अध्ययनम्
- अनुक्रमणिका
- संहिता निर्देशाः
- मूलम्
तै॰ब्रा॰ २.७.१७
ये के॒शिनः॑ प्रथ॒माः स॒त्रमास॑त।
येभि॒राभृ॑तं॒ यदि॒दं वि॒रोच॑ते।
तेभ्यो॑ जुहोमि बहु॒धा घृ॒तेन॑।
रा॒यस्पोषे॑णे॒मं वर्च॑सा॒ सꣳ सृ॑जाथ।
नर्ते ब्रह्म॑ण॒स्तप॑सो विमो॒कः।
द्वि॒नाम्नी॑ दी॒क्षा व॒शिनी॒ ह्यु॑ग्रा।
प्र केशाः᳚ सु॒वते॑ का॒ण्डिनो॑ भवन्ति।
तेषां᳚ ब्र॒ह्मेदीशे॒ वप॑नस्य॒ नान्यः।
आ रो॑ह॒ प्रोष्ठं॒ विष॑हस्व॒ शत्रून्॑।
अवा᳚स्राग्दी॒क्षा व॒शिनी॒ ह्यु॑ग्रा॥५९॥
दे॒हि दक्षि॑णां॒ प्रति॑र॒स्वायुः॑।
अथा॑मुच्यस्व॒ वरु॑णस्य॒ पाशा᳚त्।
येनाव॑पथ्सवि॒ता क्षु॒रेण॑।
सोम॑स्य॒ राज्ञो॒ वरु॑णस्य वि॒द्वान्।
तेन॑ ब्रह्माणो वपते॒दम॒स्योर्जेमम्।
र॒य्या वर्च॑सा॒ सꣳ सृ॑जाथ।
मा ते॒ केशा॒ननु॑ गा॒द्वर्च॑ ए॒तत्।
तथा॑ धा॒ता क॑रोतु ते।
तुभ्य॒मिन्द्रो॒ बृह॒स्पतिः॑।
स॒वि॒ता वर्च॒ आद॑धात्॥६०॥
तेभ्यो॑ नि॒धानं॑ बहु॒धा व्यैच्छन्॑।
अ॒न्त॒रा द्यावा॑पृथि॒वी अ॒पः सुवः॑।
द॒र्भ॒स्त॒म्बे वी॒र्य॑कृते नि॒धाय॑।
पौꣴस्ये॑ने॒मं वर्च॑सा॒ सꣳ सृ॑जाथ।
बलं॑ ते बाहु॒वोः स॑वि॒ता द॑धातु।
सोम॑स्त्वाऽनक्तु॒ पय॑सा घृ॒तेन॑।
स्त्री॒षु रू॒पम॑श्विनै॒तन्नि ध॑त्तम्।
पौꣴस्ये॑ने॒मं वर्च॑सा॒ सꣳसृ॑जाथ।
यथ्सी॒मन्तं॒ कङ्क॑तस्ते लि॒लेख॑।
यद्वा᳚ क्षु॒रः प॑रिव॒वर्ज॒ वपꣴ॑स्ते।
स्त्री॒षु रू॒पम॑श्विनै॒तन्नि ध॑त्तम्।
पौꣴस्ये॑ने॒मꣳ सꣳ सृ॑जाथो वी॒र्ये॑ण॥६१॥ ॥TB 2.7.17॥
॥१॥