Study
- Anukramaṇī
- Source
(1-48 ) 1-10 akṛṣṭā māṣā:, 11-20 sikatā nivāvarī, 21-30 pṛśniyo'jā:, 31-40 akṛṣṭamāṣādayastraya:,41-45 bhaumo'tri:, 46-48 gṛtsamada: śaunaka: | pavamāna: soma: |jagatī |
pra ta̍ ā̱śava̍: pavamāna dhī̱javo̱ madā̍ arṣanti raghu̱jā i̍va̱ tmanā̍ |
di̱vyāḥ su̍pa̱rṇā madhu̍manta̱ inda̍vo ma̱dinta̍māsa̱: pari̱ kośa̍māsate
||1||प्र त॑ आ॒शव॑: पवमान धी॒जवो॒ मदा॑ अर्षन्ति रघु॒जा इ॑व॒ त्मना॑ ।
दि॒व्याः सु॑प॒र्णा मधु॑मन्त॒ इन्द॑वो म॒दिन्त॑मास॒: परि॒ कोश॑मासते
pra te̱ madā̍so madi̱rāsa̍ ā̱śavo'sṛ̍kṣata̱ rathyā̍so̱ yathā̱ pṛtha̍k |
dhe̱nurna va̱tsaṃ paya̍sā̱bhi va̱jriṇa̱mindra̱minda̍vo̱ madhu̍manta ū̱rmaya̍:
||2||प्र ते॒ मदा॑सो मदि॒रास॑ आ॒शवोऽसृ॑क्षत॒ रथ्या॑सो॒ यथा॒ पृथ॑क् ।
धे॒नुर्न व॒त्सं पय॑सा॒भि व॒ज्रिण॒मिन्द्र॒मिन्द॑वो॒ मधु॑मन्त ऊ॒र्मय॑:
atyo̱ na hi̍yā̱no a̱bhi vāja̍marṣa sva̱rvitkośa̍ṃ di̱vo adri̍mātaram |
vṛṣā̍ pa̱vitre̱ adhi̱ sāno̍ a̱vyaye̱ soma̍: punā̱na i̍ndri̱yāya̱ dhāya̍se
||3||अत्यो॒ न हि॑या॒नो अ॒भि वाज॑मर्ष स्व॒र्वित्कोशं॑ दि॒वो अद्रि॑मातरम् ।
वृषा॑ प॒वित्रे॒ अधि॒ सानो॑ अ॒व्यये॒ सोम॑: पुना॒न इ॑न्द्रि॒याय॒ धाय॑से
pra ta̱ āśvi̍nīḥ pavamāna dhī̱juvo̍ di̱vyā a̍sṛgra̱npaya̍sā̱ dharī̍maṇi |
prāntaṝṣa̍ya̱: sthāvi̍rīrasṛkṣata̱ ye tvā̍ mṛ̱jantyṛ̍ṣiṣāṇa ve̱dhasa̍:
||4||प्र त॒ आश्वि॑नीः पवमान धी॒जुवो॑ दि॒व्या अ॑सृग्र॒न्पय॑सा॒ धरी॑मणि ।
प्रान्तॠष॑य॒: स्थावि॑रीरसृक्षत॒ ये त्वा॑ मृ॒जन्त्यृ॑षिषाण वे॒धस॑:
viśvā̱ dhāmā̍ni viśvacakṣa̱ ṛbhva̍saḥ pra̱bhoste̍ sa̱taḥ pari̍ yanti ke̱tava̍: |
vyā̱na̱śiḥ pa̍vase soma̱ dharma̍bhi̱: pati̱rviśva̍sya̱ bhuva̍nasya rājasi
||5||विश्वा॒ धामा॑नि विश्वचक्ष॒ ऋभ्व॑सः प्र॒भोस्ते॑ स॒तः परि॑ यन्ति के॒तव॑: ।
व्या॒न॒शिः प॑वसे सोम॒ धर्म॑भि॒: पति॒र्विश्व॑स्य॒ भुव॑नस्य राजसि
u̱bha̱yata̱: pava̍mānasya ra̱śmayo̍ dhru̱vasya̍ sa̱taḥ pari̍ yanti ke̱tava̍: |
yadī̍ pa̱vitre̱ adhi̍ mṛ̱jyate̱ hari̱: sattā̱ ni yonā̍ ka̱laśe̍ṣu sīdati
