punarviśeṣaṃ vakṣyāmi sadācārasya kuṃbhaja
skaṃda uvāca
punarviśeṣaṃ vakṣyāmi sadācārasya kuṃbhaja ||
yaṃ śrutvāpi naro dhīmānnājñānatimiraṃ viśet
||1||पुनर्विशेषं वक्ष्यामि सदाचारस्य कुंभज ॥
यं श्रुत्वापि नरो धीमान्नाज्ञानतिमिरं विशेत्
brāhmaṇāḥ kṣatriyā vaiśyāstrayo varṇā dvijāḥ smṛtāḥ ||
prathamaṃ mātṛto jātā dvitīyaṃ copanāyanāt
||2||ब्राह्मणाः क्षत्रिया वैश्यास्त्रयो वर्णा द्विजाः स्मृताः ॥
प्रथमं मातृतो जाता द्वितीयं चोपनायनात्
eṣāṃ kriyāniṣekādi śmaśānāṃtā ca vaidikī ||
ādadhīta sudhīrgarbhamṛtaumūlaṃ maghāṃ tyajet
||3||एषां क्रियानिषेकादि श्मशानांता च वैदिकी ॥
आदधीत सुधीर्गर्भमृतौमूलं मघां त्यजेत्
spaṃdanātprākpuṃsavanaṃ sīmaṃtonnayanaṃ tataḥ ||
māsi ṣaṣṭhe'ṣṭame vāpi jātetho jātakarma ca
||4||स्पंदनात्प्राक्पुंसवनं सीमंतोन्नयनं ततः ॥
मासि षष्ठेऽष्टमे वापि जातेथो जातकर्म च
nāmāhnyekādaśe gehāccaturthemāsi niṣkramaḥ ||
māsennaprāśanaṃ ṣaṣṭhe cūḍābde vā yathākulam
||5||नामाह्न्येकादशे गेहाच्चतुर्थेमासि निष्क्रमः ॥
मासेन्नप्राशनं षष्ठे चूडाब्दे वा यथाकुलम्
śamameno vrajedevaṃ baijaṃ garbhajamave ca ||
strīṇāmetāḥ kriyāstūṣṇīṃ pāṇigrāhastu maṃtravān
||6||शममेनो व्रजेदेवं बैजं गर्भजमवे च ॥
स्त्रीणामेताः क्रियास्तूष्णीं पाणिग्राहस्तु मंत्रवान्
saptamethāṣṭamevābde sāvitrīṃ brāhmaṇorhati ||
nṛpastvekādaśe vaiśyo dvādaśe vā yathākulam
||7||सप्तमेथाष्टमेवाब्दे सावित्रीं ब्राह्मणोर्हति ॥
नृपस्त्वेकादशे वैश्यो द्वादशे वा यथाकुलम्
brahmatejobhivṛddhyarthaṃ viprobdepaṃcamerhati ||
ṣaṣṭhe balārthī nṛpatirmaujīṃ vaiśyoṣṭame dhriyet
||8||ब्रह्मतेजोभिवृद्ध्यर्थं विप्रोब्देपंचमेर्हति ॥
षष्ठे बलार्थी नृपतिर्मौजीं वैश्योष्टमे ध्रियेत्
mahāvyāhṛtipūrvaṃ ca vedamadhyāpayedguruḥ ||
upanīya ca taṃ śiṣyaṃ śaucācāre ca yojayet
||9||महाव्याहृतिपूर्वं च वेदमध्यापयेद्गुरुः ॥
उपनीय च तं शिष्यं शौचाचारे च योजयेत्
pūrvoktavidhinā śaucaṃ kuryādācamanaṃ tathā ||
daṃtāñjihvāṃ viśodhyātha kṛtvā malaviśodhanam
||10||पूर्वोक्तविधिना शौचं कुर्यादाचमनं तथा ॥
दंताञ्जिह्वां विशोध्याथ कृत्वा मलविशोधनम्
snātvāṃbudaivatairmaṃtraiḥ prāṇānāyamya yatnataḥ ||
upasthānaṃ raveḥ kṛtvā saṃdhyayorubhayorapi
||11||स्नात्वांबुदैवतैर्मंत्रैः प्राणानायम्य यत्नतः ॥
उपस्थानं रवेः कृत्वा संध्ययोरुभयोरपि
agnikāryaṃ tataḥ kṛtvā brāhmaṇānabhivādayet ||
bruvannamuka gotrohamabhivādaya ityapi
||12||अग्निकार्यं ततः कृत्वा ब्राह्मणानभिवादयेत् ॥
