Study
- Anukramaṇī
- Source
30 amahīyurāṅgirasa: | pavamāna: soma: | gāyatrī |
a̱yā vī̱tī pari̍ srava̱ yasta̍ indo̱ made̱ṣvā | a̱vāha̍nnava̱tīrnava̍
||1||अ॒या वी॒ती परि॑ स्रव॒ यस्त॑ इन्दो॒ मदे॒ष्वा । अ॒वाह॑न्नव॒तीर्नव॑
pura̍: sa̱dya i̱tthādhi̍ye̱ divo̍dāsāya̱ śamba̍ram | adha̱ tyaṃ tu̱rvaśa̱ṃ yadu̍m
||2||पुर॑: स॒द्य इ॒त्थाधि॑ये॒ दिवो॑दासाय॒ शम्ब॑रम् । अध॒ त्यं तु॒र्वशं॒ यदु॑म्
pari̍ ṇo̱ aśva̍maśva̱vidgoma̍dindo̱ hira̍ṇyavat | kṣarā̍ saha̱sriṇī̱riṣa̍:
||3||परि॑ णो॒ अश्व॑मश्व॒विद्गोम॑दिन्दो॒ हिर॑ण्यवत् । क्षरा॑ सह॒स्रिणी॒रिष॑:
pava̍mānasya te va̱yaṃ pa̱vitra̍mabhyunda̱taḥ | sa̱khi̱tvamā vṛ̍ṇīmahe
||4||पव॑मानस्य ते व॒यं प॒वित्र॑मभ्युन्द॒तः । स॒खि॒त्वमा वृ॑णीमहे
ye te̍ pa̱vitra̍mū̱rmayo̍'bhi̱kṣara̍nti̱ dhāra̍yā | tebhi̍rnaḥ soma mṛl̤aya
||5||ये ते॑ प॒वित्र॑मू॒र्मयो॑ऽभि॒क्षर॑न्ति॒ धार॑या । तेभि॑र्नः सोम मृळय
sa na̍: punā̱na ā bha̍ra ra̱yiṃ vī̱rava̍tī̱miṣa̍m | īśā̍naḥ soma vi̱śvata̍:
||6||स न॑: पुना॒न आ भ॑र र॒यिं वी॒रव॑ती॒मिष॑म् । ईशा॑नः सोम वि॒श्वत॑:
e̱tamu̱ tyaṃ daśa̱ kṣipo̍ mṛ̱janti̱ sindhu̍mātaram | samā̍di̱tyebhi̍rakhyata
||7||ए॒तमु॒ त्यं दश॒ क्षिपो॑ मृ॒जन्ति॒ सिन्धु॑मातरम् । समा॑दि॒त्येभि॑रख्यत
samindre̍ṇo̱ta vā̱yunā̍ su̱ta e̍ti pa̱vitra̱ ā | saṃ sūrya̍sya ra̱śmibhi̍:
||8||समिन्द्रे॑णो॒त वा॒युना॑ सु॒त ए॑ति प॒वित्र॒ आ । सं सूर्य॑स्य र॒श्मिभि॑:
sa no̱ bhagā̍ya vā̱yave̍ pū̱ṣṇe pa̍vasva̱ madhu̍mān | cāru̍rmi̱tre varu̍ṇe ca
||9||स नो॒ भगा॑य वा॒यवे॑ पू॒ष्णे प॑वस्व॒ मधु॑मान् । चारु॑र्मि॒त्रे वरु॑णे च
u̱ccā te̍ jā̱tamandha̍so di̱vi ṣadbhūmyā da̍de | u̱graṃ śarma̱ mahi̱ śrava̍:
||10||उ॒च्चा ते॑ जा॒तमन्ध॑सो दि॒वि षद्भूम्या द॑दे । उ॒ग्रं शर्म॒ महि॒ श्रव॑:
e̱nā viśvā̍nya̱rya ā dyu̱mnāni̱ mānu̍ṣāṇām | siṣā̍santo vanāmahe
||11||ए॒ना विश्वा॑न्य॒र्य आ द्यु॒म्नानि॒ मानु॑षाणाम् । सिषा॑सन्तो वनामहे
sa na̱ indrā̍ya̱ yajya̍ve̱ varu̍ṇāya ma̱rudbhya̍: | va̱ri̱vo̱vitpari̍ srava
||12||स न॒ इन्द्रा॑य॒ यज्य॑वे॒ वरु॑णाय म॒रुद्भ्य॑: । व॒रि॒वो॒वित्परि॑ स्रव
upo̱ ṣu jā̱tama̱ptura̱ṃ gobhi̍rbha̱ṅgaṃ pari̍ṣkṛtam | indu̍ṃ de̱vā a̍yāsiṣuḥ
||13||उपो॒ षु जा॒तम॒प्तुरं॒ गोभि॑र्भ॒ङ्गं परि॑ष्कृतम् । इन्दुं॑ दे॒वा अ॑यासिषुः
tamidva̍rdhantu no̱ giro̍ va̱tsaṃ sa̱ṃśiśva̍rīriva | ya indra̍sya hṛda̱ṃsani̍:
||14||तमिद्व॑र्धन्तु नो॒ गिरो॑ व॒त्सं सं॒शिश्व॑रीरिव । य इन्द्र॑स्य हृदं॒सनि॑:
arṣā̍ ṇaḥ soma̱ śaṃ gave̍ dhu̱kṣasva̍ pi̱pyuṣī̱miṣa̍m | vardhā̍ samu̱dramu̱kthya̍m
||15||अर्षा॑ णः सोम॒ शं गवे॑ धु॒क्षस्व॑ पि॒प्युषी॒मिष॑म् । वर्धा॑ समु॒द्रमु॒क्थ्य॑म्