||6||उ॒भ॒यत॒: पव॑मानस्य र॒श्मयो॑ ध्रु॒वस्य॑ स॒तः परि॑ यन्ति के॒तव॑: ।
यदी॑ प॒वित्रे॒ अधि॑ मृ॒ज्यते॒ हरि॒: सत्ता॒ नि योना॑ क॒लशे॑षु सीदति
ya̱jñasya̍ ke̱tuḥ pa̍vate svadhva̱raḥ somo̍ de̱vānā̱mupa̍ yāti niṣkṛ̱tam |
sa̱hasra̍dhāra̱: pari̱ kośa̍marṣati̱ vṛṣā̍ pa̱vitra̱matye̍ti̱ roru̍vat
||7||य॒ज्ञस्य॑ के॒तुः प॑वते स्वध्व॒रः सोमो॑ दे॒वाना॒मुप॑ याति निष्कृ॒तम् ।
स॒हस्र॑धार॒: परि॒ कोश॑मर्षति॒ वृषा॑ प॒वित्र॒मत्ये॑ति॒ रोरु॑वत्
rājā̍ samu̱draṃ na̱dyo̱3 vi gā̍hate̱'pāmū̱rmiṃ sa̍cate̱ sindhu̍ṣu śri̱taḥ |
adhya̍sthā̱tsānu̱ pava̍māno a̱vyaya̱ṃ nābhā̍ pṛthi̱vyā dha̱ruṇo̍ ma̱ho di̱vaḥ
||8||राजा॑ समु॒द्रं न॒द्यो॒३ वि गा॑हते॒ऽपामू॒र्मिं स॑चते॒ सिन्धु॑षु श्रि॒तः ।
अध्य॑स्था॒त्सानु॒ पव॑मानो अ॒व्ययं॒ नाभा॑ पृथि॒व्या ध॒रुणो॑ म॒हो दि॒वः
di̱vo na sānu̍ sta̱naya̍nnacikrada̱ddyauśca̱ yasya̍ pṛthi̱vī ca̱ dharma̍bhiḥ |
indra̍sya sa̱khyaṃ pa̍vate vi̱vevi̍da̱tsoma̍: punā̱naḥ ka̱laśe̍ṣu sīdati
||9||दि॒वो न सानु॑ स्त॒नय॑न्नचिक्रद॒द्द्यौश्च॒ यस्य॑ पृथि॒वी च॒ धर्म॑भिः ।
इन्द्र॑स्य स॒ख्यं प॑वते वि॒वेवि॑द॒त्सोम॑: पुना॒नः क॒लशे॑षु सीदति
jyoti̍rya̱jñasya̍ pavate̱ madhu̍ pri̱yaṃ pi̱tā de̱vānā̍ṃ jani̱tā vi̱bhūva̍suḥ |
dadhā̍ti̱ ratna̍ṃ sva̱dhayo̍rapī̱cya̍ṃ ma̱dinta̍mo matsa̱ra i̍ndri̱yo rasa̍:
||10||ज्योति॑र्य॒ज्ञस्य॑ पवते॒ मधु॑ प्रि॒यं पि॒ता दे॒वानां॑ जनि॒ता वि॒भूव॑सुः ।
दधा॑ति॒ रत्नं॑ स्व॒धयो॑रपी॒च्यं॑ म॒दिन्त॑मो मत्स॒र इ॑न्द्रि॒यो रस॑:
a̱bhi̱kranda̍nka̱laśa̍ṃ vā̱jya̍rṣati̱ pati̍rdi̱vaḥ śa̱tadhā̍ro vicakṣa̱ṇaḥ |
hari̍rmi̱trasya̱ sada̍neṣu sīdati marmṛjā̱no'vi̍bhi̱: sindhu̍bhi̱rvṛṣā̍
||11||अ॒भि॒क्रन्द॑न्क॒लशं॑ वा॒ज्य॑र्षति॒ पति॑र्दि॒वः श॒तधा॑रो विचक्ष॒णः ।
हरि॑र्मि॒त्रस्य॒ सद॑नेषु सीदति मर्मृजा॒नोऽवि॑भि॒: सिन्धु॑भि॒र्वृषा॑
agre̱ sindhū̍nā̱ṃ pava̍māno arṣa̱tyagre̍ vā̱co a̍gri̱yo goṣu̍ gacchati |
