pāramparikam
dhyānam
śaṅkhaṃ cakraṃ jalaukāṃ dadhadamṛtaghaṭaṃ cārudorbhiścaturbhiḥ
sūkṣmasvacchātihṛdyāṃśuka-parivilasanmaulimambhojanetram |
kālāmbhodojjvalāṅgaṃ kaṭitaṭavilasaccārūpītāmbarāḍhyaṃ
vande dhanvantariṃ taṃ nikhilagadavanaprauḍhadāvāgnilīlam ||
||1||stotram
dhanvantariḥ sudhāpūrṇakalaśāḍhyakaro hariḥ |
jarāmṛtitrastadevaprārthanāsādhakaḥ prabhuḥ ||
||2||nirvikalpo nissamāno mandasmitamukhāmbujaḥ |
āñjaneyaprāpitādriḥ pārśvasthavinatāsutaḥ ||
||3||nimagnamandaradharaḥ kūrmarūpī bṛhattanuḥ |
nīlakuñcitakeśāntaḥ paramādbhutarūpadhṛt ||
||4||kaṭākṣavīkṣaṇāśvastavāsukiḥ siṃhavikramaḥ |
smartṛhṛdrogaharaṇo mahāviṣṇvaṃśasambhavaḥ ||
||5||prekṣaṇīyotpalaśyāma āyurvedādhidaivatam |
bheṣajagrahaṇānehassmaraṇīyapadāmbujaḥ ||
||6||navayauvanasampannaḥ kirīṭānvitamastakaḥ |
nakrakuṇḍalasaṃśobhiśravaṇadvayaśaṣkuliḥ ||
||7||dīrghapīvaradordaṇḍaḥ kambugrīvo'mbujekṣaṇaḥ |
caturbhujaḥ śaṅkhadharaścakrahasto varapradaḥ ||
||8||sudhāpātroparilasadāmrapatralasatkaraḥ |
śatapadyāḍhyahastaśca kastūrītilakāñcitaḥ ||
||9||sukapolaḥ sunāsaśca sundarabhrūlatāñcitaḥ |
svaṅgulītalaśobhāḍhyo gūḍhajatrurmahāhanuḥ ||
||10||divyāṅgadalasadbāhuḥ keyūrapariśobhitaḥ |
vicitraratnakhacitavalayadvayaśobhitaḥ ||
||11||samollasatsujātāṃsaścāṅgulīyavibhūṣitaḥ |
sudhāgandharasāsvādamiladbhṛṅgamanoharaḥ ||
||12||lakṣmīsamarpitotphullakañjamālālasadgalaḥ |
lakṣmīśobhitavakṣasko vanamālāvirājitaḥ ||
||13||navaratnamaṇīkḷptahāraśobhitakandharaḥ |
hīranakṣatramālādiśobhārañjitadiṅmukhaḥ ||
||14||virajo'mbarasaṃvīto viśālorāḥ pṛthuśravāḥ |
nimnanābhiḥ sūkṣmamadhyaḥ sthūlajaṅgho nirañjanaḥ ||
||15||sulakṣaṇapadāṅguṣṭhaḥ sarvasāmudrikānvitaḥ |
alaktakāraktapādo mūrtimadvārdhipūjitaḥ ||
||16||sudhārthānyonyasaṃyudhyad devadaiteyasāntvanaḥ |
koṭimanmathasaṅkāśaḥ sarvāvayavasundaraḥ ||
||17||amṛtāsvādanodyuktadevasaṅghapariṣṭutaḥ |
puṣpavarṣaṇasaṃyuktagandharvakulasevitaḥ ||
||18||śaṅkhatūryamṛdaṅgādisuvāditrāpsarovṛtaḥ |
viṣvaksenādiyukpārśvaḥ sanakādimunistutaḥ ||
||19||sāścaryasasmitacaturmukhanetrasamīkṣitaḥ |
sāśaṅkasambhramaditidanuvaṃśyasamīḍitaḥ ||
||20||namanonmukhadevādimaulīratnalasatpadaḥ |
divyatejaḥpuñjarūpaḥ sarvadevahitotsukaḥ ||
||21||svanirgamakṣubdhadugdhavārāśirdundubhisvanaḥ |
gandharvagītāpadānaśravaṇotkamahāmanāḥ ||
||22||niṣkiñcanajanaprīto bhavasamprāptarogahṛt |
antarhitasudhāpātro mahātmā māyikāgraṇīḥ ||
||23||kṣaṇārdhamohinīrūpaḥ sarvastrīśubhalakṣaṇaḥ |
madamattebhagamanaḥ sarvalokavimohanaḥ ||
||24||sraṃsannīvīgranthibandhāsaktadivyakarāṅguliḥ |
ratnadarvīlasaddhasto devadaityavibhāgakṛt ||
||25||saṅkhyātadevatānyāso daityadānavavañcakaḥ |
devāmṛtapradātā ca pariveṣaṇahṛṣṭadhīḥ ||
||26||unmukhonmukhadaityendradantapaṅkitavibhājakaḥ |
puṣpavatsuvinirdiṣṭarāhurakṣaḥśiroharaḥ ||
||27||rāhuketugrahasthānapaścādgatividhāyakaḥ |
amṛtālābhanirviṇṇayudhyad devārisūdanaḥ ||
||28||garutmadvāhanārūḍhaḥ sarveśastotrasaṃyutaḥ |
svasvādhikārasantuṣṭaśakravahnyādipūjitaḥ ||
||29||mohinīdarśanāyātasthāṇucittavimohakaḥ |
śacīsvāhādidikpālapatnīmaṇḍalasannutaḥ ||
||30||vedāntavedyamahimā sarvalokaikarakṣakaḥ |
rājarājaprapūjyāṅghriścintitārthapradāyakaḥ ||
||31||dhanvantarerbhagavato nāmnāmaṣṭottaraṃ śatam |
yaḥ paṭhetsatataṃ bhaktyā nīrogaḥ sukhabhāgbhavet ||
||32||iti bṛhadbrahmānandopaniṣadāntargataṃ śrī-dhanvantaryaṣṭottaraśatanāmastotraṃ sampūrṇam