Study
- Anukramaṇī
- Source
(58) 1-3 maitrāvaruṇirvasiṣṭha:, 4-6 vāsiṣṭha indrapramati:,7-9 vāsiṣṭho vṛṣagaṇa:,10 -12 vāsiṣṭho manyu :, 13-15 vāsiṣṭha upamanyu:, 16-18 vāsiṣṭho vyāghrapād , 19 -21 vāsiṣṭhaḥ śakti:, 22-24 vāsiṣṭhaḥ karṇaśrud ,25 -27 vāsiṣṭho mṛl̤īka:, 28-30 vāsiṣṭho vasukra:, 31-44 parāśara: śāktya:, 45-58 kutsa āṅgirasa: | pavamāna: soma: |triṣṭup |
a̱sya pre̱ṣā he̱manā̍ pū̱yamā̍no de̱vo de̱vebhi̱: sama̍pṛkta̱ rasa̍m |
su̱taḥ pa̱vitra̱ṃ parye̍ti̱ rebha̍nmi̱teva̱ sadma̍ paśu̱mānti̱ hotā̍
||1||अ॒स्य प्रे॒षा हे॒मना॑ पू॒यमा॑नो दे॒वो दे॒वेभि॒: सम॑पृक्त॒ रस॑म् ।
सु॒तः प॒वित्रं॒ पर्ये॑ति॒ रेभ॑न्मि॒तेव॒ सद्म॑ पशु॒मान्ति॒ होता॑
bha̱drā vastrā̍ sama̱nyā̱3 vasā̍no ma̱hānka̱virni̱vaca̍nāni̱ śaṃsa̍n |
ā va̍cyasva ca̱mvo̍: pū̱yamā̍no vicakṣa̱ṇo jāgṛ̍virde̱vavī̍tau
||2||भ॒द्रा वस्त्रा॑ सम॒न्या॒३ वसा॑नो म॒हान्क॒विर्नि॒वच॑नानि॒ शंस॑न् ।
आ व॑च्यस्व च॒म्वो॑: पू॒यमा॑नो विचक्ष॒णो जागृ॑विर्दे॒ववी॑तौ
samu̍ pri̱yo mṛ̍jyate̱ sāno̱ avye̍ ya̱śasta̍ro ya̱śasā̱ṃ kṣaito̍ a̱sme |
a̱bhi sva̍ra̱ dhanvā̍ pū̱yamā̍no yū̱yaṃ pā̍ta sva̱stibhi̱: sadā̍ naḥ
||3||समु॑ प्रि॒यो मृ॑ज्यते॒ सानो॒ अव्ये॑ य॒शस्त॑रो य॒शसां॒ क्षैतो॑ अ॒स्मे ।
अ॒भि स्व॑र॒ धन्वा॑ पू॒यमा॑नो यू॒यं पा॑त स्व॒स्तिभि॒: सदा॑ नः
pra gā̍yatā̱bhya̍rcāma de̱vāntsoma̍ṃ hinota maha̱te dhanā̍ya |
svā̱duḥ pa̍vāte̱ ati̱ vāra̱mavya̱mā sī̍dāti ka̱laśa̍ṃ deva̱yurna̍:
||4||प्र गा॑यता॒भ्य॑र्चाम दे॒वान्त्सोमं॑ हिनोत मह॒ते धना॑य ।
स्वा॒दुः प॑वाते॒ अति॒ वार॒मव्य॒मा सी॑दाति क॒लशं॑ देव॒युर्न॑:
indu̍rde̱vānā̱mupa̍ sa̱khyamā̱yantsa̱hasra̍dhāraḥ pavate̱ madā̍ya |
nṛbhi̱: stavā̍no̱ anu̱ dhāma̱ pūrva̱maga̱nnindra̍ṃ maha̱te saubha̍gāya
||5||इन्दु॑र्दे॒वाना॒मुप॑ स॒ख्यमा॒यन्त्स॒हस्र॑धारः पवते॒ मदा॑य ।
नृभि॒: स्तवा॑नो॒ अनु॒ धाम॒ पूर्व॒मग॒न्निन्द्रं॑ मह॒ते सौभ॑गाय
sto̱tre rā̱ye hari̍rarṣā punā̱na indra̱ṃ mado̍ gacchatu te̱ bharā̍ya |
de̱vairyā̍hi sa̱ratha̱ṃ rādho̱ acchā̍ yū̱yaṃ pā̍ta sva̱stibhi̱: sadā̍ naḥ
||6||स्तो॒त्रे रा॒ये हरि॑रर्षा पुना॒न इन्द्रं॒ मदो॑ गच्छतु ते॒ भरा॑य ।
दे॒वैर्या॑हि स॒रथं॒ राधो॒ अच्छा॑ यू॒यं पा॑त स्व॒स्तिभि॒: सदा॑ नः