agre̱ vāja̍sya bhajate mahādha̱naṃ svā̍yu̱dhaḥ so̱tṛbhi̍: pūyate̱ vṛṣā̍
||12||अग्रे॒ सिन्धू॑नां॒ पव॑मानो अर्ष॒त्यग्रे॑ वा॒चो अ॑ग्रि॒यो गोषु॑ गच्छति ।
अग्रे॒ वाज॑स्य भजते महाध॒नं स्वा॑यु॒धः सो॒तृभि॑: पूयते॒ वृषा॑
a̱yaṃ ma̱tavā̍ñchaku̱no yathā̍ hi̱to'vye̍ sasāra̱ pava̍māna ū̱rmiṇā̍ |
tava̱ kratvā̱ roda̍sī anta̱rā ka̍ve̱ śuci̍rdhi̱yā pa̍vate̱ soma̍ indra te
||13||अ॒यं म॒तवा॑ञ्छकु॒नो यथा॑ हि॒तोऽव्ये॑ ससार॒ पव॑मान ऊ॒र्मिणा॑ ।
तव॒ क्रत्वा॒ रोद॑सी अन्त॒रा क॑वे॒ शुचि॑र्धि॒या प॑वते॒ सोम॑ इन्द्र ते
drā̱piṃ vasā̍no yaja̱to di̍vi̱spṛśa̍mantarikṣa̱prā bhuva̍ne̱ṣvarpi̍taḥ |
sva̍rjajñā̱no nabha̍sā̱bhya̍kramītpra̱tnama̍sya pi̱tara̱mā vi̍vāsati
||14||द्रा॒पिं वसा॑नो यज॒तो दि॑वि॒स्पृश॑मन्तरिक्ष॒प्रा भुव॑ने॒ष्वर्पि॑तः ।
स्व॑र्जज्ञा॒नो नभ॑सा॒भ्य॑क्रमीत्प्र॒त्नम॑स्य पि॒तर॒मा वि॑वासति
so a̍sya vi̱śe mahi̱ śarma̍ yacchati̱ yo a̍sya̱ dhāma̍ pratha̱maṃ vyā̍na̱śe |
pa̱daṃ yada̍sya para̱me vyo̍ma̱nyato̱ viśvā̍ a̱bhi saṃ yā̍ti sa̱ṃyata̍:
||15||सो अ॑स्य वि॒शे महि॒ शर्म॑ यच्छति॒ यो अ॑स्य॒ धाम॑ प्रथ॒मं व्या॑न॒शे ।
प॒दं यद॑स्य पर॒मे व्यो॑म॒न्यतो॒ विश्वा॑ अ॒भि सं या॑ति सं॒यत॑:
pro a̍yāsī̱dindu̱rindra̍sya niṣkṛ̱taṃ sakhā̱ sakhyu̱rna pra mi̍nāti sa̱ṃgira̍m |
marya̍ iva yuva̱tibhi̱: sama̍rṣati̱ soma̍: ka̱laśe̍ śa̱tayā̍mnā pa̱thā
||16||प्रो अ॑यासी॒दिन्दु॒रिन्द्र॑स्य निष्कृ॒तं सखा॒ सख्यु॒र्न प्र मि॑नाति सं॒गिर॑म् ।
मर्य॑ इव युव॒तिभि॒: सम॑र्षति॒ सोम॑: क॒लशे॑ श॒तया॑म्ना प॒था
pra vo̱ dhiyo̍ mandra̱yuvo̍ vipa̱nyuva̍: pana̱syuva̍: sa̱ṃvasa̍neṣvakramuḥ |
soma̍ṃ manī̱ṣā a̱bhya̍nūṣata̱ stubho̱'bhi dhe̱nava̱: paya̍semaśiśrayuḥ
||17||प्र वो॒ धियो॑ मन्द्र॒युवो॑ विप॒न्युव॑: पन॒स्युव॑: सं॒वस॑नेष्वक्रमुः ।
सोमं॑ मनी॒षा अ॒भ्य॑नूषत॒ स्तुभो॒ऽभि धे॒नव॒: पय॑सेमशिश्रयुः
ā na̍: soma sa̱ṃyata̍ṃ pi̱pyuṣī̱miṣa̱mindo̱ pava̍sva̱ pava̍māno a̱sridha̍m |
yā no̱ doha̍te̱ triraha̱nnasa̍ścuṣī kṣu̱madvāja̍va̱nmadhu̍matsu̱vīrya̍m
