sadācāralakṣaṇavarṇanam
vyāsa uvāca
upakārāya sādhūnāṃ gṛhasthāśramavāsinām ||
yathā ca kriyate dharmo yathāvatkathayāmi te
||1||उपकाराय साधूनां गृहस्थाश्रमवासिनाम् ॥
यथा च क्रियते धर्मो यथावत्कथयामि ते
vatsa gārhasthyamāsthāya naraḥ sarvamidaṃ jagat ||
puṣṇāti tena lokāṃśca sa jayatyabhivāṃchitān
||2||वत्स गार्हस्थ्यमास्थाय नरः सर्वमिदं जगत् ॥
पुष्णाति तेन लोकांश्च स जयत्यभिवांछितान्
pitaro munayo devā bhūtāni manujāstathā ||
krimikīṭapataṃgāśca vayāṃsi pitaro'surāḥ
||3||पितरो मुनयो देवा भूतानि मनुजास्तथा ॥
क्रिमिकीटपतंगाश्च वयांसि पितरोऽसुराः
gṛhasthamupajīvaṃti tatastṛptiṃ prayāṃti ca ||
mukhaṃ vāsya nirīkṣaṃte apo no dāsyatīti ca
||4||गृहस्थमुपजीवंति ततस्तृप्तिं प्रयांति च ॥
मुखं वास्य निरीक्षंते अपो नो दास्यतीति च
sarvasyādhārabhūtā ye vatsa dhenustrayīmayī ||
asyāṃ pratiṣṭhitaṃ viśvaṃ viśvahetuśca yā matā
||5||सर्वस्याधारभूता ये वत्स धेनुस्त्रयीमयी ॥
अस्यां प्रतिष्ठितं विश्वं विश्वहेतुश्च या मता
ṛkpṛṣṭhāsau yajuḥsaṃdhyā sāmakukṣipayodharā ||
iṣṭāpūrtaviṣāṇā ca sādhusūktatanūruhā
||6||ऋक्पृष्ठासौ यजुःसंध्या सामकुक्षिपयोधरा ॥
इष्टापूर्तविषाणा च साधुसूक्ततनूरुहा
śāṃti puṣṭiśakṛnmūtrā varṇapādapratiṣṭhitā ||
upajīvyamānā jagatāṃ padakramajaṭāghanaiḥ
||7||शांति पुष्टिशकृन्मूत्रा वर्णपादप्रतिष्ठिता ॥
उपजीव्यमाना जगतां पदक्रमजटाघनैः
svāhākārasvadhākārau vaṣaṭkāraśca putraka ||
hantakārastathai vānyastasyāḥ stanacatuṣṭayam
||8||स्वाहाकारस्वधाकारौ वषट्कारश्च पुत्रक ॥
हन्तकारस्तथै वान्यस्तस्याः स्तनचतुष्टयम्
svāhākārastanaṃ devāḥ pitaraśca svadhāmayam ||
munayaśca vaṣaṭkāraṃ devabhūtasureśvarāḥ
||9||स्वाहाकारस्तनं देवाः पितरश्च स्वधामयम् ॥
मुनयश्च वषट्कारं देवभूतसुरेश्वराः
hantakāraṃ manuṣyāśca pibaṃti satataṃ stanam ||
evamadhyāpayedeva vedānāṃ pratyahaṃ trayīm
||10||हन्तकारं मनुष्याश्च पिबंति सततं स्तनम् ॥
एवमध्यापयेदेव वेदानां प्रत्यहं त्रयीम्
teṣāmucchedakarttā yaḥ puruṣo'naṃtapāpakṛt ||
sa tamasyaṃdhatāmisre narake hi nimajjati
||11||तेषामुच्छेदकर्त्ता यः पुरुषोऽनंतपापकृत् ॥
स तमस्यंधतामिस्रे नरके हि निमज्जति
yastvenāṃ mānavo dhenuṃ svarvatsairamarādibhiḥ ||
pūjayatyucite kāle sa svargāyopapadyate
||12||यस्त्वेनां मानवो धेनुं स्वर्वत्सैरमरादिभिः ॥
पूजयत्युचिते काले स स्वर्गायोपपद्यते
tasmātputra manuṣyeṇa devarṣi pitṛmānavāḥ ||
bhūtāni cānudivasaṃ poṣyāṇi svatanuryathā
||13||तस्मात्पुत्र मनुष्येण देवर्षि पितृमानवाः ॥
भूतानि चानुदिवसं पोष्याणि स्वतनुर्यथा
tasmātsnātaḥ śucirbhūtvā devarṣipitṛtarpaṇam ||
yajñasyāṃte tathaivādbhiḥ kāle kuryātsamāhitaḥ
||14||तस्मात्स्नातः शुचिर्भूत्वा देवर्षिपितृतर्पणम् ॥
