Study
- Anukramaṇī
- 8 kuśikaḥ saubharaḥ, rātrirvā bhāradvājī| rātriḥ| gāyatrī|
- Source
- Ṛgveda Śākala saṃhitā (linked ṛcs). Learn svara from a guru.
8 kuśikaḥ saubharaḥ, rātrirvā bhāradvājī| rātriḥ| gāyatrī|
rātrī̱ vya̍khyadāya̱tī pu̍ru̱trā de̱vya1kṣabhi̍: | viśvā̱ adhi̱ śriyo̍'dhita ॥10.127.1॥
रात्री॒ व्य॑ख्यदाय॒ती पु॑रु॒त्रा दे॒व्य१क्षभि॑: । विश्वा॒ अधि॒ श्रियो॑ऽधित
orva̍prā̱ ama̍rtyā ni̱vato̍ de̱vyu1dvata̍: | jyoti̍ṣā bādhate̱ tama̍: ॥10.127.2॥
ओर्व॑प्रा॒ अम॑र्त्या नि॒वतो॑ दे॒व्यु१द्वत॑: । ज्योति॑षा बाधते॒ तम॑:
niru̱ svasā̍ramaskṛto̱ṣasa̍ṃ de̱vyā̍ya̱tī | apedu̍ hāsate̱ tama̍: ॥10.127.3॥
निरु॒ स्वसा॑रमस्कृतो॒षसं॑ दे॒व्या॑य॒ती । अपेदु॑ हासते॒ तम॑:
sā no̍ a̱dya yasyā̍ va̱yaṃ ni te̱ yāma̱nnavi̍kṣmahi | vṛ̱kṣe na va̍sa̱tiṃ vaya̍: ॥10.127.4॥
सा नो॑ अ॒द्य यस्या॑ व॒यं नि ते॒ याम॒न्नवि॑क्ष्महि । वृ॒क्षे न व॑स॒तिं वय॑:
ni grāmā̍so avikṣata̱ ni pa̱dvanto̱ ni pa̱kṣiṇa̍: | ni śye̱nāsa̍ścida̱rthina̍: ॥10.127.5॥
नि ग्रामा॑सो अविक्षत॒ नि प॒द्वन्तो॒ नि प॒क्षिण॑: । नि श्ये॒नास॑श्चिद॒र्थिन॑:
yā̱vayā̍ vṛ̱kyaṃ1 vṛka̍ṃ ya̱vaya̍ ste̱namū̍rmye | athā̍ naḥ su̱tarā̍ bhava ॥10.127.6॥
या॒वया॑ वृ॒क्यं१ वृकं॑ य॒वय॑ स्ते॒नमू॑र्म्ये । अथा॑ नः सु॒तरा॑ भव
upa̍ mā̱ pepi̍śa̱ttama̍: kṛ̱ṣṇaṃ vya̍ktamasthita | uṣa̍ ṛ̱ṇeva̍ yātaya ॥10.127.7॥
उप॑ मा॒ पेपि॑श॒त्तम॑: कृ॒ष्णं व्य॑क्तमस्थित । उष॑ ऋ॒णेव॑ यातय
upa̍ te̱ gā i̱vāka̍raṃ vṛṇī̱ṣva du̍hitardivaḥ | rātri̱ stoma̱ṃ na ji̱gyuṣe̍ ॥10.127.8॥
उप॑ ते॒ गा इ॒वाक॑रं वृणी॒ष्व दु॑हितर्दिवः । रात्रि॒ स्तोमं॒ न जि॒ग्युषे॑