||18||आ न॑: सोम सं॒यतं॑ पि॒प्युषी॒मिष॒मिन्दो॒ पव॑स्व॒ पव॑मानो अ॒स्रिध॑म् ।
या नो॒ दोह॑ते॒ त्रिरह॒न्नस॑श्चुषी क्षु॒मद्वाज॑व॒न्मधु॑मत्सु॒वीर्य॑म्
vṛṣā̍ matī̱nāṃ pa̍vate vicakṣa̱ṇaḥ somo̱ ahna̍: pratarī̱toṣaso̍ di̱vaḥ |
krā̱ṇā sindhū̍nāṃ ka̱laśā̍m̐ avīvaśa̱dindra̍sya̱ hārdyā̍vi̱śanma̍nī̱ṣibhi̍:
||19||वृषा॑ मती॒नां प॑वते विचक्ष॒णः सोमो॒ अह्न॑: प्रतरी॒तोषसो॑ दि॒वः ।
क्रा॒णा सिन्धू॑नां क॒लशाँ॑ अवीवश॒दिन्द्र॑स्य॒ हार्द्या॑वि॒शन्म॑नी॒षिभि॑:
ma̱nī̱ṣibhi̍: pavate pū̱rvyaḥ ka̱virnṛbhi̍rya̱taḥ pari̱ kośā̍m̐ acikradat |
tri̱tasya̱ nāma̍ ja̱naya̱nmadhu̍ kṣara̱dindra̍sya vā̱yoḥ sa̱khyāya̱ karta̍ve
||20||म॒नी॒षिभि॑: पवते पू॒र्व्यः क॒विर्नृभि॑र्य॒तः परि॒ कोशाँ॑ अचिक्रदत् ।
त्रि॒तस्य॒ नाम॑ ज॒नय॒न्मधु॑ क्षर॒दिन्द्र॑स्य वा॒योः स॒ख्याय॒ कर्त॑वे
a̱yaṃ pu̍nā̱na u̱ṣaso̱ vi ro̍cayada̱yaṃ sindhu̍bhyo abhavadu loka̱kṛt |
a̱yaṃ triḥ sa̱pta du̍duhā̱na ā̱śira̱ṃ somo̍ hṛ̱de pa̍vate̱ cāru̍ matsa̱raḥ
||21||अ॒यं पु॑ना॒न उ॒षसो॒ वि रो॑चयद॒यं सिन्धु॑भ्यो अभवदु लोक॒कृत् ।
अ॒यं त्रिः स॒प्त दु॑दुहा॒न आ॒शिरं॒ सोमो॑ हृ॒दे प॑वते॒ चारु॑ मत्स॒रः
pava̍sva soma di̱vyeṣu̱ dhāma̍su sṛjā̱na i̍ndo ka̱laśe̍ pa̱vitra̱ ā |
sīda̱nnindra̍sya ja̱ṭhare̱ kani̍krada̱nnṛbhi̍rya̱taḥ sūrya̱māro̍hayo di̱vi
||22||पव॑स्व सोम दि॒व्येषु॒ धाम॑सु सृजा॒न इ॑न्दो क॒लशे॑ प॒वित्र॒ आ ।
सीद॒न्निन्द्र॑स्य ज॒ठरे॒ कनि॑क्रद॒न्नृभि॑र्य॒तः सूर्य॒मारो॑हयो दि॒वि
adri̍bhiḥ su̱taḥ pa̍vase pa̱vitra̱ ām̐ inda̱vindra̍sya ja̱ṭhare̍ṣvāvi̱śan |
tvaṃ nṛ̱cakṣā̍ abhavo vicakṣaṇa̱ soma̍ go̱tramaṅgi̍robhyo'vṛṇo̱rapa̍
||23||अद्रि॑भिः सु॒तः प॑वसे प॒वित्र॒ आँ इन्द॒विन्द्र॑स्य ज॒ठरे॑ष्वावि॒शन् ।
त्वं नृ॒चक्षा॑ अभवो विचक्षण॒ सोम॑ गो॒त्रमङ्गि॑रोभ्योऽवृणो॒रप॑
tvāṃ so̍ma̱ pava̍mānaṃ svā̱dhyo'nu̱ viprā̍so amadannava̱syava̍: |
tvāṃ su̍pa̱rṇa ābha̍raddi̱vasparīndo̱ viśvā̍bhirma̱tibhi̱: pari̍ṣkṛtam