यज्ञस्यांते तथैवाद्भिः काले कुर्यात्समाहितः
sumanogandhapuṣpaiśca devānabhyarcya mānavaḥ ||
tatognestarpaṇaṃ kuryāddyāccāpi balīṃstathā
||15||सुमनोगन्धपुष्पैश्च देवानभ्यर्च्य मानवः ॥
ततोग्नेस्तर्पणं कुर्याद्द्याच्चापि बलींस्तथा
naktaṃcarebhyo bhūtebhyo balimākāśato haret ||
pitṝṇāṃ nirvapettadvaddakṣiṇābhimukhastataḥ
||16||नक्तंचरेभ्यो भूतेभ्यो बलिमाकाशतो हरेत् ॥
पितॄणां निर्वपेत्तद्वद्दक्षिणाभिमुखस्ततः
gṛhasthastatparo bhūtvā samāhitamānasaḥ ||
tatastoyamupādāya teṣvevārpaṇa satkriyām
||17||गृहस्थस्तत्परो भूत्वा समाहितमानसः ॥
ततस्तोयमुपादाय तेष्वेवार्पण सत्क्रियाम्
sthāneṣu nikṣipetprājño nāmnā tūdiśya devatāḥ ||
evaṃ baliṃ gṛhe dattvā gṛhe gṛhapatiḥ śuciḥ
||18||स्थानेषु निक्षिपेत्प्राज्ञो नाम्ना तूदिश्य देवताः ॥
एवं बलिं गृहे दत्त्वा गृहे गृहपतिः शुचिः
ācamya ca tataḥ kuryātprājño dvārāvalokanam ||
muhūrtasyāṣṭamaṃ bhāgamudīkṣetātithiṃ tataḥ
||19||आचम्य च ततः कुर्यात्प्राज्ञो द्वारावलोकनम् ॥
मुहूर्तस्याष्टमं भागमुदीक्षेतातिथिं ततः
atithiṃ tatra saṃprāptamarghyapādyodakena ca ||
bubhukṣumāgataṃ śrāṃtaṃ yācamānamakiṃcanam
||20||अतिथिं तत्र संप्राप्तमर्घ्यपाद्योदकेन च ॥
बुभुक्षुमागतं श्रांतं याचमानमकिंचनम्
brāhmaṇaṃ prāhuratithiṃ saṃpūjya śaktito budhaiḥ ||
na pṛchettatrācaraṇaṃ svādhyāyaṃ cāpi paṃḍitaḥ
||21||ब्राह्मणं प्राहुरतिथिं संपूज्य शक्तितो बुधैः ॥
न पृछेत्तत्राचरणं स्वाध्यायं चापि पंडितः
śobhanāśobhanākāraṃ taṃ manyeta prajāpatim ||
anityaṃ hi sthito yasmāttasmādatithirucyate
||22||शोभनाशोभनाकारं तं मन्येत प्रजापतिम् ॥
अनित्यं हि स्थितो यस्मात्तस्मादतिथिरुच्यते
tasmai dattvā tu yo bhuṃkte sa tu bhuṃkte'mṛtaṃ naraḥ ||
atithiryasya bhagnāśo gṛhātprati nivartate
||23||तस्मै दत्त्वा तु यो भुंक्ते स तु भुंक्तेऽमृतं नरः ॥
अतिथिर्यस्य भग्नाशो गृहात्प्रति निवर्तते
sa dattvā duṣkṛtaṃ tasmai puṇyamādāya gacchati ||
api vā śākadānena yadvā toyapradānataḥ ||
pūjayettaṃ naraḥ bhaktyā tenaivāto vimucyate
||24||स दत्त्वा दुष्कृतं तस्मै पुण्यमादाय गच्छति ॥
अपि वा शाकदानेन यद्वा तोयप्रदानतः ॥
पूजयेत्तं नरः भक्त्या तेनैवातो विमुच्यते
yudhiṣṭhira uvāca
vivāhā brāhmadaivārṣāḥ prājāpatyāsurau tathā ||
gāṃdharvo rākṣasaścāpi paiśācoṣṭama ucyate
||25||विवाहा ब्राह्मदैवार्षाः प्राजापत्यासुरौ तथा ॥
गांधर्वो राक्षसश्चापि पैशाचोष्टम उच्यते
eteṣāṃ ca vidhiṃ brūhi tathā kāryaṃ ca tattvataḥ ||
gṛhasthānāṃ tathā dharmānbrūhi me tvaṃ viśeṣataḥ
||26||एतेषां च विधिं ब्रूहि तथा कार्यं च तत्त्वतः ॥
गृहस्थानां तथा धर्मान्ब्रूहि मे त्वं विशेषतः
parāśara uvāca
sa brāhmo varamāhūya yatra kanyā svalaṃkṛtā ||
dīyate tatsutaḥ pūyātpuruṣānekaviṃśatim