pava̍māno ajījanaddi̱vaści̱traṃ na ta̍nya̱tum | jyoti̍rvaiśvāna̱raṃ bṛ̱hat
||16||पव॑मानो अजीजनद्दि॒वश्चि॒त्रं न त॑न्य॒तुम् । ज्योति॑र्वैश्वान॒रं बृ॒हत्
pava̍mānasya te̱ raso̱ mado̍ rājannaducchu̱naḥ | vi vāra̱mavya̍marṣati
||17||पव॑मानस्य ते॒ रसो॒ मदो॑ राजन्नदुच्छु॒नः । वि वार॒मव्य॑मर्षति
pava̍māna̱ rasa̱stava̱ dakṣo̱ vi rā̍jati dyu̱mān | jyoti̱rviśva̱ṃ sva̍rdṛ̱śe
||18||पव॑मान॒ रस॒स्तव॒ दक्षो॒ वि रा॑जति द्यु॒मान् । ज्योति॒र्विश्वं॒ स्व॑र्दृ॒शे
yaste̱ mado̱ vare̍ṇya̱stenā̍ pava̱svāndha̍sā | de̱vā̱vīra̍ghaśaṃsa̱hā
||19||यस्ते॒ मदो॒ वरे॑ण्य॒स्तेना॑ पव॒स्वान्ध॑सा । दे॒वा॒वीर॑घशंस॒हा
jaghni̍rvṛ̱trama̍mi̱triya̱ṃ sasni̱rvāja̍ṃ di̱vedi̍ve | go̱ṣā u̍ aśva̱sā a̍si
||20||जघ्नि॑र्वृ॒त्रम॑मि॒त्रियं॒ सस्नि॒र्वाजं॑ दि॒वेदि॑वे । गो॒षा उ॑ अश्व॒सा अ॑सि
sammi̍ślo aru̱ṣo bha̍va sūpa̱sthābhi̱rna dhe̱nubhi̍: | sīda̍ñchye̱no na yoni̱mā
||21||सम्मि॑श्लो अरु॒षो भ॑व सूप॒स्थाभि॒र्न धे॒नुभि॑: । सीद॑ञ्छ्ये॒नो न योनि॒मा
sa pa̍vasva̱ ya āvi̱thendra̍ṃ vṛ̱trāya̱ hanta̍ve | va̱vri̱vāṃsa̍ṃ ma̱hīra̱paḥ
||22||स प॑वस्व॒ य आवि॒थेन्द्रं॑ वृ॒त्राय॒ हन्त॑वे । व॒व्रि॒वांसं॑ म॒हीर॒पः
su̱vīrā̍so va̱yaṃ dhanā̱ jaye̍ma soma mīḍhvaḥ | pu̱nā̱no va̍rdha no̱ gira̍:
||23||सु॒वीरा॑सो व॒यं धना॒ जये॑म सोम मीढ्वः । पु॒ना॒नो व॑र्ध नो॒ गिर॑:
tvotā̍sa̱stavāva̍sā̱ syāma̍ va̱nvanta̍ ā̱mura̍: | soma̍ vra̱teṣu̍ jāgṛhi
||24||त्वोता॑स॒स्तवाव॑सा॒ स्याम॑ व॒न्वन्त॑ आ॒मुर॑: । सोम॑ व्र॒तेषु॑ जागृहि
a̱pa̱ghnanpa̍vate̱ mṛdho'pa̱ somo̱ arā̍vṇaḥ | gaccha̱nnindra̍sya niṣkṛ̱tam
||25||अ॒प॒घ्नन्प॑वते॒ मृधोऽप॒ सोमो॒ अरा॑व्णः । गच्छ॒न्निन्द्र॑स्य निष्कृ॒तम्
ma̱ho no̍ rā̱ya ā bha̍ra̱ pava̍māna ja̱hī mṛdha̍: | rāsve̍ndo vī̱rava̱dyaśa̍:
||26||म॒हो नो॑ रा॒य आ भ॑र॒ पव॑मान ज॒ही मृध॑: । रास्वे॑न्दो वी॒रव॒द्यश॑:
na tvā̍ śa̱taṃ ca̱na hruto̱ rādho̱ ditsa̍nta̱mā mi̍nan | yatpu̍nā̱no ma̍kha̱syase̍
||27||न त्वा॑ श॒तं च॒न ह्रुतो॒ राधो॒ दित्स॑न्त॒मा मि॑नन् । यत्पु॑ना॒नो म॑ख॒स्यसे॑
pava̍svendo̱ vṛṣā̍ su̱taḥ kṛ̱dhī no̍ ya̱śaso̱ jane̍ | viśvā̱ apa̱ dviṣo̍ jahi
||28||पव॑स्वेन्दो॒ वृषा॑ सु॒तः कृ॒धी नो॑ य॒शसो॒ जने॑ । विश्वा॒ अप॒ द्विषो॑ जहि
asya̍ te sa̱khye va̱yaṃ tave̍ndo dyu̱mna u̍tta̱me | sā̱sa̱hyāma̍ pṛtanya̱taḥ
||29||अस्य॑ ते स॒ख्ये व॒यं तवे॑न्दो द्यु॒म्न उ॑त्त॒मे । सा॒स॒ह्याम॑ पृतन्य॒तः
yā te̍ bhī̱mānyāyu̍dhā ti̱gmāni̱ santi̱ dhūrva̍ṇe | rakṣā̍ samasya no ni̱daḥ
||30||या ते॑ भी॒मान्यायु॑धा ति॒ग्मानि॒ सन्ति॒ धूर्व॑णे । रक्षा॑ समस्य नो नि॒दः