bhūdānaphalānuvarṇanam
atha pāpavināśanatīrthamāhātmyavarṇanam ||
śrīsūta uvāca ||
punaścāhaṃ pravakṣyāmi pāpanāśanavaibhavam ||
bhagavadbhaktibhāvena śṛṇudhvaṃ susamāhitāḥ
||1||अथ पापविनाशनतीर्थमाहात्म्यवर्णनम् ॥
श्रीसूत उवाच ॥
पुनश्चाहं प्रवक्ष्यामि पापनाशनवैभवम् ॥
भगवद्भक्तिभावेन शृणुध्वं सुसमाहिताः
itihāsaṃ pravakṣyāmi sarvapāpavināśanam ||
yacchrutvā sarvapāpebhyo mucyate nātra saṃśayaḥ
||2||इतिहासं प्रवक्ष्यामि सर्वपापविनाशनम् ॥
यच्छ्रुत्वा सर्वपापेभ्यो मुच्यते नात्र संशयः
atha bhadramatyākhyadaridradvijavṛttāntaḥ ||
āsītpurā dvijavaro vedavedāṃgapāragaḥ ||
daridro vṛttihīnaśca nāmnā bhadramatirdvijaḥ
||3||अथ भद्रमत्याख्यदरिद्रद्विजवृत्तान्तः ॥
आसीत्पुरा द्विजवरो वेदवेदांगपारगः ॥
दरिद्रो वृत्तिहीनश्च नाम्ना भद्रमतिर्द्विजः
śrutāni sarvaśāstrāṇi tena vipreṇa dhīmatā ||
śrutāni ca purāṇāni dharmaśāstrāṇi sarvaśaḥ
||4||श्रुतानि सर्वशास्त्राणि तेन विप्रेण धीमता ॥
श्रुतानि च पुराणानि धर्मशास्त्राणि सर्वशः
abhavaṃstasya ṣaṭ patnyaḥ kṛtā siṃdhuryaśovatī ||
kāminī mālinī caiva śobhā caiva prakīrtitāḥ
||5||अभवंस्तस्य षट् पत्न्यः कृता सिंधुर्यशोवती ॥
कामिनी मालिनी चैव शोभा चैव प्रकीर्तिताः
tāsu patnīṣu tasyāsītputrāṇāṃ ca śatadvayam ||
te sarve tasya putrādyāḥ kṣudhayā paripīḍitāḥ
||6||तासु पत्नीषु तस्यासीत्पुत्राणां च शतद्वयम् ॥
ते सर्वे तस्य पुत्राद्याः क्षुधया परिपीडिताः
akiñcano bhadramatiḥ kṣudhārtānātmajānpriyān ||
paśyanpriyāḥ kṣudhārtāśca vilalāpākulendriyaḥ
||7||अकिञ्चनो भद्रमतिः क्षुधार्तानात्मजान्प्रियान् ॥
पश्यन्प्रियाः क्षुधार्ताश्च विललापाकुलेन्द्रियः
dhigjanma bhāgyarahitaṃ dhigjanma dhanavarjitam ||
dhigjanma kīrtirahitaṃ dhigjanmātithyavarjitam
||8||धिग्जन्म भाग्यरहितं धिग्जन्म धनवर्जितम् ॥
धिग्जन्म कीर्तिरहितं धिग्जन्मातिथ्यवर्जितम्
dhigjanmācārarahitaṃ dhigjanma jñānavarjitam ||
dhigjanma yatnarahitaṃ dhigjanma sukhavarjitam
||9||धिग्जन्माचाररहितं धिग्जन्म ज्ञानवर्जितम् ॥
धिग्जन्म यत्नरहितं धिग्जन्म सुखवर्जितम्
dhigjanma bandhurahitaṃ dhigjanma khyātivarjitam ||
narasya bahvapatyasya dhigjanmaiśvaryavarjitam
||10||धिग्जन्म बन्धुरहितं धिग्जन्म ख्यातिवर्जितम् ॥
नरस्य बह्वपत्यस्य धिग्जन्मैश्वर्यवर्जितम्