||27||स ब्राह्मो वरमाहूय यत्र कन्या स्वलंकृता ॥
दीयते तत्सुतः पूयात्पुरुषानेकविंशतिम्
yajñasthāyartvije daivastajjaḥ pāti caturdaśa ||
varādādāya godvandvamārṣastajjaḥ punāti ṣaṭ
||28||यज्ञस्थायर्त्विजे दैवस्तज्जः पाति चतुर्दश ॥
वरादादाय गोद्वन्द्वमार्षस्तज्जः पुनाति षट्
sahobhau caratāṃ dharmaṃ prājāpatyaḥ sa īritaḥ ||
varavadhvoḥ svecchayrā ca gāṃdharvo'nyonyamaitrataḥ ||
prasahya kanyāharaṇādrākṣaso ninditaḥ satām
||29||सहोभौ चरतां धर्मं प्राजापत्यः स ईरितः ॥
वरवध्वोः स्वेच्छय्रा च गांधर्वोऽन्योन्यमैत्रतः ॥
प्रसह्य कन्याहरणाद्राक्षसो निन्दितः सताम्
chalena kanyāharaṇātpaiśāco garhito'ṣṭamaḥ ||
prāyaḥ kṣatraviśoruktā gāṃdharvāsurarākṣasāḥ
||30||छलेन कन्याहरणात्पैशाचो गर्हितोऽष्टमः ॥
प्रायः क्षत्रविशोरुक्ता गांधर्वासुरराक्षसाः
aṣṭamastveṣa pāpiṣṭhaḥ pāpiṣṭhānāṃ ca saṃbhavaḥ ||
savarṇayā karo grāhyo dhāryaḥ kṣatriyayā śaraḥ
||31||अष्टमस्त्वेष पापिष्ठः पापिष्ठानां च संभवः ॥
सवर्णया करो ग्राह्यो धार्यः क्षत्रियया शरः
pratodo vaiśyayā dhāryo vāsoṃtaḥ śūdrayā tathā ||
asavarṇā sveṣa vidhiḥ smṛtau dṛṣṭaśca vedane
||32||प्रतोदो वैश्यया धार्यो वासोंतः शूद्रया तथा ॥
असवर्णा स्वेष विधिः स्मृतौ दृष्टश्च वेदने
savarṇābhistu sarvābhiḥ pāṇirgrāhyastvayaṃ vidhiḥ ||
dharmye vivāhe jāyaṃte dharmyāḥ putrāḥ śatāyuṣaḥ
||33||सवर्णाभिस्तु सर्वाभिः पाणिर्ग्राह्यस्त्वयं विधिः ॥
धर्म्ये विवाहे जायंते धर्म्याः पुत्राः शतायुषः
adharmyāddharmmarahitā maṃdabhāgyadhanāyuṣaḥ ||
kṛtakālābhigamane dharmoyaṃ gṛhiṇaḥ paraḥ
||34||अधर्म्याद्धर्म्मरहिता मंदभाग्यधनायुषः ॥
कृतकालाभिगमने धर्मोयं गृहिणः परः
strīṇāṃ varamanusmṛtya yathākāmyathavā bhavet ||
divābhigamanaṃ puṃsāmanāyuṣyaṃ paraṃ matam
||35||स्त्रीणां वरमनुस्मृत्य यथाकाम्यथवा भवेत् ॥
दिवाभिगमनं पुंसामनायुष्यं परं मतम्
śrāddhārhaḥ sarvaparvāṇi na gaṃtavyāni dhīmatā ||
tatra gachanstriyaṃ mohārddharmātpracyavate parāt
||36||श्राद्धार्हः सर्वपर्वाणि न गंतव्यानि धीमता ॥
तत्र गछन्स्त्रियं मोहार्द्धर्मात्प्रच्यवते परात्
ṛtukālābhigāmī yaḥ svadāranirataśca yaḥ ||
sa sadā brahmacārī hi vijñeyaḥ sa gṛhāśramī
||37||ऋतुकालाभिगामी यः स्वदारनिरतश्च यः ॥
स सदा ब्रह्मचारी हि विज्ञेयः स गृहाश्रमी
ārṣe vivāhe godvaṃdvaṃ yaduktaṃ tatra śasyate ||
śulkamaṇvapi kanyāyāḥ kanyāvikrayapāpakṛt
||38||आर्षे विवाहे गोद्वंद्वं यदुक्तं तत्र शस्यते ॥
शुल्कमण्वपि कन्यायाः कन्याविक्रयपापकृत्
apatyavikrayātkalpaṃ vasedviṭkṛmibhojane ||
ato nāṇvapi kanyāyā upajīvyaṃ narairdhanam
||39||अपत्यविक्रयात्कल्पं वसेद्विट्कृमिभोजने ॥
अतो नाण्वपि कन्याया उपजीव्यं नरैर्धनम्
tatra tuṣṭā mahālakṣmīrnivaseddānavāriṇā ||
vāṇijyaṃ nīcasevā ca vedānadhyayanaṃ tathā