||24||त्वां सो॑म॒ पव॑मानं स्वा॒ध्योऽनु॒ विप्रा॑सो अमदन्नव॒स्यव॑: ।
त्वां सु॑प॒र्ण आभ॑रद्दि॒वस्परीन्दो॒ विश्वा॑भिर्म॒तिभि॒: परि॑ष्कृतम्
avye̍ punā̱naṃ pari̱ vāra̍ ū̱rmiṇā̱ hari̍ṃ navante a̱bhi sa̱pta dhe̱nava̍: |
a̱pāmu̱pasthe̱ adhyā̱yava̍: ka̱vimṛ̱tasya̱ yonā̍ mahi̱ṣā a̍heṣata
||25||अव्ये॑ पुना॒नं परि॒ वार॑ ऊ॒र्मिणा॒ हरिं॑ नवन्ते अ॒भि स॒प्त धे॒नव॑: ।
अ॒पामु॒पस्थे॒ अध्या॒यव॑: क॒विमृ॒तस्य॒ योना॑ महि॒षा अ॑हेषत
indu̍: punā̱no ati̍ gāhate̱ mṛdho̱ viśvā̍ni kṛ̱ṇvantsu̱pathā̍ni̱ yajya̍ve |
gāḥ kṛ̍ṇvā̱no ni̱rṇija̍ṃ harya̱taḥ ka̱viratyo̱ na krīl̤a̱npari̱ vāra̍marṣati
||26||इन्दु॑: पुना॒नो अति॑ गाहते॒ मृधो॒ विश्वा॑नि कृ॒ण्वन्त्सु॒पथा॑नि॒ यज्य॑वे ।
गाः कृ॑ण्वा॒नो नि॒र्णिजं॑ हर्य॒तः क॒विरत्यो॒ न क्रीळ॒न्परि॒ वार॑मर्षति
a̱sa̱ścata̍: śa̱tadhā̍rā abhi̱śriyo̱ hari̍ṃ nava̱nte'va̱ tā u̍da̱nyuva̍: |
kṣipo̍ mṛjanti̱ pari̱ gobhi̱rāvṛ̍taṃ tṛ̱tīye̍ pṛ̱ṣṭhe adhi̍ roca̱ne di̱vaḥ
||27||अ॒स॒श्चत॑: श॒तधा॑रा अभि॒श्रियो॒ हरिं॑ नव॒न्तेऽव॒ ता उ॑द॒न्युव॑: ।
क्षिपो॑ मृजन्ति॒ परि॒ गोभि॒रावृ॑तं तृ॒तीये॑ पृ॒ष्ठे अधि॑ रोच॒ने दि॒वः
tave̱māḥ pra̱jā di̱vyasya̱ reta̍sa̱stvaṃ viśva̍sya̱ bhuva̍nasya rājasi |
athe̱daṃ viśva̍ṃ pavamāna te̱ vaśe̱ tvami̍ndo pratha̱mo dhā̍ma̱dhā a̍si
||28||तवे॒माः प्र॒जा दि॒व्यस्य॒ रेत॑स॒स्त्वं विश्व॑स्य॒ भुव॑नस्य राजसि ।
अथे॒दं विश्वं॑ पवमान ते॒ वशे॒ त्वमि॑न्दो प्रथ॒मो धा॑म॒धा अ॑सि
tvaṃ sa̍mu̱dro a̍si viśva̱vitka̍ve̱ tave̱māḥ pañca̍ pra̱diśo̱ vidha̍rmaṇi |
tvaṃ dyāṃ ca̍ pṛthi̱vīṃ cāti̍ jabhriṣe̱ tava̱ jyotī̍ṃṣi pavamāna̱ sūrya̍:
||29||त्वं स॑मु॒द्रो अ॑सि विश्व॒वित्क॑वे॒ तवे॒माः पञ्च॑ प्र॒दिशो॒ विध॑र्मणि ।
त्वं द्यां च॑ पृथि॒वीं चाति॑ जभ्रिषे॒ तव॒ ज्योतीं॑षि पवमान॒ सूर्य॑:
tvaṃ pa̱vitre̱ raja̍so̱ vidha̍rmaṇi de̱vebhya̍: soma pavamāna pūyase |
tvāmu̱śija̍: pratha̱mā a̍gṛbhṇata̱ tubhye̱mā viśvā̱ bhuva̍nāni yemire
||30||त्वं प॒वित्रे॒ रज॑सो॒ विध॑र्मणि दे॒वेभ्य॑: सोम पवमान पूयसे ।