ब्रुवन्नमुक गोत्रोहमभिवादय इत्यपि
abhivādanaśīlasya vṛddhasevāratasya ca ||
āyuryaśobalaṃ buddhirvardhate'harahodhikam
||13||अभिवादनशीलस्य वृद्धसेवारतस्य च ॥
आयुर्यशोबलं बुद्धिर्वर्धतेऽहरहोधिकम्
adhīte guruṇā hūtaḥ prāptaṃ tasmai nivedayet ||
karmaṇā manasā vācā hitaṃ tasyācaretsadā
||14||अधीते गुरुणा हूतः प्राप्तं तस्मै निवेदयेत् ॥
कर्मणा मनसा वाचा हितं तस्याचरेत्सदा
adhyāpyādharmatonārthātsādhvāptajñānavittadāḥ ||
śaktāḥ kṛtajñāḥ śucayo'drohakāścānasūyakāḥ
||15||अध्याप्याधर्मतोनार्थात्साध्वाप्तज्ञानवित्तदाः ॥
शक्ताः कृतज्ञाः शुचयोऽद्रोहकाश्चानसूयकाः
dhārayenmekhalādaṃḍopavītājinameva ca ||
aniṃdyeṣu caredbhaikṣyaṃ brāhmaṇeṣvātmavṛttaye
||16||धारयेन्मेखलादंडोपवीताजिनमेव च ॥
अनिंद्येषु चरेद्भैक्ष्यं ब्राह्मणेष्वात्मवृत्तये
brāhmaṇakṣatriyaviśāmādimadhyāvasānataḥ ||
bhaikṣyacaryā krameṇa syādbhavacchabdopalakṣitā
||17||ब्राह्मणक्षत्रियविशामादिमध्यावसानतः ॥
भैक्ष्यचर्या क्रमेण स्याद्भवच्छब्दोपलक्षिता
vāgyato gurvanujñāto bhuṃjītānnamakutsayan ||
ekānnaṃ na samaśnīyācchrāddhe'śnīyāttathāpadi
||18||वाग्यतो गुर्वनुज्ञातो भुंजीतान्नमकुत्सयन् ॥
एकान्नं न समश्नीयाच्छ्राद्धेऽश्नीयात्तथापदि
anārogyamanāyuṣyamasvargyaṃcātibhojanam ||
apuṇyaṃ lokavidviṣṭaṃ tasmāttatparivarjayet
||19||अनारोग्यमनायुष्यमस्वर्ग्यंचातिभोजनम् ॥
अपुण्यं लोकविद्विष्टं तस्मात्तत्परिवर्जयेत्
na dvirbhuṃjīta caikasmindivā kvāpi dvijottamaḥ ||
sāyaṃprātardvijo'śnīyādagnihotravidhānavit
||20||न द्विर्भुंजीत चैकस्मिन्दिवा क्वापि द्विजोत्तमः ॥
सायंप्रातर्द्विजोऽश्नीयादग्निहोत्रविधानवित्
madhumāṃsaṃ prāṇihiṃsāṃ bhāskarālokanāṃjane ||
striyaṃ paryuṣitocchiṣṭaṃparivādaṃ vivajaryet
||21||मधुमांसं प्राणिहिंसां भास्करालोकनांजने ॥
स्त्रियं पर्युषितोच्छिष्टंपरिवादं विवजर्येत्
aupanāyanikaḥ kālo brahmakṣatra viśāṃ paraḥ ||
ā ṣoḍaśādādvāviṃśādā caturviṃśadabdataḥ
||22||औपनायनिकः कालो ब्रह्मक्षत्र विशां परः ॥
आ षोडशादाद्वाविंशादा चतुर्विंशदब्दतः
itopyūrdhvaṃ na saṃskāryāḥ patitā dharmavarjitāḥ ||
vrātyastomena yajñena tatpātityaṃ parivrajet
||23||इतोप्यूर्ध्वं न संस्कार्याः पतिता धर्मवर्जिताः ॥
व्रात्यस्तोमेन यज्ञेन तत्पातित्यं परिव्रजेत्
sāvitrīpatitaiḥ sārdhaṃ saṃbaṃdhaṃ na samācaret ||
aiṇaṃ ca rauravaṃ vāstaṃ kramāccarma dvijanmanām
||24||सावित्रीपतितैः सार्धं संबंधं न समाचरेत् ॥
