Sūktam 72 — udvācamīrayati (9 mantras) — Śākala Saṃhitā (Ṛgveda)

Study

hari̍ṃ mṛjantyaru̱ṣo na yu̍jyate̱ saṃ dhe̱nubhi̍: ka̱laśe̱ somo̍ ajyate |

udvāca̍mī̱raya̍ti hi̱nvate̍ ma̱tī pu̍ruṣṭu̱tasya̱ kati̍ citpari̱priya̍:

||1||

हरिं॑ मृजन्त्यरु॒षो न यु॑ज्यते॒ सं धे॒नुभि॑: क॒लशे॒ सोमो॑ अज्यते ।

उद्वाच॑मी॒रय॑ति हि॒न्वते॑ म॒ती पु॑रुष्टु॒तस्य॒ कति॑ चित्परि॒प्रिय॑:

sā̱kaṃ va̍danti ba̱havo̍ manī̱ṣiṇa̱ indra̍sya̱ soma̍ṃ ja̱ṭhare̱ yadā̍du̱huḥ |

yadī̍ mṛ̱janti̱ suga̍bhastayo̱ nara̱: sanī̍l̤ābhirda̱śabhi̱: kāmya̱ṃ madhu̍

||2||

सा॒कं व॑दन्ति ब॒हवो॑ मनी॒षिण॒ इन्द्र॑स्य॒ सोमं॑ ज॒ठरे॒ यदा॑दु॒हुः ।

यदी॑ मृ॒जन्ति॒ सुग॑भस्तयो॒ नर॒: सनी॑ळाभिर्द॒शभि॒: काम्यं॒ मधु॑

ara̍mamāṇo̱ atye̍ti̱ gā a̱bhi sūrya̍sya pri̱yaṃ du̍hi̱tusti̱ro rava̍m |

anva̍smai̱ joṣa̍mabharadvinaṃgṛ̱saḥ saṃ dva̱yībhi̱: svasṛ̍bhiḥ kṣeti jā̱mibhi̍:

||3||

अर॑ममाणो॒ अत्ये॑ति॒ गा अ॒भि सूर्य॑स्य प्रि॒यं दु॑हि॒तुस्ति॒रो रव॑म् ।

अन्व॑स्मै॒ जोष॑मभरद्विनंगृ॒सः सं द्व॒यीभि॒: स्वसृ॑भिः क्षेति जा॒मिभि॑:

nṛdhū̍to̱ adri̍ṣuto ba̱rhiṣi̍ pri̱yaḥ pati̱rgavā̍ṃ pra̱diva̱ indu̍ṝ̱tviya̍: |

pura̍ṃdhivā̱nmanu̍ṣo yajña̱sādha̍na̱: śuci̍rdhi̱yā pa̍vate̱ soma̍ indra te

||4||

नृधू॑तो॒ अद्रि॑षुतो ब॒र्हिषि॑ प्रि॒यः पति॒र्गवां॑ प्र॒दिव॒ इन्दु॑ॠ॒त्विय॑: ।

पुरं॑धिवा॒न्मनु॑षो यज्ञ॒साध॑न॒: शुचि॑र्धि॒या प॑वते॒ सोम॑ इन्द्र ते

nṛbā̱hubhyā̍ṃ codi̱to dhāra̍yā su̱to̍'nuṣva̱dhaṃ pa̍vate̱ soma̍ indra te |

āprā̱: kratū̱ntsama̍jairadhva̱re ma̱tīrverna dru̱ṣacca̱mvo̱3rāsa̍da̱ddhari̍:

||5||

नृबा॒हुभ्यां॑ चोदि॒तो धार॑या सु॒तो॑ऽनुष्व॒धं प॑वते॒ सोम॑ इन्द्र ते ।

आप्रा॒: क्रतू॒न्त्सम॑जैरध्व॒रे म॒तीर्वेर्न द्रु॒षच्च॒म्वो॒३रास॑द॒द्धरि॑:

a̱ṃśuṃ du̍hanti sta̱naya̍nta̱makṣi̍taṃ ka̱viṃ ka̱vayo̱'paso̍ manī̱ṣiṇa̍: |

samī̱ gāvo̍ ma̱tayo̍ yanti sa̱ṃyata̍ ṛ̱tasya̱ yonā̱ sada̍ne puna̱rbhuva̍:

||6||

अं॒शुं दु॑हन्ति स्त॒नय॑न्त॒मक्षि॑तं क॒विं क॒वयो॒ऽपसो॑ मनी॒षिण॑: ।

समी॒ गावो॑ म॒तयो॑ यन्ति सं॒यत॑ ऋ॒तस्य॒ योना॒ सद॑ने पुन॒र्भुव॑:

nābhā̍ pṛthi̱vyā dha̱ruṇo̍ ma̱ho di̱vo̱3'pāmū̱rmau sindhu̍ṣva̱ntaru̍kṣi̱taḥ |

indra̍sya̱ vajro̍ vṛṣa̱bho vi̱bhūva̍su̱: somo̍ hṛ̱de pa̍vate̱ cāru̍ matsa̱raḥ

||7||

नाभा॑ पृथि॒व्या ध॒रुणो॑ म॒हो दि॒वो॒३ऽपामू॒र्मौ सिन्धु॑ष्व॒न्तरु॑क्षि॒तः ।

इन्द्र॑स्य॒ वज्रो॑ वृष॒भो वि॒भूव॑सु॒: सोमो॑ हृ॒दे प॑वते॒ चारु॑ मत्स॒रः

sa tū pa̍vasva̱ pari̱ pārthi̍va̱ṃ raja̍: sto̱tre śikṣa̍nnādhūnva̱te ca̍ sukrato |

mā no̱ nirbhā̱gvasu̍naḥ sādana̱spṛśo̍ ra̱yiṃ pi̱śaṅga̍ṃ bahu̱laṃ va̍sīmahi

||8||

स तू प॑वस्व॒ परि॒ पार्थि॑वं॒ रज॑: स्तो॒त्रे शिक्ष॑न्नाधून्व॒ते च॑ सुक्रतो ।

मा नो॒ निर्भा॒ग्वसु॑नः सादन॒स्पृशो॑ र॒यिं पि॒शङ्गं॑ बहु॒लं व॑सीमहि

ā tū na̍ indo śa̱tadā̱tvaśvya̍ṃ sa̱hasra̍dātu paśu̱maddhira̍ṇyavat |

upa̍ māsva bṛha̱tī re̱vatī̱riṣo'dhi̍ sto̱trasya̍ pavamāna no gahi

||9||

आ तू न॑ इन्दो श॒तदा॒त्वश्व्यं॑ स॒हस्र॑दातु पशु॒मद्धिर॑ण्यवत् ।

उप॑ मास्व बृह॒ती रे॒वती॒रिषोऽधि॑ स्तो॒त्रस्य॑ पवमान नो गहि