त्वामु॒शिज॑: प्रथ॒मा अ॑गृभ्णत॒ तुभ्ये॒मा विश्वा॒ भुव॑नानि येमिरे
pra re̱bha e̱tyati̱ vāra̍ma̱vyaya̱ṃ vṛṣā̱ vane̱ṣvava̍ cakrada̱ddhari̍: |
saṃ dhī̱tayo̍ vāvaśā̱nā a̍nūṣata̱ śiśu̍ṃ rihanti ma̱taya̱: pani̍pnatam
||31||प्र रे॒भ ए॒त्यति॒ वार॑म॒व्ययं॒ वृषा॒ वने॒ष्वव॑ चक्रद॒द्धरि॑: ।
सं धी॒तयो॑ वावशा॒ना अ॑नूषत॒ शिशुं॑ रिहन्ति म॒तय॒: पनि॑प्नतम्
sa sūrya̍sya ra̱śmibhi̱: pari̍ vyata̱ tantu̍ṃ tanvā̱nastri̱vṛta̱ṃ yathā̍ vi̱de |
naya̍nnṛ̱tasya̍ pra̱śiṣo̱ navī̍yasī̱: pati̱rjanī̍nā̱mupa̍ yāti niṣkṛ̱tam
||32||स सूर्य॑स्य र॒श्मिभि॒: परि॑ व्यत॒ तन्तुं॑ तन्वा॒नस्त्रि॒वृतं॒ यथा॑ वि॒दे ।
नय॑न्नृ॒तस्य॑ प्र॒शिषो॒ नवी॑यसी॒: पति॒र्जनी॑ना॒मुप॑ याति निष्कृ॒तम्
rājā̱ sindhū̍nāṃ pavate̱ pati̍rdi̱va ṛ̱tasya̍ yāti pa̱thibhi̱: kani̍kradat |
sa̱hasra̍dhāra̱: pari̍ ṣicyate̱ hari̍: punā̱no vāca̍ṃ ja̱naya̱nnupā̍vasuḥ
||33||राजा॒ सिन्धू॑नां पवते॒ पति॑र्दि॒व ऋ॒तस्य॑ याति प॒थिभि॒: कनि॑क्रदत् ।
स॒हस्र॑धार॒: परि॑ षिच्यते॒ हरि॑: पुना॒नो वाचं॑ ज॒नय॒न्नुपा॑वसुः
pava̍māna̱ mahyarṇo̱ vi dhā̍vasi̱ sūro̱ na ci̱tro avya̍yāni̱ pavya̍yā |
gabha̍stipūto̱ nṛbhi̱radri̍bhiḥ su̱to ma̱he vājā̍ya̱ dhanyā̍ya dhanvasi
||34||पव॑मान॒ मह्यर्णो॒ वि धा॑वसि॒ सूरो॒ न चि॒त्रो अव्य॑यानि॒ पव्य॑या ।
गभ॑स्तिपूतो॒ नृभि॒रद्रि॑भिः सु॒तो म॒हे वाजा॑य॒ धन्या॑य धन्वसि
iṣa̱mūrja̍ṃ pavamānā̱bhya̍rṣasi śye̱no na vaṃsu̍ ka̱laśe̍ṣu sīdasi |
indrā̍ya̱ madvā̱ madyo̱ mada̍: su̱to di̱vo vi̍ṣṭa̱mbha u̍pa̱mo vi̍cakṣa̱ṇaḥ
||35||इष॒मूर्जं॑ पवमाना॒भ्य॑र्षसि श्ये॒नो न वंसु॑ क॒लशे॑षु सीदसि ।
इन्द्रा॑य॒ मद्वा॒ मद्यो॒ मद॑: सु॒तो दि॒वो वि॑ष्ट॒म्भ उ॑प॒मो वि॑चक्ष॒णः
sa̱pta svasā̍ro a̱bhi mā̱tara̱: śiśu̱ṃ nava̍ṃ jajñā̱naṃ jenya̍ṃ vipa̱ścita̍m |
a̱pāṃ ga̍ndha̱rvaṃ di̱vyaṃ nṛ̱cakṣa̍sa̱ṃ soma̱ṃ viśva̍sya̱ bhuva̍nasya rā̱jase̍
||36||स॒प्त स्वसा॑रो अ॒भि मा॒तर॒: शिशुं॒ नवं॑ जज्ञा॒नं जेन्यं॑ विप॒श्चित॑म् ।