||40||तत्र तुष्टा महालक्ष्मीर्निवसेद्दानवारिणा ॥
वाणिज्यं नीचसेवा च वेदानध्ययनं तथा
kuvivāhaḥ kriyālopaḥ kule patanahetavaḥ ||
kuryādvaivāhike cāgnau gṛhyakarmmānvahaṃ gṛhī
||41||कुविवाहः क्रियालोपः कुले पतनहेतवः ॥
कुर्याद्वैवाहिके चाग्नौ गृह्यकर्म्मान्वहं गृही
pañcayajñakriyāṃ cāpi paktiṃ dainaṃdinīmapi ||
gṛhasthāśramiṇaḥ pañcasūnākarma dinedine
||42||पञ्चयज्ञक्रियां चापि पक्तिं दैनंदिनीमपि ॥
गृहस्थाश्रमिणः पञ्चसूनाकर्म दिनेदिने
kuṇḍanī peṣaṇī cullī hyudakumbhī tu mārjanī ||
tāsāṃ ca paṃcasūnānāṃ nirākaraṇahetavaḥ ||
kratavaḥ paṃca nirddiṣṭā gṛhiśreyobhivarddhanāḥ
||43||कुण्डनी पेषणी चुल्ली ह्युदकुम्भी तु मार्जनी ॥
तासां च पंचसूनानां निराकरणहेतवः ॥
क्रतवः पंच निर्द्दिष्टा गृहिश्रेयोभिवर्द्धनाः
paṭhanaṃ brahmayajñaḥ syāttarpaṇaṃ ca pitṛkratuḥ ||
homo daivo balirbhauta ātithyaṃ nṛkratuḥ kramāt
||44||पठनं ब्रह्मयज्ञः स्यात्तर्पणं च पितृक्रतुः ॥
होमो दैवो बलिर्भौत आतिथ्यं नृक्रतुः क्रमात्
vaiśvadevāṃtare prāptaḥ sūryoḍho vātithiḥ smṛtaḥ ||
atitherāditopyete bhojyā nātra vicāraṇā
||45||वैश्वदेवांतरे प्राप्तः सूर्योढो वातिथिः स्मृतः ॥
अतिथेरादितोप्येते भोज्या नात्र विचारणा
pitṛdevamanuṣyebhyo dattvāśnātyamṛtaṃ gṛhī ||
adattvānnaṃ ca yo bhuṃkte kevalaṃ svodaraṃbhariḥ
||46||पितृदेवमनुष्येभ्यो दत्त्वाश्नात्यमृतं गृही ॥
अदत्त्वान्नं च यो भुंक्ते केवलं स्वोदरंभरिः
vaiśvadevena ye hīnā ātithyena vivarjitāḥ ||
sarve te vṛṣalā jñeyāḥ prāptavedā api dvijāḥ
||47||वैश्वदेवेन ये हीना आतिथ्येन विवर्जिताः ॥
सर्वे ते वृषला ज्ञेयाः प्राप्तवेदा अपि द्विजाः
akṛtvā vaiśvadevaṃ tu bhuñjate ye dvijādhamāḥ ||
iha lokennahīnāḥ syuḥ kākayoniṃ vrajaṃtyatho
||48||अकृत्वा वैश्वदेवं तु भुञ्जते ये द्विजाधमाः ॥
इह लोकेन्नहीनाः स्युः काकयोनिं व्रजंत्यथो
vedoktaṃ viditaṃ karmma nityaṃ kuryādataṃdritaḥ ||
yadi kuryādyathāśakti prāpnuyātsadgatiṃ parām
||49||वेदोक्तं विदितं कर्म्म नित्यं कुर्यादतंद्रितः ॥
यदि कुर्याद्यथाशक्ति प्राप्नुयात्सद्गतिं पराम्
ṣaṣṭhyaṣṭamyorvasetpāpaṃ taile māṃse sadaiva hi ||
caturdaśyāṃ pañcadaśyāṃ tathaiva ca kṣure bhage
||50||षष्ठ्यष्टम्योर्वसेत्पापं तैले मांसे सदैव हि ॥
चतुर्दश्यां पञ्चदश्यां तथैव च क्षुरे भगे
udayantaṃ na vīkṣeta nāstaṃ yaṃtaṃ na mastake ||
na rāhuṇopaspṛṣṭaṃ ca nāṃḍasthaṃ vīkṣayedravim
||51||उदयन्तं न वीक्षेत नास्तं यंतं न मस्तके ॥
न राहुणोपस्पृष्टं च नांडस्थं वीक्षयेद्रविम्
na vīkṣetātmano rūpamapsu dhāvenna kardame ||
na nagnāṃ striyamīkṣeta na nagno jalamāviśet
||52||न वीक्षेतात्मनो रूपमप्सु धावेन्न कर्दमे ॥
न नग्नां स्त्रियमीक्षेत न नग्नो जलमाविशेत्
devatāyatanaṃ vipraṃ dhenuṃ madhu mṛdaṃ tathā ||