ऐणं च रौरवं वास्तं क्रमाच्चर्म द्विजन्मनाम्
vasīrannānupūrvyeṇa śāṇa kṣaumāvikāni ca ||
dvijasya mekhalā mauṃjī maurvī ca bhujajanmanaḥ ||
bhavettrivṛtsamāślakṣṇā viśastu śaṇatāṃtavī
||25||वसीरन्नानुपूर्व्येण शाण क्षौमाविकानि च ॥
द्विजस्य मेखला मौंजी मौर्वी च भुजजन्मनः ॥
भवेत्त्रिवृत्समाश्लक्ष्णा विशस्तु शणतांतवी
muṃjābhāve vidhātavyā kuśāśmaṃtakabalvajaiḥ ||
graṃthinaikena saṃyuktā tribhiḥ paṃcabhireva vā
||26||मुंजाभावे विधातव्या कुशाश्मंतकबल्वजैः ॥
ग्रंथिनैकेन संयुक्ता त्रिभिः पंचभिरेव वा
upavītakrameṇa syātkārpāsaṃ śāṇamāvikam ||
trivṛdūrdhvavṛtaṃ tacca bhavedāyurvivṛddhaye
||27||उपवीतक्रमेण स्यात्कार्पासं शाणमाविकम् ॥
त्रिवृदूर्ध्ववृतं तच्च भवेदायुर्विवृद्धये
bilvapālāśayordaṃḍo brāhmaṇasya nṛpasya tu ||
nyagrodhabāladalayoḥ pīlūduṃbarayorviśaḥ
||28||बिल्वपालाशयोर्दंडो ब्राह्मणस्य नृपस्य तु ॥
न्यग्रोधबालदलयोः पीलूदुंबरयोर्विशः
āmauliṃ vā''lalāṭaṃvā''nāsamūrdhvapramāṇataḥ ||
brahmakṣatraviśāṃ daṃḍastvagāḍhyonāgnidūṣitaḥ
||29||आमौलिं वाऽऽललाटंवाऽऽनासमूर्ध्वप्रमाणतः ॥
ब्रह्मक्षत्रविशां दंडस्त्वगाढ्योनाग्निदूषितः
pradakṣiṇaṃ parītyāgnimupasthāya divākaram ||
daṃḍājinopavītāḍhyaścaredbhaikṣyaṃ yathoditam
||30||प्रदक्षिणं परीत्याग्निमुपस्थाय दिवाकरम् ॥
दंडाजिनोपवीताढ्यश्चरेद्भैक्ष्यं यथोदितम्
mātṛmātṛṣvasṛsvasṛpitṛsvasṛpuraḥsarāḥ ||
prathamaṃ bhikṣaṇīyāḥ syuretāyācana no vadet
||31||मातृमातृष्वसृस्वसृपितृस्वसृपुरःसराः ॥
प्रथमं भिक्षणीयाः स्युरेतायाचन नो वदेत्
yāvadvedamadhīte ca caranvedavratāni ca ||
brahmacārī bhavettāvadūrdhvaṃ snāto gṛhī bhavet
||32||यावद्वेदमधीते च चरन्वेदव्रतानि च ॥
ब्रह्मचारी भवेत्तावदूर्ध्वं स्नातो गृही भवेत्
proktosāvupakurvāṇo dvitīyastatra naiṣṭhikaḥ ||
tiṣṭhettāvadgurukule yāvatsyādāyuṣaḥ kṣayaḥ
||33||प्रोक्तोसावुपकुर्वाणो द्वितीयस्तत्र नैष्ठिकः ॥
तिष्ठेत्तावद्गुरुकुले यावत्स्यादायुषः क्षयः
gṛhāśramaṃ samāśritya yaḥ punarbrahmacaryabhāk ||
nāsau yatirvanastho vā syātsarvāśramavarjitaḥ
||34||गृहाश्रमं समाश्रित्य यः पुनर्ब्रह्मचर्यभाक् ॥
नासौ यतिर्वनस्थो वा स्यात्सर्वाश्रमवर्जितः
anāśramī na tiṣṭheta dinamekamapi dvijaḥ ||
āśramaṃ tu vinā tiṣṭhanprāyaścittī yato hi saḥ
||35||अनाश्रमी न तिष्ठेत दिनमेकमपि द्विजः ॥
आश्रमं तु विना तिष्ठन्प्रायश्चित्ती यतो हि सः
japaṃ homaṃ vrataṃ dānaṃ svādhyāyaṃ pitṛtarpaṇam ||
kurvāṇothāśramabhraṣṭo nāsau tatphalamāpnuyāt
||36||जपं होमं व्रतं दानं स्वाध्यायं पितृतर्पणम् ॥
कुर्वाणोथाश्रमभ्रष्टो नासौ तत्फलमाप्नुयात्
mekhalājinadaṃḍāśca liṃgaṃ syādbrahmacāriṇaḥ ||
gṛhiṇo vedayajñādi nakhalomavanasthiteḥ
||37||मेखलाजिनदंडाश्च लिंगं स्याद्ब्रह्मचारिणः ॥
गृहिणो वेदयज्ञादि नखलोमवनस्थितेः
tridaṃḍādi yateruktamupalakṣaṇamatra vai ||
etallakṣaṇahīnastu prāyaścittī dine dine
||38||त्रिदंडादि यतेरुक्तमुपलक्षणमत्र वै ॥
एतल्लक्षणहीनस्तु प्रायश्चित्ती दिने दिने
jīrṇaṃ kamaṃḍaluṃ daṃḍamupavītājine api ||
apsveva tāni nikṣipya gṛhṇītānyacca maṃtravat
||39||जीर्णं कमंडलुं दंडमुपवीताजिने अपि ॥
अप्स्वेव तानि निक्षिप्य गृह्णीतान्यच्च मंत्रवत्
vidadhyātṣoḍaśe varṣe keśāṃtakarma ca kramāt ||
dvāviṃśe ca caturviṃśe gārhasthya pratipattaye
||40||विदध्यात्षोडशे वर्षे केशांतकर्म च क्रमात् ॥
द्वाविंशे च चतुर्विंशे गार्हस्थ्य प्रतिपत्तये
tapo yajña vratebhyaśca sarvasmācchubhakarmaṇaḥ ||
dvijātīnāṃ śrutirhyekā heturniśreyasa śriyaḥ
||41||तपो यज्ञ व्रतेभ्यश्च सर्वस्माच्छुभकर्मणः ॥
द्विजातीनां श्रुतिर्ह्येका हेतुर्निश्रेयस श्रियः
vedāraṃbhe visarge ca vidadhyātpraṇavaṃ sadā ||
aphalo'noṃkṛto yasmātpaṭhitopi na siddhaye
||42||वेदारंभे विसर्गे च विदध्यात्प्रणवं सदा ॥
अफलोऽनोंकृतो यस्मात्पठितोपि न सिद्धये
vedasya vadanaṃ proktaṃ gāyatrī tripadā parā ||
tisṛbhiḥ praṇavādyābhirmahāvyāhṛtibhiḥ saha
||43||वेदस्य वदनं प्रोक्तं गायत्री त्रिपदा परा ॥
तिसृभिः प्रणवाद्याभिर्महाव्याहृतिभिः सह
sahasraṃ sādhikaṃ kiṃcittrikamaitajjapanyamī ||
māsaṃ bahiḥ pratidinaṃ mahāghādapi mucyate
||44||सहस्रं साधिकं किंचित्त्रिकमैतज्जपन्यमी ॥
मासं बहिः प्रतिदिनं महाघादपि मुच्यते
atyabdamiti yobhyasyetpratighasramananyadhīḥ ||
sa vyomamūrtiḥ śuddhātmā paraṃ brahmādhigacchati
||45||अत्यब्दमिति योभ्यस्येत्प्रतिघस्रमनन्यधीः ॥
स व्योममूर्तिः शुद्धात्मा परं ब्रह्माधिगच्छति
trivarṇamayamoṃkāraṃ bhūrbhuvaḥsvariti trayam ||
pādatrayaṃ ca sāvitryāstrayovedā adūduhan
||46||त्रिवर्णमयमोंकारं भूर्भुवःस्वरिति त्रयम् ॥
पादत्रयं च सावित्र्यास्त्रयोवेदा अदूदुहन्
etadakṣaramenāṃ ca japedvyāhṛtipūrvikām ||
saṃdhyayorvedavidvipro vedapuṇyena yujyate
||47||एतदक्षरमेनां च जपेद्व्याहृतिपूर्विकाम् ॥
संध्ययोर्वेदविद्विप्रो वेदपुण्येन युज्यते
vidhikratordaśaguṇaṃ japasyaphalamaśnute ||
vidhikratordaśaguṇo japakraturudīritaḥ
||48||विधिक्रतोर्दशगुणं जपस्यफलमश्नुते ॥