अ॒पां ग॑न्ध॒र्वं दि॒व्यं नृ॒चक्ष॑सं॒ सोमं॒ विश्व॑स्य॒ भुव॑नस्य रा॒जसे॑
ī̱śā̱na i̱mā bhuva̍nāni̱ vīya̍se yujā̱na i̍ndo ha̱rita̍: supa̱rṇya̍: |
tāste̍ kṣarantu̱ madhu̍madghṛ̱taṃ paya̱stava̍ vra̱te so̍ma tiṣṭhantu kṛ̱ṣṭaya̍:
||37||ई॒शा॒न इ॒मा भुव॑नानि॒ वीय॑से युजा॒न इ॑न्दो ह॒रित॑: सुप॒र्ण्य॑: ।
तास्ते॑ क्षरन्तु॒ मधु॑मद्घृ॒तं पय॒स्तव॑ व्र॒ते सो॑म तिष्ठन्तु कृ॒ष्टय॑:
tvaṃ nṛ̱cakṣā̍ asi soma vi̱śvata̱: pava̍māna vṛṣabha̱ tā vi dhā̍vasi |
sa na̍: pavasva̱ vasu̍ma̱ddhira̍ṇyavadva̱yaṃ syā̍ma̱ bhuva̍neṣu jī̱vase̍
||38||त्वं नृ॒चक्षा॑ असि सोम वि॒श्वत॒: पव॑मान वृषभ॒ ता वि धा॑वसि ।
स न॑: पवस्व॒ वसु॑म॒द्धिर॑ण्यवद्व॒यं स्या॑म॒ भुव॑नेषु जी॒वसे॑
go̱vitpa̍vasva vasu̱viddhi̍raṇya̱vidre̍to̱dhā i̍ndo̱ bhuva̍ne̱ṣvarpi̍taḥ |
tvaṃ su̱vīro̍ asi soma viśva̱vittaṃ tvā̱ viprā̱ upa̍ gi̱rema ā̍sate
||39||गो॒वित्प॑वस्व वसु॒विद्धि॑रण्य॒विद्रे॑तो॒धा इ॑न्दो॒ भुव॑ने॒ष्वर्पि॑तः ।
त्वं सु॒वीरो॑ असि सोम विश्व॒वित्तं त्वा॒ विप्रा॒ उप॑ गि॒रेम आ॑सते
unmadhva̍ ū̱rmirva̱nanā̍ atiṣṭhipada̱po vasā̍no mahi̱ṣo vi gā̍hate |
rājā̍ pa̱vitra̍ratho̱ vāja̱māru̍hatsa̱hasra̍bhṛṣṭirjayati̱ śravo̍ bṛ̱hat
||40||उन्मध्व॑ ऊ॒र्मिर्व॒नना॑ अतिष्ठिपद॒पो वसा॑नो महि॒षो वि गा॑हते ।
राजा॑ प॒वित्र॑रथो॒ वाज॒मारु॑हत्स॒हस्र॑भृष्टिर्जयति॒ श्रवो॑ बृ॒हत्
sa bha̱ndanā̱ udi̍yarti pra̱jāva̍tīrvi̱śvāyu̱rviśvā̍: su̱bharā̱ aha̍rdivi |
brahma̍ pra̱jāva̍dra̱yimaśva̍pastyaṃ pī̱ta i̍nda̱vindra̍ma̱smabhya̍ṃ yācatāt
||41||स भ॒न्दना॒ उदि॑यर्ति प्र॒जाव॑तीर्वि॒श्वायु॒र्विश्वा॑: सु॒भरा॒ अह॑र्दिवि ।
ब्रह्म॑ प्र॒जाव॑द्र॒यिमश्व॑पस्त्यं पी॒त इ॑न्द॒विन्द्र॑म॒स्मभ्यं॑ याचतात्
so agre̱ ahnā̱ṃ hari̍rharya̱to mada̱: pra ceta̍sā cetayata̱ta anu̱ dyubhi̍: |
dvā janā̍ yā̱taya̍nna̱ntarī̍yate̱ narā̍ ca̱ śaṃsa̱ṃ daivya̍ṃ ca dha̱rtari̍
||42||सो अग्रे॒ अह्नां॒ हरि॑र्हर्य॒तो मद॒: प्र चेत॑सा चेतयत॒त अनु॒ द्युभि॑: ।