aho guṇāḥ saumyatā ca vidvattā janma satkule ||
dāridryāmbudhimagnasya sarvametanna śobhate
||11||अहो गुणाः सौम्यता च विद्वत्ता जन्म सत्कुले ॥
दारिद्र्याम्बुधिमग्नस्य सर्वमेतन्न शोभते
viprāḥ putrāśca pautrāśca bāndhavā bhrātarastathā ||
śiṣyāśca sarve manujāstyajantyaiśvaryavarjitam
||12||विप्राः पुत्राश्च पौत्राश्च बान्धवा भ्रातरस्तथा ॥
शिष्याश्च सर्वे मनुजास्त्यजन्त्यैश्वर्यवर्जितम्
iti niścitya matimāndhīro bhadramatirdvijaḥ ||
caṇḍālo vā dvijo vāpi bhāgyavāneva pūjyate
||13||इति निश्चित्य मतिमान्धीरो भद्रमतिर्द्विजः ॥
चण्डालो वा द्विजो वापि भाग्यवानेव पूज्यते
daridraḥ puruṣo loke śavavallokaninditaḥ ||
aho sampatsamāyukto niṣṭhuro vāpyaniṣṭhuraḥ
||14||दरिद्रः पुरुषो लोके शववल्लोकनिन्दितः ॥
अहो सम्पत्समायुक्तो निष्ठुरो वाप्यनिष्ठुरः
guṇahīno'pi guṇavānmūrkho vāpi sa paṇḍitaḥ ||
niṣṭhuro vā guṇī vāpi dharmahīno'tha vā naraḥ
||15||गुणहीनोऽपि गुणवान्मूर्खो वापि स पण्डितः ॥
निष्ठुरो वा गुणी वापि धर्महीनोऽथ वा नरः
aiśvaryaguṇayuktaścetpūjya eva na saṃśayaḥ ||
aho daridratā duḥkhaṃ tatrāpyāśātiduḥkhadā
||16||ऐश्वर्यगुणयुक्तश्चेत्पूज्य एव न संशयः ॥
अहो दरिद्रता दुःखं तत्राप्याशातिदुःखदा
āśābhibhūtāḥ puruṣā duḥkhamaśnuvate kṣaṇāt
||17||आशाभिभूताः पुरुषा दुःखमश्नुवते क्षणात्
āśāyā ye dāsā dāsāste sarvalokasya ||
āśā dāsī yeṣāṃ teṣāṃ dāsāyate lokaḥ
||18||आशाया ये दासा दासास्ते सर्वलोकस्य ॥
आशा दासी येषां तेषां दासायते लोकः
sarvaśāstrārthavettāpi daridro bhāti mūrkhavat ||
ākiñcanyamahāgrāhagrastānāṃ nāsti mocakaḥ
||19||सर्वशास्त्रार्थवेत्तापि दरिद्रो भाति मूर्खवत् ॥
आकिञ्चन्यमहाग्राहग्रस्तानां नास्ति मोचकः
aho duḥkhamaho duḥkhamaho duḥkhaṃ daridratā ||
tatrāpi putradārāṇāṃ bāhulyamatiduḥkhadam
||20||अहो दुःखमहो दुःखमहो दुःखं दरिद्रता ॥
तत्रापि पुत्रदाराणां बाहुल्यमतिदुःखदम्
evamuktvā bhadramatiḥ sarvaśāstrārthapāragaḥ ||
atyaiśvaryapradaṃ dharmaṃ manasā cintayaṃstadā ||
tūṣṇīṃ sthito bhadramatimahākleśasamanvitaḥ
||21||एवमुक्त्वा भद्रमतिः सर्वशास्त्रार्थपारगः ॥
अत्यैश्वर्यप्रदं धर्मं मनसा चिन्तयंस्तदा ॥
तूष्णीं स्थितो भद्रमतिमहाक्लेशसमन्वितः
atha bhadramateḥ kāminīkṛtaveṃkaṭādrigamanaprotsāhanam ||
