Study
7 manyustāpasaḥ| manyuḥ| triṣṭup , 1 jagatī|
yaste̍ ma̱nyo'vi̍dhadvajra sāyaka̱ saha̱ oja̍: puṣyati̱ viśva̍mānu̱ṣak |
sā̱hyāma̱ dāsa̱mārya̱ṃ tvayā̍ yu̱jā saha̍skṛtena̱ saha̍sā̱ saha̍svatā ॥10.83.1॥
यस्ते॑ म॒न्योऽवि॑धद्वज्र सायक॒ सह॒ ओज॑: पुष्यति॒ विश्व॑मानु॒षक् ।
सा॒ह्याम॒ दास॒मार्यं॒ त्वया॑ यु॒जा सह॑स्कृतेन॒ सह॑सा॒ सह॑स्वता
ma̱nyurindro̍ ma̱nyure̱vāsa̍ de̱vo ma̱nyurhotā̱ varu̍ṇo jā̱tave̍dāḥ |
ma̱nyuṃ viśa̍ īl̤ate̱ mānu̍ṣī̱ryāḥ pā̱hi no̍ manyo̱ tapa̍sā sa̱joṣā̍: ॥10.83.2॥
म॒न्युरिन्द्रो॑ म॒न्युरे॒वास॑ दे॒वो म॒न्युर्होता॒ वरु॑णो जा॒तवे॑दाः ।
म॒न्युं विश॑ ईळते॒ मानु॑षी॒र्याः पा॒हि नो॑ मन्यो॒ तप॑सा स॒जोषा॑:
a̱bhī̍hi manyo ta̱vasa̱stavī̍yā̱ntapa̍sā yu̱jā vi ja̍hi̱ śatrū̍n |
a̱mi̱tra̱hā vṛ̍tra̱hā da̍syu̱hā ca̱ viśvā̱ vasū̱nyā bha̍rā̱ tvaṃ na̍: ॥10.83.3॥
अ॒भी॑हि मन्यो त॒वस॒स्तवी॑या॒न्तप॑सा यु॒जा वि ज॑हि॒ शत्रू॑न् ।
अ॒मि॒त्र॒हा वृ॑त्र॒हा द॑स्यु॒हा च॒ विश्वा॒ वसू॒न्या भ॑रा॒ त्वं न॑:
tvaṃ hi ma̍nyo a̱bhibhū̍tyojāḥ svaya̱mbhūrbhāmo̍ abhimātiṣā̱haḥ |
vi̱śvaca̍rṣaṇi̱: sahu̍ri̱: sahā̍vāna̱smāsvoja̱: pṛta̍nāsu dhehi ॥10.83.4॥
त्वं हि म॑न्यो अ॒भिभू॑त्योजाः स्वय॒म्भूर्भामो॑ अभिमातिषा॒हः ।
वि॒श्वच॑र्षणि॒: सहु॑रि॒: सहा॑वान॒स्मास्वोज॒: पृत॑नासु धेहि
a̱bhā̱gaḥ sannapa̱ pare̍to asmi̱ tava̱ kratvā̍ tavi̱ṣasya̍ pracetaḥ |
taṃ tvā̍ manyo akra̱turji̍hīl̤ā̱haṃ svā ta̱nūrba̍la̱deyā̍ya̱ mehi̍ ॥10.83.5॥
अ॒भा॒गः सन्नप॒ परे॑तो अस्मि॒ तव॒ क्रत्वा॑ तवि॒षस्य॑ प्रचेतः ।
तं त्वा॑ मन्यो अक्र॒तुर्जि॑हीळा॒हं स्वा त॒नूर्ब॑ल॒देया॑य॒ मेहि॑
a̱yaṃ te̍ a̱smyupa̱ mehya̱rvāṅpra̍tīcī̱naḥ sa̍hure viśvadhāyaḥ |
manyo̍ vajrinna̱bhi māmā va̍vṛtsva̱ hanā̍va̱ dasyū̍m̐ru̱ta bo̍dhyā̱peḥ ॥10.83.6॥
अ॒यं ते॑ अ॒स्म्युप॒ मेह्य॒र्वाङ्प्र॑तीची॒नः स॑हुरे विश्वधायः ।
मन्यो॑ वज्रिन्न॒भि मामा व॑वृत्स्व॒ हना॑व॒ दस्यूँ॑रु॒त बो॑ध्या॒पेः
a̱bhi prehi̍ dakṣiṇa̱to bha̍vā̱ me'dhā̍ vṛ̱trāṇi̍ jaṅghanāva̱ bhūri̍ |
ju̱homi̍ te dha̱ruṇa̱ṃ madhvo̱ agra̍mu̱bhā u̍pā̱ṃśu pra̍tha̱mā pi̍bāva ॥10.83.7॥
अ॒भि प्रेहि॑ दक्षिण॒तो भ॑वा॒ मेऽधा॑ वृ॒त्राणि॑ जङ्घनाव॒ भूरि॑ ।
जु॒होमि॑ ते ध॒रुणं॒ मध्वो॒ अग्र॑मु॒भा उ॑पां॒शु प्र॑थ॒मा पि॑बाव