द्वा जना॑ या॒तय॑न्न॒न्तरी॑यते॒ नरा॑ च॒ शंसं॒ दैव्यं॑ च ध॒र्तरि॑
a̱ñjate̱ vya̍ñjate̱ sama̍ñjate̱ kratu̍ṃ rihanti̱ madhu̍nā̱bhya̍ñjate |
sindho̍rucchvā̱se pa̱taya̍ntamu̱kṣaṇa̍ṃ hiraṇyapā̱vāḥ pa̱śumā̍su gṛbhṇate
||43||अ॒ञ्जते॒ व्य॑ञ्जते॒ सम॑ञ्जते॒ क्रतुं॑ रिहन्ति॒ मधु॑ना॒भ्य॑ञ्जते ।
सिन्धो॑रुच्छ्वा॒से प॒तय॑न्तमु॒क्षणं॑ हिरण्यपा॒वाः प॒शुमा॑सु गृभ्णते
vi̱pa̱ścite̱ pava̍mānāya gāyata ma̱hī na dhārātyandho̍ arṣati |
ahi̱rna jū̱rṇāmati̍ sarpati̱ tvaca̱matyo̱ na krīl̤a̍nnasara̱dvṛṣā̱ hari̍:
||44||वि॒प॒श्चिते॒ पव॑मानाय गायत म॒ही न धारात्यन्धो॑ अर्षति ।
अहि॒र्न जू॒र्णामति॑ सर्पति॒ त्वच॒मत्यो॒ न क्रीळ॑न्नसर॒द्वृषा॒ हरि॑:
a̱gre̱go rājāpya̍staviṣyate vi̱māno̱ ahnā̱ṃ bhuva̍ne̱ṣvarpi̍taḥ |
hari̍rghṛ̱tasnu̍: su̱dṛśī̍ko arṇa̱vo jyo̱tīra̍thaḥ pavate rā̱ya o̱kya̍:
||45||अ॒ग्रे॒गो राजाप्य॑स्तविष्यते वि॒मानो॒ अह्नां॒ भुव॑ने॒ष्वर्पि॑तः ।
हरि॑र्घृ॒तस्नु॑: सु॒दृशी॑को अर्ण॒वो ज्यो॒तीर॑थः पवते रा॒य ओ॒क्य॑:
asa̍rji ska̱mbho di̱va udya̍to̱ mada̱: pari̍ tri̱dhātu̱rbhuva̍nānyarṣati |
a̱ṃśuṃ ri̍hanti ma̱taya̱: pani̍pnataṃ gi̱rā yadi̍ ni̱rṇija̍mṛ̱gmiṇo̍ ya̱yuḥ
||46||अस॑र्जि स्क॒म्भो दि॒व उद्य॑तो॒ मद॒: परि॑ त्रि॒धातु॒र्भुव॑नान्यर्षति ।
अं॒शुं रि॑हन्ति म॒तय॒: पनि॑प्नतं गि॒रा यदि॑ नि॒र्णिज॑मृ॒ग्मिणो॑ य॒युः
pra te̱ dhārā̱ atyaṇvā̍ni me̱ṣya̍: punā̱nasya̍ sa̱ṃyato̍ yanti̱ raṃha̍yaḥ |
yadgobhi̍rindo ca̱mvo̍: sama̱jyasa̱ ā su̍vā̱naḥ so̍ma ka̱laśe̍ṣu sīdasi
||47||प्र ते॒ धारा॒ अत्यण्वा॑नि मे॒ष्य॑: पुना॒नस्य॑ सं॒यतो॑ यन्ति॒ रंह॑यः ।
यद्गोभि॑रिन्दो च॒म्वो॑: सम॒ज्यस॒ आ सु॑वा॒नः सो॑म क॒लशे॑षु सीदसि
pava̍sva soma kratu̱vinna̍ u̱kthyo'vyo̱ vāre̱ pari̍ dhāva̱ madhu̍ pri̱yam |
ja̱hi viśvā̍nra̱kṣasa̍ indo a̱triṇo̍ bṛ̱hadva̍dema vi̱dathe̍ su̱vīrā̍:
||48||पव॑स्व सोम क्रतु॒विन्न॑ उ॒क्थ्योऽव्यो॒ वारे॒ परि॑ धाव॒ मधु॑ प्रि॒यम् ।
ज॒हि विश्वा॑न्र॒क्षस॑ इन्दो अ॒त्रिणो॑ बृ॒हद्व॑देम वि॒दथे॑ सु॒वीरा॑: