atrāsti ca mahādevi khalvāvaraṇapaṃcakam
īśvara uvāca
atrāsti ca mahādevi khalvāvaraṇapaṃcakam |
paṃcāvaraṇapūjāntu prārabheta yathākramam
||1||अत्रास्ति च महादेवि खल्वावरणपंचकम् ।
पंचावरणपूजान्तु प्रारभेत यथाक्रमम्
prathamampūjitau yatra tatraiva kramaśassudhīḥ |
gandhādyairarcayetpūrvaṃ devau heraṃbaṣaṇmukhau
||2||प्रथमम्पूजितौ यत्र तत्रैव क्रमशस्सुधीः ।
गन्धाद्यैरर्चयेत्पूर्वं देवौ हेरंबषण्मुखौ
paṃca brahmāṇi parito vṛtte sampūjayetkramāt |
īśānadeśe pūrve ca dakṣiṇe cottare tathā
||3||पंच ब्रह्माणि परितो वृत्ते सम्पूजयेत्क्रमात् ।
ईशानदेशे पूर्वे च दक्षिणे चोत्तरे तथा
paścime ca tatastasminṣaḍaṃgāni samarcayeta |
āgneye ca tathaiśāne nairṛte vāyudeśake
||4||पश्चिमे च ततस्तस्मिन्षडंगानि समर्चयेत ।
आग्नेये च तथैशाने नैर्ऋते वायुदेशके
madhye netrantadvadastrampūrvādiparitaḥ kramāt |
prathamāvaraṇamproktaṃ dvitīyāvaraṇaṃ śṛṇu
||5||मध्ये नेत्रन्तद्वदस्त्रम्पूर्वादिपरितः क्रमात् ।
प्रथमावरणम्प्रोक्तं द्वितीयावरणं शृणु
anantampūrvadikpatre sūkṣmandakṣiṇatastathā |
śivottamaṃ paścimata ekanetrantathottare
||6||अनन्तम्पूर्वदिक्पत्रे सूक्ष्मन्दक्षिणतस्तथा ।
शिवोत्तमं पश्चिमत एकनेत्रन्तथोत्तरे
ekarudrantathaiśāne trimūrtiṃ vahnidigdale |
śrīkaṇṭhaṃ nairṛte vāyau śikhaṇḍīśaṃ samarcayet
||7||एकरुद्रन्तथैशाने त्रिमूर्तिं वह्निदिग्दले ।
श्रीकण्ठं नैर्ऋते वायौ शिखण्डीशं समर्चयेत्
dvitīyāvaraṇe caiva pūjyāste cakravartinaḥ |
pūrvadvārasya madhye tu vṛṣeśānamprapūjayet
||8||द्वितीयावरणे चैव पूज्यास्ते चक्रवर्तिनः ।
पूर्वद्वारस्य मध्ये तु वृषेशानम्प्रपूजयेत्
taddakṣiṇe nandinañca mahākālantaduttare |
bhṛṃgīśandakṣiṇadvārapaścime samprapūjayet
||9||तद्दक्षिणे नन्दिनञ्च महाकालन्तदुत्तरे ।
भृंगीशन्दक्षिणद्वारपश्चिमे सम्प्रपूजयेत्
tatpūrvakoṣṭhe gandhādyaissamprapūjya vināyakam |
paścimottarakoṣṭhe ca vṛṣabhandakṣiṇe guham
||10||तत्पूर्वकोष्ठे गन्धाद्यैस्सम्प्रपूज्य विनायकम् ।
पश्चिमोत्तरकोष्ठे च वृषभन्दक्षिणे गुहम्
uttaradvārapūrve tu pradakṣiṇavidhānataḥ |
nāmāṣṭakavidhānena pūjayeducyate hi tat
||11||उत्तरद्वारपूर्वे तु प्रदक्षिणविधानतः ।
नामाष्टकविधानेन पूजयेदुच्यते हि तत्
bhavaṃ śarvaṃ tatheśānaṃ rudrampaśupatimpunaḥ |
ugrambhīmammahādevantṛtīyāvaraṇantvidam
||12||भवं शर्वं तथेशानं रुद्रम्पशुपतिम्पुनः ।
उग्रम्भीमम्महादेवन्तृतीयावरणन्त्विदम्
yo vedādau svara iti samāvāhya maheśvaram |
pūjayetpūrvadigbhāge kamale karṇikopari
||13||यो वेदादौ स्वर इति समावाह्य महेश्वरम् ।
