Study
- Anukramaṇī
- Source
(1-32) 1-3 bharadvājo bārhaspatya:, 4-6 kaśyapo mārīca:, 7-9 gotamo rāhūgaṇa:, 10-12 atrirbhauma:, 13-15 viśvāmitro gāthina:, 16-18 jamadagnirbhārgava:, 19-21 vasiṣṭho maitrāvaruṇi:,22-32 pavitra āṅgiraso vā vasiṣṭho vā ubhau vā | pavamānaḥ soma:, 10-12 pavamānaḥ pūṣā vā, 23-27 pavamāno'gni:, 25 pavamānaḥ savitā vā, 26 pavamānāgnisavitāra:, 27 viśve devā vā , 31-32 pavamānyadhyetā |gāyatrī, 16 -18 nityadvipadā gāyatrī , 30 purauṣṇik; 27 ,31 ,32, anuṣṭup |
tvaṃ so̍māsi dhāra̱yurma̱ndra oji̍ṣṭho adhva̱re | pava̍sva maṃha̱yadra̍yiḥ
||1||त्वं सो॑मासि धार॒युर्म॒न्द्र ओजि॑ष्ठो अध्व॒रे । पव॑स्व मंह॒यद्र॑यिः
tvaṃ su̱to nṛ̱māda̍no dadha̱nvānma̍tsa̱rinta̍maḥ | indrā̍ya sū̱rirandha̍sā
||2||त्वं सु॒तो नृ॒माद॑नो दध॒न्वान्म॑त्स॒रिन्त॑मः । इन्द्रा॑य सू॒रिरन्ध॑सा
tvaṃ su̍ṣvā̱ṇo adri̍bhira̱bhya̍rṣa̱ kani̍kradat | dyu̱manta̱ṃ śuṣma̍mutta̱mam
||3||त्वं सु॑ष्वा॒णो अद्रि॑भिर॒भ्य॑र्ष॒ कनि॑क्रदत् । द्यु॒मन्तं॒ शुष्म॑मुत्त॒मम्
indu̍rhinvā̱no a̍rṣati ti̱ro vārā̍ṇya̱vyayā̍ | hari̱rvāja̍macikradat
||4||इन्दु॑र्हिन्वा॒नो अ॑र्षति ति॒रो वारा॑ण्य॒व्यया॑ । हरि॒र्वाज॑मचिक्रदत्
indo̱ vyavya̍marṣasi̱ vi śravā̍ṃsi̱ vi saubha̍gā | vi vājā̍ntsoma̱ goma̍taḥ
||5||इन्दो॒ व्यव्य॑मर्षसि॒ वि श्रवां॑सि॒ वि सौभ॑गा । वि वाजा॑न्त्सोम॒ गोम॑तः
ā na̍ indo śata̱gvina̍ṃ ra̱yiṃ goma̍ntama̱śvina̍m | bharā̍ soma saha̱sriṇa̍m
||6||आ न॑ इन्दो शत॒ग्विनं॑ र॒यिं गोम॑न्तम॒श्विन॑म् । भरा॑ सोम सह॒स्रिण॑म्
pava̍mānāsa̱ inda̍vasti̱raḥ pa̱vitra̍mā̱śava̍: | indra̱ṃ yāme̍bhirāśata
||7||पव॑मानास॒ इन्द॑वस्ति॒रः प॒वित्र॑मा॒शव॑: । इन्द्रं॒ यामे॑भिराशत
ka̱ku̱haḥ so̱myo rasa̱ indu̱rindrā̍ya pū̱rvyaḥ | ā̱yuḥ pa̍vata ā̱yave̍
||8||क॒कु॒हः सो॒म्यो रस॒ इन्दु॒रिन्द्रा॑य पू॒र्व्यः । आ॒युः प॑वत आ॒यवे॑
hi̱nvanti̱ sūra̱musra̍ya̱: pava̍mānaṃ madhu̱ścuta̍m | a̱bhi gi̱rā sama̍svaran