jātivṛddhaṃ vayovṛddhaṃ vidyāvṛddhaṃ tathaiva ca
||53||देवतायतनं विप्रं धेनुं मधु मृदं तथा ॥
जातिवृद्धं वयोवृद्धं विद्यावृद्धं तथैव च
aśvatthaṃ caityavṛkṣaṃ ca guruṃ jalabhṛtaṃ ghaṭam ||
siddhānnaṃ dadhisiddhārthaṃ gacchankuryātpradakṣiṇam
||54||अश्वत्थं चैत्यवृक्षं च गुरुं जलभृतं घटम् ॥
सिद्धान्नं दधिसिद्धार्थं गच्छन्कुर्यात्प्रदक्षिणम्
rajasvalāṃ na seveta nāśnīyātsaha bhāryayā ||
ekavāsā na bhuñjīta na bhuñjītotkaṭāsane
||55||रजस्वलां न सेवेत नाश्नीयात्सह भार्यया ॥
एकवासा न भुञ्जीत न भुञ्जीतोत्कटासने
nāśuciṃ striyamīkṣeta teja skāmo dvijottamaḥ ||
asaṃtarpya pitṝndevānnādyādannaṃ ca kutracit
||56||नाशुचिं स्त्रियमीक्षेत तेज स्कामो द्विजोत्तमः ॥
असंतर्प्य पितॄन्देवान्नाद्यादन्नं च कुत्रचित्
pakvānnaṃ cāpi no māṃsaṃ dīrghakālaṃ jijīviṣuḥ ||
na mūtraṇaṃ vraje kuryānna valmī ke na bhasmani
||57||पक्वान्नं चापि नो मांसं दीर्घकालं जिजीविषुः ॥
न मूत्रणं व्रजे कुर्यान्न वल्मी के न भस्मनि
na gatteṃṣu sasattveṣu na tiṣṭhanna vrajannapi ||
brāhmaṇaṃ sūryamagniṃ ca caṃdraṛkṣagurūnapi
||58||न गत्तेंषु ससत्त्वेषु न तिष्ठन्न व्रजन्नपि ॥
ब्राह्मणं सूर्यमग्निं च चंद्रऋक्षगुरूनपि
abhipaśyanna kurvīta malamūtravisarja nam ||
mukhenopadhamennāgniṃ nagnāṃ nekṣeta yoṣitam
||59||अभिपश्यन्न कुर्वीत मलमूत्रविसर्ज नम् ॥
मुखेनोपधमेन्नाग्निं नग्नां नेक्षेत योषितम्
nāṃghrī pratāpayedagnau na vastu aśuci kṣipet ||
prāṇihiṃsāṃ na kurvīta nāśnīyātsaṃdhya yordvayoḥ
||60||नांघ्री प्रतापयेदग्नौ न वस्तु अशुचि क्षिपेत् ॥
प्राणिहिंसां न कुर्वीत नाश्नीयात्संध्य योर्द्वयोः
na saṃviśecca saṃdhyāyāṃ prātaḥ sāyaṃ kvacidbudhaḥ ||
nācakṣīta dhayaṃtīṃ gāṃ neṃdracāpaṃ pradarśayet
||61||न संविशेच्च संध्यायां प्रातः सायं क्वचिद्बुधः ॥
नाचक्षीत धयंतीं गां नेंद्रचापं प्रदर्शयेत्
naikaḥ supyātkvacicchūnye na śayānaṃ prabodhayet ||
paṃthānaṃ naikalo yāyānna vāryyaṃjalinā pibet
||62||नैकः सुप्यात्क्वचिच्छून्ये न शयानं प्रबोधयेत् ॥
पंथानं नैकलो यायान्न वार्य्यंजलिना पिबेत्
na divoddhṛtasāraṃ ca bhakṣayeddadhi no niśi ||
strīdharmiṇī nābhivadennādyādātṛpti rātriṣu
||63||न दिवोद्धृतसारं च भक्षयेद्दधि नो निशि ॥
स्त्रीधर्मिणी नाभिवदेन्नाद्यादातृप्ति रात्रिषु
tauryatrikapriyo na syātkāṃsye pādau na dhāvayet ||
śrāddhaṃ kṛtvā paraśrāddhe yo'śnīyājjñānavarjitaḥ
||64||तौर्यत्रिकप्रियो न स्यात्कांस्ये पादौ न धावयेत् ॥
श्राद्धं कृत्वा परश्राद्धे योऽश्नीयाज्ज्ञानवर्जितः
dātuḥ śrāddhaphalaṃ nāsti bhoktā kilbiṣabhugbhavet ||
na dhārayedanyabhuktaṃ vāsaścopānahāvapi
||65||दातुः श्राद्धफलं नास्ति भोक्ता किल्बिषभुग्भवेत् ॥
न धारयेदन्यभुक्तं वासश्चोपानहावपि
