अध्ययनम्
- अनुक्रमणिका
- मूलम्
६ बार्हस्पत्यो भरद्वाज: ।पूषा । गायत्री ।
एहि॒ वां वि॑मुचो नपा॒दाघृ॑णे॒ सं स॑चावहै । र॒थीॠ॒तस्य॑ नो भव
॥१॥ehi̱ vāṃ vi̍muco napā̱dāghṛ̍ṇe̱ saṃ sa̍cāvahai | ra̱thīṝ̱tasya̍ no bhava
र॒थीत॑मं कप॒र्दिन॒मीशा॑नं॒ राध॑सो म॒हः । रा॒यः सखा॑यमीमहे
॥२॥ra̱thīta̍maṃ kapa̱rdina̱mīśā̍na̱ṃ rādha̍so ma̱haḥ | rā̱yaḥ sakhā̍yamīmahe
रा॒यो धारा॑स्याघृणे॒ वसो॑ रा॒शिर॑जाश्व । धीव॑तोधीवत॒: सखा॑
॥३॥rā̱yo dhārā̍syāghṛṇe̱ vaso̍ rā̱śira̍jāśva | dhīva̍todhīvata̱: sakhā̍
पू॒षणं॒ न्व१जाश्व॒मुप॑ स्तोषाम वा॒जिन॑म् । स्वसु॒र्यो जा॒र उ॒च्यते॑
॥४॥pū̱ṣaṇa̱ṃ nva1jāśva̱mupa̍ stoṣāma vā̱jina̍m | svasu̱ryo jā̱ra u̱cyate̍
मा॒तुर्दि॑धि॒षुम॑ब्रवं॒ स्वसु॑र्जा॒रः शृ॑णोतु नः । भ्रातेन्द्र॑स्य॒ सखा॒ मम॑
॥५॥mā̱turdi̍dhi̱ṣuma̍brava̱ṃ svasu̍rjā̱raḥ śṛ̍ṇotu naḥ | bhrātendra̍sya̱ sakhā̱ mama̍
आजास॑: पू॒षणं॒ रथे॑ निशृ॒म्भास्ते ज॑न॒श्रिय॑म् । दे॒वं व॑हन्तु॒ बिभ्र॑तः
॥६॥ājāsa̍: pū̱ṣaṇa̱ṃ rathe̍ niśṛ̱mbhāste ja̍na̱śriya̍m | de̱vaṃ va̍hantu̱ bibhra̍taḥ