||9||हि॒न्वन्ति॒ सूर॒मुस्र॑य॒: पव॑मानं मधु॒श्चुत॑म् । अ॒भि गि॒रा सम॑स्वरन्
a̱vi̱tā no̍ a̱jāśva̍: pū̱ṣā yāma̍niyāmani | ā bha̍kṣatka̱nyā̍su naḥ
||10||अ॒वि॒ता नो॑ अ॒जाश्व॑: पू॒षा याम॑नियामनि । आ भ॑क्षत्क॒न्या॑सु नः
a̱yaṃ soma̍: kapa̱rdine̍ ghṛ̱taṃ na pa̍vate̱ madhu̍ | ā bha̍kṣatka̱nyā̍su naḥ
||11||अ॒यं सोम॑: कप॒र्दिने॑ घृ॒तं न प॑वते॒ मधु॑ । आ भ॑क्षत्क॒न्या॑सु नः
a̱yaṃ ta̍ āghṛṇe su̱to ghṛ̱taṃ na pa̍vate̱ śuci̍ | ā bha̍kṣatka̱nyā̍su naḥ
||12||अ॒यं त॑ आघृणे सु॒तो घृ॒तं न प॑वते॒ शुचि॑ । आ भ॑क्षत्क॒न्या॑सु नः
vā̱co ja̱ntuḥ ka̍vī̱nāṃ pava̍sva soma̱ dhāra̍yā | de̱veṣu̍ ratna̱dhā a̍si
||13||वा॒चो ज॒न्तुः क॑वी॒नां पव॑स्व सोम॒ धार॑या । दे॒वेषु॑ रत्न॒धा अ॑सि
ā ka̱laśe̍ṣu dhāvati śye̱no varma̱ vi gā̍hate | a̱bhi droṇā̱ kani̍kradat
||14||आ क॒लशे॑षु धावति श्ये॒नो वर्म॒ वि गा॑हते । अ॒भि द्रोणा॒ कनि॑क्रदत्
pari̱ pra so̍ma te̱ raso'sa̍rji ka̱laśe̍ su̱taḥ | śye̱no na ta̱kto a̍rṣati
||15||परि॒ प्र सो॑म ते॒ रसोऽस॑र्जि क॒लशे॑ सु॒तः । श्ये॒नो न त॒क्तो अ॑र्षति
pava̍sva soma ma̱ndaya̱nnindrā̍ya̱ madhu̍mattamaḥ
||16||पव॑स्व सोम म॒न्दय॒न्निन्द्रा॑य॒ मधु॑मत्तमः
asṛ̍grande̱vavī̍taye vāja̱yanto̱ rathā̍ iva
||17||असृ॑ग्रन्दे॒ववी॑तये वाज॒यन्तो॒ रथा॑ इव
te su̱tāso̍ ma̱dinta̍māḥ śu̱krā vā̱yuma̍sṛkṣata
||18||ते सु॒तासो॑ म॒दिन्त॑माः शु॒क्रा वा॒युम॑सृक्षत
grāvṇā̍ tu̱nno a̱bhiṣṭu̍taḥ pa̱vitra̍ṃ soma gacchasi | dadha̍tsto̱tre su̱vīrya̍m
||19||ग्राव्णा॑ तु॒न्नो अ॒भिष्टु॑तः प॒वित्रं॑ सोम गच्छसि । दध॑त्स्तो॒त्रे सु॒वीर्य॑म्
e̱ṣa tu̱nno a̱bhiṣṭu̍taḥ pa̱vitra̱mati̍ gāhate | ra̱kṣo̱hā vāra̍ma̱vyaya̍m
||20||ए॒ष तु॒न्नो अ॒भिष्टु॑तः प॒वित्र॒मति॑ गाहते । र॒क्षो॒हा वार॑म॒व्यय॑म्
yadanti̱ yacca̍ dūra̱ke bha̱yaṃ vi̱ndati̱ māmi̱ha | pava̍māna̱ vi tajja̍hi
||21||यदन्ति॒ यच्च॑ दूर॒के भ॒यं वि॒न्दति॒ मामि॒ह । पव॑मान॒ वि तज्ज॑हि
pava̍māna̱: so a̱dya na̍: pa̱vitre̍ṇa̱ vica̍rṣaṇiḥ | yaḥ po̱tā sa pu̍nātu naḥ