tadānīṃ tāsu bhāryāsu kāminī patidevatā
||22||अथ भद्रमतेः कामिनीकृतवेंकटाद्रिगमनप्रोत्साहनम् ॥
तदानीं तासु भार्यासु कामिनी पतिदेवता
bhāryā sādhuguṇairyuktā patiṃ taṃ pratyabhāṣata
||23||भार्या साधुगुणैर्युक्ता पतिं तं प्रत्यभाषत
kāminyuvāca
bhagavansarvadharmajña sarvaśāstrārthapāraga ||
mama nātha mahābhāga vākyaṃ śṛṇu mahāmate
||24||भगवन्सर्वधर्मज्ञ सर्वशास्त्रार्थपारग ॥
मम नाथ महाभाग वाक्यं शृणु महामते
suvarṇamukharītīre ṛṣisaṃghaniṣevite ||
vartate daivataiḥ sevyaḥ pāvano veṃkaṭācalaḥ
||25||सुवर्णमुखरीतीरे ऋषिसंघनिषेविते ॥
वर्तते दैवतैः सेव्यः पावनो वेंकटाचलः
tasminveṃkaṭaśailendre surāsuranamaskṛte ||
vartate pāvanaṃ tīrthaṃ pāpānāṃ dāhakaṃ śubham
||26||तस्मिन्वेंकटशैलेन्द्रे सुरासुरनमस्कृते ॥
वर्तते पावनं तीर्थं पापानां दाहकं शुभम्
tatra gatvā mahābhāga pāpanāśe mahāmate ||
kuru snānaṃ prayatnena bhāryāputrasamanvitaḥ
||27||तत्र गत्वा महाभाग पापनाशे महामते ॥
कुरु स्नानं प्रयत्नेन भार्यापुत्रसमन्वितः
tasya tīrthasya māhātmyaṃ nāradācca śrutaṃ mayā ||
bālabhāve mama pituraṃtike proktavānmuniḥ
||28||तस्य तीर्थस्य माहात्म्यं नारदाच्च श्रुतं मया ॥
बालभावे मम पितुरंतिके प्रोक्तवान्मुनिः
veṃkaṭādrau mahāpuṇye sarvapātakanāśane ||
sarvaduḥkhapraśamane sarvasaṃpatpradāyake
||29||वेंकटाद्रौ महापुण्ये सर्वपातकनाशने ॥
सर्वदुःखप्रशमने सर्वसंपत्प्रदायके
pāpanāśe mahātīrthe snātvā saṃkalpapūrvakam ||
atyaiśvaryapradaṃ dharmaṃ manasā cintayaṃstadā
||30||पापनाशे महातीर्थे स्नात्वा संकल्पपूर्वकम् ॥
अत्यैश्वर्यप्रदं धर्मं मनसा चिन्तयंस्तदा
bhūmidānaṃ viniścitya sarvadānottamottamam ||
prāpakaṃ paralokasya sarvakāmaphalapradam
||31||भूमिदानं विनिश्चित्य सर्वदानोत्तमोत्तमम् ॥
प्रापकं परलोकस्य सर्वकामफलप्रदम्
dānānāmuttamaṃ dānaṃ bhūdānaṃ parikīrtitam ||
taddattvā samavāpnoti yadyadiṣṭatamaṃ naraḥ
||32||दानानामुत्तमं दानं भूदानं परिकीर्तितम् ॥
तद्दत्त्वा समवाप्नोति यद्यदिष्टतमं नरः
ityevaṃ nāradenoktaṃ śrutvā me janako dvijaḥ ||
saṃprahṛṣṭamanā bhūtvā śeṣādriṃ prāptavāṃstadā
||33||इत्येवं नारदेनोक्तं श्रुत्वा मे जनको द्विजः ॥
संप्रहृष्टमना भूत्वा शेषाद्रिं प्राप्तवांस्तदा
tatra gatvā mahābhāgaḥ sarvasaṃpatpradāyakam ||
