Study
14 bārhaspatyo bharadvāja: | sarasvatī| gāyatrī; 1-3, 13 jagatī; 14 triṣṭup |
i̱yama̍dadādrabha̱samṛ̍ṇa̱cyuta̱ṃ divo̍dāsaṃ vadhrya̱śvāya̍ dā̱śuṣe̍ |
yā śaśva̍ntamāca̱khādā̍va̱saṃ pa̱ṇiṃ tā te̍ dā̱trāṇi̍ tavi̱ṣā sa̍rasvati ॥6.61.1॥
इ॒यम॑ददाद्रभ॒समृ॑ण॒च्युतं॒ दिवो॑दासं वध्र्य॒श्वाय॑ दा॒शुषे॑ ।
या शश्व॑न्तमाच॒खादा॑व॒सं प॒णिं ता ते॑ दा॒त्राणि॑ तवि॒षा स॑रस्वति
i̱yaṃ śuṣme̍bhirbisa̱khā i̍vāruja̱tsānu̍ girī̱ṇāṃ ta̍vi̱ṣebhi̍rū̱rmibhi̍: |
pā̱rā̱va̱ta̱ghnīmava̍se suvṛ̱ktibhi̱: sara̍svatī̱mā vi̍vāsema dhī̱tibhi̍: ॥6.61.2॥
इ॒यं शुष्मे॑भिर्बिस॒खा इ॑वारुज॒त्सानु॑ गिरी॒णां त॑वि॒षेभि॑रू॒र्मिभि॑: ।
पा॒रा॒व॒त॒घ्नीमव॑से सुवृ॒क्तिभि॒: सर॑स्वती॒मा वि॑वासेम धी॒तिभि॑:
sara̍svati deva̱nido̱ ni ba̍rhaya pra̱jāṃ viśva̍sya̱ bṛsa̍yasya mā̱yina̍: |
u̱ta kṣi̱tibhyo̱'vanī̍ravindo vi̱ṣame̍bhyo asravo vājinīvati ॥6.61.3॥
सर॑स्वति देव॒निदो॒ नि ब॑र्हय प्र॒जां विश्व॑स्य॒ बृस॑यस्य मा॒यिन॑: ।
उ॒त क्षि॒तिभ्यो॒ऽवनी॑रविन्दो वि॒षमे॑भ्यो अस्रवो वाजिनीवति
pra ṇo̍ de̱vī sara̍svatī̱ vāje̍bhirvā̱jinī̍vatī | dhī̱nāma̍vi̱trya̍vatu ॥6.61.4॥
प्र णो॑ दे॒वी सर॑स्वती॒ वाजे॑भिर्वा॒जिनी॑वती । धी॒नाम॑वि॒त्र्य॑वतु
yastvā̍ devi sarasvatyupabrū̱te dhane̍ hi̱te | indra̱ṃ na vṛ̍tra̱tūrye̍ ॥6.61.5॥
यस्त्वा॑ देवि सरस्वत्युपब्रू॒ते धने॑ हि॒ते । इन्द्रं॒ न वृ॑त्र॒तूर्ये॑
tvaṃ de̍vi sarasva̱tyavā̱ vāje̍ṣu vājini | radā̍ pū̱ṣeva̍ naḥ sa̱nim ॥6.61.6॥
त्वं दे॑वि सरस्व॒त्यवा॒ वाजे॑षु वाजिनि । रदा॑ पू॒षेव॑ नः स॒निम्
u̱ta syā na̱: sara̍svatī gho̱rā hira̍ṇyavartaniḥ | vṛ̱tra̱ghnī va̍ṣṭi suṣṭu̱tim ॥6.61.7॥
उ॒त स्या न॒: सर॑स्वती घो॒रा हिर॑ण्यवर्तनिः । वृ॒त्र॒घ्नी व॑ष्टि सुष्टु॒तिम्
yasyā̍ ana̱nto ahru̍tastve̱ṣaśca̍ri̱ṣṇura̍rṇa̱vaḥ | ama̱ścara̍ti̱ roru̍vat ॥6.61.8॥
यस्या॑ अन॒न्तो अह्रु॑तस्त्वे॒षश्च॑रि॒ष्णुर॑र्ण॒वः । अम॒श्चर॑ति॒ रोरु॑वत्
sā no̱ viśvā̱ ati̱ dviṣa̱: svasṝ̍ra̱nyā ṛ̱tāva̍rī | ata̱nnahe̍va̱ sūrya̍: ॥6.61.9॥
सा नो॒ विश्वा॒ अति॒ द्विष॒: स्वसॄ॑र॒न्या ऋ॒ताव॑री । अत॒न्नहे॑व॒ सूर्य॑:
u̱ta na̍: pri̱yā pri̱yāsu̍ sa̱ptasva̍sā̱ suju̍ṣṭā | sara̍svatī̱ stomyā̍ bhūt ॥6.61.10॥
उ॒त न॑: प्रि॒या प्रि॒यासु॑ स॒प्तस्व॑सा॒ सुजु॑ष्टा । सर॑स्वती॒ स्तोम्या॑ भूत्
ā̱pa̱pruṣī̱ pārthi̍vānyu̱ru rajo̍ a̱ntari̍kṣam | sara̍svatī ni̱daspā̍tu ॥6.61.11॥
आ॒प॒प्रुषी॒ पार्थि॑वान्यु॒रु रजो॑ अ॒न्तरि॑क्षम् । सर॑स्वती नि॒दस्पा॑तु
tri̱ṣa̱dhasthā̍ sa̱ptadhā̍tu̱: pañca̍ jā̱tā va̱rdhaya̍ntī | vāje̍vāje̱ havyā̍ bhūt ॥6.61.12॥
त्रि॒ष॒धस्था॑ स॒प्तधा॑तु॒: पञ्च॑ जा॒ता व॒र्धय॑न्ती । वाजे॑वाजे॒ हव्या॑ भूत्
pra yā ma̍hi̱mnā ma̱hinā̍su̱ ceki̍te dyu̱mnebhi̍ra̱nyā a̱pasā̍ma̱pasta̍mā |
ratha̍ iva bṛha̱tī vi̱bhvane̍ kṛ̱topa̱stutyā̍ ciki̱tuṣā̱ sara̍svatī ॥6.61.13॥
प्र या म॑हि॒म्ना म॒हिना॑सु॒ चेकि॑ते द्यु॒म्नेभि॑र॒न्या अ॒पसा॑म॒पस्त॑मा ।
रथ॑ इव बृह॒ती वि॒भ्वने॑ कृ॒तोप॒स्तुत्या॑ चिकि॒तुषा॒ सर॑स्वती
sara̍svatya̱bhi no̍ neṣi̱ vasyo̱ māpa̍ spharī̱: paya̍sā̱ mā na̱ ā dha̍k |
ju̱ṣasva̍ naḥ sa̱khyā ve̱śyā̍ ca̱ mā tvatkṣetrā̱ṇyara̍ṇāni ganma ॥6.61.14॥
सर॑स्वत्य॒भि नो॑ नेषि॒ वस्यो॒ माप॑ स्फरी॒: पय॑सा॒ मा न॒ आ ध॑क् ।
जु॒षस्व॑ नः स॒ख्या वे॒श्या॑ च॒ मा त्वत्क्षेत्रा॒ण्यर॑णानि गन्म