विधिक्रतोर्दशगुणो जपक्रतुरुदीरितः
upāṃśustacchataguṇaḥ sahasro mānasastataḥ
||49||उपांशुस्तच्छतगुणः सहस्रो मानसस्ततः
adhītyavedānvedau vā vedaṃ vā śaktito dvijaḥ ||
suvarṇapūrṇa dharaṇī dānasya phalamaśnute
||50||अधीत्यवेदान्वेदौ वा वेदं वा शक्तितो द्विजः ॥
सुवर्णपूर्ण धरणी दानस्य फलमश्नुते
śrutimeva sadābhyasyettapastaptuṃ dvijottamaḥ ||
śrutyabhyāso hi viprasya paramaṃ tapa ucyate
||51||श्रुतिमेव सदाभ्यस्येत्तपस्तप्तुं द्विजोत्तमः ॥
श्रुत्यभ्यासो हि विप्रस्य परमं तप उच्यते
hitvā śruteradhyayanaṃ yonyatpaṭhitumicchati ||
sa dogdhrīṃ dhenumutsṛjya grāmakroḍīṃ dudhukṣati
||52||हित्वा श्रुतेरध्ययनं योन्यत्पठितुमिच्छति ॥
स दोग्ध्रीं धेनुमुत्सृज्य ग्रामक्रोडीं दुधुक्षति
upanīya ca vai śiṣyaṃ vedamadhyāpayeddvijaḥ ||
sakalpaṃ sarahasyaṃ ca tamācāryaṃ vidrbudhāḥ
||53||उपनीय च वै शिष्यं वेदमध्यापयेद्द्विजः ॥
सकल्पं सरहस्यं च तमाचार्यं विदु्र्बुधाः
yodhyāpayedekadeśaṃ śruteraṃgānyathāpi vā ||
vṛttyarthaṃ sa upādhyāyo vidvadbhiḥ parigīyate
||54||योध्यापयेदेकदेशं श्रुतेरंगान्यथापि वा ॥
वृत्त्यर्थं स उपाध्यायो विद्वद्भिः परिगीयते
yathāvidhi niṣekādi yaḥ karma kurute dvijaḥ ||
saṃbhāvayettathānnena guruḥ sa iha kīrtyate
||59||यथाविधि निषेकादि यः कर्म कुरुते द्विजः ॥
संभावयेत्तथान्नेन गुरुः स इह कीर्त्यते
agnyādheyaṃ pākayajñānagniṣṭomādikānmakhān ||
yaḥ karoti vṛto yasya sa tasyarttvigihocyate
||56||अग्न्याधेयं पाकयज्ञानग्निष्टोमादिकान्मखान् ॥
यः करोति वृतो यस्य स तस्यर्त्त्विगिहोच्यते
upādhyāyāddaśācārya ācāryāttu śataṃ pitā ||
sahasraṃ tu piturmātā gauraveṇātiricyate
||57||उपाध्यायाद्दशाचार्य आचार्यात्तु शतं पिता ॥
सहस्रं तु पितुर्माता गौरवेणातिरिच्यते
viprāṇāṃ jñānato jyaiṣṭhyaṃ bāhujānāṃ tu vīryataḥ ||
vaiśyānāṃ dhānyadhanataḥ pajjātānāṃ tu janmataḥ
||58||विप्राणां ज्ञानतो ज्यैष्ठ्यं बाहुजानां तु वीर्यतः ॥
वैश्यानां धान्यधनतः पज्जातानां तु जन्मतः
yathā dārumayo hastī yathā kṛttimayo mṛgaḥ ||
tathā vipro'nadhīyānastrayo'mī nāmadhāriṇaḥ
||59||यथा दारुमयो हस्ती यथा कृत्तिमयो मृगः ॥
तथा विप्रोऽनधीयानस्त्रयोऽमी नामधारिणः
svapne siktvā brahmacārī dvijaḥ śukramakāmataḥ ||
snātvārkamarcayitvā triḥ punarmāmityṛcaṃ japet
||60||स्वप्ने सिक्त्वा ब्रह्मचारी द्विजः शुक्रमकामतः ॥
स्नात्वार्कमर्चयित्वा त्रिः पुनर्मामित्यृचं जपेत्
svadharmaniratānāṃ ca vedayajñakriyāvatām ||