bhūdānaṃ vipravaryāya śrotriyāya pradattavān
||34||तत्र गत्वा महाभागः सर्वसंपत्प्रदायकम् ॥
भूदानं विप्रवर्याय श्रोत्रियाय प्रदत्तवान्
tato me janako vidvansarvabhāgyasamanvitaḥ ||
ihaloke sukhaṃ prāpya cānte viṣṇupuraṃ yayau
||35||ततो मे जनको विद्वन्सर्वभाग्यसमन्वितः ॥
इहलोके सुखं प्राप्य चान्ते विष्णुपुरं ययौ
tvaṃ ca gatvā mahābhāga veṃkaṭādriṃ nagottamam ||
kuru dānaṃ prayatnena bhūdānaṃ sarvakāmadam
||36||त्वं च गत्वा महाभाग वेंकटाद्रिं नगोत्तमम् ॥
कुरु दानं प्रयत्नेन भूदानं सर्वकामदम्
atha kāminīkathitabhūdānapraśaṃsā ||
bhūmidānasya māhātmyaṃ śṛṇuṣva susamāhitaḥ ||
na ko'pi gadituṃ śakto loke'sminbhagavanprabho
||37||अथ कामिनीकथितभूदानप्रशंसा ॥
भूमिदानस्य माहात्म्यं शृणुष्व सुसमाहितः ॥
न कोऽपि गदितुं शक्तो लोकेऽस्मिन्भगवन्प्रभो
bhūmidānātparaṃ dānaṃ na bhūtaṃ na bhaviṣyati ||
paraṃ nirvāṇamāpnoti bhūmido nātra saṃśayaḥ
||38||भूमिदानात्परं दानं न भूतं न भविष्यति ॥
परं निर्वाणमाप्नोति भूमिदो नात्र संशयः
svalpāmapi mahīṃ dattvā śrotriyāyāhitāgnaye ||
brahmalokamavāpnoti punarāvṛttivarjitam
||39||स्वल्पामपि महीं दत्त्वा श्रोत्रियायाहिताग्नये ॥
ब्रह्मलोकमवाप्नोति पुनरावृत्तिवर्जितम्
bhūmidaḥ sarvadaḥ prokto bhūmido mokṣabhāgbhavet ||
bhūbhidānaṃ vṛṣādrau ca sarvapāpapraṇāśanam
||40||भूमिदः सर्वदः प्रोक्तो भूमिदो मोक्षभाग्भवेत् ॥
भूभिदानं वृषाद्रौ च सर्वपापप्रणाशनम्
mahāpātakayukto vā yukto vā sarvapātakaiḥ ||
daśahastāṃ mahīṃ dattvā sarvapāpaiḥ pramucyate
||41||महापातकयुक्तो वा युक्तो वा सर्वपातकैः ॥
दशहस्तां महीं दत्त्वा सर्वपापैः प्रमुच्यते
satpātre bhūmidātā yaḥ sarvadānaphalaṃ labhet ||
bhūmidasya samo nānyastriṣu lokeṣu vidyate
||42||सत्पात्रे भूमिदाता यः सर्वदानफलं लभेत् ॥
भूमिदस्य समो नान्यस्त्रिषु लोकेषु विद्यते
dvijasya vṛttihīnasya yaḥ pradadyānmahīṃ śubhām ||
tasya puṇyaphalaṃ vaktuṃ śeṣo nārhaḥ kadācana
||43||द्विजस्य वृत्तिहीनस्य यः प्रदद्यान्महीं शुभाम् ॥
तस्य पुण्यफलं वक्तुं शेषो नार्हः कदाचन
viprasya vṛttihīnasya sadācārasya kasyacit ||
yo 'lpāmapi mahīṃ dadyātsa viṣṇurnātra saṃśayaḥ
||44||विप्रस्य वृत्तिहीनस्य सदाचारस्य कस्यचित् ॥
यो ऽल्पामपि महीं दद्यात्स विष्णुर्नात्र संशयः
