Study
- Anukramaṇī
- Source
6 bṛhanmatirāṅgirasa: | pavamāna: soma: | gāyatrī |
ā̱śura̍rṣa bṛhanmate̱ pari̍ pri̱yeṇa̱ dhāmnā̍ | yatra̍ de̱vā iti̱ brava̍n
||1||आ॒शुर॑र्ष बृहन्मते॒ परि॑ प्रि॒येण॒ धाम्ना॑ । यत्र॑ दे॒वा इति॒ ब्रव॑न्
pa̱ri̱ṣkṛ̱ṇvannani̍ṣkṛta̱ṃ janā̍ya yā̱taya̱nniṣa̍: | vṛ̱ṣṭiṃ di̱vaḥ pari̍ srava
||2||प॒रि॒ष्कृ॒ण्वन्ननि॑ष्कृतं॒ जना॑य या॒तय॒न्निष॑: । वृ॒ष्टिं दि॒वः परि॑ स्रव
su̱ta e̍ti pa̱vitra̱ ā tviṣi̱ṃ dadhā̍na̱ oja̍sā | vi̱cakṣā̍ṇo viro̱caya̍n
||3||सु॒त ए॑ति प॒वित्र॒ आ त्विषिं॒ दधा॑न॒ ओज॑सा । वि॒चक्षा॑णो विरो॒चय॑न्
a̱yaṃ sa yo di̱vaspari̍ raghu̱yāmā̍ pa̱vitra̱ ā | sindho̍rū̱rmā vyakṣa̍rat
||4||अ॒यं स यो दि॒वस्परि॑ रघु॒यामा॑ प॒वित्र॒ आ । सिन्धो॑रू॒र्मा व्यक्ष॑रत्
ā̱vivā̍sanparā̱vato̱ atho̍ arvā̱vata̍: su̱taḥ | indrā̍ya sicyate̱ madhu̍
||5||आ॒विवा॑सन्परा॒वतो॒ अथो॑ अर्वा॒वत॑: सु॒तः । इन्द्रा॑य सिच्यते॒ मधु॑
sa̱mī̱cī̱nā a̍nūṣata̱ hari̍ṃ hinva̱ntyadri̍bhiḥ | yonā̍vṛ̱tasya̍ sīdata
||6||स॒मी॒ची॒ना अ॑नूषत॒ हरिं॑ हिन्व॒न्त्यद्रि॑भिः । योना॑वृ॒तस्य॑ सीदत