brahmacārī caredbhaikṣyaṃ veśmasuprayato'nvaham
||61||स्वधर्मनिरतानां च वेदयज्ञक्रियावताम् ॥
ब्रह्मचारी चरेद्भैक्ष्यं वेश्मसुप्रयतोऽन्वहम्
akṛtvā bhaikṣyacaraṇamasamidhya hutāśanam ||
anāturaḥ saptarātramavakīrṇi vrataṃ caret
||62||अकृत्वा भैक्ष्यचरणमसमिध्य हुताशनम् ॥
अनातुरः सप्तरात्रमवकीर्णि व्रतं चरेत्
yatheṣṭaceṣṭo nabhavedgurornayanagocare ||
na nāmaparigṛhṇīyātparokṣepyaviśeṣaṇam
||63||यथेष्टचेष्टो नभवेद्गुरोर्नयनगोचरे ॥
न नामपरिगृह्णीयात्परोक्षेप्यविशेषणम्
guruniṃdābhavedyatra parivādastu yatra ca ||
śrutī pidhāya vāstheyaṃ yātavyaṃ vā tatonyataḥ
||64||गुरुनिंदाभवेद्यत्र परिवादस्तु यत्र च ॥
श्रुती पिधाय वास्थेयं यातव्यं वा ततोन्यतः
kharo guroḥ parīvādācchvā bhavedguruniṃdakaḥ ||
matsarī kṣudrakīṭaḥsyātparibhoktā bhavetkṛmiḥ
||65||खरो गुरोः परीवादाच्छ्वा भवेद्गुरुनिंदकः ॥
मत्सरी क्षुद्रकीटःस्यात्परिभोक्ता भवेत्कृमिः
nābhivādyā guroḥ patnī spṛṣṭvāṃghrī yuvatī satī ||
kvāpi viṃśativarṣeṇa jñātṛṇā guṇadoṣayoḥ
||66||नाभिवाद्या गुरोः पत्नी स्पृष्ट्वांघ्री युवती सती ॥
क्वापि विंशतिवर्षेण ज्ञातृणा गुणदोषयोः
svabhāvaścaṃcalaḥ strīṇāṃ doṣaḥ puṃsāmataḥ smṛtaḥ ||
pramadāsu pramādyaṃti kvacinnaiva vipaścitaḥ
||67||स्वभावश्चंचलः स्त्रीणां दोषः पुंसामतः स्मृतः ॥
प्रमदासु प्रमाद्यंति क्वचिन्नैव विपश्चितः
vidvāṃsamapyavidvāṃsaṃ yatastādharṣayaṃtyalam ||
svavaśaṃ vāpi kurvaṃti sūtrabaddhaśakuṃtavat
||68||विद्वांसमप्यविद्वांसं यतस्ताधर्षयंत्यलम् ॥
स्ववशं वापि कुर्वंति सूत्रबद्धशकुंतवत्
na mātrā na duhitrā vā na svasraikāṃtaśīlatā ||
balavaṃtīdriyāṇyatra mohayaṃtyapi kovidān
||69||न मात्रा न दुहित्रा वा न स्वस्रैकांतशीलता ॥
बलवंतीद्रियाण्यत्र मोहयंत्यपि कोविदान्
prayatnena khananyadvadbhūmervāryadhigacchati ||
śuśrūṣayā gurostadvadvidyā śiṣyodhigacchati
||70||प्रयत्नेन खनन्यद्वद्भूमेर्वार्यधिगच्छति ॥
शुश्रूषया गुरोस्तद्वद्विद्या शिष्योधिगच्छति
śayānamabhyudayate bradhnaścedbrahmacāriṇam ||
pramādādatha nimlocejjapannapavaseddinam
||71||शयानमभ्युदयते ब्रध्नश्चेद्ब्रह्मचारिणम् ॥
प्रमादादथ निम्लोचेज्जपन्नपवसेद्दिनम्
sutasya saṃbhave kleśaṃ sahete pitarau ca yat ||
śakyā varṣaśatenāpi no kartuṃ tasya niṣkṛtiḥ
||72||सुतस्य संभवे क्लेशं सहेते पितरौ च यत् ॥
शक्या वर्षशतेनापि नो कर्तुं तस्य निष्कृतिः
atastayoḥ priyaṃ kuryādgurorapi ca sarvadā ||
triṣu teṣu sutuṣṭeṣu tapaḥ sarvaṃ samāpyate