पूजयेत्पूर्वदिग्भागे कमले कर्णिकोपरि
īśvarampūrvadikpatre viśveśandakṣiṇe tataḥ |
saumye tu parameśānaṃ sarveśampa ścime yajet
||14||ईश्वरम्पूर्वदिक्पत्रे विश्वेशन्दक्षिणे ततः ।
सौम्ये तु परमेशानं सर्वेशम्प श्चिमे यजेत्
dakṣiṇe tu yajedrudramāvorājānamityṛcā |
āvāhya gandhapuṣpādyaiḥ karṇikāyāndaleṣu ca
||15||दक्षिणे तु यजेद्रुद्रमावोराजानमित्यृचा ।
आवाह्य गन्धपुष्पाद्यैः कर्णिकायान्दलेषु च
śivaḥ pūrve dakṣiṇato hara uttarato mṛḍaḥ |
bhavaḥ paścimadikpatre pūjyā ete yathākramam
||16||शिवः पूर्वे दक्षिणतो हर उत्तरतो मृडः ।
भवः पश्चिमदिक्पत्रे पूज्या एते यथाक्रमम्
uttare viṣṇumāvāhya gandhapuṣpādibhiryajet |
pratadviṣṇuriti procya karṇikāyāndaleṣu ca
||17||उत्तरे विष्णुमावाह्य गन्धपुष्पादिभिर्यजेत् ।
प्रतद्विष्णुरिति प्रोच्य कर्णिकायान्दलेषु च
vāsudevampūrvabhāge dakṣiṇe cāniruddhakam |
saumye saṃkarṣaṇañcaiva pradyumnampaścime yajet
||18||वासुदेवम्पूर्वभागे दक्षिणे चानिरुद्धकम् ।
सौम्ये संकर्षणञ्चैव प्रद्युम्नम्पश्चिमे यजेत्
brahmāṇampaścime padme samāvāhya samarcayet |
hiraṇyagarbhaḥ samavartata iti maṃtreṇa maṃtravit
||19||ब्रह्माणम्पश्चिमे पद्मे समावाह्य समर्चयेत् ।
हिरण्यगर्भः समवर्तत इति मंत्रेण मंत्रवित्
hiraṇyagarbhaṃ pūrvasyāṃ virājandakṣiṇe tataḥ |
uttare puṣkarañcaiva kālampaścimato yajet
||20||हिरण्यगर्भं पूर्वस्यां विराजन्दक्षिणे ततः ।
उत्तरे पुष्करञ्चैव कालम्पश्चिमतो यजेत्
sarvorddhvapaṃktau pūrvādipradakṣiṇavidhānataḥ |
tattatsthāneṣu saṃpūjya lokapālānanukramāt
||21||सर्वोर्द्ध्वपंक्तौ पूर्वादिप्रदक्षिणविधानतः ।
तत्तत्स्थानेषु संपूज्य लोकपालाननुक्रमात्
rāntaṃpāntaṃ tathā jñāntaṃ lāntaṃ lāntamapūrvakam |
ṣāntaṃ sāntañca vedādyaṃ śrībījañca daśakramāt
||22||रान्तंपान्तं तथा ज्ञान्तं लान्तं लान्तमपूर्वकम् ।
षान्तं सान्तञ्च वेदाद्यं श्रीबीजञ्च दशक्रमात्
bījāni lokapālānāmetairetānsamarcayet |
nairṛte cottare tadvadīśānasya ca dakṣiṇe
||23||बीजानि लोकपालानामेतैरेतान्समर्चयेत् ।
नैर्ऋते चोत्तरे तद्वदीशानस्य च दक्षिणे
brahma viṣṇū ca vidhinā pūjayedupacārakaiḥ |
bāhyarekhāsu deveśampañcamāvaraṇe yajet
||24||ब्रह्म विष्णू च विधिना पूजयेदुपचारकैः ।
बाह्यरेखासु देवेशम्पञ्चमावरणे यजेत्
śrīmattriśūlamīśāne vajraṃ māhendradiṅmukhe |
paraśuṃ vahnidigbhāge yāmye sāyakamarcayet
||25||श्रीमत्त्रिशूलमीशाने वज्रं माहेन्द्रदिङ्मुखे ।
परशुं वह्निदिग्भागे याम्ये सायकमर्चयेत्
nairṛte tu yajetkhaḍgampāśaṃ varuṇagocare |
aṃkuśaṃ mārute bhāge pinākaṃ cottare yajet
||26||नैर्ऋते तु यजेत्खड्गम्पाशं वरुणगोचरे ।