ikṣugodhūmakedārapūgadṛkṣādisaṃyutā ||
pṛthvī pradīyate yena sa viṣṇurnātra saṃśayaḥ
||45||इक्षुगोधूमकेदारपूगदृक्षादिसंयुता ॥
पृथ्वी प्रदीयते येन स विष्णुर्नात्र संशयः
vṛttihīnasya viprasya daridrasya kuṭumbinaḥ ||
svalpāmapi mahīṃ dattvā viṣṇusāyujyamaśnute
||46||वृत्तिहीनस्य विप्रस्य दरिद्रस्य कुटुम्बिनः ॥
स्वल्पामपि महीं दत्त्वा विष्णुसायुज्यमश्नुते
saktasya devapūjāsu viprasyāṭavikā mahī ||
dattā bhavati gaṃgāyāṃ trirātrasnānajaṃ phalam
||47||सक्तस्य देवपूजासु विप्रस्याटविका मही ॥
दत्ता भवति गंगायां त्रिरात्रस्नानजं फलम्
viprasya vṛttihīnasya sadācāraratasya ca ||
droṇikāṃ pṛthivīṃ dattvā yatphalaṃ labhate śṛṇu
||48||विप्रस्य वृत्तिहीनस्य सदाचाररतस्य च ॥
द्रोणिकां पृथिवीं दत्त्वा यत्फलं लभते शृणु
gaṃgātīre'śvamedhānāṃ śatāni vidhivannaraḥ ||
kṛtvā yatphalamāpnoti tadāpnoti mahatphalam
||49||गंगातीरेऽश्वमेधानां शतानि विधिवन्नरः ॥
कृत्वा यत्फलमाप्नोति तदाप्नोति महत्फलम्
dadāti bhārikāṃ bhūmiṃ daridrāya dvijātaye ||
tasya puṇyaṃ pravakṣyāmi mannātha bhagavanprabho
||50||ददाति भारिकां भूमिं दरिद्राय द्विजातये ॥
तस्य पुण्यं प्रवक्ष्यामि मन्नाथ भगवन्प्रभो
aśvamedhasahasrāṇi vājapeyaśatāni ca ||
vidhāya jāhnavītīre yatphalaṃ tallabheta saḥ
||51||अश्वमेधसहस्राणि वाजपेयशतानि च ॥
विधाय जाह्नवीतीरे यत्फलं तल्लभेत सः
bhūmidānaṃ mahādānamatidānaṃ prakīrtitam ||
sarvapāpapraśamanamapavargaphalapradam
||52||भूमिदानं महादानमतिदानं प्रकीर्तितम् ॥
सर्वपापप्रशमनमपवर्गफलप्रदम्
yacchrutvā śraddhayā yukto bhūmidānaphalaṃ labhet ||
bhāryāyā vacanaṃ śrutvā tvitihāsasamanvitam
||53||यच्छ्रुत्वा श्रद्धया युक्तो भूमिदानफलं लभेत् ॥
भार्याया वचनं श्रुत्वा त्वितिहाससमन्वितम्
santuṣṭo manasi dhyātvā śeṣācalanivāsinam
||54||सन्तुष्टो मनसि ध्यात्वा शेषाचलनिवासिनम्
atha bhadramataye bhūpradānātsughoṣasya sadgatiḥ ||
gantuṃ pracakrame buddhyā krīḍācalamanuttamam ||
tato bhadramatiḥ saumyaḥ sarvadharmaparāyaṇaḥ
||55||अथ भद्रमतये भूप्रदानात्सुघोषस्य सद्गतिः ॥
गन्तुं प्रचक्रमे बुद्ध्या क्रीडाचलमनुत्तमम् ॥
ततो भद्रमतिः सौम्यः सर्वधर्मपरायणः
suśāliṃnāma nagarīṃ kalatrasahito yayau ||
sughoṣaṃ nāma viprendraṃ sarvaiśvaryasamanvitam
||56||सुशालिंनाम नगरीं कलत्रसहितो ययौ ॥