||22||पव॑मान॒: सो अ॒द्य न॑: प॒वित्रे॑ण॒ विच॑र्षणिः । यः पो॒ता स पु॑नातु नः
yatte̍ pa̱vitra̍ma̱rciṣyagne̱ vita̍tama̱ntarā | brahma̱ tena̍ punīhi naḥ
||23||यत्ते॑ प॒वित्र॑म॒र्चिष्यग्ने॒ वित॑तम॒न्तरा । ब्रह्म॒ तेन॑ पुनीहि नः
yatte̍ pa̱vitra̍marci̱vadagne̱ tena̍ punīhi naḥ | bra̱hma̱sa̱vaiḥ pu̍nīhi naḥ
||24||यत्ते॑ प॒वित्र॑मर्चि॒वदग्ने॒ तेन॑ पुनीहि नः । ब्र॒ह्म॒स॒वैः पु॑नीहि नः
u̱bhābhyā̍ṃ deva savitaḥ pa̱vitre̍ṇa sa̱vena̍ ca | māṃ pu̍nīhi vi̱śvata̍:
||25||उ॒भाभ्यां॑ देव सवितः प॒वित्रे॑ण स॒वेन॑ च । मां पु॑नीहि वि॒श्वत॑:
tri̱bhiṣṭvaṃ de̍va savita̱rvarṣi̍ṣṭhaiḥ soma̱ dhāma̍bhiḥ | agne̱ dakṣai̍: punīhi naḥ
||26||त्रि॒भिष्ट्वं दे॑व सवित॒र्वर्षि॑ष्ठैः सोम॒ धाम॑भिः । अग्ने॒ दक्षै॑: पुनीहि नः
pu̱nantu̱ māṃ de̍vaja̱nāḥ pu̱nantu̱ vasa̍vo dhi̱yā | viśve̍ devāḥ punī̱ta mā̱ jāta̍vedaḥ punī̱hi mā̍
||27||पु॒नन्तु॒ मां दे॑वज॒नाः पु॒नन्तु॒ वस॑वो धि॒या । विश्वे॑ देवाः पुनी॒त मा॒ जात॑वेदः पुनी॒हि मा॑
pra pyā̍yasva̱ pra sya̍ndasva̱ soma̱ viśve̍bhira̱ṃśubhi̍: | de̱vebhya̍ utta̱maṃ ha̱viḥ
||28||प्र प्या॑यस्व॒ प्र स्य॑न्दस्व॒ सोम॒ विश्वे॑भिरं॒शुभि॑: । दे॒वेभ्य॑ उत्त॒मं ह॒विः
upa̍ pri̱yaṃ pani̍pnata̱ṃ yuvā̍namāhutī̱vṛdha̍m | aga̍nma̱ bibhra̍to̱ nama̍:
||29||उप॑ प्रि॒यं पनि॑प्नतं॒ युवा॑नमाहुती॒वृध॑म् । अग॑न्म॒ बिभ्र॑तो॒ नम॑:
a̱lāyya̍sya para̱śurna̍nāśa̱ tamā pa̍vasva deva soma | ā̱khuṃ ci̍de̱va de̍va soma
||30||अ॒लाय्य॑स्य पर॒शुर्न॑नाश॒ तमा प॑वस्व देव सोम । आ॒खुं चि॑दे॒व दे॑व सोम
yaḥ pā̍vamā̱nīra̱dhyetyṛṣi̍bhi̱: sambhṛ̍ta̱ṃ rasa̍m | sarva̱ṃ sa pū̱tama̍śnāti svadi̱taṃ mā̍ta̱riśva̍nā
||31||यः पा॑वमा॒नीर॒ध्येत्यृषि॑भि॒: सम्भृ॑तं॒ रस॑म् । सर्वं॒ स पू॒तम॑श्नाति स्वदि॒तं मा॑त॒रिश्व॑ना
pā̱va̱mā̱nīryo a̱dhyetyṛṣi̍bhi̱: sambhṛ̍ta̱ṃ rasa̍m | tasmai̱ sara̍svatī duhe kṣī̱raṃ sa̱rpirmadhū̍da̱kam
||32||पा॒व॒मा॒नीर्यो अ॒ध्येत्यृषि॑भि॒: सम्भृ॑तं॒ रस॑म् । तस्मै॒ सर॑स्वती दुहे क्षी॒रं स॒र्पिर्मधू॑द॒कम्