pra kāvya̍mu̱śane̍va bruvā̱ṇo de̱vo de̱vānā̱ṃ jani̍mā vivakti |
mahi̍vrata̱: śuci̍bandhuḥ pāva̱kaḥ pa̱dā va̍rā̱ho a̱bhye̍ti̱ rebha̍n
||7||प्र काव्य॑मु॒शने॑व ब्रुवा॒णो दे॒वो दे॒वानां॒ जनि॑मा विवक्ति ।
महि॑व्रत॒: शुचि॑बन्धुः पाव॒कः प॒दा व॑रा॒हो अ॒भ्ये॑ति॒ रेभ॑न्
pra ha̱ṃsāsa̍stṛ̱pala̍ṃ ma̱nyumacchā̱mādasta̱ṃ vṛṣa̍gaṇā ayāsuḥ |
ā̱ṅgū̱ṣyaṃ1 pava̍māna̱ṃ sakhā̍yo du̱rmarṣa̍ṃ sā̱kaṃ pra va̍danti vā̱ṇam
||8||प्र हं॒सास॑स्तृ॒पलं॑ म॒न्युमच्छा॒मादस्तं॒ वृष॑गणा अयासुः ।
आ॒ङ्गू॒ष्यं१ पव॑मानं॒ सखा॑यो दु॒र्मर्षं॑ सा॒कं प्र व॑दन्ति वा॒णम्
sa ra̍ṃhata urugā̱yasya̍ jū̱tiṃ vṛthā̱ krīl̤a̍ntaṃ mimate̱ na gāva̍: |
pa̱rī̱ṇa̱saṃ kṛ̍ṇute ti̱gmaśṛ̍ṅgo̱ divā̱ hari̱rdadṛ̍śe̱ nakta̍mṛ̱jraḥ
||9||स रं॑हत उरुगा॒यस्य॑ जू॒तिं वृथा॒ क्रीळ॑न्तं मिमते॒ न गाव॑: ।
प॒री॒ण॒सं कृ॑णुते ति॒ग्मशृ॑ङ्गो॒ दिवा॒ हरि॒र्ददृ॑शे॒ नक्त॑मृ॒ज्रः
indu̍rvā̱jī pa̍vate̱ gonyo̍ghā̱ indre̱ soma̱: saha̱ inva̱nmadā̍ya |
hanti̱ rakṣo̱ bādha̍te̱ paryarā̍tī̱rvari̍vaḥ kṛ̱ṇvanvṛ̱jana̍sya̱ rājā̍
||10||इन्दु॑र्वा॒जी प॑वते॒ गोन्यो॑घा॒ इन्द्रे॒ सोम॒: सह॒ इन्व॒न्मदा॑य ।
हन्ति॒ रक्षो॒ बाध॑ते॒ पर्यरा॑ती॒र्वरि॑वः कृ॒ण्वन्वृ॒जन॑स्य॒ राजा॑
adha̱ dhāra̍yā̱ madhvā̍ pṛcā̱nasti̱ro roma̍ pavate̱ adri̍dugdhaḥ |
indu̱rindra̍sya sa̱khyaṃ ju̍ṣā̱ṇo de̱vo de̱vasya̍ matsa̱ro madā̍ya
||11||अध॒ धार॑या॒ मध्वा॑ पृचा॒नस्ति॒रो रोम॑ पवते॒ अद्रि॑दुग्धः ।
इन्दु॒रिन्द्र॑स्य स॒ख्यं जु॑षा॒णो दे॒वो दे॒वस्य॑ मत्स॒रो मदा॑य
a̱bhi pri̱yāṇi̍ pavate punā̱no de̱vo de̱vāntsvena̱ rase̍na pṛ̱ñcan |
indu̱rdharmā̍ṇyṛtu̱thā vasā̍no̱ daśa̱ kṣipo̍ avyata̱ sāno̱ avye̍
||12||अ॒भि प्रि॒याणि॑ पवते पुना॒नो दे॒वो दे॒वान्त्स्वेन॒ रसे॑न पृ॒ञ्चन् ।
इन्दु॒र्धर्मा॑ण्यृतु॒था वसा॑नो॒ दश॒ क्षिपो॑ अव्यत॒ सानो॒ अव्ये॑
vṛṣā̱ śoṇo̍ abhi̱kani̍krada̱dgā na̱daya̍nneti pṛthi̱vīmu̱ta dyām |
indra̍syeva va̱gnurā śṛ̍ṇva ā̱jau pra̍ce̱taya̍nnarṣati̱ vāca̱memām
||13||वृषा॒ शोणो॑ अभि॒कनि॑क्रद॒द्गा न॒दय॑न्नेति पृथि॒वीमु॒त द्याम् ।
इन्द्र॑स्येव व॒ग्नुरा शृ॑ण्व आ॒जौ प्र॑चे॒तय॑न्नर्षति॒ वाच॒मेमाम्
ra̱sāyya̱: paya̍sā̱ pinva̍māna ī̱raya̍nneṣi̱ madhu̍mantama̱ṃśum |
pava̍mānaḥ saṃta̱nime̍ṣi kṛ̱ṇvannindrā̍ya soma pariṣi̱cyamā̍naḥ
||14||र॒साय्य॒: पय॑सा॒ पिन्व॑मान ई॒रय॑न्नेषि॒ मधु॑मन्तमं॒शुम् ।
पव॑मानः संत॒निमे॑षि कृ॒ण्वन्निन्द्रा॑य सोम परिषि॒च्यमा॑नः
e̱vā pa̍vasva madi̱ro madā̍yodagrā̱bhasya̍ na̱maya̍nvadha̱snaiḥ |
pari̱ varṇa̱ṃ bhara̍māṇo̱ ruśa̍ntaṃ ga̱vyurno̍ arṣa̱ pari̍ soma si̱ktaḥ
||15||ए॒वा प॑वस्व मदि॒रो मदा॑योदग्रा॒भस्य॑ न॒मय॑न्वध॒स्नैः ।
परि॒ वर्णं॒ भर॑माणो॒ रुश॑न्तं ग॒व्युर्नो॑ अर्ष॒ परि॑ सोम सि॒क्तः
ju̱ṣṭvī na̍ indo su̱pathā̍ su̱gānyu̱rau pa̍vasva̱ vari̍vāṃsi kṛ̱ṇvan |
gha̱neva̱ viṣva̍gduri̱tāni̍ vi̱ghnannadhi̱ ṣṇunā̍ dhanva̱ sāno̱ avye̍
||16||जु॒ष्ट्वी न॑ इन्दो सु॒पथा॑ सु॒गान्यु॒रौ प॑वस्व॒ वरि॑वांसि कृ॒ण्वन् ।
घ॒नेव॒ विष्व॑ग्दुरि॒तानि॑ वि॒घ्नन्नधि॒ ष्णुना॑ धन्व॒ सानो॒ अव्ये॑
vṛ̱ṣṭiṃ no̍ arṣa di̱vyāṃ ji̍ga̱tnumil̤ā̍vatīṃ śa̱ṃgayī̍ṃ jī̱radā̍num |
stuke̍va vī̱tā dha̍nvā vici̱nvanbandhū̍m̐ri̱mām̐ ava̍rām̐ indo vā̱yūn
||17||वृ॒ष्टिं नो॑ अर्ष दि॒व्यां जि॑ग॒त्नुमिळा॑वतीं शं॒गयीं॑ जी॒रदा॑नुम् ।
स्तुके॑व वी॒ता ध॑न्वा विचि॒न्वन्बन्धूँ॑रि॒माँ अव॑राँ इन्दो वा॒यून्
gra̱nthiṃ na vi ṣya̍ grathi̱taṃ pu̍nā̱na ṛ̱juṃ ca̍ gā̱tuṃ vṛ̍ji̱naṃ ca̍ soma |
atyo̱ na kra̍do̱ hari̱rā sṛ̍jā̱no maryo̍ deva dhanva pa̱styā̍vān
||18||ग्र॒न्थिं न वि ष्य॑ ग्रथि॒तं पु॑ना॒न ऋ॒जुं च॑ गा॒तुं वृ॑जि॒नं च॑ सोम ।
अत्यो॒ न क्र॑दो॒ हरि॒रा सृ॑जा॒नो मर्यो॑ देव धन्व प॒स्त्या॑वान्
juṣṭo̱ madā̍ya de̱vatā̍ta indo̱ pari̱ ṣṇunā̍ dhanva̱ sāno̱ avye̍ |
sa̱hasra̍dhāraḥ sura̱bhirada̍bdha̱: pari̍ srava̱ vāja̍sātau nṛ̱ṣahye̍
||19||जुष्टो॒ मदा॑य दे॒वता॑त इन्दो॒ परि॒ ष्णुना॑ धन्व॒ सानो॒ अव्ये॑ ।
स॒हस्र॑धारः सुर॒भिरद॑ब्ध॒: परि॑ स्रव॒ वाज॑सातौ नृ॒षह्ये॑
a̱ra̱śmāno̱ ye̍'ra̱thā ayu̍ktā̱ atyā̍so̱ na sa̍sṛjā̱nāsa̍ ā̱jau |
e̱te śu̱krāso̍ dhanvanti̱ somā̱ devā̍sa̱stām̐ upa̍ yātā̱ piba̍dhyai
||20||अ॒र॒श्मानो॒ ये॑ऽर॒था अयु॑क्ता॒ अत्या॑सो॒ न स॑सृजा॒नास॑ आ॒जौ ।
ए॒ते शु॒क्रासो॑ धन्वन्ति॒ सोमा॒ देवा॑स॒स्ताँ उप॑ याता॒ पिब॑ध्यै
e̱vā na̍ indo a̱bhi de̱vavī̍ti̱ṃ pari̍ srava̱ nabho̱ arṇa̍śca̱mūṣu̍ |
somo̍ a̱smabhya̱ṃ kāmya̍ṃ bṛ̱hanta̍ṃ ra̱yiṃ da̍dātu vī̱rava̍ntamu̱gram
||21||ए॒वा न॑ इन्दो अ॒भि दे॒ववी॑तिं॒ परि॑ स्रव॒ नभो॒ अर्ण॑श्च॒मूषु॑ ।
सोमो॑ अ॒स्मभ्यं॒ काम्यं॑ बृ॒हन्तं॑ र॒यिं द॑दातु वी॒रव॑न्तमु॒ग्रम्
takṣa̱dyadī̱ mana̍so̱ vena̍to̱ vāgjyeṣṭha̍sya vā̱ dharma̍ṇi̱ kṣoranī̍ke |
ādī̍māya̱nvara̱mā vā̍vaśā̱nā juṣṭa̱ṃ pati̍ṃ ka̱laśe̱ gāva̱ indu̍m
||22||तक्ष॒द्यदी॒ मन॑सो॒ वेन॑तो॒ वाग्ज्येष्ठ॑स्य वा॒ धर्म॑णि॒ क्षोरनी॑के ।
आदी॑माय॒न्वर॒मा वा॑वशा॒ना जुष्टं॒ पतिं॑ क॒लशे॒ गाव॒ इन्दु॑म्
pra dā̍nu̱do di̱vyo dā̍nupi̱nva ṛ̱tamṛ̱tāya̍ pavate sume̱dhāḥ |
dha̱rmā bhu̍vadvṛja̱nya̍sya̱ rājā̱ pra ra̱śmibhi̍rda̱śabhi̍rbhāri̱ bhūma̍
||23||प्र दा॑नु॒दो दि॒व्यो दा॑नुपि॒न्व ऋ॒तमृ॒ताय॑ पवते सुमे॒धाः ।
ध॒र्मा भु॑वद्वृज॒न्य॑स्य॒ राजा॒ प्र र॒श्मिभि॑र्द॒शभि॑र्भारि॒ भूम॑
pa̱vitre̍bhi̱: pava̍māno nṛ̱cakṣā̱ rājā̍ de̱vānā̍mu̱ta martyā̍nām |
dvi̱tā bhu̍vadrayi̱patī̍ rayī̱ṇāmṛ̱taṃ bha̍ra̱tsubhṛ̍ta̱ṃ cārvindu̍:
||24||प॒वित्रे॑भि॒: पव॑मानो नृ॒चक्षा॒ राजा॑ दे॒वाना॑मु॒त मर्त्या॑नाम् ।
द्वि॒ता भु॑वद्रयि॒पती॑ रयी॒णामृ॒तं भ॑र॒त्सुभृ॑तं॒ चार्विन्दु॑:
arvā̍m̐ iva̱ śrava̍se sā̱timacchendra̍sya vā̱yora̱bhi vī̱tima̍rṣa |
sa na̍: sa̱hasrā̍ bṛha̱tīriṣo̍ dā̱ bhavā̍ soma draviṇo̱vitpu̍nā̱naḥ
||25||अर्वाँ॑ इव॒ श्रव॑से सा॒तिमच्छेन्द्र॑स्य वा॒योर॒भि वी॒तिम॑र्ष ।
स न॑: स॒हस्रा॑ बृह॒तीरिषो॑ दा॒ भवा॑ सोम द्रविणो॒वित्पु॑ना॒नः
de̱vā̱vyo̍ naḥ pariṣi̱cyamā̍nā̱: kṣaya̍ṃ su̱vīra̍ṃ dhanvanta̱ somā̍: |
ā̱ya̱jyava̍: suma̱tiṃ vi̱śvavā̍rā̱ hotā̍ro̱ na di̍vi̱yajo̍ ma̱ndrata̍māḥ
||26||दे॒वा॒व्यो॑ नः परिषि॒च्यमा॑ना॒: क्षयं॑ सु॒वीरं॑ धन्वन्त॒ सोमा॑: ।
आ॒य॒ज्यव॑: सुम॒तिं वि॒श्ववा॑रा॒ होता॑रो॒ न दि॑वि॒यजो॑ म॒न्द्रत॑माः
e̱vā de̍va de̱vatā̍te pavasva ma̱he so̍ma̱ psara̍se deva̱pāna̍: |
ma̱haści̱ddhi ṣmasi̍ hi̱tāḥ sa̍ma̱rye kṛ̱dhi su̍ṣṭhā̱ne roda̍sī punā̱naḥ
||27||ए॒वा दे॑व दे॒वता॑ते पवस्व म॒हे सो॑म॒ प्सर॑से देव॒पान॑: ।
म॒हश्चि॒द्धि ष्मसि॑ हि॒ताः स॑म॒र्ये कृ॒धि सु॑ष्ठा॒ने रोद॑सी पुना॒नः
aśvo̱ no kra̍do̱ vṛṣa̍bhiryujā̱naḥ si̱ṃho na bhī̱mo mana̍so̱ javī̍yān |
a̱rvā̱cīnai̍: pa̱thibhi̱rye raji̍ṣṭhā̱ ā pa̍vasva saumana̱saṃ na̍ indo
||28||अश्वो॒ नो क्र॑दो॒ वृष॑भिर्युजा॒नः सिं॒हो न भी॒मो मन॑सो॒ जवी॑यान् ।
अ॒र्वा॒चीनै॑: प॒थिभि॒र्ये रजि॑ष्ठा॒ आ प॑वस्व सौमन॒सं न॑ इन्दो
śa̱taṃ dhārā̍ de̱vajā̍tā asṛgrantsa̱hasra̍menāḥ ka̱vayo̍ mṛjanti |
indo̍ sa̱nitra̍ṃ di̱va ā pa̍vasva purae̱tāsi̍ maha̱to dhana̍sya
||29||श॒तं धारा॑ दे॒वजा॑ता असृग्रन्त्स॒हस्र॑मेनाः क॒वयो॑ मृजन्ति ।
इन्दो॑ स॒नित्रं॑ दि॒व आ प॑वस्व पुरए॒तासि॑ मह॒तो धन॑स्य
di̱vo na sargā̍ asasṛgra̱mahnā̱ṃ rājā̱ na mi̱traṃ pra mi̍nāti̱ dhīra̍: |
pi̱turna pu̱traḥ kratu̍bhiryatā̱na ā pa̍vasva vi̱śe a̱syā ajī̍tim
||30||दि॒वो न सर्गा॑ अससृग्र॒मह्नां॒ राजा॒ न मि॒त्रं प्र मि॑नाति॒ धीर॑: ।
पि॒तुर्न पु॒त्रः क्रतु॑भिर्यता॒न आ प॑वस्व वि॒शे अ॒स्या अजी॑तिम्
pra te̱ dhārā̱ madhu̍matīrasṛgra̱nvārā̱nyatpū̱to a̱tyeṣyavyā̍n |
pava̍māna̱ pava̍se̱ dhāma̱ gonā̍ṃ jajñā̱naḥ sūrya̍mapinvo a̱rkaiḥ
||31||प्र ते॒ धारा॒ मधु॑मतीरसृग्र॒न्वारा॒न्यत्पू॒तो अ॒त्येष्यव्या॑न् ।
पव॑मान॒ पव॑से॒ धाम॒ गोनां॑ जज्ञा॒नः सूर्य॑मपिन्वो अ॒र्कैः
kani̍krada̱danu̱ panthā̍mṛ̱tasya̍ śu̱kro vi bhā̍sya̱mṛta̍sya̱ dhāma̍ |
sa indrā̍ya pavase matsa̱ravā̍nhinvā̱no vāca̍ṃ ma̱tibhi̍: kavī̱nām
||32||कनि॑क्रद॒दनु॒ पन्था॑मृ॒तस्य॑ शु॒क्रो वि भा॑स्य॒मृत॑स्य॒ धाम॑ ।
स इन्द्रा॑य पवसे मत्स॒रवा॑न्हिन्वा॒नो वाचं॑ म॒तिभि॑: कवी॒नाम्
di̱vyaḥ su̍pa̱rṇo'va̍ cakṣi soma̱ pinva̱ndhārā̱: karma̍ṇā de̱vavī̍tau |
endo̍ viśa ka̱laśa̍ṃ soma̱dhāna̱ṃ kranda̍nnihi̱ sūrya̱syopa̍ ra̱śmim
||33||दि॒व्यः सु॑प॒र्णोऽव॑ चक्षि सोम॒ पिन्व॒न्धारा॒: कर्म॑णा दे॒ववी॑तौ ।
एन्दो॑ विश क॒लशं॑ सोम॒धानं॒ क्रन्द॑न्निहि॒ सूर्य॒स्योप॑ र॒श्मिम्
ti̱sro vāca̍ īrayati̱ pra vahni̍ṝ̱tasya̍ dhī̱tiṃ brahma̍ṇo manī̱ṣām |
gāvo̍ yanti̱ gopa̍tiṃ pṛ̱cchamā̍nā̱: soma̍ṃ yanti ma̱tayo̍ vāvaśā̱nāḥ
||34||ति॒स्रो वाच॑ ईरयति॒ प्र वह्नि॑ॠ॒तस्य॑ धी॒तिं ब्रह्म॑णो मनी॒षाम् ।
गावो॑ यन्ति॒ गोप॑तिं पृ॒च्छमा॑ना॒: सोमं॑ यन्ति म॒तयो॑ वावशा॒नाः
soma̱ṃ gāvo̍ dhe̱navo̍ vāvaśā̱nāḥ soma̱ṃ viprā̍ ma̱tibhi̍: pṛ̱cchamā̍nāḥ |
soma̍: su̱taḥ pū̍yate a̱jyamā̍na̱: some̍ a̱rkāstri̱ṣṭubha̱: saṃ na̍vante
||35||सोमं॒ गावो॑ धे॒नवो॑ वावशा॒नाः सोमं॒ विप्रा॑ म॒तिभि॑: पृ॒च्छमा॑नाः ।
सोम॑: सु॒तः पू॑यते अ॒ज्यमा॑न॒: सोमे॑ अ॒र्कास्त्रि॒ष्टुभ॒: सं न॑वन्ते
e̱vā na̍: soma pariṣi̱cyamā̍na̱ ā pa̍vasva pū̱yamā̍naḥ sva̱sti |
indra̱mā vi̍śa bṛha̱tā rave̍ṇa va̱rdhayā̱ vāca̍ṃ ja̱nayā̱ pura̍ṃdhim
||36||ए॒वा न॑: सोम परिषि॒च्यमा॑न॒ आ प॑वस्व पू॒यमा॑नः स्व॒स्ति ।
