अध्ययनम्
- अनुक्रमणिका
- संहिता निर्देशाः
- मूलम्
तै॰ब्रा॰ २.७.६
ए॒ष गो॑स॒वः।
ष॒ट्त्रि॒ꣳ॒श उ॒क्थ्यो॑ बृ॒हथ्सा॑मा।
पव॑माने कण्वरथन्त॒रं भ॑वति।
यो वै वा॑ज॒पेयः॑।
स स॑म्राट्थ्स॒वः।
यो रा॑ज॒सूयः॑।
स व॑रुणस॒वः।
प्र॒जाप॑तिः॒ स्वारा᳚ज्यं परमे॒ष्ठी।
स्वारा᳚ज्यं॒ गौरे॒व।
गौरि॑व भवति॥१३॥
य ए॒तेन॒ यज॑ते।
य उ॑ चैनमे॒वं वेद॑।
उ॒भे बृ॑हद्रथन्त॒रे भ॑वतः।
तद्धि स्वारा᳚ज्यम्।
अ॒युतं॒ दक्षि॑णाः।
तद्धि स्वारा᳚ज्यम्।
प्र॒ति॒धुषा॒ऽभिषि॑ञ्चति।
तद्धि स्वारा᳚ज्यम्।
अनु॑द्धते॒ वेद्यै॑ दक्षिण॒त आ॑हव॒नीय॑स्य बृह॒तः स्तो॒त्रं प्रत्य॒भिषि॑ञ्चति।
इ॒यं वाव र॑थन्त॒रम्॥१४॥
अ॒सौ बृ॒हत्।
अ॒नयो॑रे॒वैन॒मन॑न्तर्हितम॒भिषि॑ञ्चति।
प॒शु॒स्तो॒मो वा ए॒षः।
तेन॑ गोस॒वः।
ष॒ट्त्रि॒ꣳ॒शः सर्वः॑।
रे॒वज्जा॒तः सह॑सा वृ॒द्धः।
क्ष॒त्राणां᳚ क्षत्र॒भृत्त॑मो वयो॒धाः।
म॒हान्म॑हि॒त्वे त॑स्तभा॒नः।
क्ष॒त्रे रा॒ष्ट्रे च॑ जागृहि।
प्र॒जाप॑तेस्त्वा परमे॒ष्ठिनः॒ स्वारा᳚ज्येना॒भिषि॑ञ्चा॒मीत्या॑ह।
स्वारा᳚ज्यमे॒वैनं॑ गमयति॥१५॥ ॥TB 2.7.6॥
॥१॥