pāramparikam
dhyānam
sindūrāruṇakāntiminduvadanaṃ keyūrahārādibhiḥ
divyairābharaṇairvibhūṣitatanuṃ svargasya saukhyapradam |
ambhojābhayaśaktikukkuṭadharaṃ ratnāṅgarāgāṃśukaṃ
subrahmaṇyamupāsmahe praṇamatāṃ bhītipraṇāśodyatam ||
||1||stotram
viśvāmitrastu bhagavān kumāraṃ śaraṇaṃ gataḥ |
stavaṃ divyaṃ sampracakre mahāsenasya cāpi saḥ ||
||2||aṣṭottaraśatanāmnāṃ śṛṇu tvaṃ tāni phālguna |
japena yeṣāṃ pāpāni yānti jñānamavāpnuyāt ||
||3||tvaṃ brahmavādī tvaṃ brahmā brahmabrāhmaṇavatsalaḥ |
brahmaṇyo brahmadevaśca brahmado brahmasaṅgrahaḥ ||
||4||tvaṃ paraṃ paramaṃ tejo maṅgalānāṃ ca maṅgalam |
aprameyaguṇaścaiva mantrāṇāṃ mantrago bhavān ||
||5||tvaṃ sāvitrīmayo devaḥ sarvatraivāparājitaḥ |
mantraḥ sarvātmako devaḥ ṣaḍakṣaravatāṃ varaḥ ||
||6||gavāṃ putraḥ surārighnaḥ sambhavo bhavabhāvanaḥ |
pinākī śatruhā caiva kūṭaḥ skandaḥ surāgraṇīḥ ||
||7||dvādaśo bhūrbhuvo bhāvī bhuvaḥputro namaskṛtaḥ |
nāgarājaḥ sudharmātmā nākapṛṣṭhaḥ sanātanaḥ ||
||8||hemagarbho mahāgarbho jayaśca vijayeśvaraḥ |
tvaṃ kartā tvaṃ vidhātā ca nityo'nityo'rimardanaḥ ||
||9||mahāseno mahātejā vīrasenaścamūpatiḥ |
surasenaḥ surādhyakṣo bhīmaseno nirāmayaḥ ||
||10||śauriryadurmahātejā vīryavān satyavikramaḥ |
tejogarbho'suraripuḥ suramūrtiḥ surorjitaḥ ||
||11||kṛtajño varadaḥ satyaḥ śaraṇyaḥ sādhuvatsalaḥ |
suvrataḥ sūryasaṅkāśo vahnigarbho raṇotsukaḥ ||
||12||pippalī śīghrago raudrirgāṅgeyo ripudāraṇaḥ |
kārttikeyaḥ prabhuḥ kṣānto nīladaṃṣṭro mahāmanāḥ ||
||13||nigraho nigrahāṇāṃ ca netā tvaṃ daityasūdanaḥ |
pragrahaḥ paramānandaḥ krodhaghnastārako'cchidaḥ ||
||14||kukkuṭī bahulo vādī kāmado bhūrivardhanaḥ |
amogho'mṛtado hyagniḥ śatrughnaḥ sarvabodhanaḥ ||
||15||anagho hyamaraḥ śrīmānunnato hyagnisambhavaḥ |
piśācarājaḥ sūryābhaḥ śivātmā tvaṃ sanātanaḥ ||
||16||evaṃ sa sarvabhūtānāṃ saṃstutaḥ parameśvaraḥ |
nāmnāmaṣṭaśatenāyaṃ viśvāmitramaharṣiṇā ||
||17||prasannamūrtirāhedaṃ munīndra vriyatāmiti |
mama tvayā dvijaśreṣṭha stutireṣā vinirmitā ||
||18||bhaviṣyati manobhīṣṭaprāptaye prāṇināṃ bhuvi |
vivardhate kule lakṣmīstasya yaḥ prapaṭhedimam ||
||19||na rākṣasāḥ piśācā vā na bhūtāni na cā''padaḥ |
vighnakārīṇi tadgehe yatraivaṃ saṃstuvanti mām ||
||20||duḥsvapnaṃ na ca paśyetsa baddho mucyeta bandhanāt |
stavasyāsya prabhāveṇa divyabhāvaḥ pumānbhavet ||
||21||iti śrīskandamahāpurāṇe māheśvarakhaṇḍāntargate kumārikākhaṇḍe śrīkārttikeyāṣṭottaraśatanāmastotraṃ sampūrṇam