na bhinnabhājane'śnīyānnāsītāgnyādidūṣite ||
ārohaṇaṃ gavāṃ pṛṣṭhe pretadhūmaṃ sarittaṭam
||66||न भिन्नभाजनेऽश्नीयान्नासीताग्न्यादिदूषिते ॥
आरोहणं गवां पृष्ठे प्रेतधूमं सरित्तटम्
bālātapaṃ divāsvāpaṃ tyajeddīrghaṃ jijīviṣuḥ ||
snātvā na mārjayedgātraṃ visṛjenna śikhāṃ pathi
||67||बालातपं दिवास्वापं त्यजेद्दीर्घं जिजीविषुः ॥
स्नात्वा न मार्जयेद्गात्रं विसृजेन्न शिखां पथि
hastau śiro na dhunuyānnākarṣedāsanaṃ padā ||
kareṇa no mṛjedgātraṃ snānavastreṇa vā punaḥ
||68||हस्तौ शिरो न धुनुयान्नाकर्षेदासनं पदा ॥
करेण नो मृजेद्गात्रं स्नानवस्त्रेण वा पुनः
śunocchiṣṭaṃ bhavedgātraṃ punaḥ snānena śudhyati ||
notpāṭayellomanakhaṃ daśanena kadācana
||69||शुनोच्छिष्टं भवेद्गात्रं पुनः स्नानेन शुध्यति ॥
नोत्पाटयेल्लोमनखं दशनेन कदाचन
karajaiḥ karajacchedaṃ vivarjayecchubhāya tu ||
yadāyatyāṃ tyajettanna kuryātkarma prayatnataḥ
||70||करजैः करजच्छेदं विवर्जयेच्छुभाय तु ॥
यदायत्यां त्यजेत्तन्न कुर्यात्कर्म प्रयत्नतः
advāreṇa na gantavyaṃ svaveśmāpi kadācana ||
krīḍennājñaiḥ sahāsīta na dharmmaghnairna rogibhiḥ
||71||अद्वारेण न गन्तव्यं स्ववेश्मापि कदाचन ॥
क्रीडेन्नाज्ञैः सहासीत न धर्म्मघ्नैर्न रोगिभिः
na śayīta kvacinnagnaḥ pāṇau bhuṃjīta naiva ca ||
ārdrapādakarāsyo'śnandīrghakālaṃ na jīvati
||72||न शयीत क्वचिन्नग्नः पाणौ भुंजीत नैव च ॥
आर्द्रपादकरास्योऽश्नन्दीर्घकालं न जीवति
saṃviśennārdracaraṇo nocchiṣṭaḥ kvacidāvrajet ||
śayanastho na cāśnīyānna pibecca jalaṃ dvijaḥ
||73||संविशेन्नार्द्रचरणो नोच्छिष्टः क्वचिदाव्रजेत् ॥
शयनस्थो न चाश्नीयान्न पिबेच्च जलं द्विजः
sopānatko nopaviśenna jalaṃ cotthitaḥ pibet ||
sarvvamamlamayaṃ nādyādārogyasyābhilāṣukaḥ
||74||सोपानत्को नोपविशेन्न जलं चोत्थितः पिबेत् ॥
सर्व्वमम्लमयं नाद्यादारोग्यस्याभिलाषुकः
na nirīkṣeta viṇmūtre nocchiṣṭaḥ saṃspṛśecchiraḥ ||
nādhitiṣṭhettuṣāṃgāra bhasmakeśakapālikāḥ
||75||न निरीक्षेत विण्मूत्रे नोच्छिष्टः संस्पृशेच्छिरः ॥
नाधितिष्ठेत्तुषांगार भस्मकेशकपालिकाः
patitaiḥ saha saṃvāsaḥ patanāyaiva jāyate ||
dadyādāsanaṃ maṃcaṃ na śūdrāya kadācana
||76||पतितैः सह संवासः पतनायैव जायते ॥
दद्यादासनं मंचं न शूद्राय कदाचन
brāhmaṇyāddhīyate vipraḥ śūdro dharmācca hīyate ||
dharmopadeśaḥ śūdrāṇāṃ svaśreyaḥ pratighātayet
||77||ब्राह्मण्याद्धीयते विप्रः शूद्रो धर्माच्च हीयते ॥
धर्मोपदेशः शूद्राणां स्वश्रेयः प्रतिघातयेत्
dvijaśuśrūṣaṇaṃ dharmmaḥ śūdrāṇāṃ hi paro mataḥ ||
kaṇḍūyanaṃ hi śirasaḥ pāṇibhyāṃ na śubhaṃ matam
||78||द्विजशुश्रूषणं धर्म्मः शूद्राणां हि परो मतः ॥
कण्डूयनं हि शिरसः पाणिभ्यां न शुभं मतम्
ādiśedvaidikaṃ maṃtraṃ na śūdrāya kadācana ||
brāhmaṇyā dīyate vipraḥ śūdro dharmmācca hīyate