||73||अतस्तयोः प्रियं कुर्याद्गुरोरपि च सर्वदा ॥
त्रिषु तेषु सुतुष्टेषु तपः सर्वं समाप्यते
teṣāṃ trayāṇāṃ śuśrūṣā paramaṃ tapa ucyate ||
tānatikramya yaḥ kuryāttannasiddhyetkadācana
||74||तेषां त्रयाणां शुश्रूषा परमं तप उच्यते ॥
तानतिक्रम्य यः कुर्यात्तन्नसिद्ध्येत्कदाचन
trīnevāmūnsamārādhya trīm̐llokānsa jayetsudhīḥ ||
devavaddivi dīvyeta teṣāṃ toṣaṃ vivardhayan
||75||त्रीनेवामून्समाराध्य त्रीँल्लोकान्स जयेत्सुधीः ॥
देववद्दिवि दीव्येत तेषां तोषं विवर्धयन्
bhūrlokaṃ jananī bhaktyā bhuvarlokaṃ tathā pituḥ ||
guroḥ śuśrūṣaṇāttadvatsvarlokaṃ ca jayetkṛtī
||76||भूर्लोकं जननी भक्त्या भुवर्लोकं तथा पितुः ॥
गुरोः शुश्रूषणात्तद्वत्स्वर्लोकं च जयेत्कृती
etadeva nṛṇāṃ proktaṃ puruṣārthacatuṣṭayam ||
yadeteṣāṃ hi saṃtoṣa upadharmonya ucyate
||77||एतदेव नृणां प्रोक्तं पुरुषार्थचतुष्टयम् ॥
यदेतेषां हि संतोष उपधर्मोन्य उच्यते
adhītya vedānvedau vā vedaṃ vāpi kramāddvijaḥ ||
apraskhaladbrahmacaryo gṛhāśramamathāśrayet
||78||अधीत्य वेदान्वेदौ वा वेदं वापि क्रमाद्द्विजः ॥
अप्रस्खलद्ब्रह्मचर्यो गृहाश्रममथाश्रयेत्
avipluta brahmacaryo viśveśānugrahādbhavet ||
anugrahaśca vaiśveśaḥ kāśīprāptikaraḥ paraḥ
||79||अविप्लुत ब्रह्मचर्यो विश्वेशानुग्रहाद्भवेत् ॥
अनुग्रहश्च वैश्वेशः काशीप्राप्तिकरः परः
kāśīprāptyā bhavejjñānaṃ jñānānnirvāṇamṛcchati ||
nirvāṇārthaṃ prayatno hi sadācārasya dhīmatām
||80||काशीप्राप्त्या भवेज्ज्ञानं ज्ञानान्निर्वाणमृच्छति ॥
निर्वाणार्थं प्रयत्नो हि सदाचारस्य धीमताम्
sadācāro gṛhe yadvanna tathāstyāśramāṃtare ||
vidyājātaṃ paṭhitvāṃte gṛhasthāśramamāśrayet
||81||सदाचारो गृहे यद्वन्न तथास्त्याश्रमांतरे ॥
विद्याजातं पठित्वांते गृहस्थाश्रममाश्रयेत्
gṛhāśramātparaṃ nāsti yadi patnīvaśaṃvadā ||
ānukūlyaṃ hi daṃpatyostrivargodaya hetave
||82||गृहाश्रमात्परं नास्ति यदि पत्नीवशंवदा ॥
आनुकूल्यं हि दंपत्योस्त्रिवर्गोदय हेतवे
ānukūlyaṃ kalatraṃ cettridivenāpi kiṃ tataḥ ||
prātikūlyaṃ kalatraṃ cennarakeṇāpi kiṃ tataḥ
||83||आनुकूल्यं कलत्रं चेत्त्रिदिवेनापि किं ततः ॥
प्रातिकूल्यं कलत्रं चेन्नरकेणापि किं ततः
gṛhāśramaḥ sukhārthāya bhāryāmūlaṃ ca tatsukham ||
sā ca bhāryā vinītāyā trivargo vinayo dhuvam
||84||गृहाश्रमः सुखार्थाय भार्यामूलं च तत्सुखम् ॥
सा च भार्या विनीताया त्रिवर्गो विनयो धुवम्
jalaukayopamīyaṃte pramadā maṃdabuddhibhiḥ ||
mṛgīdṛśāṃ jalaukānāṃ vicārānmahadataṃram