सुघोषं नाम विप्रेन्द्रं सर्वैश्वर्यसमन्वितम्
gatvā yācitavānbhūmiṃ pañcahastāyatāṃ dvijaḥ ||
sughoṣo dharmaniratastaṃ nirīkṣya kuṭumbinam
||57||गत्वा याचितवान्भूमिं पञ्चहस्तायतां द्विजः ॥
सुघोषो धर्मनिरतस्तं निरीक्ष्य कुटुम्बिनम्
manasā prītimāpannaṃ samabhyarcyainamabravīt ||
kṛtārtho'haṃ bhadramate saphalaṃ mama janma ca ||
matkulaṃ cānaghaṃ jātaṃ tvaṃ hi grāhyo'si me yataḥ
||58||मनसा प्रीतिमापन्नं समभ्यर्च्यैनमब्रवीत् ॥
कृतार्थोऽहं भद्रमते सफलं मम जन्म च ॥
मत्कुलं चानघं जातं त्वं हि ग्राह्योऽसि मे यतः
ityuktvā taṃ samabhyarcya sughoṣo dharmatatparaḥ ||
pañcahastapramāṇāṃ tāṃ dadau tasmai mahāmatiḥ
||59||इत्युक्त्वा तं समभ्यर्च्य सुघोषो धर्मतत्परः ॥
पञ्चहस्तप्रमाणां तां ददौ तस्मै महामतिः
pṛthivī vaiṣṇavī puṇyā pṛthivī viṣṇupālitā ||
pṛthivyāstu pradānena prīyatāṃ me janārdanaḥ
||60||पृथिवी वैष्णवी पुण्या पृथिवी विष्णुपालिता ॥
पृथिव्यास्तु प्रदानेन प्रीयतां मे जनार्दनः
mantreṇānena viprendrāḥ sughoṣastaṃ dvijeśvaram ||
viṣṇubuddhyā samabhyarcya tāvatīṃ pṛthivīṃ dadau
||61||मन्त्रेणानेन विप्रेन्द्राः सुघोषस्तं द्विजेश्वरम् ॥
विष्णुबुद्ध्या समभ्यर्च्य तावतीं पृथिवीं ददौ
sa bhadramataye viprā dhīmāṃstāṃ yācitāṃ bhuvam ||
dattavānharibhaktāya śrotriyāya kuṭuṃbine
||62||स भद्रमतये विप्रा धीमांस्तां याचितां भुवम् ॥
दत्तवान्हरिभक्ताय श्रोत्रियाय कुटुंबिने
sughoṣo bhūmidānena koṭivaṃśasamanvitaḥ ||
prapede viṣṇubhavanaṃ yatra gatvā na śocati
||63||सुघोषो भूमिदानेन कोटिवंशसमन्वितः ॥
प्रपेदे विष्णुभवनं यत्र गत्वा न शोचति
atha bhadramateḥ pāpanāśanatīre bhūdānārthaṃ veṃkaṭādrigamanam ||
vipro bhadramatiścāpi putradārasamanvitaḥ ||
gato veṃkaṭaśailendraṃ surāsuranamaskṛtam
||64||अथ भद्रमतेः पापनाशनतीरे भूदानार्थं वेंकटाद्रिगमनम् ॥
विप्रो भद्रमतिश्चापि पुत्रदारसमन्वितः ॥
गतो वेंकटशैलेन्द्रं सुरासुरनमस्कृतम्
gandharvayakṣaśailādisevitaṃ meruputrakam ||
vaikuṇṭhādāgataṃ divyaṃ krīḍācalamanuttamam
||65||गन्धर्वयक्षशैलादिसेवितं मेरुपुत्रकम् ॥
वैकुण्ठादागतं दिव्यं क्रीडाचलमनुत्तमम्
tatra svāmisarastoye nirmale pāvane śubhe ||
dāraputrādisaṃyuktaḥ snātvā saṃkalpapūrvakam
||66||तत्र स्वामिसरस्तोये निर्मले पावने शुभे ॥