||79||आदिशेद्वैदिकं मंत्रं न शूद्राय कदाचन ॥
ब्राह्मण्या दीयते विप्रः शूद्रो धर्म्माच्च हीयते
ātāḍanaṃ karābhyāṃ ca krośanaṃ keśaluṃcanam ||
aśāstravartanaṃ bhūyo lubdhātkṛtvā pratigraham
||80||आताडनं कराभ्यां च क्रोशनं केशलुंचनम् ॥
अशास्त्रवर्तनं भूयो लुब्धात्कृत्वा प्रतिग्रहम्
brāhmaṇaḥ sa ca vai yāti narakānekaviṃśatim ||
akālameghastanite varṣartau pāṃsuvarṣaṇe
||81||ब्राह्मणः स च वै याति नरकानेकविंशतिम् ॥
अकालमेघस्तनिते वर्षर्तौ पांसुवर्षणे
mahābāladhvanau rātrāvanadhyāyāḥ prakīrtitāḥ ||
ulkāpāte ca bhūkaṃpe digdāhe madhyarātriṣu
||82||महाबालध्वनौ रात्रावनध्यायाः प्रकीर्तिताः ॥
उल्कापाते च भूकंपे दिग्दाहे मध्यरात्रिषु
madhyayorvṛṣalopānte rājyahāre ca sūtake ||
daśāṣṭakāsu bhūtāyāṃ śrāddhāhe pratipadyapi
||83||मध्ययोर्वृषलोपान्ते राज्यहारे च सूतके ॥
दशाष्टकासु भूतायां श्राद्धाहे प्रतिपद्यपि
pūrṇimāyāṃ tathāṣṭamyāṃ viḍvare rāṣṭraviplave ||
upākarmaṇi cotsarge kalpādiṣu yugādiṣu
||84||पूर्णिमायां तथाष्टम्यां विड्वरे राष्ट्रविप्लवे ॥
उपाकर्मणि चोत्सर्गे कल्पादिषु युगादिषु
āraṇyakamadhītyāpi bāṇasāmnorapi dhvanau ||
anadhyāyeṣu caiteṣu cādhīyīta na vai kvacit
||85||आरण्यकमधीत्यापि बाणसाम्नोरपि ध्वनौ ॥
अनध्यायेषु चैतेषु चाधीयीत न वै क्वचित्
bhūtāṣṭamyoḥ pañcadaśyorbrahmacārī sadā bhavet ||
anāyuṣyakaraṃ ceha paradāropasarpaṇam ||
tasmāttaddūratastyājya vairiṇāṃ copasevanam
||86||भूताष्टम्योः पञ्चदश्योर्ब्रह्मचारी सदा भवेत् ॥
अनायुष्यकरं चेह परदारोपसर्पणम् ॥
तस्मात्तद्दूरतस्त्याज्य वैरिणां चोपसेवनम्
pūrvarddhibhiḥ parityaktamātmānaṃ nāvamānayet ||
sadodyamavatāṃ yasmācchriyo vidyā na durlabhāḥ
||87||पूर्वर्द्धिभिः परित्यक्तमात्मानं नावमानयेत् ॥
सदोद्यमवतां यस्माच्छ्रियो विद्या न दुर्लभाः
satyaṃ brūyātpriyaṃ būyānna brūyātsatyamapriyam ||
priyaṃ ca nānṛtaṃ brūyādeṣa dharmo vidhīyate
||88||सत्यं ब्रूयात्प्रियं बूयान्न ब्रूयात्सत्यमप्रियम् ॥
प्रियं च नानृतं ब्रूयादेष धर्मो विधीयते
vācovegaṃ manāvegaṃ jihvāvegaṃ ca varja yet ||
guhyajānyapi lomāni tatsparśādaśucirbhaveta
||89||वाचोवेगं मनावेगं जिह्वावेगं च वर्ज येत् ॥
गुह्यजान्यपि लोमानि तत्स्पर्शादशुचिर्भवेत
pādadhautodakaṃ mūtramucchiṣṭānyudakāni ca ||
niṣṭhīvanaṃ ca śleṣmāṇaṃ dūrāddūraṃ viniḥ kṣipeta
||90||पादधौतोदकं मूत्रमुच्छिष्टान्युदकानि च ॥
निष्ठीवनं च श्लेष्माणं दूराद्दूरं विनिः क्षिपेत
aharnniśaṃ śruterjāpyācchaucācāraniṣevaṇāta ||
adrohavatyā buddhyā ca pūrvajanma mmareddvijaḥ
||91||अहर्न्निशं श्रुतेर्जाप्याच्छौचाचारनिषेवणात ॥
अद्रोहवत्या बुद्ध्या च पूर्वजन्म म्मरेद्द्विजः
vṛddhānprayatnādvaṃdeta dadyātteṣāṃ svamāsanama ||
vinamrakandharo bhūyādanuyāyāttataśca tān
