̍ṃ pa̱piḥ soma̍ṃ da̱dirgāḥ |
kartā̍ vī̱raṃ narya̱ṃ sarva̍vīra̱ṃ śrotā̱ hava̍ṃ gṛṇa̱taḥ stoma̍vāhāḥ
अस्मै॑ व॒यं यद् वा॒वान॒ तद् वि॑विष्म॒ इन्द्रा॑य॒ यो न॑: प्र॒दिवो॒ अप॒स्कः ।
सु॒ते सोमे॑ स्तु॒मसि॒ शंस॑दु॒क्थेन्द्रा॑य॒ ब्रह्म॒ वर्ध॑नं॒ यथास॑त्
॥५॥asmai̍ va̱yaṃ yad vā̱vāna̱ tad vi̍viṣma̱ indrā̍ya̱ yo na̍: pra̱divo̱ apa̱skaḥ |
su̱te some̍ stu̱masi̱ śaṃsa̍du̱kthendrā̍ya̱ brahma̱ vardha̍na̱ṃ yathāsa̍t
ब्रह्मा॑णि॒ हि च॑कृ॒षे वर्ध॑नानि॒ ताव॑त् त इन्द्र म॒तिभि॑र्विविष्मः ।
सु॒ते सोमे॑ सुतपा॒: शंत॑मानि॒ रान्द्या॑ क्रियास्म॒ वक्ष॑णानि य॒ज्ञैः
॥६॥brahmā̍ṇi̱ hi ca̍kṛ̱ṣe vardha̍nāni̱ tāva̍t ta indra ma̱tibhi̍rviviṣmaḥ |
su̱te some̍ sutapā̱: śaṃta̍māni̱ rāndyā̍ kriyāsma̱ vakṣa̍ṇāni ya̱jñaiḥ
स नो॑ बोधि पुरो॒ळाशं॒ ररा॑ण॒: पिबा॒ तु सोमं॒ गोऋ॑जीकमिन्द्र ।
एदं ब॒र्हिर्यज॑मानस्य सीदो॒रुं कृ॑धि त्वाय॒त उ॑ लो॒कम्
॥७॥sa no̍ bodhi puro̱l̤āśa̱ṃ rarā̍ṇa̱: pibā̱ tu soma̱ṃ goṛ̍jīkamindra |
edaṃ ba̱rhiryaja̍mānasya sīdo̱ruṃ kṛ̍dhi tvāya̱ta u̍ lo̱kam
स म॑न्दस्वा॒ ह्यनु॒ जोष॑मुग्र॒ प्र त्वा॑ य॒ज्ञास॑ इ॒मे अ॑श्नुवन्तु ।
प्रेमे हवा॑सः पुरुहू॒तम॒स्मे आ त्वे॒यं धीरव॑स इन्द्र यम्याः
॥८॥sa ma̍ndasvā̱ hyanu̱ joṣa̍mugra̱ pra tvā̍ ya̱jñāsa̍ i̱me a̍śnuvantu |
preme havā̍saḥ puruhū̱tama̱sme ā tve̱yaṃ dhīrava̍sa indra yamyāḥ
तं व॑: सखाय॒: सं यथा॑ सु॒तेषु॒ सोमे॑भिरीं पृणता भो॒जमिन्द्र॑म् ।
कु॒वित् तस्मा॒ अस॑ति नो॒ भरा॑य॒ न सुष्वि॒मिन्द्रोऽव॑से मृधाति
॥९॥taṃ va̍: sakhāya̱: saṃ yathā̍ su̱teṣu̱ some̍bhirīṃ pṛṇatā bho̱jamindra̍m |
ku̱vit tasmā̱ asa̍ti no̱ bharā̍ya̱ na suṣvi̱mindro'va̍se mṛdhāti
ए॒वेदिन्द्र॑: सु॒ते अ॑स्तावि॒ सोमे॑ भ॒रद्वा॑जेषु॒ क्षय॒दिन्म॒घोन॑: ।
अस॒द् यथा॑ जरि॒त्र उ॒त सू॒रिरिन्द्रो॑ रा॒यो वि॒श्ववा॑रस्य दा॒ता
॥१०॥e̱vedindra̍: su̱te a̍stāvi̱ some̍ bha̱radvā̍jeṣu̱ kṣaya̱dinma̱ghona̍: |
asa̱d yathā̍ jari̱tra u̱ta sū̱ririndro̍ rā̱yo vi̱śvavā̍rasya dā̱tā