अंकुशं मारुते भागे पिनाकं चोत्तरे यजेत्
paścimābhimukhaṃ raudraṃ kṣetrapālaṃ samarcayet |
yathāvidhi vidhānajñaśśivaprītyarthameva ca
||27||पश्चिमाभिमुखं रौद्रं क्षेत्रपालं समर्चयेत् ।
यथाविधि विधानज्ञश्शिवप्रीत्यर्थमेव च
kṛtāñjalipuṭāssarve cintyāḥ smitamukhāmbujāḥ |
sādaraṃ prekṣamāṇāśca devaṃ devīñca sarvadā
||28||कृताञ्जलिपुटास्सर्वे चिन्त्याः स्मितमुखाम्बुजाः ।
सादरं प्रेक्षमाणाश्च देवं देवीञ्च सर्वदा
itthamāvaraṇābhyarcāṃ kṛtvā vikṣepaśāntaye |
punarabhyarcya deveśampraṇavaṃ ca śivaṃ vadet
||29||इत्थमावरणाभ्यर्चां कृत्वा विक्षेपशान्तये ।
पुनरभ्यर्च्य देवेशम्प्रणवं च शिवं वदेत्
evamabhyarcya vidhivadgandhādyairupacārakaiḥ |
upacaryya tato dadyānnaivedyaṃ vidhisādhitam
||30||एवमभ्यर्च्य विधिवद्गन्धाद्यैरुपचारकैः ।
उपचर्य्य ततो दद्यान्नैवेद्यं विधिसाधितम्
punarācamanīyaṃ ca dadyādarghyaṃ yathā purā |
tato nivedya pānīyantāmbūlaṃ copadeśataḥ
||31||पुनराचमनीयं च दद्यादर्घ्यं यथा पुरा ।
ततो निवेद्य पानीयन्ताम्बूलं चोपदेशतः
nīrājanādikaṃ kṛtvā pūjāśeṣaṃ samāpayet |
dhyātvā devaṃ ca devīñca manumaṣṭottaraṃ japet
||32||नीराजनादिकं कृत्वा पूजाशेषं समापयेत् ।
ध्यात्वा देवं च देवीञ्च मनुमष्टोत्तरं जपेत्
tata utthāya racitapuṣpāñjalipuṭaḥ sthitaḥ |
japeddhyātvā mahādevaṃ yo devānāmiti kramāt
||33||तत उत्थाय रचितपुष्पाञ्जलिपुटः स्थितः ।
जपेद्ध्यात्वा महादेवं यो देवानामिति क्रमात्
yo vedādau svaraḥ prokta ityaṃtamparameśvari |
puṣpāñjalintato dattvā triḥ pradakṣiṇamācaret
||34||यो वेदादौ स्वरः प्रोक्त इत्यंतम्परमेश्वरि ।
पुष्पाञ्जलिन्ततो दत्त्वा त्रिः प्रदक्षिणमाचरेत्
sāṣṭāṃgampraṇamettaṃ sa bhaktyā paramayānvitaḥ |
punaḥ pradakṣiṇāṃ kṛtvā praṇametpunarekadhā
||35||साष्टांगम्प्रणमेत्तं स भक्त्या परमयान्वितः ।
पुनः प्रदक्षिणां कृत्वा प्रणमेत्पुनरेकधा
sthitvāsane samabhyarcya devaṃ nāmāṣṭakena ca |
sādhu vāsādhu vā karma yadyadācaritaṃ mayā
||36||स्थित्वासने समभ्यर्च्य देवं नामाष्टकेन च ।
साधु वासाधु वा कर्म यद्यदाचरितं मया
tatsarvaṃ bhagavañchambho bhavadārādhanamparam |
iti śaṃkhodakenaiva sapuṣpeṇa samarpayet
||37||तत्सर्वं भगवञ्छम्भो भवदाराधनम्परम् ।
इति शंखोदकेनैव सपुष्पेण समर्पयेत्
pūjyaṃ punassamabhyarcya sārthaṃ nāmāṣṭakaṃ japet |
tadeva śṛṇu deveśi saṃbruve tava bhaktitaḥ
||38||पूज्यं पुनस्समभ्यर्च्य सार्थं नामाष्टकं जपेत् ।
तदेव शृणु देवेशि संब्रुवे तव भक्तितः
iti śrīśivamahāpurāṇe ṣaṣṭhyāṃ kailāsasaṃhitāyāmāvaraṇapūjāvarṇanaṃ nāmāṣṭamo'dhyāyaḥ || 8 ||