दारपुत्रादिसंयुक्तः स्नात्वा संकल्पपूर्वकम्
tatpaścimataṭe śvetasūkaraṃ vasudhādharam ||
natvā tatra vidhānena śrīnivāsālayaṃ gataḥ
||67||तत्पश्चिमतटे श्वेतसूकरं वसुधाधरम् ॥
नत्वा तत्र विधानेन श्रीनिवासालयं गतः
tatra brahmādidevaiśca sevitaṃ veṃkaṭeśvaram ||
dṛṣṭavānsaha putrādyairviṣṇubhakto mahāmatiḥ
||68||तत्र ब्रह्मादिदेवैश्च सेवितं वेंकटेश्वरम् ॥
दृष्टवान्सह पुत्राद्यैर्विष्णुभक्तो महामतिः
bhaktyā praṇamya deveśaṃ śrīnivāsaṃ kṛpānidhim ||
putradārādisaṃyuktaḥ pāpanāśanamāyayau
||69||भक्त्या प्रणम्य देवेशं श्रीनिवासं कृपानिधिम् ॥
पुत्रदारादिसंयुक्तः पापनाशनमाययौ
tatra snātvā vidhānena kṛtadharmādisatkriyaḥ ||
kasmaicidviṣṇubhaktāya śrotriyāya mahāmatiḥ
||70||तत्र स्नात्वा विधानेन कृतधर्मादिसत्क्रियः ॥
कस्मैचिद्विष्णुभक्ताय श्रोत्रियाय महामतिः
viṣṇubuddhyā sa pradadau bhūdānaṃ mokṣadaṃ śubham
||71||विष्णुबुद्ध्या स प्रददौ भूदानं मोक्षदं शुभम्
atha bhūdānaprabhāveṇa bhadramaterbhagavatsākṣātkāraḥ ||
tadā prādurabhūddevaḥ śaṃkhacakragadādharaḥ
||72||अथ भूदानप्रभावेण भद्रमतेर्भगवत्साक्षात्कारः ॥
तदा प्रादुरभूद्देवः शंखचक्रगदाधरः
vinatānandanārūḍho vanamālāvibhūṣitaḥ ||
pāpanāśasya tīre tu bhūdānasya prabhāvataḥ
||73||विनतानन्दनारूढो वनमालाविभूषितः ॥
पापनाशस्य तीरे तु भूदानस्य प्रभावतः
tadā bhadramatiḥ saumyaḥ stotuṃ samupacakrame
||74||तदा भद्रमतिः सौम्यः स्तोतुं समुपचक्रमे
namonamaste'khilakāraṇāya namonamaste'khilapālakāya ||
namonamaste'maranāyakāya namonamo daityavimardanāya
||75||नमोनमस्तेऽखिलकारणाय नमोनमस्तेऽखिलपालकाय ॥
नमोनमस्तेऽमरनायकाय नमोनमो दैत्यविमर्दनाय
namonamo bhaktajanapriyāya namonamaḥ pāpavidāraṇāya ||
namonamo durjananāśakāya namo'stu tasmai jagadīśvarāya
||76||नमोनमो भक्तजनप्रियाय नमोनमः पापविदारणाय ॥
नमोनमो दुर्जननाशकाय नमोऽस्तु तस्मै जगदीश्वराय
namo namaḥ kāraṇavāmanāya nārāyaṇāyāmitavikramāya ||
śrīśārṅgacakrāsigadādharāya namo'stu tasmai puruṣottamāya
||77||नमो नमः कारणवामनाय नारायणायामितविक्रमाय ॥
श्रीशार्ङ्गचक्रासिगदाधराय नमोऽस्तु तस्मै पुरुषोत्तमाय
namaḥ payorāśinivāsakāya namo'stu lakṣmīpataye'vyayāya ||
namo'stu sūryādyamitaprabhāya namonamaḥ puṇyagatāgatāya