इन्द्र॒मा वि॑श बृह॒ता रवे॑ण व॒र्धया॒ वाचं॑ ज॒नया॒ पुरं॑धिम्
ā jāgṛ̍vi̱rvipra̍ ṛ̱tā ma̍tī̱nāṃ soma̍: punā̱no a̍sadacca̱mūṣu̍ |
sapa̍nti̱ yaṃ mi̍thu̱nāso̱ nikā̍mā adhva̱ryavo̍ rathi̱rāsa̍: su̱hastā̍:
||37||आ जागृ॑वि॒र्विप्र॑ ऋ॒ता म॑ती॒नां सोम॑: पुना॒नो अ॑सदच्च॒मूषु॑ ।
सप॑न्ति॒ यं मि॑थु॒नासो॒ निका॑मा अध्व॒र्यवो॑ रथि॒रास॑: सु॒हस्ता॑:
sa pu̍nā̱na upa̱ sūre̱ na dhātobhe a̍prā̱ roda̍sī̱ vi ṣa ā̍vaḥ |
pri̱yā ci̱dyasya̍ priya̱sāsa̍ ū̱tī sa tū dhana̍ṃ kā̱riṇe̱ na pra ya̍ṃsat
||38||स पु॑ना॒न उप॒ सूरे॒ न धातोभे अ॑प्रा॒ रोद॑सी॒ वि ष आ॑वः ।
प्रि॒या चि॒द्यस्य॑ प्रिय॒सास॑ ऊ॒ती स तू धनं॑ का॒रिणे॒ न प्र यं॑सत्
sa va̍rdhi̱tā vardha̍naḥ pū̱yamā̍na̱: somo̍ mī̱ḍhvām̐ a̱bhi no̱ jyoti̍ṣāvīt |
yenā̍ na̱: pūrve̍ pi̱tara̍: pada̱jñāḥ sva̱rvido̍ a̱bhi gā adri̍mu̱ṣṇan
||39||स व॑र्धि॒ता वर्ध॑नः पू॒यमा॑न॒: सोमो॑ मी॒ढ्वाँ अ॒भि नो॒ ज्योति॑षावीत् ।
येना॑ न॒: पूर्वे॑ पि॒तर॑: पद॒ज्ञाः स्व॒र्विदो॑ अ॒भि गा अद्रि॑मु॒ष्णन्
akrā̍ntsamu̱draḥ pra̍tha̱me vidha̍rmañja̱naya̍npra̱jā bhuva̍nasya̱ rājā̍ |
vṛṣā̍ pa̱vitre̱ adhi̱ sāno̱ avye̍ bṛ̱hatsomo̍ vāvṛdhe suvā̱na indu̍:
||40||अक्रा॑न्त्समु॒द्रः प्र॑थ॒मे विध॑र्मञ्ज॒नय॑न्प्र॒जा भुव॑नस्य॒ राजा॑ ।
वृषा॑ प॒वित्रे॒ अधि॒ सानो॒ अव्ये॑ बृ॒हत्सोमो॑ वावृधे सुवा॒न इन्दु॑:
ma̱hattatsomo̍ mahi̱ṣaśca̍kārā̱'pāṃ yadgarbho'vṛ̍ṇīta de̱vān |
ada̍dhā̱dindre̱ pava̍māna̱ ojo'ja̍naya̱tsūrye̱ jyoti̱rindu̍:
||41||म॒हत्तत्सोमो॑ महि॒षश्च॑कारा॒ऽपां यद्गर्भोऽवृ॑णीत दे॒वान् ।
अद॑धा॒दिन्द्रे॒ पव॑मान॒ ओजोऽज॑नय॒त्सूर्ये॒ ज्योति॒रिन्दु॑:
matsi̍ vā̱yumi̱ṣṭaye̱ rādha̍se ca̱ matsi̍ mi̱trāvaru̍ṇā pū̱yamā̍naḥ |
matsi̱ śardho̱ māru̍ta̱ṃ matsi̍ de̱vānmatsi̱ dyāvā̍pṛthi̱vī de̍va soma
||42||मत्सि॑ वा॒युमि॒ष्टये॒ राध॑से च॒ मत्सि॑ मि॒त्रावरु॑णा पू॒यमा॑नः ।
मत्सि॒ शर्धो॒ मारु॑तं॒ मत्सि॑ दे॒वान्मत्सि॒ द्यावा॑पृथि॒वी दे॑व सोम
ṛ̱juḥ pa̍vasva vṛji̱nasya̍ ha̱ntā'pāmī̍vā̱ṃ bādha̍māno̱ mṛdha̍śca |
a̱bhi̱śrī̱ṇanpaya̱: paya̍sā̱bhi gonā̱mindra̍sya̱ tvaṃ tava̍ va̱yaṃ sakhā̍yaḥ
||43||ऋ॒जुः प॑वस्व वृजि॒नस्य॑ ह॒न्ताऽपामी॑वां॒ बाध॑मानो॒ मृध॑श्च ।
अ॒भि॒श्री॒णन्पय॒: पय॑सा॒भि गोना॒मिन्द्र॑स्य॒ त्वं तव॑ व॒यं सखा॑यः