||85||जलौकयोपमीयंते प्रमदा मंदबुद्धिभिः ॥
मृगीदृशां जलौकानां विचारान्महदतंरम्
jalaukā kevalaṃ raktamādadānā tapasvinī ||
pramadā sarvadā datte cittaṃ vittaṃ balaṃ sukham
||86||जलौका केवलं रक्तमाददाना तपस्विनी ॥
प्रमदा सर्वदा दत्ते चित्तं वित्तं बलं सुखम्
dakṣā prajāvatī sādhvī priyavākca vaśaṃvadā ||
guṇairamībhiḥ saṃyuktā sā śrīḥ strīrūpadhāriṇī
||87||दक्षा प्रजावती साध्वी प्रियवाक्च वशंवदा ॥
गुणैरमीभिः संयुक्ता सा श्रीः स्त्रीरूपधारिणी
guroranujñayā snātvā vrataṃ vedaṃ samāpya ca ||
udvaheta tato bhāryāṃ savarṇāṃ sādhulakṣaṇām
||88||गुरोरनुज्ञया स्नात्वा व्रतं वेदं समाप्य च ॥
उद्वहेत ततो भार्यां सवर्णां साधुलक्षणाम्
jane tu rasagotrāyā māturyāpyasapiṃḍakā ||
dārakarmaṇi yogyā sā dvijānāṃ dharmavṛddhaye
||89||जने तु रसगोत्राया मातुर्याप्यसपिंडका ॥
दारकर्मणि योग्या सा द्विजानां धर्मवृद्धये
strīsaṃbaṃdhepyapasmāri kṣayi śvitri kulaṃ tyajet ||
abhiśastisamāyuktaṃ tathā kanyāprasūṃ tyajet
||90||स्त्रीसंबंधेप्यपस्मारि क्षयि श्वित्रि कुलं त्यजेत् ॥
अभिशस्तिसमायुक्तं तथा कन्याप्रसूं त्यजेत्
rogahīnāṃ bhrātṛmatīṃ svasmātkiṃcillaghīyasīm ||
udvaheta dvijo bhāryāṃ saumyāsyāṃ mṛdubhāṣiṇīm
||91||रोगहीनां भ्रातृमतीं स्वस्मात्किंचिल्लघीयसीम् ॥
उद्वहेत द्विजो भार्यां सौम्यास्यां मृदुभाषिणीम्
na parvatarkṣavṛkṣāhvāṃ na nadīsarpanāmikām ||
na pakṣyahipreṣyanāmnīṃ saumyākhyāmudvahetsudhīḥ
||92||न पर्वतर्क्षवृक्षाह्वां न नदीसर्पनामिकाम् ॥
न पक्ष्यहिप्रेष्यनाम्नीं सौम्याख्यामुद्वहेत्सुधीः
na cātiriktahīnāṃgīṃ nātidīrghāṃ na vā kṛśām ||
nālomikāṃ nātilomāṃ nāsnigdhasthūlamaulijām
||93||न चातिरिक्तहीनांगीं नातिदीर्घां न वा कृशाम् ॥
नालोमिकां नातिलोमां नास्निग्धस्थूलमौलिजाम्
mohātsamupayaccheta kulahīnāṃ na kanyakām ||
hīnopayamanādyāti saṃtānamapi hīnatām
||94||मोहात्समुपयच्छेत कुलहीनां न कन्यकाम् ॥
हीनोपयमनाद्याति संतानमपि हीनताम्
lakṣaṇāni parīkṣyādau tataḥ kanyāṃ samudvahet ||
sulakṣaṇā sadācārā patyurāyurvivardhayet
||95||लक्षणानि परीक्ष्यादौ ततः कन्यां समुद्वहेत् ॥
सुलक्षणा सदाचारा पत्युरायुर्विवर्धयेत्
brahmacāri samācāra iti te samudī ritaḥ ||
ghaṭodbhava prasaṃgena strīlakṣaṇamatha bruve
||96||ब्रह्मचारि समाचार इति ते समुदी रितः ॥
घटोद्भव प्रसंगेन स्त्रीलक्षणमथ ब्रुवे
iti śrī skāṃde mahāpurāṇa ekāśīti sāhasryāṃ saṃhitāyāṃ caturthe kāśīkhaṃḍe pūrvārddhe ṣaṭtriṃśattamo'dhyāyaḥ || 36 ||