अध्ययनम्
- अनुक्रमणिका
- मूलम्
१० बार्हस्पत्यो भरद्वाज: ।पूषा । गायत्री, ८ अनुष्टुप् ।
व॒यमु॑ त्वा पथस्पते॒ रथं॒ न वाज॑सातये । धि॒ये पू॑षन्नयुज्महि
॥१॥va̱yamu̍ tvā pathaspate̱ ratha̱ṃ na vāja̍sātaye | dhi̱ye pū̍ṣannayujmahi
अ॒भि नो॒ नर्यं॒ वसु॑ वी॒रं प्रय॑तदक्षिणम् । वा॒मं गृ॒हप॑तिं नय
॥२॥a̱bhi no̱ narya̱ṃ vasu̍ vī̱raṃ praya̍tadakṣiṇam | vā̱maṃ gṛ̱hapa̍tiṃ naya
अदि॑त्सन्तं चिदाघृणे॒ पूष॒न्दाना॑य चोदय । प॒णेश्चि॒द्वि म्र॑दा॒ मन॑:
॥३॥adi̍tsantaṃ cidāghṛṇe̱ pūṣa̱ndānā̍ya codaya | pa̱ṇeści̱dvi mra̍dā̱ mana̍:
वि प॒थो वाज॑सातये चिनु॒हि वि मृधो॑ जहि । साध॑न्तामुग्र नो॒ धिय॑:
॥४॥vi pa̱tho vāja̍sātaye cinu̱hi vi mṛdho̍ jahi | sādha̍ntāmugra no̱ dhiya̍:
परि॑ तृन्धि पणी॒नामार॑या॒ हृद॑या कवे । अथे॑म॒स्मभ्यं॑ रन्धय
॥५॥pari̍ tṛndhi paṇī̱nāmāra̍yā̱ hṛda̍yā kave | athe̍ma̱smabhya̍ṃ randhaya
वि पू॑ष॒न्नार॑या तुद प॒णेरि॑च्छ हृ॒दि प्रि॒यम् । अथे॑म॒स्मभ्यं॑ रन्धय
॥६॥vi pū̍ṣa̱nnāra̍yā tuda pa̱ṇeri̍ccha hṛ̱di pri̱yam | athe̍ma̱smabhya̍ṃ randhaya
आ रि॑ख किकि॒रा कृ॑णु पणी॒नां हृद॑या कवे । अथे॑म॒स्मभ्यं॑ रन्धय
॥७॥ā ri̍kha kiki̱rā kṛ̍ṇu paṇī̱nāṃ hṛda̍yā kave | athe̍ma̱smabhya̍ṃ randhaya
यां पू॑षन्ब्रह्म॒चोद॑नी॒मारां॒ बिभ॑र्ष्याघृणे । तया॑ समस्य॒ हृद॑य॒मा रि॑ख किकि॒रा कृ॑णु
॥८॥yāṃ pū̍ṣanbrahma̱coda̍nī̱mārā̱ṃ bibha̍rṣyāghṛṇe | tayā̍ samasya̱ hṛda̍ya̱mā ri̍kha kiki̱rā kṛ̍ṇu
या ते॒ अष्ट्रा॒ गोओ॑प॒शाऽऽघृ॑णे पशु॒साध॑नी । तस्या॑स्ते सु॒म्नमी॑महे
॥९॥yā te̱ aṣṭrā̱ goo̍pa̱śā''ghṛ̍ṇe paśu̱sādha̍nī | tasyā̍ste su̱mnamī̍mahe
उ॒त नो॑ गो॒षणिं॒ धिय॑मश्व॒सां वा॑ज॒सामु॒त । नृ॒वत्कृ॑णुहि वी॒तये॑
॥१०॥u̱ta no̍ go̱ṣaṇi̱ṃ dhiya̍maśva̱sāṃ vā̍ja̱sāmu̱ta | nṛ̱vatkṛ̍ṇuhi vī̱taye̍