madhva̱: sūda̍ṃ pavasva̱ vasva̱ utsa̍ṃ vī̱raṃ ca̍ na̱ ā pa̍vasvā̱ bhaga̍ṃ ca |
svada̱svendrā̍ya̱ pava̍māna indo ra̱yiṃ ca̍ na̱ ā pa̍vasvā samu̱drāt
||44||मध्व॒: सूदं॑ पवस्व॒ वस्व॒ उत्सं॑ वी॒रं च॑ न॒ आ प॑वस्वा॒ भगं॑ च ।
स्वद॒स्वेन्द्रा॑य॒ पव॑मान इन्दो र॒यिं च॑ न॒ आ प॑वस्वा समु॒द्रात्
soma̍: su̱to dhāra̱yātyo̱ na hitvā̱ sindhu̱rna ni̱mnama̱bhi vā̱jya̍kṣāḥ |
ā yoni̱ṃ vanya̍masadatpunā̱naḥ samindu̱rgobhi̍rasara̱tsama̱dbhiḥ
||45||सोम॑: सु॒तो धार॒यात्यो॒ न हित्वा॒ सिन्धु॒र्न नि॒म्नम॒भि वा॒ज्य॑क्षाः ।
आ योनिं॒ वन्य॑मसदत्पुना॒नः समिन्दु॒र्गोभि॑रसर॒त्सम॒द्भिः
e̱ṣa sya te̍ pavata indra̱ soma̍śca̱mūṣu̱ dhīra̍ uśa̱te tava̍svān |
sva̍rcakṣā rathi̱raḥ sa̱tyaśu̍ṣma̱: kāmo̱ na yo de̍vaya̱tāmasa̍rji
||46||ए॒ष स्य ते॑ पवत इन्द्र॒ सोम॑श्च॒मूषु॒ धीर॑ उश॒ते तव॑स्वान् ।
स्व॑र्चक्षा रथि॒रः स॒त्यशु॑ष्म॒: कामो॒ न यो दे॑वय॒तामस॑र्जि
e̱ṣa pra̱tnena̱ vaya̍sā punā̱nasti̱ro varpā̍ṃsi duhi̱turdadhā̍naḥ |
vasā̍na̱: śarma̍ tri̱varū̍thama̱psu hote̍va yāti̱ sama̍neṣu̱ rebha̍n
||47||ए॒ष प्र॒त्नेन॒ वय॑सा पुना॒नस्ति॒रो वर्पां॑सि दुहि॒तुर्दधा॑नः ।
वसा॑न॒: शर्म॑ त्रि॒वरू॑थम॒प्सु होते॑व याति॒ सम॑नेषु॒ रेभ॑न्
nū na̱stvaṃ ra̍thi̱ro de̍va soma̱ pari̍ srava ca̱mvo̍: pū̱yamā̍naḥ |
a̱psu svādi̍ṣṭho̱ madhu̍mām̐ ṛ̱tāvā̍ de̱vo na yaḥ sa̍vi̱tā sa̱tyama̍nmā
||48||नू न॒स्त्वं र॑थि॒रो दे॑व सोम॒ परि॑ स्रव च॒म्वो॑: पू॒यमा॑नः ।
अ॒प्सु स्वादि॑ष्ठो॒ मधु॑माँ ऋ॒तावा॑ दे॒वो न यः स॑वि॒ता स॒त्यम॑न्मा
a̱bhi vā̱yuṃ vī̱tya̍rṣā gṛṇā̱no̱3'bhi mi̱trāvaru̍ṇā pū̱yamā̍naḥ |
a̱bhī nara̍ṃ dhī̱java̍naṃ rathe̱ṣṭhāma̱bhīndra̱ṃ vṛṣa̍ṇa̱ṃ vajra̍bāhum
||49||अ॒भि वा॒युं वी॒त्य॑र्षा गृणा॒नो॒३ऽभि मि॒त्रावरु॑णा पू॒यमा॑नः ।
अ॒भी नरं॑ धी॒जव॑नं रथे॒ष्ठाम॒भीन्द्रं॒ वृष॑णं॒ वज्र॑बाहुम्
a̱bhi vastrā̍ suvasa̱nānya̍rṣā̱'bhi dhe̱nūḥ su̱dughā̍: pū̱yamā̍naḥ |
a̱bhi ca̱ndrā bharta̍ve no̱ hira̍ṇyā̱'bhyaśvā̍nra̱thino̍ deva soma
||50||अ॒भि वस्त्रा॑ सुवस॒नान्य॑र्षा॒ऽभि धे॒नूः सु॒दुघा॑: पू॒यमा॑नः ।
अ॒भि च॒न्द्रा भर्त॑वे नो॒ हिर॑ण्या॒ऽभ्यश्वा॑न्र॒थिनो॑ देव सोम
a̱bhī no̍ arṣa di̱vyā vasū̍nya̱bhi viśvā̱ pārthi̍vā pū̱yamā̍naḥ |
a̱bhi yena̱ dravi̍ṇama̱śnavā̍mā̱'bhyā̍rṣe̱yaṃ ja̍madagni̱vanna̍:
