Study
- Anukramaṇī
- Saṃhitā citations
- Source
tai॰ā॰ 1.27
i̱mānu̍ka̱ṃ bhu̍vanā sīṣadhema| indra̍śca̱ viśve̍ ca de̱vāḥ|
ya̱jñaṃ ca̍ nasta̱nvaṃ ca̍ pra̱jāṃ ca̍| ā̱di̱tyairindra̍ḥ sa̱ha sī̍ṣadhātu|
ā̱di̱tyairindra̱ḥ saga̍ṇo ma̱rudbhi̍ḥ| a̱smāka̍ṃ bhūtvavi̱tā ta̱nūnā̎m|
āpla̍vasva̱ prapla̍vasva| ā̱ṇḍībha̍vaja̱ mā mu̱huḥ|
sukhādīndu̍ḥkhani̱dhanām| prati̍muñcasva̱ svāṃ pu̱ram||114||
marī̍cayaḥ svāyambhu̱vāḥ| ye śa̍rī̱rāṇya̍kalpayan|
te te̍ de̱haṃ ka̍lpayantu| mā ca̍ te̱ khyāsma̍ tīriṣat|
utti̍ṣṭhata̱ mā sva̍pta| a̱gnimi̍cchadhva̱ṃ bhāra̍tāḥ|
rājña̱ḥ soma̍sya tṛ̱ptāsa̍ḥ| sūrye̍ṇa sa̱yujo̍ṣasaḥ|
yuvā̍ su̱vāsā̎ḥ| a̱ṣṭāca̍krā̱ nava̍dvārā||115||
de̱vānā̱ṃ pūra̍yo̱dhyā| tasyāgͫ̍ hiraṇma̍yaḥ ko̱śaḥ|
sva̱rgo lo̱ko jyoti̱ṣā''vṛ̍taḥ| yo vai tā̎ṃ brahma̍ṇo ve̱da|
a̱mṛte̍nā''vṛ̱tāṃ pu̍rīm| tasmai̎ brahma ca̍ brahmā̱ ca|
ā̱yuḥ kīrti̍ṃ pra̱jāṃ da̍duḥ| vi̱bhrāja̍mānā̱g̱ͫ hari̍ṇīm|
ya̱śasā̍ sampa̱rīvṛ̍tām| puragͫ̍ hiraṇma̍yīṃ bra̱hmā||116||
vi̱veśā̍'pa̱rāji̍tā| parāṅetya̍jyāma̱yī|
parāṅetya̍nāśa̱kī| i̱ha cā̍mutra̍ cānve̱ti|
vi̱dvānde̍vāsu̱rānu̍bha̱yān| yatku̍mā̱rī ma̱ndraya̍te|
ya̱dyo̱ṣidyatpa̍ti̱vratā̎| ari̍ṣṭa̱ṃ yatkiṃ ca̍ kri̱yate̎|
a̱gnistadanu̍vedhati| a̱śṛtā̍saḥ śṛ̍tāsa̱śca||117||
ya̱jvāno̱ ye'pya̍ya̱jvana̍ḥ| sva̍ryanto̱ nāpe̎kṣante|
indra̍ma̱gniṃ ca̍ ye vi̱duḥ| sika̍tā iva sa̱ṃyanti̍|
ra̱śmibhi̍ḥ samu̱dīri̍tāḥ| a̱smāllo̱kāda̍muṣmā̱cca|
ṛ̱ṣibhi̍radātpṛ̱śnibhi̍ḥ|
ape̍ta̱ vīta̱ vi ca̍ sarpa̱tāta̍ḥ| ye'tra̱ stha pu̍rā̱ṇā ye ca̱ nūta̍nāḥ|
aho̍bhira̱dbhira̱ktubhi̱rvya̍ktam||118||
ya̱mo da̍dātvava̱sāna̍masmai| nṛ mu̍ṇantu nṛpā̱tvarya̍ḥ|
a̱kṛ̱ṣṭā ye ca̱ kṛṣṭa̍jāḥ| ku̱mārī̍ṣu ka̱nīnī̍ṣu|
jā̱riṇī̍ṣu ca̱ ye hi̱tāḥ| reta̍ḥ pītā̱ āṇḍa̍pītāḥ|
aṅgā̍reṣu ca̱ ye hu̱tāḥ| u̱bhayā̎n putra̍pautra̱kān|
yu̱ve̱'haṃ ya̱marāja̍gān| śa̱taminnu śa̱rada̍ḥ||119||
ado̱ yadbrahma̍ vila̱bam| pi̱tṛ̱ṇāṃ ca̍ ya̱masya̍ ca|
varu̍ṇa̱syāśvi̍nora̱gneḥ| ma̱rutā̎ṃ ca vi̱hāya̍sām|
kā̱ma̱pra̱yava̍ṇaṃ me astu| sa hye̍vāsmi̍ sa̱nāta̍naḥ|
iti nāko brahmiśravo̍ rāyo̱ dhanam| pu̱trānāpo̍ de̱vīri̱hā''hi̍ta||120|| ॥TA 1.27॥
||1||