7 manyustāpasaḥ| manyuḥ| jagatī,1-3 triṣṭup|
tvayā̍ manyo sa̱ratha̍māru̱janto̱ harṣa̍māṇāso dhṛṣi̱tā ma̍rutvaḥ |
ti̱gmeṣa̍va̱ āyu̍dhā sa̱ṃśiśā̍nā a̱bhi pra ya̍ntu̱ naro̍ a̱gnirū̍pāḥ ॥10.84.1॥
त्वया॑ मन्यो स॒रथ॑मारु॒जन्तो॒ हर्ष॑माणासो धृषि॒ता म॑रुत्वः ।
ति॒ग्मेष॑व॒ आयु॑धा सं॒शिशा॑ना अ॒भि प्र य॑न्तु॒ नरो॑ अ॒ग्निरू॑पाः
a̱gniri̍va manyo tviṣi̱taḥ sa̍hasva senā̱nīrna̍: sahure hū̱ta e̍dhi |
ha̱tvāya̱ śatrū̱nvi bha̍jasva̱ veda̱ ojo̱ mimā̍no̱ vi mṛdho̍ nudasva ॥10.84.2॥
अ॒ग्निरि॑व मन्यो त्विषि॒तः स॑हस्व सेना॒नीर्न॑: सहुरे हू॒त ए॑धि ।
ह॒त्वाय॒ शत्रू॒न्वि भ॑जस्व॒ वेद॒ ओजो॒ मिमा॑नो॒ वि मृधो॑ नुदस्व
saha̍sva manyo a̱bhimā̍tima̱sme ru̱janmṛ̱ṇanpra̍mṛ̱ṇanprehi̱ śatrū̍n |
u̱graṃ te̱ pājo̍ na̱nvā ru̍rudhre va̱śī vaśa̍ṃ nayasa ekaja̱ tvam ॥10.84.3॥
सह॑स्व मन्यो अ॒भिमा॑तिम॒स्मे रु॒जन्मृ॒णन्प्र॑मृ॒णन्प्रेहि॒ शत्रू॑न् ।
उ॒ग्रं ते॒ पाजो॑ न॒न्वा रु॑रुध्रे व॒शी वशं॑ नयस एकज॒ त्वम्
eko̍ bahū̱nāma̍si manyavīl̤i̱to viśa̍ṃviśaṃ yu̱dhaye̱ saṃ śi̍śādhi |
akṛ̍ttaru̱ktvayā̍ yu̱jā va̱yaṃ dyu̱manta̱ṃ ghoṣa̍ṃ vija̱yāya̍ kṛṇmahe ॥10.84.4॥
एको॑ बहू॒नाम॑सि मन्यवीळि॒तो विशं॑विशं यु॒धये॒ सं शि॑शाधि ।
अकृ॑त्तरु॒क्त्वया॑ यु॒जा व॒यं द्यु॒मन्तं॒ घोषं॑ विज॒याय॑ कृण्महे
vi̱je̱ṣa̱kṛdindra̍ ivānavabra̱vo̱3'smāka̍ṃ manyo adhi̱pā bha̍ve̱ha |
pri̱yaṃ te̱ nāma̍ sahure gṛṇīmasi vi̱dmā tamutsa̱ṃ yata̍ āba̱bhūtha̍ ॥10.84.5॥
वि॒जे॒ष॒कृदिन्द्र॑ इवानवब्र॒वो॒३ऽस्माकं॑ मन्यो अधि॒पा भ॑वे॒ह ।
प्रि॒यं ते॒ नाम॑ सहुरे गृणीमसि वि॒द्मा तमुत्सं॒ यत॑ आब॒भूथ॑
ābhū̍tyā saha̱jā va̍jra sāyaka̱ saho̍ bibharṣyabhibhūta̱ utta̍ram |
kratvā̍ no manyo sa̱ha me̱dye̍dhi mahādha̱nasya̍ puruhūta sa̱ṃsṛji̍ ॥10.84.6॥
आभू॑त्या सह॒जा व॑ज्र सायक॒ सहो॑ बिभर्ष्यभिभूत॒ उत्त॑रम् ।
क्रत्वा॑ नो मन्यो स॒ह मे॒द्ये॑धि महाध॒नस्य॑ पुरुहूत सं॒सृजि॑
saṃsṛ̍ṣṭa̱ṃ dhana̍mu̱bhaya̍ṃ sa̱mākṛ̍tama̱smabhya̍ṃ dattā̱ṃ varu̍ṇaśca ma̱nyuḥ |
bhiya̱ṃ dadhā̍nā̱ hṛda̍yeṣu̱ śatra̍va̱: parā̍jitāso̱ apa̱ ni la̍yantām ॥10.84.7॥
संसृ॑ष्टं॒ धन॑मु॒भयं॑ स॒माकृ॑तम॒स्मभ्यं॑ दत्तां॒ वरु॑णश्च म॒न्युः ।
भियं॒ दधा॑ना॒ हृद॑येषु॒ शत्र॑व॒: परा॑जितासो॒ अप॒ नि ल॑यन्ताम्