||51||अ॒भी नो॑ अर्ष दि॒व्या वसू॑न्य॒भि विश्वा॒ पार्थि॑वा पू॒यमा॑नः ।
अ॒भि येन॒ द्रवि॑णम॒श्नवा॑मा॒ऽभ्या॑र्षे॒यं ज॑मदग्नि॒वन्न॑:
a̱yā pa̱vā pa̍vasvai̱nā vasū̍ni mām̐śca̱tva i̍ndo̱ sara̍si̱ pra dha̍nva |
bra̱dhnaści̱datra̱ vāto̱ na jū̱taḥ pu̍ru̱medha̍ści̱ttaka̍ve̱ nara̍ṃ dāt
||52||अ॒या प॒वा प॑वस्वै॒ना वसू॑नि माँश्च॒त्व इ॑न्दो॒ सर॑सि॒ प्र ध॑न्व ।
ब्र॒ध्नश्चि॒दत्र॒ वातो॒ न जू॒तः पु॑रु॒मेध॑श्चि॒त्तक॑वे॒ नरं॑ दात्
u̱ta na̍ e̱nā pa̍va̱yā pa̍va̱svā'dhi̍ śru̱te śra̱vāyya̍sya tī̱rthe |
ṣa̱ṣṭiṃ sa̱hasrā̍ naigu̱to vasū̍ni vṛ̱kṣaṃ na pa̱kvaṃ dhū̍nava̱draṇā̍ya
||53||उ॒त न॑ ए॒ना प॑व॒या प॑व॒स्वाऽधि॑ श्रु॒ते श्र॒वाय्य॑स्य ती॒र्थे ।
ष॒ष्टिं स॒हस्रा॑ नैगु॒तो वसू॑नि वृ॒क्षं न प॒क्वं धू॑नव॒द्रणा॑य
mahī̱me a̍sya̱ vṛṣa̱nāma̍ śū̱ṣe mām̐śca̍tve vā̱ pṛśa̍ne vā̱ vadha̍tre |
asvā̍payanni̱guta̍: sne̱haya̱ccā'pā̱mitrā̱m̐ apā̱cito̍ ace̱taḥ
||54||मही॒मे अ॑स्य॒ वृष॒नाम॑ शू॒षे माँश्च॑त्वे वा॒ पृश॑ने वा॒ वध॑त्रे ।
अस्वा॑पयन्नि॒गुत॑: स्ने॒हय॒च्चाऽपा॒मित्राँ॒ अपा॒चितो॑ अचे॒तः
saṃ trī pa̱vitrā̱ vita̍tānye̱ṣyanveka̍ṃ dhāvasi pū̱yamā̍naḥ |
asi̱ bhago̱ asi̍ dā̱trasya̍ dā̱tā'si̍ ma̱ghavā̍ ma̱ghava̍dbhya indo
||55||सं त्री प॒वित्रा॒ वित॑तान्ये॒ष्यन्वेकं॑ धावसि पू॒यमा॑नः ।
असि॒ भगो॒ असि॑ दा॒त्रस्य॑ दा॒ताऽसि॑ म॒घवा॑ म॒घव॑द्भ्य इन्दो
e̱ṣa vi̍śva̱vitpa̍vate manī̱ṣī somo̱ viśva̍sya̱ bhuva̍nasya̱ rājā̍ |
dra̱psām̐ ī̱raya̍nvi̱dathe̱ṣvindu̱rvi vāra̱mavya̍ṃ sa̱mayāti̍ yāti
||56||ए॒ष वि॑श्व॒वित्प॑वते मनी॒षी सोमो॒ विश्व॑स्य॒ भुव॑नस्य॒ राजा॑ ।
द्र॒प्साँ ई॒रय॑न्वि॒दथे॒ष्विन्दु॒र्वि वार॒मव्यं॑ स॒मयाति॑ याति
indu̍ṃ rihanti mahi̱ṣā ada̍bdhāḥ pa̱de re̍bhanti ka̱vayo̱ na gṛdhrā̍: |
hi̱nvanti̱ dhīrā̍ da̱śabhi̱: kṣipā̍bhi̱: sama̍ñjate rū̱pama̱pāṃ rase̍na
||57||इन्दुं॑ रिहन्ति महि॒षा अद॑ब्धाः प॒दे रे॑भन्ति क॒वयो॒ न गृध्रा॑: ।
हि॒न्वन्ति॒ धीरा॑ द॒शभि॒: क्षिपा॑भि॒: सम॑ञ्जते रू॒पम॒पां रसे॑न
tvayā̍ va̱yaṃ pava̍mānena soma̱ bhare̍ kṛ̱taṃ vi ci̍nuyāma̱ śaśva̍t |
tanno̍ mi̱tro varu̍ṇo māmahantā̱madi̍ti̱: sindhu̍: pṛthi̱vī u̱ta dyauḥ
||58||त्वया॑ व॒यं पव॑मानेन सोम॒ भरे॑ कृ॒तं वि चि॑नुयाम॒ शश्व॑त् ।
तन्नो॑ मि॒त्रो वरु॑णो मामहन्ता॒मदि॑ति॒: सिन्धु॑: पृथि॒वी उ॒त द्यौः