||78||नमः पयोराशिनिवासकाय नमोऽस्तु लक्ष्मीपतयेऽव्ययाय ॥
नमोऽस्तु सूर्याद्यमितप्रभाय नमोनमः पुण्यगतागताय
namonamo'rkenduvilocanāya namo'stu te yajñaphalapradāya ||
namostu yajñāṃgavirājitāya namo'stu te sajjanavallabhāya
||79||नमोनमोऽर्केन्दुविलोचनाय नमोऽस्तु ते यज्ञफलप्रदाय ॥
नमोस्तु यज्ञांगविराजिताय नमोऽस्तु ते सज्जनवल्लभाय
namonamaḥ kāraṇakāraṇāya namo'stu śabdādivivarjitāya ||
namo'stu te'bhīṣṭasukhapradāya namonamo bhaktamanoramāya
||80||नमोनमः कारणकारणाय नमोऽस्तु शब्दादिविवर्जिताय ॥
नमोऽस्तु तेऽभीष्टसुखप्रदाय नमोनमो भक्तमनोरमाय
namonamaste'dbhutakāraṇāya namo'stu te mandaradhārakāya ||
namo'stu te yajñavarāhanāmne namo hiraṇyākṣavidārakāya
||81||नमोनमस्तेऽद्भुतकारणाय नमोऽस्तु ते मन्दरधारकाय ॥
नमोऽस्तु ते यज्ञवराहनाम्ने नमो हिरण्याक्षविदारकाय
namo'stu te vāmanarūpabhāje namo'stu te kṣatrakulāntakāya ||
namo'stu te rāvaṇamardanāya namo'stu te nandasutāgrajāya
||82||नमोऽस्तु ते वामनरूपभाजे नमोऽस्तु ते क्षत्रकुलान्तकाय ॥
नमोऽस्तु ते रावणमर्दनाय नमोऽस्तु ते नन्दसुताग्रजाय
namaste kamalākānta namaste sukhadāyine ||
śritārtināśine tubhyaṃ bhūyobhūyo namonamaḥ
||83||नमस्ते कमलाकान्त नमस्ते सुखदायिने ॥
श्रितार्तिनाशिने तुभ्यं भूयोभूयो नमोनमः
vipreṇa saṃstuto devo bhagavānbhaktavatsalaḥ ||
vātsalyenābravīdvākyaṃ śrīnivāso dayānidhiḥ
||84||विप्रेण संस्तुतो देवो भगवान्भक्तवत्सलः ॥
वात्सल्येनाब्रवीद्वाक्यं श्रीनिवासो दयानिधिः
tāta tuṣṭo'smi bhadraṃ te stotreṇa mahatā dvija ||
sarvabhogasamāyuktaḥ putrapautrādibhiryutaḥ
||85||तात तुष्टोऽस्मि भद्रं ते स्तोत्रेण महता द्विज ॥
सर्वभोगसमायुक्तः पुत्रपौत्रादिभिर्युतः
iha loke sukhaṃ prāpya dehānte muktimāpnuhi ||
ityuktvā bhagavānviṣṇustatraivāntaradhīyata
||86||इह लोके सुखं प्राप्य देहान्ते मुक्तिमाप्नुहि ॥
इत्युक्त्वा भगवान्विष्णुस्तत्रैवान्तरधीयत
evaṃ vaḥ kathitaṃ viprāḥ pāpanāśanavaibhavam ||
tattīre bhūpradānasya māhātmyaṃ cāpi varṇitam
||87||एवं वः कथितं विप्राः पापनाशनवैभवम् ॥
तत्तीरे भूप्रदानस्य माहात्म्यं चापि वर्णितम्
iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīveṃkaṭācalamāhātmye pāpavināśanatīrthe bhūdānaphalānuvarṇanaṃnāma viṃśatitamo'dhyāyaḥ || 20 ||