||92||वृद्धान्प्रयत्नाद्वंदेत दद्यात्तेषां स्वमासनम ॥
विनम्रकन्धरो भूयादनुयायात्ततश्च तान्
śrutibhūdevadevānāṃ nṛpasādhutapasvinām ||
pativratānāṃ nārīṇāṃ nindāṃ kuryānna karhi cita
||93||श्रुतिभूदेवदेवानां नृपसाधुतपस्विनाम् ॥
पतिव्रतानां नारीणां निन्दां कुर्यान्न कर्हि चित
uddhṛtya pañcamṛtpiṃḍānsnāyātparajalāśaye ||
śraddhayā pātramāsādya yatkiṃciddīyate vasu
||94||उद्धृत्य पञ्चमृत्पिंडान्स्नायात्परजलाशये ॥
श्रद्धया पात्रमासाद्य यत्किंचिद्दीयते वसु
deśe kāle ca vidhinā tadānaṃtyāya kalpate ||
bhūprado maṇḍalādhīśaḥ sarvatra sukhito'nnadaḥ
||95||देशे काले च विधिना तदानंत्याय कल्पते ॥
भूप्रदो मण्डलाधीशः सर्वत्र सुखितोऽन्नदः
toyadātā surūpaḥ syātpuṣṭaścānnaprado bhaveta ||
pradīpado nirmalākṣo godātāryamaloka bhāk
||96||तोयदाता सुरूपः स्यात्पुष्टश्चान्नप्रदो भवेत ॥
प्रदीपदो निर्मलाक्षो गोदातार्यमलोक भाक्
svarṇadātā ca dīrghāyustiladaḥ syācca suprajaḥ ||
veśmado'tyuccasaudheśo vastradaścandralokabhāk
||97||स्वर्णदाता च दीर्घायुस्तिलदः स्याच्च सुप्रजः ॥
वेश्मदोऽत्युच्चसौधेशो वस्त्रदश्चन्द्रलोकभाक्
hayaprado divyadeho lakṣmīvānvṛṣabha pradaḥ ||
subhāryaḥ śibikādātā suparyaṃkaprado'pi ca
||98||हयप्रदो दिव्यदेहो लक्ष्मीवान्वृषभ प्रदः ॥
सुभार्यः शिबिकादाता सुपर्यंकप्रदोऽपि च
śraddhayā pratigṛhṇāti śraddhayā yaḥ prayacchati ||
svargiṇau tāvubhau syātāṃ patato'śradrayā tvadhaḥ
||99||श्रद्धया प्रतिगृह्णाति श्रद्धया यः प्रयच्छति ॥
स्वर्गिणौ तावुभौ स्यातां पततोऽश्रद्रया त्वधः
anṛtena kṣaredyajñastapo vismayataḥ kṣaret ||
kṣaretkīrtirvinādānamāyurviprāpamānataḥ
||100||अनृतेन क्षरेद्यज्ञस्तपो विस्मयतः क्षरेत् ॥
क्षरेत्कीर्तिर्विनादानमायुर्विप्रापमानतः
gaṃdhaṃ puṣpaṃ kuśā gāvaḥ śākaṃ māṃsaṃ payo dadhi ||
maṇimatsyagahaṃ dhānyaṃ grāhyametadupasthitam
||101||गंधं पुष्पं कुशा गावः शाकं मांसं पयो दधि ॥
मणिमत्स्यगहं धान्यं ग्राह्यमेतदुपस्थितम्
madhūdakaṃ phalaṃ mūlamedhāṃsyabhayadakṣiṇā ||
abhyudyatāni grāhyāṇi tvetānyapi nikṛṣṭataḥ
||102||मधूदकं फलं मूलमेधांस्यभयदक्षिणा ॥
अभ्युद्यतानि ग्राह्याणि त्वेतान्यपि निकृष्टतः
dāsanāpitagopālakulamitrārddhasīriṇaḥ ||
bhojyānnāḥ śūdravargemī tathātmavinivedakaḥ
||103||दासनापितगोपालकुलमित्रार्द्धसीरिणः ॥
भोज्यान्नाः शूद्रवर्गेमी तथात्मविनिवेदकः
itthamācāradharmoyaṃ dharmāraṇyanivāsinām ||
śrutismṛtyuktadharmo'yaṃ yudhiṣṭhira niveditaḥ
||104||इत्थमाचारधर्मोयं धर्मारण्यनिवासिनाम् ॥
श्रुतिस्मृत्युक्तधर्मोऽयं युधिष्ठिर निवेदितः
iti śrīskāṃde mahāpurāṇa ekāśītisāhasryāṃ saṃhitāyāṃ tṛtīye brahmakhaṇḍe pūrvabhāge dharmāraṇyamāhātmye sadācāralakṣaṇavarṇanaṃ nāma ṣaṣṭho'dhyāyaḥ || 6 ||